Kungla Shaman Poi Laban, A, 2023

Kungla Shaman Poi Laban

Hebre ma ni Kungla lang let lam kau e Madu hpe hkap tau la; Ja htau garu let tsun ai gaw “Lamu dang hta Karai Wa nga ai.

Ndai kungla shanan poi hpe shaning shagu galaw ga ai raitim kahtap kahtap nna bai na mayu ai hte galaw mayu ga ai Hkristan masha ngai tai nga sai kun? kabu gara shiga ka ai laika ka sara (4) hte yawng gaw, Madu Yesu Yerusalem de shang wa ai lam tsun hkai da ai hpe mu lu ai. Dai kabu gara shiga laika ka sara ni madung da tsun dan mayu ai ahkyak lam lahkawng bung nga ai hpe mu lu ai.

Dai gaw

(1) Yesu madu gaw Isreaela Myusha ni myit mada la nga ai Mesiah re.

(2) Yesu madu gaw Myithtoi ni tau nau myithtoi da ai Mesiah re. ngu ai lam rai nga ai.

Yesu madu gaw Isreaela myu sha ni myit mada la nga ai Mesiah re. Yesu Madu mungkan ga ntsa naw nga nga ten shi a laklai ai lam ni hpe mu chye ai ni kadai hpe raitim, masha law law hpe tsun shapraw dan ai lam n galaw na matu, pat shingdang da ai. Ndai lang na yerusalem de shang wa ai lam hpe gaw, masha law law chye lu u ga tsun shabra na matu aten du sai rai nga ai. Yesu Madu gaw Mesiah rai nna mungkan ting hpe hkyela na wa re. Kasha Karai Kasang, mungkan ga de du sa ai lam gaw mungkan masha yawng hpe hkye la na matu rai nga ai. Yesu Madu, Nu Maria a hkritung hta masha tai wa sai ten kaw na nan, shinggyim masha ni hpe hkye hpang wa sai re. Ya gaw matsan jamjau hkam ai hte si hkam ai a marang e hkye hkrang la ai magam hkum zup na matu aten du sai rai nga ai re. Yesu gaw Mesiah re ngu nna Yuda ningbaw ningla ni ndang hkam hkra Mung Shawa masha ni Jahtau marawn n gun jaw nga ma ai. Mt 21:9 “Dawi a kasha a hpung shingkang hpe shakawn kungdawn nga mu law Madu a mying ningsang hte du sa ai wa gaw a nga ai law! Karai Kasang a hpung shingkang hpe shakawn kungdawn nga mu law” nga nna Yesu a hpang hkan ai masha wunawng kaba jahtau garu ma ai nga nna ka da nga ai.

Yesu madu gaw Myithtoi ni tau nau myithtoi da ai Mesiah re. Lau ze hpe jawn ai ngu ai gaw Myihtoi kaji Zahkariah a ga sadi teng ai re hpe madun dan na matu Yesu Madu hkum nan hkyen lajang ai lam rai nga ai. Mt 21:5 hta “Myithtoi gaw Ziun mare hpe tsun mu, Yu u, nanhte a hkawhkam wa gaw nanhte hpang de du sa wa ra ai! Shi gaw shagrit shanem ai myit hte, lawze kanu a kasha ntsa hta jawn nga ai; rai sa, lawze kanu a kasha ntsa e jawn nga ai; nga ai gaw Zahkariah 9:9 hta myithtoi htoi da ai ga rai nga ai. Karai Kasang mungkan masha ni hpe ga shaka tawn da ai lam yawng gaw Hkristu Madu hta hkum zup wa sai. San Paulu gaw Korintu kaw nga ai masha ni hpe “shi gaw Karai Kasang a ga ndat ni yawng a matu re ngu ai mahtai rai nga ai. Dai rai nna anhte gaw Karai Kasang a hpung shingkang dan hkung shangun na matu Yesu Hkristu hta, Amen ngu ga ai” nga na tsun da nga ai. 2Kor 1:20 hta rawng nga ai. Karai Kasang gaw Hkristu hta Shi a ga shaka hpe hkum zup hpring zup shangun ai re.

