Laban Mungga: Hkristu A Hkye Hkrang La Magam hta masha hkum shagu shang lawm na matu saw shaga nga ai (Pranwan Ladaw 4, C)

Pranwan ladaw (4), C, 2022

Yer 1:4-5,17,19         1Kor 12:31-13:13      Lk 4:21-30

Hkristu a hkye hkrang la magam hta anhte marai hkum shagu hpe mung shang lawm na matu saw shaga nga ai

          Hkristu hta tsaw ra ai nu wa hpu nau ni e, ndai laban gaw Pranwan ladaw hta (4) ngu na laban rai nga ai.

Chyum Laika Sang Lang Ai Lam

Chyum Laika labau hpe sawk sagawn yu yang, Karai Kasang gaw shi a hkye hkrang la magam a matu shi amyu sha ni hta na masha ni hpe lata la nna laksan re ai lit magam langai hpra gun shangun lai wa ai hpe mu lu na ga ai. Abraham, Mawshe, Myihtoi ni, Nu Maria, Yawhan Baptista, kasa ni gaw Karai Kasang lata la ai ni hta na nkau ni rai ma ai.

Karai Kasang gaw shi a myusha ni ngu shamying ga shaka tawn da ai Israel myusha ni hte rau mungkan masha yawng hpe mung Shi a hkye hkrang la magam hta shalawm lit gun hpai na matu saw shaga nga ai hpe Nawku Hpung gaw anhte hpe sumru chye na shangun mayu nga ai.

Karai Kasang gaw anhte ni sak hkrung lu na matu hte Hkristu hpe kam sham lu na matu, langai hte langai a ntsa, Hkristan prat hta kaga masha ni hpe n ap jaw da ai lit magam ni anhte langai hpra a matu san da ya ai, anhte langai hpra hpe ap jaw da ai.

Anhte garai n shangai shi ai aten kaw nna nan ndai lit magam ni hpe san da ya sai, lajang da ya sai rai nga ai. Karai Kasang ap jaw da ai ndai lit magam ni hpe shani shagu na sak hkrung prat hta anhte ni gun hpai nga ra ai. Dai lit magam gun hpai lu na ra kadawn ai atsam marai Shi hkum nan garum jaw ya nga ai.

Karai Kasang ap jaw da ai lit magam hpe n hkap la ai aten ni mung nga chye ga ai. Dai zawn byin wa na hpe mung Karai Kasang tau chye da chyalu rai nga ai. Anhte hpe lam amyu myu hku ladat amyu myu hte garum shingtau ya na mahkrun lam hpe mung lajang da sai. Garum ya na matu mung ga sadi jaw da sai rai nga ai. Anhte a lit magam gaw Karai Kasang hte galoi mung ni ni htep htep nga ra ai rai nga ai.

Myihtoi tai na matu Yeremiah hpe shaga la ai lam

Karai Kasang Yeremiah hpe shaga la ai aten Yeremiah a asak gaw hkun (20) ning rai nna ramma prat hta rai nga ai. Shi gaw Yuda hkingjawng langai a kasha rai nga ai. Yerusalem hte kilometer loi sha tsan ai Anathoth mare na rai nga ai.

Karai Kasang gaw Yeremiah n shangai shi ai aten kaw nna nan shi hpe lata da sai lam, Karai Kasang shi hpe tsaw ra ai majaw lata la ai re lam hkrak tsun da ai. “Nang hpe chye ai” ngu ai ga si a lachyum gaw “nang hpe lakawn let lata da ai” ngu ai rai nga ai.

Shi hpe shangun ai lit magam hpe hkrak n galaw lu na re ngu myit la hkam la let Yeremiah n hkap la na matu shakut lai wa yu ai. “Tsaw htum ai Madu e, ngai gaw nau naw kaji nga nngai majaw kaning ngu shaga na n chye nngai,” (Yer 1:6).

Raitim, Karai Kasang shi hpe matu n-gun jaw ai. Ngai nang hpe tsun shaga na matu hkang dat ai lam shagu shanhte hpe tsun na rai ndai; Na a makau hta ngai galoi mung nga nga na nngai, ngu n-gun jaw ai (Yer 1:7-8).

“Ngai gaw nang hpe jasan jaseng ya nna masha amyu baw ni a matu Myihtoi dang da na nngai,” (Yer 1:5).

