Laban Mungga: A Lu Ai Tara Lam Ni ( Pranwan Ladaw VI, C, 2022 )

Pranwan ladaw (6), C, 2022

Is 17:5-8     1Kor 15:12,16-20     Lk 6:17,20-26

A Lu Ai Tara Lam Ni

 Hkristu hta tsaw ra ai nu wa hpu nau ni e, ndai laban gaw Pranwan ladaw hta (6) ngu na laban rai nga ai.

Chyum Laika Sang Lang Ai Lam

Ndai laban na Kabu Gara Shiga gaw Yesu Madu bum ntsa kaw A Lu ai lam ni hte dingnye lu na lam ni hte seng ai tara mungga hpe hkaw tsun da ai lam rai nga ai. “A Lu ai lam ni” gaw shaman chyeju ni rai nga ai.

A Lu ai ni gaw (1) matsan mayan re ni, (2) kaw si hpang gara ai ni (3) Hkrap ngu hkrap ngoi ai ni (4) Masha ni n dawng n yawt ai majaw zingri zingrat hkrum ai ni rai ma ai.

Dingnye lu ai lam ni gaw (1) sut su ai ni, (2) hkru kat nga ai ni, (3) mani nga ai ni, (4) shakawn shagrau hkrum ai ni rai ma ai.

Ndai sharin shaga ai lam ni gaw San Luka laika hta mu lu ai Yesu Madu a sharin shaga tara mungga rai nga ai.

San Mahte gaw ndai San Luka tsun da ai Alu ai lam ni hta lai nna, kaga mali hpe mung ka shalawm da ai. (1) myit sum num ai ni, (2) matsan chye dum ai ni, (3) myit masin san seng ai ni, (4) Simsa lam hpe ra sharawng ai ni gaw Alu ma ai ngu tsun da ai. San Luka tsun da ai matsan re ai ni kaw wenyi lam hta matsan mayan re ai ni, bai kaw si hpang gara ai ni kaw dinghpring dingman lam hpe kaw si hpang gara ai ni, ngu San Mahte jat bang da ai hpe mung mu lu ga ai.

Yesu Madu Hkaw Tsun Ai Alu Ai Lam Hte Seng Ai  Tara Mungga hpe kaga kadai mung n hkaw tsun lai wa yu ai

Anhte ni hpe, “nang pyaw mayu a ni” ngu san yang “she pyaw mayu le” ngu htai na ni hkrai rai ga ai n rai ni?

Masha ni hpe kabu pyaw shangun ai jahpan galaw shangun ai rai yang, Ja gumhpaw, hkam ja lam, kun dinghku kata ngwi pyaw lam, shang gumhpaw nga ai bungli, lamu ga sun wang dum nta madu ai lam, masha man hta myiman pa ai lam ni zawn re ai ni hpe ka jahkrat dan na gaw malawng rai nga ai.

Madu Yesu gaw teng man kabau pyaw lam jaw ai lam ma-tsat (8) hpe tsun dan da ai.

Ndai zawn tsun ai wa gaw bawnu n gren ai wa ngu myit yang myit la lai wa na ma ai. Kadai mung matsan ai, hkrap ngu hkrap ngoi na, kaw si hpang gara na, zingri zingrat hkrum na n ra sharawng ai. Dai zawn hkrum sha ai ni a prat maka n tsawm ai ngu sha hkam la chye ga ai n rai ni?

Dai zawn myit la hkam la ai ni hpe mung mara n mai shagun ai. Masha n kau ni gaw Yesu a Alu ai lam ma-tsat (8) hpe manya ga (8) ngu pyi shamying jahprak lai wa ai ni nga lai wa ai. Ndai Alu ai lam (8) gaw makam masham a nhtoi hte rai yang she Alu ai Chyeju hpring ai lachyum rai nga ai. Mungkan shinggyim myi jut hku yu ai rai yang gaw Chyeju hpring ai Alu lam ni hte wa shakap shai rai nga ai.

Alu ai lam hte seng ai tara mungga hpe hkaw tsun ai hta, Tsun n ngu mayu ai lam ni

Ndai tara lam matsat (8) hte seng nna, makam masham ningra ai ni chye na shut chye nga ai.

Yesu Madu gaw galoi rai tim, matsan yang, hkrap ngu hkrap ngwi yang, kaw si hpang gara yang, zingri zingrat hkrum yang kaja ai ngu n tsun ai. Karai Kasang gaw shinggyim masha shagu hpe dai zawn mung n byin shangun mayu ai. Anhte shinggyim masha ni mahtang tinang shut hpyit mara a majaw hkam sha ra ai rai nga ai.

