Karai Kasang A Mungga - Pranwan Ladaw Laban 29, Shaning B, 2021

Hkye Hkrang La Lam A Matu Nni Nkri Hkam Ai Sari Manu Jahpu

Hkristu hta tsaw ra ai nu wa hpu nau ni e, ndai laban gaw Pranwan Ladaw hta (29) ngu na laban rai nga ai.

 

Kasa ni a ntsa Yesu Madu tawn da ai madung yaw shada ai lam gaw, hpang jahtum nhtoi hta dinghta ga ntsa naw nga ten, shanhte hpe hpring tup sharin shaga ya na matu rai nga ai (Mk 9:30).

 

Yesu gaw Yerusalem mare de lung wa ai lam hta, kasa shi lahkawng hpe shi hta byin wa na lam tau nau tsun dan da ai. Masha kasha gaw hkingjawng agyi ni hte tara sara ni a lata de ap kau ai hkrum na ra ai lam, Shi hpe maigan amyu ni a lata de ap kau na ma ai lam, shanhte gaw Shi hpe asawng asang di na lam, shi hpe anu kayat nhtawm sat kau na lam; rai ti mung masum ya nhtoi a hpang e Shi bai hkrung rawt wa na lam, tsun dan ai (Mk 10:32-34). Yesu Madu Shi hta byin wa na lam, kasa ni hpe asan sha tsun dan da ai. Hpyen ni nga ai shara de Yesu Madu, Shi hkum nan sape ni hpe woi awn sa ai. Shanhte hta n byin gin ai lam byin wa na hpe n ra sharawn ai majaw Yesu hkum nan woi ningshawg ai mung rai nga ai.

 

Hpa majaw nga yang, shawng de Yesu Madu, ndai lam hte seng nna tsun ai shaloi, shanhte n hkap la ma ai, ninghkap ma ai majaw rai nga ai. Ganing re ai myit mada lam ni tawn da ai raitim, Yesu Madu hta sadi dung let Shi a hpang hkan nang ai hta dut dang ai lam ni byin pru wa chye nga ai.

 

Nta Masha Ni A Matut Mahkai Hte, Yaku Hte Yawhan Yan Nau Yesu Madu Kaw Manu Dan Dik Ai Hkinghtawng Hpe Hpyi Ma Ai.

San Marku gaw ndai yan nau Yesu kaw sumsing mungdan hta ahkyak dik, tsaw dik shara, ahkang aya hpe hpyi ma ai ngu ka da ai. San Mahte gaw ndai shan nau, shan a kanu hku nna hpyi ya shangun ai ngu ka da ai (Mt 20:20). Dai shan nau a kanu mying gaw Salome rai nga ai. Shi gaw Yesu Madu mungga hkaw, sasana galaw ai hta ra mara garum lawm ai wa mung rai nga ai (Mk 15:41; Lk 8:2). Shi gaw Yesu a kanu ji daw ang ai rai nga ai. Shi hte shi a madu wa, langai ngai gaw Yesu a kanu Nu Maria hte, shing n rai, Yawsep hte amyu daw ai wa rai nga re. Dai majaw Yaku hte Yawhan yan gaw Yesu hte lawu lahta kahpu kanau daw ai rai nga ai.

 

Shan a kanu, Yesu a jinghku majing wa rai nga ai majaw, Yesu madu kaw shan hpyi mayu ai ahkang aya hpe kanu hku nna hpyi yang hkap la ya na re, ngu zeng myit kaba hte aput hpyi shangun ai mung mai rai nga ai.

 

Kaga byin mai ai lam langai gaw amyu daw jinghku re majaw hpyi gwi ai hta lai nna, Yes gaw Petru hte rau shan nau hpe laksan shaga woi woi di ai majaw mung mai rai nga ai. San Petru a kani hpe shamai ya ai shaloi (Mk 1:29), Jairus a kasha num ma hpe jahkrung sharawt ai shaloi (Mk 5:37), bum ntsa Yesu Madu ahpraw nsam galai ai shaloi (Mk 9:2), shan nau hpe mung Petru hte rau shaga woi ai hpe chyum laika hta mu lu ga ai.