Yerusalem de Lauze jawn let shang wa ai shaloi mung shawa masha wuhpung kaba hkap tau la ai hpe Yesu a myit masin hta gara hku hkam sha nga ai kun?

Yerusalem de Madu Yesu shang wa ai ahkyak ai lachyum shapraw dan lam ni bung ai hpe kabu gara shiga laika mali hta mu lu ai. Raitim, tang madun ka shapraw ai lam langai hte langai shai hkat ai lam mu lu nga ai. Dai zawn shai hkat ai lam gaw laika ka sara ni tinang tsun dan mayu ai masha ni hta hkan nna chye na la mu ga yaw shada let tsun ai majaw rai nga ai. Luka laika hta gaw yerusalem de shang wa ai Yesu Madu a masa hte shawa wunawng kaba lapran masa hpe shadan shadawng ai lam rai nga ai. Shawa wuhpung kaba a matu ahkyak ai gaw du sa na ra ai Mesiah, hpang jahtum e shanhte a lapran du sa ai hpe kabu gara hkalum la ai na lam rai nga ai. Gade nna yang shanhte hpe lamyit kumla madun sa wa na re ngu myit mada kam kaba nga ma ai. Shanhte a mungdan hpe up sha taw ai Chyasam Roma myusha ni hpe rawt malan ninghkap woi nna shanglawt lu ai mungdan gaw de sa wa na ngu kam kaba nga ma ai. Madu Yesu a kasa ni mung kabu myit dik nga ma ai. Hpa majaw nga yang shanhte hte rau nga ai ten Madu Yesu gaw yubak hkam nna si hkam na re ngu ai, sawng dik ai prat maka hpe, nhkap la sai sha, amying dan hkrung ai prat madang tsaw ai maka hta she hkawm sa na rai sai nga myit la hkam la nga ma ai. “Ara, rai sa ya chyawm gaw anhte ni a sara Yesu a ningmu gaw anhte ni a ning mu hte bung wa sai. Anhte ni myit mada shara gaw myit htum lunghkrung nrai sai” nga nna hkam la nga ma na re. Dai atem hta nan shanhte myit ai hte Yesu Madu myit ai gaw shai ai lam langai nga taw sai rai nga ai. Madu Yesu gaw gara hku, kade daram sak jaw ap nawng ra ai raitim mungkan ga hpe jahtum du hkra hkye la na re ngu ai ngang kang ai myit dawdan da lam nga nga ai. Yesu Madu a myit hta laklai hkamsha myit npyaw nga ai gaw masha n kau mi shi Madu a shawang tsaw ra myit kaba hte jaw ya ai hkye hkrang la ai chyeju hpe ningdang ai majaw hten run mat ai de du na ma ai lam rai nga ai. Hten run mat na masha law na nlaw na ngu ai gaw ahkrak lam nre. masha langai mi a hten run mat ai lam gaw Yesu Madu a myi pri hkrat na matu law htam nga ai. Luka 19:41 hta “Shi gaw Yerusalem mare hte grau ni wa nna, dai mare hpe mu mada ai shaloi, de a matu shi hkrap nna...” nga yesu a myit yawn ai lam hpe ka da nga ai. Tinang manu shadan tawn ai mare hten run mat ai gaw grai nan myit machyi myit npyaw hpa nan rai nga ai. Raitim Karai Kasang a tsaw ra myit hpe nhkap la ai masha langai mi a hten run mat ai hte shingdaw yang kaji kajaw sha rai nga ai. Masha gaw hpan da magam hta na manu dan manu kaba dik rai nga ai. Ngai hpe Karai Kasang Kade daram tsawra nga ai ngu ai hpe chyena hkap la sai kun?

Hkristu gaw anhte ni myit sumnung ai hte sak jaw ap nawng ai hpe hkap la nna anhte hpe hkye la na myit ra nga ai.