Yesu Madu gaw anhte shinggyim masha shagu hpe, mai byin ai made, matsan hku kaw nna shalawt ya mayu ai, shinggyim madang tsaw shangun ya mayu ai. Ndai kaw tsun mayu ai shinggyim madang tsaw ai ngu gaw Karai Kasang masat ai shinggyim madang rai nga ai.

Yesu Madu hkum nan mung, mungkan ntsa naw nga ten, kaw si hpang gara hkrum lai wa yu ai (Lk 4:3), rai ti mung, shi a mungga hpe madat hkam la ai ten kaw si hpang gara ai shawa masha ni hpe daw jau jahkru shakat ya ai (Lk 9:10-17).

Mungkan ntsa naw nga ten, Yesu Madu hkum nan,  yawn hkyen hkrum ai aten nga lai wa ai. Na-In mare na gaida num a kasha lasha si mat ai shaloi dai kanu hpe n-gun jaw ya ai hte si mat sai ma hpe mung jahkrung sharawt ya ai (Lk 7:14-15).

Yesu Madu kabu pyaw ai hte daw sha poi ni galaw lai wa ai. Anhte zawn sha mani sumsai rai lu sha lai wa ai. Lazaru a kana yan nau hte rau hku hku hkau hkau lu sha lai wa ai. Shi a matu ra mara galaw karum ya ai myu shayi ni law law hpe chyeju dum myit kaba hte hkap la lai wa ai (Lk 8:1-3).

Tsun mat sai lam ni hpe ginchyum dat bai tsun ga nga yang, ra kadawn ai lam ni n nga ai, kaw si hpang gara ai, matsan mayan re ai, zingri zingrat hkrum ai lam ni gaw Yesu Madu a matu mung anhte ni zawn sha, n kaja ai lam ni rai nga ai.

Yeremiah gaw anhte ni Alu ai lam hte seng ai tara ni hpe chye na na matu garum ya ai

Chyum daw langai hta, Myihtoi Yeremiah gaw maga mi de chyeju hte seng ai lam, maga mi de yubak hte seng ai lam ginhka tsun jahpra da ai. Shinggyim masha ni hpe madung da kam hpa ai ni gaw gawmai gawsha, shoi hpa lam hkrum na ra ai; Karai Kasang hpe madung da kam sham kam hpa ai ni gaw Alu ai chyeju hkam la lu na ra ai, ngu hkaw tsun da nga ai.

Shinggyim masha hpe kam hpa kam shamyat ai ngu ai gaw shinggyim myi hta byin mai ai ngu hkam la ai lam ni rai nga ai: tinang hkum hpe, gumhpraw hpe, madu lu da ai mungkan sutgan ni zawn re ai ni hpe kam myit kaba tawn da ai lam rai nga ai.

Yeremiah gaw shanhte zawn re ai ni hpe zaibru jang e tu ai, shingna n nga, n jaw ya lu ai nam sumwawm hte shabung da ai. Dai gaw ju ni hte hpring rai nna, makau kaw sa ai ni yawng hpe jam jau jaw chye ai rai nga ai.

Karai Kasang hta kam hpa kam shamyat ai ni gaw, tinang a gawng kya ai lam ni hpe dum shai nna Karai Kasang a hpung dagu atsam marai hte galoi mung awng dang lu ai. Shanhte gaw atsam kaba ai n hkru n kaja ai ni a zingri zingrat ai lam ni hpe chye na hkam jan lu ma ai. Karai Kasang shanhte hpe tsaw ra ai, makawp maga bau sin ya nga ai hpe kam sham ma ai.

Yeremiah gaw shanhte hpe mali hka makau e hkai shaprut da ai hpun ni zawn chyeju asak hte hpring ai, yawng hkum tsup ai ngu tsun da ai.

Shanhte gaw dai zawn re ai matsan, jam jau lam ni a lachyum hpe chye na da ma ai majaw kaja wa sha matsan mayan re ai ni hpe myit tau ya let karum shingtau ya na jing jing rai nga ma ai. Shanhte gaw hpu nau shada tsaw ra ai apu asi law law pu si shangun ma ai.

Matsan ai lam ngu ai gaw Karai Kasang hpe kam hpa kam shamyat ai hpe tsun ai

Kaja wa sha, matsan mayan re dum ai ni gaw, shanhte a myit hta nan, gawng kya ai hte shut hpyi mara lu dum ai, tinang madu da ai sutgan ni hte sha n hkum tsup ai ngu myit la ai; dai majaw hkum tsup ai Madu hpe kam hpa ai ni rai ma ai.

Shanhte madu da ai sak hkrung lam, kam ja lam, machye machyang, hpaji, ja sutgan  hte kaga amyu myu gaw tinang madu da ai n rai, Karai Kasang matsan dum ai hte jaw ya ai chyeju she rai nga ai hpe kabu gara let hkam la masat masa galaw ai matsan mayan ai ni rai ma ai.

