Laban Mungga -Kungla Shaman Poi, C, 2022

Kungla Shaman Poi, C, 2022

          Hkristu hta tsawra ai nu wa hpu nau ni e, ndai laban gaw Kungla shaman poi laban rai nga ai.

Yesu Madu Yerusalem mare de lauze kasha jawn nna shang wa ai lam Kabu Gara Shiga ndau ya ai hta na la lu saga ai. Daining na kungla shaman ten na chyum daw gaw Luka laika hta na rai nga ai.

Laning hte laning laklai ai mabyin hpe na lu ga ai. Ndai shaning hta mung San Luka gaw Hkristu hte Madu a prat hpe grau sung grau dam lada ai hku chye na la na Karai Kasang ra sharawng ai hte saw shaga nga ai lam tsun da ai.

1. Mabyin hta lawm ai ahkyak kri madun numhtet ga

Kabu Gara Chyum Laika mali hte kaw Yesu Madu Yerusalem mare de shang wa ai lam ka da ai. Mabyin masa lam ni yawng gaw Yesu Madu a prat daw dan shadan shadawng ai lam rai nga ai hpe anhte chye na lu ga ai.

Kabu Gara Shiga Chyum Laika mali hte jaw ai Kabu Gara Shiga gaw

(1) Shawng daw hta Yesu Madu gaw Shi kadai re ai hpe makau grupyin shawa masha ni hpe ndau ai lam hkum galaw na matu hkang da ai. Ya ndai aten kaw nna gaw shawa masha yawng hpe ndau ya na aten du sai rai nga ai. Yesu Madu gaw shinggyim masha yawng hpe sa du hkye hkrang la na mungkan ting a hkye la Madu Messaiah rai nga ai.

Nu Maria a hkritung hta e shinggyim hkum sa la ai ten kaw nna nan Madu gaw shinggyim masha ni hpe hkye la hpang sai rai nna, ya gaw shi a nni nkri hkam si hkam ai a marang e jahkum shatup ai rai nga ai.

Ndai gaw teng man ai lam ni a teng man ai lam rai nna si du hkra sakse hkam na re lam Pilatu hpe tsun lai wa ai (Yh 18:37).

(2) Masha ni Yuda ningbaw ni hpe n ra sharawng ma ai raitim, Madu gaw Messaiah hkyela Madu re lam ndau ma ai; ndai gaw Madu a ahkaw ahkang lam rai nga ai.

“Madu a mying nsang hte du sa ai hkawhkam wa hpe Karai Kasang shaman ya u ga law! Sumsing lamu e ngwi pyaw ai hte, tsaw htum ai shara e Karai Kasang a hpung shingkang rawng nga u ga law!, nga ma ai (Lk 19:38).

Hkristu Madu shangai wa na matu Lamu Kasa ndau shana ai hte maren sha rai nga ai hpe sumru la mai nga ai.

“Daini na nhtoi hta Hkye Hkrang La Ai Wa Hkristu ngu ai Madu gaw, David a mare e nanhte a matu shangai wa sai,” (Lk 2:11).

Yesu Madu a shangai wa ai gaw hkye hkrang la magam nnan hpang ai rai nna Shi a si hkam ai a marang e dai hpe hkum tsup shangun ai.

Yesu Madu gaw Myihtoi ni tau nau myihtoi hkaw tsun da ai Messaiah Hkyela Madu rai nga ai

Yesu Madu hkum nan kasa lahkawng hpe shangun dat nna lajang da ai Lauze kasha gaw Myihtoi kaji ngu masat shamying ai Zakhariah a myihtoi ga dik wa na matu rai nga ai.

“Myihtoi gaw, Ziun mare hpe tsun mu: Yu u, nanhte a hkawhkam wa gaw nanhte hpang de du sa wa ra ai! Shi gaw shagrit shanem ai myit hte, lawze kanu a kasha ntsa e jawn nga ai, nga ai (Mt 21:5; Zakhariah 9:9).

