Karai Kasang A Mungga - Pranwan ladaw laban (6) A, 2023

Pranwan ladaw laban (6)

Mungdan Tara Upadi

Hkristu hta tsawra ai nu wa hpu nau ni e, ndai laban gaw pranwan ladaw hta (6) ngu na laban rai nga ai.

Yesu Madu mungkan ga de du sa ai gaw Karai Kasang a tsaw ra matsan dum ai hte up hkang ai lam shinggyim masha yawng a ntsa e anga nga na matu rai nga ai.

Mungkan ga na hkawhkam ni gaw mungdan hpe madu lu magang, lu su nga mai magang, arawng aya kaba magang rai nga ai.

Karai Kasang chyawm gaw shinggyim masha ni kaw na hpa mung n madu la ai. Shi a tara lam ni hpe shinggyim masha ni hkan shatup ai majaw Shi hta akyu ara jat wa ai lam n nga sai. Shi a mungga hpe n hkan shatup ga ai raitim, Shi hta jasum kau na lam hpa n nga ai. Karai Kasang gaw galoi mung hkum tsup dik ai mahkra dang chye ai Wa rai nga ai.

Shi a tara hpe hkan shatup nna, Shi a mungga hpe madat hkam la hkan shatup ai gaw anhte shinggyim masha ni a akyu ara matu she rai nga ai.

Gara mungdan rai tim, tara upadi ngu ai nga ai. Yesu Madu Karai mungdan hpe gaw gap ai shaloi kaning re ai tara hpe gaw de da ai rai?

Ndai laban na chyum mungga gaw Karai mungdan a mung shawa masha ni hku nna tinang a hkum hpe kaning re ai tara hte lam matsun madun nga ai rai?

Karai Kasang gaw shinggyim masha ni hpe Shi a matsan dum lama myit hte hpan tawn da ai

Ndai gaw ahkyak ai lam re. Karai Kasang hta mayam, shangun ma ra ahkyak ai majaw shinggyim masha ni hpe hpan tawn da ai n rai. Shi a mai kaja ai lam yawng hpe shinggyim masha ni hkam sha lu na matu hpan da ai.

Karai Kasang a matu shinggyim masha ni hpe hpan n ra ai. Raitimung, matsan dum lama myit kaba hte hpan da ai.

Shinggyim masha ni hpe kabu pyaw lam hpring tup jaw ya na matu masing jahkrat da ai. Dai hpe anhte gaw Karai Kasang a tara kanu ni ngu shamying shaga ga ai. Kabu pyaw lam matsun ni ngu mung shamying shaga mai ga ai.

Shinggyim masha gaw Karai Kasang zawn sha hpung dagu kaba nna, madu lu ai wa hku nna Karai Kasang a shangun ma tai nga yang gade she kaja na wa i.

Karai Kasang gaw shinggyim masha ni hpe shi a asak hpe garan kachyan ya let Shi a kashu kasha majing ni shatai da ai. Shi a asak jaw bang ya nna, Shi a kun dinghku masha majing shatai da ai.

Karai Kasang gaw shinggyim masha ni hpe hpring tsup ai shanglawt lam jaw da ai

Mungkan ga na up hkang du ni gaw hpang hkan ni ra ai rai tim, n ra ai raitim, hting hkang da ma ai.Hting hkang da ai kaw na tawt lai na shakut ai ni hpe dam kaba jaw ma ai.

Kun dinghku masha ni hta gaw dai masa hku n re ai. Kashu kasha ni gaw nta kata kaw chyu sharawng da hkrum ai n re. Kaga shara, kaga masha ni kaw na n lu mai ai kanu kawa, kahpu kanau, nau na ni a tsaw ra ai hpe hkam la let nta kaw myit ngwi myit pyaw nga lu ma ai.

Dai hte maren sha, Karai Kasang gaw myit su ai kashu kasha ni zawn kun dinghku langai hta rau nga shangun mayu ai. Dai rai nna, Madu gaw anhte a kabu pyaw lam a matu mahkyen lamang matsun ni hpe hkan shatup lu ai, tawt lai lu ai, hkap la lu ai, hte ninghkap lu ai shanglawt myit hpe jaw bang da ya ai.