Kaja wa sha matsan mayan ai lam hpe chye na hkap la ai ni gaw, masha kaga ni madu da ai sutgan arung arai ni hpe ra marin ai myit n rawng ai, manawn masham myit n rawng ai. Ra kadawn ai ni hpe garum shingtau ai hta mung jing jing rai nga ma ai.

Wenyi hta matsan mayan re ai ni gaw, tinang madu lu ai mahkra a matu Kari Kasang hpe chyeju dum chye ai. N madu da lu ai lam ni hpe lak lak jan jan rai ra marin ai myit mung n nga ai. Dai majaw tinang madu lu ai sutgan ni jashum kau ai shaloi raitim, Karai Kasang hpe sha kam sham kam hpa ding yang rai ma ai.

Wenyi hta teng sha matsan mayan re ai ni gaw ja, gumhpraw, hte sutgan su ai raitim, mai-aw hpun zawn kam hpa n mai ai. Mai-aw hpun gaw nbung bung ai maga kadang chye ai zawn, hten run loi nga ai. Matsan mayan re ai ni gaw Karai Kasang hta aten shagu kam hpa chye ma ai.

Wenyi hta matsan mayan re ai ni gaw tinang a hkye hkrang la lam hpe ja gumhpraw, sut gan hte mari la n lu ai hpe dum chye ai. Karai Kasang a tsaw ra matsan dum lama ai hte sha hkye hkrang la hkrum lu ai hpe mung dum chye ma ai.

Wenyi hta matsan mayan re ai ni gaw si hkrung si htan lam hpe n hkrit n tsang ma ai. Teng man myit malai let Karai Kasang a shingngyip npu kaw sak hkrung nga pra ai rai yang htani htana asak hpe teng sha madu lu na hpe kam sham ma ai.

Kaja wa sha, wenyi hta matsan mayan re ai hpe hkam sha lu na gaw n loi la nga ai. Prat tup sharin hkam la ra ai. Anhte hta nga ai Wenyi chyu sha anhte hpe, lani hte lani, wenyi hta matsan mayan lam hpe hkam la shangun lu ai.

Mungkan hta mu mada ai sutgan su ai lam hta matsan ai ni gaw Karai Kasang a ja mungdan de shang lu na mahkrun lam kaba langai rai nga ai

Yesu Madu, wenyi hta matsan mayan re ai ni gaw Alu ma ai, ngu tsun ai gaw Shi hta yaw shada lam nga nga ai. Sumsing mungdan madu lu na ma ai, ngu n tsun ai sha, sumsing mungdan madu lu ma ai, ngu Yesu Madu tsun ai gaw shanhte ni kaja wa sha sumsing mungdan hpe madu lu nga sai hpe tsun ai rai nga ai.

Hkristu hpe kam sham ai gaw prat hta matsan ai lam hpe lachyum nga shangun ai

Korintu na Hkristan ni gaw sharin shara langai mi e n jaw n ang ai hku sharin ya ai hkrum lai wa ma ai. Dai sharin shaga ai lam gaw, si ai wa gaw bai n hkrung sai ngu ai rai nga ai.

San Pawlu gaw dai shut shai ai sharin shaga ai hpe teng man ai sharin shaga lam hte lam bai shading la ya ai. Si ai ni bai n hkrung rawt sayang gaw, Hkristu mung bai hkrung rawt na n rai. Dai zawn Hkristu n hkrung rawt yang gaw anhte ni a makam masham gaw npawt nhpang n nga sai. Hkristan n re ai ni zawn mungkan pyaw hpa lam hta pyaw len hkawm yang gaw grau kaja na rai nga ai, ngu San Pawlu sang lang tsun jahpra dan da ai.

Akyu hpyi saga

Wa Karai Kasang e, wenyi hta matsan mayan ai ni, dinghpring dingman lam hpe kaw si hpang gara ai ni, hkrap ngu hkrap ngoi ai ni, zingri zingrat hkrum ai ni gaw Alu ma ai; myit sum nung shingdi ai ni, matsan chye dum ai ni, myit masin san seng ai ni, simsa lam hpe ra sharawng ai ni gaw Alu ma ai nga Nang Madu hkaw tsun da ai hte maren dai chyeju lam ni hta sak hkrung nga lu na atsam anhte hpe jaw ya rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra ai hkung ga ai kanu kawa Tara hkaw sara/num ni hte nu wa hpu nau ni e, ndai laban gaw Pranwan ladaw hta (6) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1)  Is 17:5-8    

Chyum Mungga Daw (2) 1Kor 15:12,16-20    

Kabu Gara Shiga Lk 6:17,20-26

Ndai Ja Chyum Mungga ni hpe hti nna hpawtni na nawku daw jau lamang ni hpe woi awn nga ga!