San Pawlu Korintu hpung masha ni hpang de shagun dat ai laika hta, “Hkristu gaw Karai Kasang a ga ndat ni yawng a matu, ‘re ai’ ngu ai mahtai rai nga ai, ngu ka da ai (2Kor 1:20).

1. Yerusalem mare de shang wa ai shaloi na Yesu Madu myit sumru ai lam

Kabu Gara Shiga Chyum Laika mali hte gaw Yesu Madu Yerusalem mare de shang wa ai lam lawm ai raitim, langai hte langai kachyi kajaw shai hkat ai lam ni nga ai hpe gaw mu lu ga ai.

Ndai zawn shai hkat mat ai mabyin masa gaw chyum laika sara langai hpra shanhte madung ahkyak da ai Hkristan hpung masha wuhpung wuhpawng a ra kadawn ra sharawng, chye na hkawn hkrang na lam ni hpe madung da ai a majaw rai nga ai.

San Luka gaw laklai ai lam hpe madi madun da ai. Dai gaw, mung shawa masha ni a myit sumru ai lam hte Yerusalem mare de shang wa ai Yesu Madu a myit sumru ai lam yan a n bung pre ai lam ni rai nga ai.

Shawa masha ni a matu ahkyak ai gaw Messaiah Hkyela Madu du sa wa sai majaw kabu pyaw n ma rai nga ai. Shanhte gaw gade nna yang Messaiah Madu hpung dagu madun shana re ngu myit mada nga ma ai. Shanhte a mungdan hpe zing la up hkang nga ai Tara maigan Roma myusha ni hpe gawt shapraw kau nna David a mungdan hpe atsawm hkrak ngut kre ai du hkra gaw gap na ra ai ngu myit kam, myit mada nga ma ai.

Kasa ni mung n htum n wai kabu pyaw ma ai. Shanhte a sara gaw lai wa sai aten ni hta chyahkring hkring tsun ai, nni nkri, matsan jam jau lam hte si hkam na lam n tsun mat sai majaw shanhte a myit mada ai lam hte Yesu Madu a myit yaw shada ai gaw langai sha rai na sai ngu myit la hkam la nga ma ai. Shanhte a ra sharawng ai lam ni mung myit htum hpa n tai na n rai sai ngu shadu da ma ai.

Dai aten na shanhte myit sumru ai lam ni gaw Yesu Madu a myit dating da ai lam ni hte wa shakap shai rai nga ai, grai nan n bung nga ai. Yesu Madu gaw moi prat, ya prat, hpang prat hta myit ai lam gaw langai sha rai nga ai, maren sha rai nga ai. Yesu Madu gaw mungkan ting a hkye hkrang la lam matu gara hku ap nawng daw jau na raitim, hpring tsup hkum tsup wa ra ai ngu myit daw dan da ai.

Raitim, Yesu Madu a masin salum hta ali ahti re ai lam langai nga nga ai. Dai gaw, masha nkau ni Yesu Madu shawang myit kaba hte ta ladawn ya ai hkye hkrang la lam hpe ninghkap ma ai majaw shanhte a wenyi jasum na hpe rai nga ai.

Ndai zawn wenyi jasum kau na masha law na, n law na gaw, Yesu Madu a matu ahkyak n rai nga ai; wenyi langai mat mat ai rai yang nan, Yesu Madu a myipri hkrat na teng sha rai nga ai.

Yesu Madu Yerusalem mare hten run na lam hpe mu mada ai shaloi, hkrap lai wa ai (Lk 19:41). Madu da ai hkikhkam ai dum nta, htingnu ni hte arung arai hten run jang yawn hpa kaba rai nga ai; rai ti mung, Karai Kasang a matsan dum lama ai tsaw ra myit hpe ninghkap ai wa langai a hkrat sum lam hte shingdaw dat yang, shingdaw n lu rai nga ai.

1. Hkristu gaw anhte a myit masin san seng ai hte ap jaw ai lam yawng hpe hkap la nna anhte hpe hkye la ai.

Yesu Madu gaw mat mat na masha nga na hpe chye ai raitim, shawa masha ni a shakawn shagrau awlaw ai hpe hkap la lai wa ai. Shakawn shagrau awlaw ai lam hta ra rawng gawng kya ai lam nga na raitim, san seng myit hte re majaw Yesu Madu hkap la lai wa ai rai nga ai.