"Nang myit ra yang, tara lam ni hpe hkan shatup mai ai. Nang hkum nan a myit daw dan ai hta rai na ra ai. Madu gaw na a shawng kaw hka hte wan hpe jahkrat da ya ai. Nang ra ai hpe nang hkum nan lata la mai ai. Nang masha n tai wa shi ai aten kaw nna, sak hkrung lam hte si hkrung si htan lam hpe Madu lajang da magang sai. Masha langai gaw shi ra sharawng ai hte lata madu la lu ai ahkaw ahkang lu ai hte dai hpe madu lu na ra ai. Madu a tara gaw sung la ai hte hpung dagu mung ja ai. Karai Kasng gaw hpung dagu mahkra hte hpring tsup ai rai nna yawng hpe mu mada lu ai" (Ecc Niti 15:15-18).

Gawng ba, rai dum ai masha wa n hkru ai hku nga sa ai hpe anhte chye lu ai. Shi gaw Karai Kasang a kun dinghku masha tai na hpe ning dang ai wa rai nga ai. Shi a pyaw hpa lam a matu Karai Kasang kaw na matsun maroi hpe n hkam la ai sha, shi a hkum shang lawt ai hte hkan tam ai.

Anhte gaw dai zawn re n hkru ai, zai ai wa a hpang e byin wa na hpe mung chye lu ai. Karai Kasang a kasha tai nga ai kaw nna, satan a mayam tai wa ai. Shi gaw pyaw hpa lam ni hpe n jaw n ang ai hku tam la ai. Karai Kasang hte shi tam ai kabu pyaw lam kaw nna tsan gang ai de du mat ai.

Karai Kasang gaw shinggyim masha ni hpe bai tam la ai

Karai Kasang gaw shi a kun dinghku kaw na pru le mat ai ni hpe n kabai kau ai, n kau da ai. Shinggyim masha yawng hpe bai shaga la na matu Ahbraham hku nna Israel myusha ni hpe lata san la da ai. Kade n na yang, Egypt (Egutu) mung na mayam prat kaw nna Israel myusha ni hpe hkye shaw la nna, Ahbraham hte ga sadi tawn da ai lamu ga shara de woi sa na matu Moses hpe lata la ai.

Israel myusha ni teng man kabu pyaw lam hpe lu la na matu tara kanu lam shi (10) hpe jaw da ai. Kanu gaw kasha ni hpe sharin shaga ding yang re ai zawn, Karai Kasang gaw Israel myusha ni hpe nawku daw jau lam hte seng nna poi lamang ni, kun dinghku ni, hkam ja lam hte shinggyim kanawn mazum lam ni a matu htung tara lam ni hpe jaw da ai.

Karai Kasang gaw dai ga shaka hpe mung jaw da ai, hkan mung hkan shatup ai. Israel myusha ni mahtang ga sadi run ai majaw matsan mayan hkrum lai wa ma ai.

Mungdan ningnan a matu tara ningnan

Hpang jahtum hku nna matsan mayan hkrum ai ni hpe hkye hkrang la na matu Karai Ksang gaw Shi a kasha shingtai hpe mungkan ga de shangun dat ai. Mungdan ningnan hpe bai gaw gap na matu rai nga ai. Karai Kasang a kun dinghku masha bai shatai la na sa du saw shaga na matu rai nga ai.

Yesu Madu gaw myusha langai hte sha n re, myusha shagu, yawng hte ga shaka ningnan hpe tawn da na matu du sa ai.

Dai ga shaka hta shang lawm ai ni a matu kaning re ai matsun maroi lam ni rai?

Yesu Madu mungkan ga de du sa ai shaloi, Israel ningbaw ningla ni gaw Moses a tara hpe hkan shatup ai hta n mai byin na zawn re ai tara kaji ni hpe jat bang ma ai. Karai Kasang a tara kanu lam (10) hta jat bang ma ai. Yesu Madu gaw dai n hkan shatup lu na zawn re ai lit magam ni a matu chyahkring hkring tsun shadum lai wa ai.

"Shanhte gaw li la ai hte hpai yak ai lit hpe masha shingma hta gyit shakap mara da nhtawm, shanhte gaw tinang a yunghkyi hte sha pyi n kam mala sharawt karum mayu ma ai" (Mt. 23:4).

Jew makam kaw nna Hkristan de gale wa ai Hkristan ni gaw, tara maigan masha kaw nna Hkristan de gale wa ai Hkristan ni hpe Moses a tara (hting lai tara) ni hpe hkan shatup ra na lam tsun ai shaloi, San Petru mung Jew Hkristan ni hpe sadi jaw shadum lai wa ai.

"Dai rai yang, ji wa ni e mung n hpai dang anhte mung n dang ai lit hpe sape ni a lahpa hta shagun ga nga nna ya nanhte hpa rai Karai Kasang hpe chyam yu mayu nga myit ta?" (Kasa 15:10)

Kaja ai kun dinghku hta gaw, tara upadi lam ni madung n rai, tsaw ra myit gaw ahkyak ai hpe madung mu lu na ga ai. Kanu kawa ni gaw kashu kasha ni hpe tsaw ra nna, kashu kasha ni mung kanu kawa ni, hpu nau, nau na ni hpe tsaw ra let shada hkap la madat mara ma ai.

