Laban Mungga - Hkristu Hta Kam Sham Ai Lam, Lu Sha Gam Ladaw Laban II , 2, 2022

Lusha Gam Ladaw (2), 2, 2022

Hkristu Hta Kam Sham Ai Lam

Np.Nhp 15:5-12, 17-18   Hpi 34:17-4:1    Lk 9:28-36

Hkristu hta tsaw ra ai nu wa hpu nau ni e, ndai laban gaw Lusha Gam Ladaw hta (2) ngu na laban rai nga ai.

Chyum Laika Sang Lang Daw

Lai wa sai laban hta ndai lusha gam ladaw gaw mara ni hpe koi yan kau nna Karai Kasang hpang de bai htang wa na hte ga sadi bai hkam na ladaw rai sai lam sang lang da ai.

Hkristan masha a matu gaw ndai ladaw hta ndai bai wa ai wa ngu tsun ma ai. Anhte a hkristan prat ting hpe Hkristu lam woi ya nga ai.

Ndai laban gaw anhte Hkristan ni a makam masham hte sumsing mungdan de dingbai dingna n hkrum ai sha shim lum ai hku du lu ai.

Chyum daw langai hta Abraham gaw anhte a matu makam masham hpe kasi tai madun dan da ai. Karai Kasang shi hpe shaga hpang ai kaw nna kamsham myit kaba hte hkap la nna sawng la ai chyam dinglik ai lam ni hpe hkrum lai wa ai raitim, galoi mung n htingnut mat ai.

Chyum mungga daw lahkawng gaw Hkristu hta kam sham ai ni kaw sadi dung ai lam nga ra ai lam tsun da ai. Anhte a lapran kahkyin gumdin lam nga ai gaw sadi dung ai a apu asi lami laman langai rai nga ai. Hkristu hta sadi dung ai ni gaw galoi mung myit n dik ai lam nga na n rai. Shi a hpang hkan ai a majaw malai lu na n rai.

Kabu Gara shiga gaw Yesu Madu a ahpraw nsam galai ai hpe madun dan nna Karai kasang chyu sha anhte a makam masham hpe hting hkang da lu ai wa re ai hpe chye na shangun ai.

Karai Kasang gaw Shi hte Abraham lapran tawn da na ga shaka hpe Abraham a “ai n kam, myit um-ang ai lam” hpe shaprai kau ya ai

Abraham asak 75 aten Karai Kasang shi hpe shaga la ai gaw mauhpa re ngu tsun mai nga ai. Dai asak aprat hpe madu da lu ai ni gaw law malawng sut su ai wa, shu mashi shu masha law law a kachyum, hkying mun seng re ai sagu, bainam, hte dusat dumyen madu lu ai wa rai nga ai.

Abraham gaw Shi a mungdan hte sut gan, myusha ni hpe kau da nna deng hkying mun hku tsan ai shara de htawt nga shangun hkrum ai. Abraham mung shi a madu jan Sara hpe woi la nna Madu Karai hkang dat ai hte maren sa wa ai (Np.Nhp 12:4).

Karai kasang ga sadi tawn da ai Hkanan mare de, Abraham a myusha bawsang ni, sagu, bainam dusat dumyen ni hte rau, du wa ai shaloi Abraham hta grau ai myu sha n-gun hte sutgan ni hpe madu da lu sai rai ma ai.

Abraham a makam hpe shangang shakang na matu ga sadi lahkawng hpe bai matut jaw da ai. (1) Shi du ai shara gaw shi a myusha ni a matu rai na, (2) shi asak kaba sai raitim, shi a madu jan Sara hta kasha langai shaprat ya na ga sadi lahkawng rai nga ai.

Abraham a makam hpe shangang shakang ai na matu dai ten na masha ni a htung lai hte maren ga sadi/ ga shaka tawn da ai hpe lamang hte galaw shangun lai wa ai.

Ga sadi hkam ga shaka tawn ai shaloi buga masha ni gaw dusat langai, shing n rai, law law hpe sat nna daw lahkawng karan man hkrum tawn da ai. Shana daw maga de du wa jang, Yaweh Karai Kasang gaw wan shinglet zawn dan pru wa nna chyen mi maga na ntsa hkru hkawm mat ai. Hkungga hpe hkap la ya ai lachyum rai nga ai. Ndai masa hku Abraham a makam hpe shangang shakang ya ai rai nga ai.