Yeremiah hpe masha ni ninghkap na ma ai lam hte asawng asang di na ma ai lam hpe mung Karai Kasang shi hpe tau nau tsun shadum da ai. Shangun dat hkrum ai hta ntsa lam masha ni mu mada ai hta gaw awng dang lam n nga ai zawn rai nga ai.

Hkawhkam hte rau makam hpung woi ni, masha yawng mayawng shi hpe n hkap la ma ai, ninghkap lai wa ma ai. Shi hpe tara hta tara jeyang, hkyuk htawng sharawng ma ai. Shi a buga hte tsan dik ai kaga mungdan Egyip mungdan hta sak hkrum ai rai nga ai.

Yeremiah gaw Karai Kasang ap jaw da ai magam lit kaw nna hprawng yan mat na matu kalang n-ga shakut lai wa yu ai. “Ngai gaw dai Madu hpe malap kau na nngai; Shi a mying hta mahta nna galoi mung n shaga na ni ai, ngu nna tsun ai shaloi, na a mungga gaw nye a myit masin kata hta wan zawn hkru nga li ai.” (Yer 20:9). Lit magam kaw nna koi yan na grai lang galaw yu tim, Shi hta sadi dung let shi a lit magam hpe matut gun hpai ai hpe mu lu ai.

San Pawlu hkrum lai wa ai Karai Kasang a shaga la ai lam

San Pawlu hta mung Yeremiah hkrum lai wa yu ai zawn hkrum lai wa ai. Yeremiah zawn hkrum sha nga ai hpe shi dum na masa hta nga ai. Shi a shagun laika hta Yeremiah tsun ai hta jai lang ai ga si ni hpe bai jai lang da ai hpe mu lu ga ai. “Nye nu na hkritung nna ngai garai n shangai yang Karai Kasang gaw shi a chyeju hte ngai hpe lata la nna shi hpe daw jau na matu shaga la ni ai, ngu shi a shaga la hkrum ai lam hpe tsun dan da ai (Gal 1:15).

Kaja wa nan mung, Yeremiah zawn sha lata la hkrum lai wa ai. “Kaning rai nme law, mungkan ting hpe hkye hkrang la ai lam lu la mu ga, ngai nang hpe maigan amyu ni a matu nthoi shatai sade ai, nga ai gaw dai Madu anhte hpe hkang da ai ga rai nga ai, ngu San Pawlu tsun da ai (Kasa 13:47).

San Pawlu gaw Yeremiah zawn sha, mungdan daru magam lu ai ni, Yuda salang ni, grau shawng ai gaw Hkristan ni hkum nan shi hpe lam amyu myu hku ninghkap lai wa ma ai. Shi a sasana hkrun lam hta hkrum sa lai wa ai nni nkri lam ni hpe mau hpa tsun dan da ai hpe 2Kor 11:22-29 hta mu lu ga ai.

Yesu a shaga la hkrum ai lam

Kawa Karai Kasang gaw Nu Maria a hkritung hta na-um na-sin n byin shi ai aten kaw nna Yesu Hpe chye da sai. Shawng daw de tsun lai wa saga ai hte maren, “chye ai” ngu ai gaw tsaw ra ai lam, lata la ai lam, madu lu ai lam, pawng hpawng ai lam ni hte mreng sha rai nga ai.

Kawa Karai Kasang gaw Yesu Madu hpe ndai zawn re ai masa hte tsaw ra ai majaw, Yawdan hka hta kashin kamun hkam ai shaloi, bai, bum ntsa hta ahpraw nsam galai ai shaloi ni hta tsun shapraw shadan shalen dan ai.

“Nang gaw ngai tsaw ra ai Kasha rai nga ndai,” (Lk 3:22).

“Ndai wa gaw ngai sha, ngai lata la ai wa rai nga ai, shi a ga madat mara mu,” (Lk 9:35).

Kawa Karai Kasang gaw Yesu Madu hpe Shi a myusha ni a matu kabu gara shiga hkaw tsun na ahkaw ahkang ap jaw ya da ai. Dai kabu gara shiga gaw, Karai Kasang nanhte hpe tsaw ra ai, Shut hpyit mara hpe kau da nna Madu hpang de lawan gayin wa mu, Nanhte yawng hpe Madu hte rau sumsing mungdan hta rau nga nga shangun mayu ai, ngu ai rai nga ai.