Karai Kasang a mungdan gaw tsawra tara langai hte sha hting hkang da na ra ai.

"Dai Madu na a Karai Kasang hpe na a myit kraw lawang mhkra hte, na a asak mahkra hte na a n-gun lagaw mahkra hte tsaw ra nga u" Tara Jahprang 6:5; Jaw Jau 19:18; Mt 22:38-39).

Yesu Madu gaw Moses tara hta tara ningnan bai jat bang ai hku n re ai sha, dai tara lam ni a ginchyum tsawra tara hpe mahtang gaw de da ai.

Dai majaw Karai Kasang a tara lam ni hpe tsaw ra nna n hkan shatup ai rai yang lachyum n nga, n pru ai. Yesu Madu hkaw matsun da sai hte maren, dai tsaw ra myit n lawm ai sha hkan shatup ai gaw hkye hkrang la lam hpe n madu lu ai.

"Karai Kasang a myit ra ai lam hpe hkan sa galaw ai lam hta Hparishe ni hte tara sara ni hta n grau malit yang gaw, sumsing lamu a mungdan hta nanhte shang lu na myit dai n rai" (Mt 5:20).

Asak sat ai lam hpe n galaw na matu jaw da ai tara hpe yu yu ga.

Nang gaw na a kahpu kanau manaw manang hpe pawt sindawng nna tsaw ra myit n rawng yang gaw shi hpe sat ai tai nga ai. Na a hpu nau wa hte n hkrum n ra ai rai yang Karai Kasang hpe nawku daw jau ai gaw Shi ra sharawng na n rai, hkap la na n rai. Prinem htingram lam hte tsaw ra ai lam hpe shawng galaw shatup ra ai. Dai hpang she nawku daw jau lam hkan ai.

Tawt lai ai lam hpe bai yu yu ga.

Tawt lai ai lam gaw num hpe raitim, madu da lu ai hpu nau langai ngai hpe raitim, hkra machyi shangun yang mara rai nga ai. Nang madu lu ai ahkang n lu ai hpe myit maring ai hte tawt lai ai majaw shi hpe hkra machyi shangun ai tai nga ai.

Jahka kau hkrum ai num hpe yu yu ga.

Moses tara hta nkau mara kaba ni a majaw jahka na ahkang jaw da ai. Raitim, Moses jaw da ai jahka tara gaw kun dinghku hpe grau tsaw ra na matu jaw da ai gaw rai nga ai. Raitimung, dai jahka ai lam gaw shinggyi masha hpe teng man kabu pyaw lam n jaw ai. Karai Kasang gaw dai masa hpe n hkap la lu ai. Teng man tsaw ra myit hpe mi na Shi masat jaw da ai hta bai makawp maga da na aten du sai.

Dagam ai lam hte seng nna bai yu yu ga.

Kun dinghku masha ni shada hta 'mai sa', n kam ai' ngu asan sha tsun shapraw ai rai tim, myit hta gaw n ju n dawng ai lam n nga ai. Shada tsaw ra myit tawn da nna dagam dala galaw n ra ai.

Yesu Madu shi a asak ap nawng kau ai ten, Karai mungdan a matu tara hpe "Nihtep hpu nau ni hpe tsaw ra na lam" langai hpe mung kadun dawk kaba wawk jaw da ai

"Shada da tsaw ra nga mu, ngu nna Tara Ningnan ngai nahte hpe jaw da made ai. Ngai nanhte hpe tsaw ra made ai zawn, nanhte mung shada da tsaw ra nga lu na rai myit dai" (Yh 13:34).

Akyu hpyi saga

Anhte a madu Yesu Hkristu a marang e hpyi nem nga ga ai. Amen.

Hkungga tsawra ai kanu kawa tara hkaw sara sarama ni e, hpawt ni gaw Pranwan ladaw hta (6) ngu na laban rai nga ai.

Hti ang ai Ja Chyum Mungga gaw

Chyum mungga daw   (1)    Sirak 15:15-20

 Chyum mungga daw  (2)    1Kor 2:6-10

Kabu gara shiga hta              Mt 5:17-37

Ndai Ja Chyum Mungga ni hpe hti nna hpawtni na nawku daw jau lamang hpe woi awn nga ga!

 

Add new comment

6 + 3 =