Karai Kasang ga sadi hpe matut galaw ai. “Dai Elieza ngu ai mayam wa gaw, na sut gan Sali wunli hpe dagraw la lu na ra ai n rai; na a shadang sha nan na a Sali wunli hpe madu lu na ra ai ngu nna shi hpe tsun ai,” (Np.Nhp 15:4). “Dai hpang dai Madu gaw abraham hte ga shaka tawn da nu ai. Shi gaw Egutu mung a ga jarit kaw nna Uhprat hka nu du hkra dam ai lamu ga yawng hte Keni Kenizi,Kadmoni, Heti, Hperizi, Rehpin, Arori, Hkanani, Girgashi hte Yebusi masha ni nga ai mung ni lawm hkra, na a amyu matu ni hpe jaw na matu, ngai ga sadi tawn da se ai nga nna tsun wu ai” (Np.Nhp 15:18).

Asak kung mashi magaw ten hta ga sadi hkam ai a marang Karai Kasang shi a ntsa tsawn da ai makam hpe sharawng awng nna chyam dinglik hkrum shagu makawp maga hkye la na re lam madun dan ai ga sadi mung rai nga ai.

Gade nna yang Isak hpe shangai shaprat la lu ma ai. Isak a kasha, Esau hte Yaku hta na Yaku a kasha 12 gaw Israel myu lakung 12 a kawa ni tai wa ma ai.

Abraham mung makam masham a kawa ngu shaga shamying hkrum nu ai.

Hkristan langai a sak prat hta kam sham ai lam ganing rai ra ai hpe chye na na matu bum ntsa ahpraw nsam galai ai a marang e shadan shalen ya ai

San Mahte, San Marku, San Luka, Chyum Laika sara masum hte gaw Yesu Madu bum ntsa ahpraw nsam galai ai lam hpe azing ayang tsun da ma ai (Mt 17:1-9; Mk 9:2-11; Lk 9:28-36). Yesu Madu a ahkyak dik mabyin, kasa ni hte anhte a matu ahkyak dik ai mabyin rai nga ai.

Hkristu hta kam sham ai a marang e Hkristan sak prat a matu n-gun atsam daju rai nga ai.

San Luka laika hta gaw ndai mabyin hpe “Yesu Madu akyu hpyi nga yang” ngu ai mabyin hte hpang ai (Lk 9:29). Yesu Madu hpa lam a matu akyu hpyi ai kun? Yerusalem mare hta gade nna yang nni nkri hkam si hkam na ahkying du magang sai aten mung rai nga ai. Shi a nni nkri hkam si hkam na lam hpe sumru nga na nhten.

Kawa Karai Kasang mung Yesu Madu hpe tsaw ra ai lam myit um ang shara n nga matu n-gun jaw nga na re. “Ngai tsaw ra ai kasha rai nga ai” ngu anhte hpe shachyan da ya sai rai nga ai.

Yesu Madu, Mawshe hte Eliah hpe, Yerusalem mare hta byin na ra ai Shi a si hkam na lam hte seng nna tsun dan ai gaw Kawa Karai Kasang gaw mungkan ga hpe hkye hkrang la na masin hte  Shi a nni nkri hkam, si hkam na lam a hpring tsup ai chyeju lam hpe mung ahkyak da myit aru nga ai rai nga ai.

Kawa Karai Kasang a yaw sin ai lam hpe chye ai Yesu Madu gaw n hpang hkrat ai sha, n hting nut mat ai sha, nni nkri hkam si hkam na lam hta hkawm sa ai rai nga ai. “Yerusalem mare de sa wa na matu myit daw dan na wu ai,” ngu San Luka madi madun da ai (Lk 9:51).

Karai Kasang a yaw shada ai hte maren ahpraw nsam galai ai gaw Yesu Madu hta kasa ni a kam sham myit hpe jat ya na matu, shangang shakang ya na matu rai nga ai.

“Kasa ni yawng a malai San Petru gaw Yesu hpe “Messaiah” hkyela Madu ngu yin la ai hte sakse mung hkam ai (Lk 9:18-21).

Bum ntsa ahpraw nsam galai ai shaloi, Petru hpe Yesu Madu a matu myit sharawng shara ai myit hte jahpring ya ai.

“Madu e, ndai yang e anhte nga na grai mai nga ai,” (Lk 9:33).

