Laban Mungga -Du Sa Ladaw (4), A, 2022 Messaiah Madu Hpe Kaja Dik Ai Hku Hkalum La Ai Ni

Du Sa Ladaw (4), A, 2022

Messaiah Madu Hpe Kaja Dik Ai Hku Hkalum La Ai Ni

 Hkristu hta tsaw ra ai nu wa hpu nau ni e, ndai laban gaw Du Sa Ladaw hta (4) ngu na laban rai nga ai.

Ahaz Hkawhkam Karai Kasang a hkye hkrang la lam hpe ninghkrap lai wa ai

Chyum daw langai na hkawhkam Ahaz gaw Karai Kasang a hkye hkrang la hpung dagu hpe n hkap la ai sha, shinggyim lai ladat hpe madung kam ra ai ngu shut shai ai hku hkap la ai wa rai nga ai. Shi zawn sha shinggyim masha lai ladat hpe kam hpa ai rai yang gaw anhte ni galoi mung hkye hkrang la hkrum na n rai ga ai. Hkristu Madu du sa ai lam mung lachyum n rawng rai mat na rai nga ai.

Ahaz hkawhkam hpa ni hkam la shut ai rai?

Solomon hkawhkam n nga mat ai hpang, dingdung mungdan hte dingda mungdan lahkawng ga karan mat wa ai. Israel myu lakawng (10) gaw dingdung mungdan rai nna Samari masha ni nga ai mungdan ngu mung tsun ai. Dingda mungdan hta gaw Israel myu lakung (2) nga ai mungdan rai nna, "Yerusalem" gaw mungdan a mare daju kaba shara rai nga ai.  Yuda ni a mungdan ngu mung tsun ai.

Ahaz hkawhkam gaw B.C 725 daram aten hta Yuda mungdan a hkaw hkam rai nga ai. Shi gaw n hkru n kaja ai hkawhkam langai rai nga ai.

Tara maigan rai nga ai shi a hkawhkam jan a majaw hpara sumla ni hpe nawku ai wa tai wa ai. Israel myusha ni hpe mung hpara sumla hpe nat jaw shangun lai wa ai, naw shangun lai wa ai.

Israel mungdan gaw lamu ga jarit matut ai htingbu mungdan a Damascu hkawhkam hte matut mahkai pawng nna Ahaz hkawhkam hpe jawm gasat na matu shakut lai wa ma ai. Pawng hpawn hpyen hpung ni gaw Yerusalem mare kaba hpe gasat awng dawm la lu na re ngu hkam la let gasat na masin jahkrat myit daw dan lai wa ma ai.

Ahaz hkawhkam hte mung shawa masha ni hkrit kajawng lai wa ma ai. "shi hte shi a amyu masha ni yawng gaw nbung ahpawt hkrum nna ashun nga ai hpun ni zawn hkrit gari nga ma ai," (Is 7:2).

Hkrit kajawng n ra ai lam, kadai hpe mung garum hpyi n ra ai lam, Hkawhkam hte rau shi a amyu masha ni hpe Karai Kasang hkum nan hkye la na re lam, Karai Kasang hta sha hpring tup kam shamyat nga ra na lam, shi a mungdan hpe gasat nga ai hpyen ni hpe mung jahten kau na re lam, Yaweh Karai Kasang, Myihtoi Isaiah hku nna Ahaz hkawhkam a matu shiga jaw ai.

Karai Kasang matut shadum da ai gaw "Na a kam sham myit n ngang ai rai yang, nang grin nga lu na n rai," ngu ai rai nga ai (Is 7:9).

Ahaz hkawhkam gaw Karai Kasang a ga hpe madat na malai, tinang hkum hpe sha kam shalai nna, Syria hkawhkam hpe garum hpyi lai wa ai.

Karai Kasang gaw myit galu kaba ai hte hkawhkam Ahaz hpang de Myihtoi Isaiah hpe lahkawng lang ngu na bai shangun dat nna shadum shangun ai.

Raitim, laklai shai ai lam n nga ai. Ahaz hkawhkam gaw chyum laika ga hpe jai lang let Myihtoi Isaiah hpe bai htang dat ai. "Nanhte a Karai Kasang hpe chyam dinglik lu na myit dai n rai" Tara Jahprang 6:16).

Chyum laika ga hpe mahta nna Ahaz hkawhkam tsun ai gaw jaw ang ai lam raitim, shi Karai Kasang hpe kamhpa kam shamyat nna tsun ai ga n rai nga ai. Shi a hkum shi karai kasang zawn nawn ai ga zawn rai nga ai. Teng man Karai Kasang hpe jahprak ai ga rai nga ai.