Shawa wuhpung kaba, Madu Yesu hpe hkap tau shagrau ma ai hta n hkum n tsup ai rai tim pat shing dang ai lam nnga ai. Yesu Madu gaw myit sumnung ai hte shi hpe sak jaw ai hpe hkap tau la ai. Dai majaw anhte ni ahkyak ai lam langai hpe myit hprang maja ra nga ga ai. Lauze tam na matu kasa lahkawng hpe shangun dat ai ten lauze madu hpe mu hkrum jang “Madu dai hpe ra nga ai ngu nna tsun mu”, ngu Madu Yesu tsun da nga ai. Madu Yesu gaw “lauze hpe ndai shara kaw du hkra bai shabai ya na” ngu tsun shangun ai. Dai gaw shi naw jai lang ai ten dai lauze hpe atsawm sha zing hkang da ya na ngu ai rai nga ai. Madu Yesu gaw lauze madu a garum shing tau lam langai ra taw nga ai rai nga ai. Dai zawn sha anhte langai hpra kaw na mung garum shingtau lam ra taw nga ai re. “Madu dai hpe ra nga ai” ngu ai ga si hte shani shagu anhte hpe tsun nga ai. Madu Yesu anhte kaw na garum shingtau lam ra taw nga ai gaw hpa rai ta? Anhte ni a myit masin hta rawng nga ai dai Wenyi gaw Hkristu anhte ni a ntsa ra sharawng nga ai lam ni hpe chye lu hkra tsun hpaw dan na re. Kalang marang anhte hpyi shawn ai lam ni gaw masha laga hpe garum shingtau ai hta ahkrak grau ai lam re ni? Law malawng gaw tinang hte ni htep ai wa hpe daw jau ai a marang e Madu Yesu hpe daw jau ai lam tai nga ai re. Madu anhte hpe hpyi sawn ai lam grai ahkrak hkra nrai tim, Madu ra sharawng ai ngu gaw jaw ang ai lam rai nga ai. Madu anhte hpe ra taw nga ai ngu ai gaw Madu Yesu anhte hpe shani shagu dawjau ai lam hta shakut shaja shang lawm na ra sharawng nga ai hpe tsun ai re. Madu Karai kasang a ra sharawng ai hpe hkan shatup mai ai zawn, nhkan shatup tim mai nga ai. Raitim anhte ni lata la ai hta hkan nna akyu pru ai lam shai mat wa na re. Karai Kasang hpe daw jau ai wa gaw hkyehkrang la ai hkrum na; nyet kau ai rai yang gaw madu karai kasang a chyeju hpe pat shing dang kau ai hte bung nga ai rai nna anhte ni karai kasang a hkyehkrang la mayu dik la ai lam hpe nlu la mat na re. Anhte a matu teng sha bying wa na lam gaw madu karai kasang hpe daw jau ai a marang e akyu chyeju lu la na; Madu karai kasang anhte hpe shagrau sharawt ya na ngu ai lam rai nga ai.

Du wa ra ai chyoi pra laban bat laman “Karai Kasang ngai kaw na nhpa mi ra sharawng nga ai kun?” ngu madu karai kasang hpe hkring hkring san nga ga. Shi Madu Karai Kasang ra sharawng ai hpyi sawn ai lam magup hpe kabu sharawng ai myit hte jaw jau nga ga. Anhte ni gade daram lawan ladan rai Karai Kasang hpe jaw jau nga ga ai raitim Madu Karai Kasang lawan dik daram chyeju bai nhtang jaw ai hpe dep lu na nre.

Akyu hpyi saga: Wa Karai Kasang e, Na a chyeju hkam la lu na matu anhte hta Nang Madu ra sharawng ai hpe anhte ni aten shagu jaw jau lu na matu lam woi ya rit. Ndai Chyoi Pra ai Laban bat magam Nawku daw jau lamang ni Myit masin hkum hkrang wenyi yawng hte shang lawm chyeju hkam la lu u ga lam woi ya rit. Anhte a madu Yesu Hkristu a marang e hpyi nem nga ga ai. Amen.

Kungla Shaman Ai Shaloi Hti Ang Ai Ja Chyum Daw Ni Gaw -

Mt 21: 1-11

Missa Hkungga Hta Hti Ang Ai Ja Chyum Mungga

Chyum Mungga Daw I - Esaia 50:4-7

Chyum Mungga Daw II - Phil 2:6-11

Kabu Gara Shiga - Mt 26:14-27:66

Ndai Ja Chyum Mungga ni hpe hti nna, hpawt ni na Nawku dawjau lamang ni hpe woi awn nga ga!