Yesu Madu kasa lahkawng hpe lawze tam shangun ai shaloi, “Madu dai hpe ra ai da” ngu tsun shangun ai. Matut nna mung, si mani ai ga hte, “Madu dai hpe lang ngut jang bai shabai ya na da” ngu tsun shangun ai (Mt 21:3).

Yesu Madu gaw lawze madu hpe garum hpyi lai wa ai. Dai zawn sha anhte langai hpra hpe mung lam amyu myu hku kahtap kahtap nna garum hpyi nga ai. “Madu ra sharawng ai”.

Yesu Madu anhte kaw na kaning re ai garum shingtau lam hpe hpyi ai rai?

Anhte hta rawng nga ai wenyi gaw ra kadawn ai garum shingtau lam amyu hpan hpa re ai gaw anhte hpe chye shangun ai. Hpa hpe, hpa lam hta, ngu ai lam ni gaw ahkyak madung n re ai sha, law malawng gaw Madu a malai kaga masha ni hpe garum ya na matu hpyi ai rai nga ai. Kade daram wa kaji ai lam raitim, grai wa n ahkyak ai lam raitim, hkye hkrang la lam a matu Madu gaw shani shagu anhte kaw na garum hpyi nga ai.

 Anhte mung Madu a garum hpyi ai hpe hkap la lu ai, nyet kau lu ai shawng lawt ai ahkaw ahkang nga ai. Dai ahkaw ahkang hpe mung Shi Madu sha jaw da ai rai nga ai.

Rai ti mung, anhte lata la ai hta hkan nna byin wa na hpe hkam la na gaw anhte a lit rai nga ai. Madu hpe garum ai gaw anhte hkye hkrang la hkrum lu na rai nga ai. Ninghkap ai rai yang Madu a matsan dum lama ai hpe anhte hkum nan chyinghka la pat shingdang da ai majaw anhte a hkye hkrang la lam hpe mung anhte hkum nan shingdang kau ai tai nga ai.

Anhte dum chye nna myit kam ra na gaw, Yesu Madu hpe akyu jaw ai hku ap nawng lam shagu hta anhte ni akyu chyeju bai lu na rai nga ai; Shi hkum nan anhte hpe chyeju kumhpa shagrau ya na ra ai.

Ndai chyoi pra ai laban bat magam laman hta “Yesu Madu ngai kaw na hpa hpe ra sharawng nga ai kun,” ngu aten shagu san ra ga ai. Madu hpyi ai lam yawng hpe kabu gara myit hte lawan dik bai jaw ra ga ai. Anhte kade kaba ai hpe kade lawan ai hku shawang myit hte jaw ga ai raitim, shi kaw na anhte bai lu na chyeju kumhpa hta grau na gaw n rai nga ai. Karai Kasang a chyeju kumhpa hta kaba grau ai gara kaw mung n nga ai; shi hta lai nna kaga kadai kaw nna mung n lu mai ai.

Akyu hpyi saga

Wa Karai Kasang e, Hkyela Madu Messaiah hpe kabu gara hkap tau hkap hkalum la let shi a myit ra ai hta hkawm sa lu na atsam anhte hta jaw bang ya rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra ai hkung ga ai Tara hkaw sara/num ni hte nu wa hpu nau ni e, ndai laban gaw Kungla shaman poi laban rai nga ai.

Hti ang ai Ja Chyum Mungga ni gaw

Kungla shaman ten Lk 19:28-40

Chyum Mungga Daw (1) Is 50:4-7/ Hpil 2:6-11

Chyum Mungga Daw (2) Phi 2:6-11

Kabu Gara Shiga Lk 22:14-23:59/ Lk 23:1-49

Ndai Ja Chyum Mungga ni hpe hti nna, hpawt ni na nawku dawjau lamang ni hpe woi awn nga ga.