Yaweh Karai Kasang mung shi lam shi hkawm u ga. Nang myihtoi wa mung na lam nang hkawm u. Ngai mung nga masing jahkrat da sai hte maren nye lam ngai hkawm na. Yaweh Karai Kasang hpe ngai n kam ai. Dai majaw ngai na ngai masing jahkrat da ngut sai ngu ai lachyum rai nga ai. (Shi gaw Ahsaria hkawhkam hte tau nau myit hkrum lam la da ngut sai rai nga ai.)

Isaiah a myihtoi ga

Myihtoi Isaiah gaw Ahaz hkawhkam galaw ai lam ni a majaw masin kahtet nga ai.

Nang gaw Yaweh Karai Kasang hpe n madat ai sha, na hkum hpe nang hpaji rawng dum, kung dum nna gumrawng nga nna, mungkan ga na hkawhkam hpe sha kam hpa na matu lata shut nit dai; kade nna yang majan byin ai mungdan ni jahten kau ai hkrum na ra ai; na a mungdan mung jahten kau hkrum na ra ai, ngu Myihtoi shadum sadi jaw da ai.

Kaning hku mi byin byin, Yaweh Karai Kasang gaw nang hpe lamik kumla langai madun na ra ai. Dai kumla gaw shinggyim myusha yawng hpe hkye la na kumla rai nga ai.

"Hkawn sek shayi sha gaw hkum gawng li nna shadang sha shangai na ra ai; shi hpe Emanuel" ngu nna shamying na ra ai" (Is 7:14).

Ga Shaka dingsa prat hta Myihtoi Isaiah a myihtoi ga hpe ndai laban na Kabu Gara Shiga Mahte Laika hta bai mu lu ga ai. (Mt 1:23)

Karai Kasang gaw Ga Shaka Dingsa prat kaw nna nan ndai laklai ai ndau lam hpe hpa galaw da ai kun? Sumru hpa kaba rai nga ai.

"Tsaw ra ai manang ni e lam langai mi hpe hkum malap kau mu! Madu a man e lani mi hte shaning hkying mi gaw hpa n shai nga ai; shi a man e, dai lahkawng gaw maren sha rai nga ai" (2Pt 3:8).

Ahaz hkawhkam she Karai Kasang a ga madat lai wa ai rai yang, shi hte rau mung shawa masha ni hkye hkrang la hkrum na rai ma ai.

Ahaz hkawhkam hkrum katut lai wa ai agung alau gaw daini anhte hkrum nga ai agung alau hte maren sha rai nga ai.

Tinang hkum hte ja gumhpraw mungkan sut rai ni hpe kam kaba shut ai; shinggyim ladat hpe kam hpe kam shut ai rai yang, Karai Kasang a hkye hkrang la lam hpe pat shingdang shangun ai tai nga na teng sha rai nga ai.

Maria hte Yawsep hkye la Madu hpe teng man jaw ang ai hku hkap la ai.

Maria gaw shagrit shanem ai hte shi hta nga manga, byin mabyin yawng gaw Karai Kasang jaw ya ai re ngu sanseng myit hte hkam la ai, kam sham ai. Karai Kasang hkang da ai lam ni hpe hkan shatup ai. Shi hta Karai Kasang byin shangun mayu ai lam ni hpe dum chye ai hte rau shi a myit masin hkum hkrang mahkra Karai Kasang kaw ap nawng da ai. "Na a ga hte maren ngai hta byin wa u ga" (Lk 1:38).

Nu Maria a shagrit shanem ai, Karai Kasang a myit ra ai hpe hkan shatup na sharawng awng ai gaw shinggyim masha ni hkye hkrang la hkrum lu na matu hkye la Madu hpe mungkan ga de gun sa ya ai. Adam yan Eve a majaw Karai Kasang hte tsan gang mat ai kaw nna Karai Kasang hpang de bai woi la na matu Messiah hkye la Madu Yesu hpe gun sa ya ai.

Karai Kasang a hkum hte sai hpe shi a hkum hte sai hku nna anhte a matu hkam la ya ai.

Nu Maria gaw shi a kamsham kamhpa myit hpe Karai Kasang a ntsa tawn da ai majaw anhte a kasi hte anhte a shakawn shagrau ai hkrum ging ai wa rai nga ai.

Dai majaw Elizabeth Maria hpe shakawn ga tsun ai. "Kam sham ai numsha gaw a lu ai; kaning rai nme law, dai Madu kaw nna shi hpe tsun ai ga gaw dik wa na ra ai" (Lk 1:48).