Yesu Madu a nni nkri hkam si hkam na lam, masum lang tup tau nau shana da ai gaw Petru hte sape ni a matu hkrit kajawng hpa rai lai wa ai. Messaiah Madu hkum nan nni nkri hkam si hkam na ngu ai hte seng nna sumru shagu n chye na rai nga ma ai; sumru mung n kam sumru ma ai; san mung n san gwi rai ma ai (Lk 9:45).

Yesu Madu a ahpraw nsam galai ai hpe mu ai kasa ni gaw makam jat wa nna Madu hpe daw jau na, sak jaw na atsam marai bai lu la ma ai.

Hkristu hta kam sham ai gaw anhte prat a nhtoi rai nga ai.

“Hpa majaw nga yang, dai gaw nanhte a myit masin ni hta htoi leng wa nna, nhtoi gintawng pru wa ai aten du hkra, nsin sin ai shara hta htoi tu nga ai pyengdin zawn rai nga ai,” (2Pt 1:19).

Hkristu hta kam sham ai gaw anhte prat hta kabu pyaw lam hpe jaw ya ai.

“Nye a kabu gara ai myit nanhte hta rawng nga na hte, nanhte a kabu gara ai gaw hpring tup wa na matu ga ndai ngai nanhte hpe tsun da ngut chyalu rai sai,” (Yh 15:11).

“Nanhte a kraw lawang ni hta kabu gara ai hte hpring na ra ai; dai nanhte a kabu gara ai hpe nanhte kaw na kadai mung kashun la ya lu sana n rai,” (Yh 16:22).

Yawhan 15:9-12 hta na chyum daw hpe ginchyum dat yang “langai hte langai tsaw ra nna, Yesu Madu a kabu pyaw ai hta shang lawm na matu” rai nga ai.

Kam sham myit n rawng ai ni a hten run na lam

Hkristu hta n kam n sham ai sha sak hkrung nga ai wa a matu myit n pyaw hpa rai nga ai. Hkristu hpe garai n chye shi a ni a matu, myit n pyaw shara rai nga ai. Makam masham hpe jasum kau ai wa a matu gaw grau nna myit n pyaw hpa rai nga ai. Chye nga ningleng Hkristu hpe n kam n sham ai ni a matu gaw tsang shara kaba nan rai nga ai.

“Ndai lam shawng de ngai nanhte hpe law law lang tsun dan yu ni ai. Ya mung myi prwi hte kahtap nna tsun dan nga nngai. Wudang ntsa e Hkristu a si hkam ai lam hpe hpyen tai nna asak hkrung ai masha law law nga nga ma ai,” (Hpil 3:18).

Makam masham n nga ai ni gaw myi kraw hte bung ai. Shi sak hkrung ten mara langai ngut ai hpang langai kahtap kahtap shut ai raitim, myit malai lu ai lam n nga ai; mara dat hkyam sa hpe mung n hkap la ai majaw gaw dai mara hta hten run mat na rai nga ai.

Shanhte zawn re ai masha ni gaw tinang a prat hpe shut shai ai hku hkam la chye ma ai. Sari manu n nga ai hpe manu shadan shut ma ai. Wenyi lam hte seng ai manu dan ai lam hpe myit n lawm ma ai. Makam masham n nga ai ni gaw kabu pyaw lam hpe n mu lu ai shara ni hta tam chye ma ai. Shanhte a matu kan hkru na hte n hkru n kaja ai mungkan pyaw hpa lam hpe Karai Kasang zawn nawn ma ai. Mungkan pyaw hpa lam gaw shanhte a matu kaya kahpa lam re ai ngu n myit la ai sha, pyi she arawng la ma ai (Hpil 3:19).

San Pawlu gaw Makam masham nga ai ni hpe “ngai a kabu pyaw lam hte kumhpa” ngu shagrau sha-a da nga ai (Hpil 4:1)

Akyu hpyi saga

Ding man ai Karai Wa e, nang gaw shut n chye, masu n chye ai majaw, nang tsun ai mungga nga manga hpe ngai kam sham nngai, na a nawku hpung sharin ya ai lam ni hpe mung myit jung nna kam sham nngai law.  Amen.

Hkristu hta tsawra  hkungga ai kanu kawa, Tara Hkaw Sara/num ni hte nu wa hpu nau ni e, ndai laban gaw Lusha Gam Ladaw hta (2) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) Ningpawt Ninghpang 15:5-12, 17-18

Chyum Mungga Daw (2) Hpi 34:17-4:1

Kabu Gara Shiga   Lk 9:28-36

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.

 

Add new comment

19 + 0 =