Kungla Shaman poi Laban, B Shaning 2024

Kungla Shaman poi Laban, B Shaning 2024

Hkristu hta tsawra hkungga ai nu wa hpu nau ni ndai laban gaw nawku hpung hku nna masat da ai B shaning a kungla shaman poi rai nga mali ai..

Madu Yesu gaw bahteni kahtawng na  Yerusalem mare kaba ngu na de nbungli hte du shang wa ai gaw nrai nga ai.. lawze hpe jawn nna mahtang shang wa ai mahtang rai nga ai..maga mi hku yu ga nga yang shi dai zawn shang wa ai lam gaw hpyen wa a lata de shi hkum shi nan sinda shachyen nna  ap jaw ya ai lam mung rai nga ai..dai zawn shi ap jaw  ai lam a npawt gaw hpa a majaw ta nga yang shinggyim masha ni hpe grai tsawra ai lam a majaw rai nga ai...

Tsawra ai nu wa hpu nau ni daw langai hku na Madu yesu gaw yerusalem myu mare kaba de gara hku rai du shang lai wa a ta nga yang... madu yesu gaw matsan mayan rai yu maya masha langai hku nna masha ni a man  e yu kaji na zawn re ai kanbau bungli hte nga lai wa nna shawa masha ni a la hpawk dum shakawn shagrau ai lam hpe lang hte lang koi yen lai wa ai lam hpe e mu lu ai..

raitim daini e Madu yesu gaw masha ni a la hpawk dum shakawn shagrau ai hte shang wa na lam dingyang marawn jahtau let maaun lap ni hpe galam hpun nba ni nyep rai grai hkrik hkam ai hte hkap tau la ai lam galaw ai hpe hkap la lai wa ai rai nga ai..hpa majaw  Madu yesu dai zawn hkap la lai wa ai lam gaw.. udang ntsa e sagu hkungga zawn nawng jau na ten grai ni htep nga sai hpe shi chye ai a majaw mung rai nga ai..udang ntsa e garai njen noi si hkam shi yang madu yesu gaw shi hkum nan david a kasha rai nga ai zawn messial ngu na hkye la madu teng teng rai nga ai lam shawa dawtsa hpe ndau shana ai lam hpe galaw na matu yerusalum ngu ai de du shang wa ai lam mung rai nga ai..

bethani kahtawng gaw tsanlun bum lagaw npu e nga ai mare kasha langai mung rai nga ai ..yerusalem mare kaba hte deng lahkawng sha tsan ai kahtawng  rai nga ai..shalai wa ai paschal poi garai n du shi yang nhtoi manga ya ram naw ra ai kaw na dai poi a matu sak jaw ap nawng na rai nga ai.. ..sagu bainam ni hpe dai mare hta e sa mahkawng shinggyin ai lam hpe tau nau nna galaw da ra ai mung rai nga ai..dai zawn sak jaw ap nawng na dusat yam nga ni da ai shara rai nga ai  bethani kahtawng kaw na yerusalem mare de madu yesu du shang wa ai lam a mungga jaw tsun shadum ya ai lam gaw mungkan masha ni hpe mara raw dat kau ya na matu hte kade nna ai ten sagu hkungga zawn rai shi madu hkum nan sak jaw nawng jau na re ai lam hpe mungga jaw tsun shadum ya ai ..bai nna e sagu rem wa gaw sak jaw nawng jau na dusat yam nga zawn sagu hkungga rai nga ai ni mung sagu rem wa hte bung rai nga  ai lam tara mungga jaw shadum ya nga ai..

Madu yesu gaw  mungkan ga  hpe masha e up hkang nga ai du gyi salang ni zawn nre ai sha ap nawng dawjaw nga ai nchyang shangun ma myit masa zawn shagrit shanem ai hte up hkang nga ai..madu yesu gaw hkawhkam ni a hkawhkam shi rai nga ninglen yerusalem mare kaba ngu na de magwi gumra ngu na ni hpe jawn nna shang wa mai ai raitim  lawze kasha jawn na mahtang shang wa ai rai nga ai..lawze kasha mung shi a hkum hpe madu yesu  jawn hkam na matu  jin jin rai nga lai wa ai..lawze kasha zawn anhte yawng madu a jai lang ai hpe jai lang hkam ai ni rai na matu galoi mung jin jin rai nga ra ai..