Nu Maria gaw anhte a matu Hkristmas hta Yesu Madu hpe gara hku hkap la ra ai kasi rai nga ai. Anhte a gawng kya ai lam ni hpe hkap la, myit malai, tawng ban, nna Karai Kasang hpe hpring tup kam sham ai hte anhte a ntsa tawn da ai matsan dum lama ai tsaw ra myit hpe hkam la ra ga ai.

Yawsep

"Yawsep gaw myit ding hpring nna teng man ai hku galoi mung galaw ai masha langai rai nga ai" (Mt 1:19).

Jinghpaw wuhpawng htung lai hta, ri nhtu ap jaw dat sai rai yang, dai hpyi da ai shayi sha gaw sa hpyi ai la sha hte hkungran na rai sai ngu ai myit hkrum masat rai nga ai.

Yuda tara hte maren, la sha gaw shi mahtan da sai num sha hpe hkungran da sai zawn myit la ra ai rai nga ai. Mahtan da sai num sha wa sadi n dung ai, sakse nga ai rai yang, si du hkra nlung hte kabai sat ai; shawa masha ni a shawng kaw lasha ni shi hpe kabai sat ai (Tara Jahprang 22:20-21).

Maria hta hkum gawng li nga sai hpe chye ai hpang, Yawsep gaw myit shuk mat ai. Shi gaw Maria hpe grai tsaw ra ai rai nna, hpring tup kam lai wa ai.

Dai zawn byin ai gaw Maria a shut kataw ai langai ngai a majaw n rai na hpe Yawsep dum nga ai. Makoi da ai, ip da ai lam langai ngai gaw nga na sai ngu shi dum shai taw ai.  Dai majaw Yawsep hkum nan myit n pyaw ai hte shi kaw na pru wa na myit daw dan ai.

Karai Kasang gaw Yawsep hpe hkye la na matu du sa ai. Maria hta byin wa ai lam Yawsep n chye na ai hpe teng man mabyin lam hpe tsun sanglang dan na matu yup mang sa jaw ai.

Yupmang hta lamu kasa tsun ai lam mahkra hpe hkap la ai; Karai Kasang hpe mung tsep kawp kam sham ai hte Maria hpe mung hkungran la nna, shi a nta de woi la ai.

Asan sha n chye na n hkrawn hkrang shi ai lam ni gaw naw nga nga na re. Raitimung, Yawsep gaw Maria zawn sha tinang (ngai ngu ai myit) a sumru yaw sin da ai masing hpe rap kau tawn da nna Karai Kasang a yaw sin ai hpe hkap la hkan shatup ai.

Ahaz hkawhkam gaw Karai Kasang a yaw sin ai shiga hpe na lu tim, n hkap la lai wa ai, ning hkap lai wa ai. Dai majaw shi hte rau shi a mungdan, mung shawa masha ni hten bya mat wa ai.

Maria hte Yawsehp gaw Karai Kasang a yaw sin ai masing hpe hkap la nna tsaw ra myit hta kam hpa kam shamyat lai wa ma ai. Shan lahkawng hte rau mungkan ting hkye hkrang la lam hpe lu la na lam hpaw ya ma ai.

Yesu Madu hta Karai atai, Masha atai lahkawng yan hpe mu mada lu ai

Ndai laban na chyum daw lahkawng gaw San Pawlu anhte Hkristan ni a makam masham lam hpe sumru dinglik shangun mayu ai majaw ka da ai laika rai nga ai.

Yesu Madu gaw aten langai kaw, aten shagu Karai atai hte Masha atai hku nga nga ai; Karai Kasang a kasha, David a aru arat rai nga ai. Anhte hpe hkye hkrang la na hpung dagu atsam hte hpring tup ai wa rai nna, aten shagu hkye hkrang la nga ai Karai Kasang rai nga ai.

"Nye a Madu a kanu ngai kaw sa du ai gaw, hpa chyeju ahkaw ahkang kaba wa rai na rai i" (Lk 1:43).

Hkristmas ladaw hta Nu Maria hte rau Kasha Karai Kasang mung anhte kaw du sa wa ai. Anhte gaw n gingdan ga ai zawn hkam sha ga ai raitim, chyeju kaba la ai hpe gaw hkam sha lu ga ai.

Akyu hpyi saga

Wa Karai Kasang e, du na Hkristmas hta, shagrit shanem ai kabu gara myit hte Messiah hkye la Madu hpe hkap tau la na aten san da lu na myit bang ya rit. Anhte a Madu Hkristu a marang e hpyi nem nga ga ai. Amen.

Hkristu hta tsaw ra ai hkung ga ai Tara hkaw sara/num ni hte nu wa hpu nau ni e, ndai laban gaw Du Sa Ladaw hta (4) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) Is 7:10-14

Chyum Mungga Daw (2) Rom 1:1-7

Kabu Gara Shiga Mt 1:18-25

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.