“Tsaw htum ai dai Madu gaw ngai hpe shi a Wenyi hte jahpring ya ni ai. Matsan mayan ni hpang de kabu gara shiga gun sa na matu mung, myit daw mat sai ni hpe shamai shatsai ya na matu mung, bawng dung ai ni hpe raw dat na matu mung, htawng hta shareng da hkrum ai ni hpe shalawt dat na matu mung, Shi ngai hpe lata la nna shangun dat nu ai,” (Is 61:1). Myihtoi Isaiah a myihtoi ga ndai gaw Kawa Karai Kasang e Yesu Mdu hpe a lata la ai lam rai nga ai.

Hkristan masha anhte ni a shaga la hkrum ai lam hpe Yeremiah, San Pawlu, grau nna, Yesu Madu a shaga la hkrum ai lam hte shabung ai lam

Anhte gaw anhte hte rau nga ai ni yawng a matu kabu gara shiga gun sa ya ai ni tai nga ra ga ai. Dai kabu gara shiga hpe hkrak gun sa ya lu ai lam langai sha nga ai. Dai gaw, teng man Hkristan sak prat hte sak hkrung nga na lam rai nga ai. Shing n rai yang gaw, shut shai ai shiga gun ai ni sha tai na ga ai.

“Kaja wa Hkristu Yesu hta asak hkrung nna tara hkunga ai lam hta asak hkrung mayu ai wa kadai mung zingri zingrat ai hkrum na ra ai,” ngu San Pawlu Timothy hpe shadum da ai gaw kaja wa teng nga ai hpe mung anhte ni dum shai nga ra ga ai (2Tim 3:12).

Karai Kasang a kabu gara shiga gun sa, sakse tai ai ni a matu awng dang lam gaw Hkristian tsaw ra myit langai hte sha mai byin ai

Ndai laban na Chyum daw lahkawng hta San Pawlu Korintu hpung masha ni hpe Wenyi gaw Nawku Hpung hta lawm ai ni a ntsa gade daram shawang myit kaba ai hte garum ya nga ai hpe tsun da ai. (1) Nkau ni gaw hpaji hte hpring ai mungga hpe hkaw tsun lu ma ai, (2) Nkau ni gaw machye machyang hte hpring ai mungga hpe jaw lu ma ai, (3) Nkau ni gaw Karai Kasang hpe kam sham ai chyeju atsam lu ma ai, (4) Nkau ni gaw machyi makaw shamai shatsai ya lu ai atsam nga ma ai, (5) Nkau ni gaw lamik kumla galaw dan na atsam lu ma ai, (6) Nkau ni gaw myihtoi htoi lu ai atsam lu ma ai, (7) Nkau ni gaw Wenyi kaw na jaw ya ai chyeju atsam hte re ai n re ai hpe chye ginhka hparan lu ai atsam lu ma ai, (8) Nkau ni gaw ga amyu myu tsun lu ai atsam lu ma ai, (9) Nkau ni gaw tsun ai ga a lachyum hpe htai sanglang dan lu ai atsam lu ma ai. Ndai atsam ni yawng gaw Wenyi langai e sha shabyin wu ai rai nna shi gaw langai hte langai hpe laklai ai chyeju atsam kumhpa kaga ga karan kachyan shagu da ya wu ai (1Kor 12:8-11).

“Karai Kasang gaw tsaw ra ai myit rai nga ai; dai rai nna tsaw ra ai myit hta asak hkrung ai wa kadai rai ti mung, Karai Kasang hte langai sha tai nna nga nga ai, Karai Kasang mung shi hte langai sha tai nna nga nga ai” (1Yh 4:16).

Akyu hpyi saga

Wa Karai Kasang e,  nang Madu anhte langai hpra hpe shaga lata la nna lit shatsam da hkrum ai magam hpe kangka gun hpai let tinang hkum hte hpu nau ni hpe hkye hkrang la ai lam de woi sa ya lu na chyeju jaw ya rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra ai hkung ga ai kanu kawa Tara hkaw sara/num ni hte nu wa hpu nau ni e, ndai laban gaw Pranwan ladaw hta (4) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1)  Yer 1:4-5,17,19        

Chyum Mungga Daw (2) 1Kor 12:31-13:13     

Kabu Gara Shiga Lk 4:21-30

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.