lawze madu mung shi a dusat hpe n la mat ya na matu kachyi mi mung pat shingdang ai lam n nga ai.. sharawng shara rai jaw dat ai lam hpe mungga hta mu lu ai...ndai mabyin lam gaw anhte gara hku  tara mungga jaw nga a ta nga yang madu yesu gaw karai kasang rai nga ai..yawng mayawng hpe shi madu nga ai..dai majaw karai kasang a myit sharawng awng ai hte maren jailang lu nga ai lam tara mungga jaw shadum ya ai rai nga ai...

matut nna shi madu anhte hpe shadum ya ai lam gaw madu yesu gaw shi hkum nan hpyen wa a lata kaw na lawt lu hkra galaw lu ai raitim n galaw lai wa ai lam hpe mungga jaw shadum ai lam rai nga ai..gum ra gaw majan kasat ai lam hpe hkrang shapraw ai hte n gun kaba la nga ai a majaw akyu rawng ai hkrang hku nna mai mu ai zawn lawze gaw simsa lam hpe hkrang shapraw ai..lawze kasha gaw zai mazut ai lam hpe hkrang n shala ai..dai majaw lawze kasha hpe jawn nna yerusalem de du shang wa ai madu yesu gaw simsa lam hpe la sa wa ai hkawhkam rai nga ai lam hpe tara mungga jaw nga ai..

madu yesu gaw mungkan pinra ntsa e ka-up up hkang nga ai madu nre ai sha masha yawng a myit masin hta shanu shingbyi nga ai madu mahtang rai nga ai lam hpe mung tara mungga jaw shadum ya nga ai.

tsawra ai nu wa hpu nau ni lahkawng hku na gaw hebre myu sha ni gaw madu yesu hpe gara hku na hkap tau la lai wa ai lam rai nga ai..yerusalem myu mare kaba de madu yesu du shang wa ai ten hta e mun kaba re ai masha  ni shi hpe hkap tau la lai wa ma ai re dai shawa hpawng kaba hta e myit san seng ai kahatwng masha ni malawng maga lawm nga ai zawn madu yesu a tsun ai shaga ai lam ni hpe mara tam mara shagun na matu mayun yu taw nga ai hparashe hte saduse ni a kinyu masha ni mung lawm nga ai..

tsawra ai nu wa hpu nau ni kungla lap ni hpe galam nna tinang a hpung palawng ni hpe lam.dingyang raw nyep da let hkap tau la ai hte tinang a n gup hku na mung david kasha Hosana rai nga u ga karai kasang a mying ningsang hte du sa wa ai wa Alu lit ga law nga nna marawn jahtau let hkap tau la lai wa ma ai re raitim madu yesu gaw lawze kasha hpe jawn nna du shang wa ai ten hta ngai hkawhkam gaw rai nga ai nanhte shadu da ai mungkan ga a hkawhkam gaw n rai nga ai ngu ai lam hpe nsen npru ai sha azim sha rai shagrit shanem ai hte mungga htawn shana dat ai lam mung rai nga ai..

mungkan ga a hkawhkam shagu  gaw tinang a mungdan hte myu sha a matu share ninghkring langai zawn asak si hkam mayu ai ..bai shanhte a hkum tsawp hpe e mung masha ni gaw  share shagan ni hpe makoi da ai shara kaw da nna jahkring hkring hkungga jaw sa du salam ai hte nam pan shang hkawng ni hpe sa tawn shakawn shagrau na lam hpe ra sharawng chye nga ma ai rai nga ai...tinang a hkum tsawp hkrang sumla hpe shachyaw tawn da ya na hpe mung ra sharawng chye nga ai..

daini e madu yesu gaw mara lu ai ni hte bawng dung hkrum ai ni hpe sha jeyang ai udang ntsa e asak dan jeyang hkam lai wa ai bai masha wa matu yaw da ai lup ningnan hta lup makoi da hkrum lai wa ai..madu yesu gaw jerusalem mare kaba hpe mada yu dat ai shaloi nawku htingnu kaba gaw hkrik hkam tsawm htap nga ai zawn dum nta ni shingkang shingwang hte hpring rai nga taw ai..shawa masha ni gaw  madu yesu hpe shakawn shagrau lai wa ai raitim nhtoi manga ya na ai hpang gaw mi shawng e  Hosana ngu nna e marawn jahtau lai wa ai shawa masha ni gaw  hpareshe laika ka ai sara ni a myit magaw myit maw shadut hkrum ai lam a majaw gunglau lau hkrum  nna dai wa hpe udang hta jen da u jen sat da kau u nga nna pilatu a rung shawng hta e nsen lanagai sha hte marawn hpyi shawn na lam rai wa na hpe madu yesu gaw tau nau chye da nga ai..

masha ngu ai hpan gaw grai hkrit ra ai baw hpan hta lawm.nga ai..hpa majaw ya ndai hku rai sai ngu yang yat du laga hku bai rai mat chye ai. ndai zawn prat ngu na  hta anhte ni mung shang lawm nga ai lam hpe tara mungga hte shadum ya nga ai...

tsawra ai nu wa hpu nau ni madu yesu hku nna ya na zawn tsa dan ka up da hkrum nga ai yerusalem hpe mu nna madu yesu gaw myi prwi hkrat lai wa ai mung rai nga ai..madu yesu a hkrat ai myi prwi gaw shi hkrum ra na nni nkri lam a matu  tau nau chye da nna e hkrat ai lam gaw nrai nga ai..shi a ya na zawn hkrap ai lam gaw pawt sindawng ai lam n nga ai..shi a tingkyang lam n myit ai hte..myi prwi si shagu gaw tsawra myit hte atsawm sha anhte hpe bai gawgap da ya ai.. tsun mayu ai gaw shi a hkrat myi prwi gaw shi a matu nre ai anhte shinggyim masha a matu she rai nga ai..

tsawra ai nu wa hpu nau ni shawa masha ni gaw madu yesu hpe shanhte share ninghkring ..bai mungkan ga a hkawhkam langai zawn hkap tau la lai wa ai rai tim shanhte a hkap la ai lam gaw madu yesu a sharawng awng ai myit hte n bung ai sha u-ga san san rai nga ai lam shanhte ndum chye lai wa ai..

masum hta gaw anhte yawng mung madu yesu hpe gara hku nna e hkap tau la nga ai kun? hebre masha ni zawn anhte yawng mung madu yesu a ka-up kahprwi da hkrum ai lam hpe ninghkap nyet kau nga ai kun..anhte mung moi na ji woi ji wa ni hte kade gaw nshai nga ai..ndai lam hpe 2 pet 2: 22 hta gwi gaw tinang a nhpat hpe nhtang sha ai..wa ni mung kashin ai hpang hkumpup hta bai hkalawi nga ai..nga nna tengman ai ga shadawn gaw shanhte hta dik wa ai..

tsun mayu ai gaw hkin du wan hkru byin ai lam rai nga ai...dai majaw masha a  gawng kya ai lam hpe chye ya nga ai karai kasang gaw anhte yawng hpe hkye hkrang la ai lam hpe hkam la lu na matu ngu ai shi a sharawng awng myit hte maren mara raw sacramentu chyeju kumla hpe shabyin tawn da ya lai wa ai rai nga ai..anhte ni mung mara raw ai lam ngu ai hta htawm hoang karaibkasang agarum ya ai chyeju hte maren ngu ai hta anhte myit malai bai akyu ga hpe tsun ai rai nga ai..

tsawra ai nu wa hpu nau ni gawng nkya nhpring zup ai masha hpe shi madu gaw chye ai dai majaw mung tsawra myit kaba hte shi hpang de du wa hkra bai  woi lakawn woi dun la ai mung rai nga ai..myit malai hte shi madu hpang de wa ga...bai nna shi madu yesu a shagrit shanem ai myit hpe kasi yu la nna dinghpring dingman ai masha ni tai nga lu hkra shakut nga ga...

Akyu hpyi saga oh hpan madu  karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.

Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw shaning B a lu sha gam ladaw mali rai nga ai.. . ..hti ang ai ja chyum mungga ni gaw chyum mungga daw langai ..Langai ngu na..Esaia a laika 31 :31 - 34, .chyum mungga daw lahkawng hpilipi hpung masha ni hpang de san paulu shagun dat ai laika   5: 7-9 kabu gara shiga Mk 11: 1-11..Mk..14:1-15:47

Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law