 

Shan nau gaw masan sa awng dang taw ai nga hkan magam bungli hpe kau da nna Yesu a hpang hkan nang ai gaw Shi a ntsa ga sadi dung ai re hpe chyahkring hkring madun lai wa ma ai. San Petru hpe jaw ai ahkaw ahkang kaba a majaw myit n pyaw, manawn masham ai lam gaw n rawng ma ai. Raitim, lahkawng ngu na hte masum ngu na tsang madang a rawng aya hpe hpyi shawn ma ai.

 

Yesu Madu Gaw Yaku Hte Yawhan Hpe, Myit Mada Lam Gara Hku Tawn Da Ra Ai Hpe Madun Ya Ai.

Yesu Madu bai htang ai lam sawng ai ngu gaw n rai nga ai. “Nan hpa hpyi nga ai hpe, nan n chye nga myit dai, Ngai lu lu na rai nga ai nni nkri ngu ai gawm hpe nan lu lu na rai nga myit ni? Ngai hkam la na rai nga ai kashin kamun hpe nan hkam la lu na myit ni, ngu nna shan hpe san mu ai (Mk 10:38). Yaku hte Yawhan gaw, Yuda myusha ni Roma ni hpe n dang lu shi ai lam hpe Yesu Madu awng dang lu hkra shakut shaja nga ai rai na re; dai hpe tsun ai rai na re majaw “Lu lu ai,” ngu htan ma ai rai na ma ai (Mk 10:39).

 

Yesu tsun ai gaw kaga lachyum hku n rai nga ai. Chyum laika ga lachyum hte maren, “gawm” madu wa hte lu lu ai ngu ai gaw dai “gawm” madu a kabu pyaw ai hta mung, myit ru myit ra ai lam hta mung shang lawm hkam sha lawm ai hpe tsun ai rai nga ai. Dai hte maren, Kashin Kamun hkam la ai ngu ai gaw, nni nkri lam hta lup taw ai lachyum, nni nkri lam hte hpring rai nga ai lachyum rai nga ai.

 

Yesu Madu shi hta hkrum ang wa na nni nkri lam ni hpe tsun mayu ai hta ga mawoi ga hku jai lang da ai rai nga ai. “Ngai hkam la na kashin kamun langai ni naw nga ai; dai garai n hkam hkam gaw, ngai nachying myit nni nkri hkrum nga nngai,”  (Lk 12:50).

 

Yesu Madu a nni nkri lam hta shang lawm hkam sharang gun hpai ai rai yang, mungkan ntsa, anhte myit mada tawn da ai yaw shada lam hta tsaw grau ai hpung shingkang tai nga na rai nga ai. “Kaja wa ngai lu na gawm hpe nan lu na rai nga myit dai; ngai hkam la na kashin kamun hpe nan hkam la na rai nga myit dai teng ai,” (Mk 10:39). Yesu Madu a nni nkri hta jawm pawng nga ai rai yang n myit mada lu ai mungkan hpung dagu hta tsaw grau ai hpung shingkan hpe hkam la lu na ngu tsun ai rai nga ai.

 

Shan nau hte kanu gaw dai hpe hpang daw hta chye na wa ma ai. Shan a kanu, Salome gaw Madu Yesu wudang ntsa jan noi si hkam ai lagaw nhpang hta Yesu Madu a kanu Nu Maria, kaga num sha ni hte rau rai nga ai. Yesu Madu nni nkri hkam asak htum ai ten hta ndai lam hpe chye na sai rai nga ai (Mk 15:40).

 

Yaku hpe Yuda ni n ra sharawng hkra, Herod hkawhkam baw htau du di nna sat kau ai (Kasa 12:1). Yaku gaw Hkristu a matu si hkam ai hta kasa ni hta na nambat langai ang ai rai nga ai. Shi mung Yesu Madu hta ga sadi dung ai a marang e, shi a matu hpung dagu kaba rai nga ai hpe chye na wa ai.

 

“Raitimung, nye a hkra maga hte pai maga de kadai dung lu na ngu nna lata san da na ahkang ngai n lu nngai. Dai gaw Karai Kasang shi hkyen lajang da ya ai masha ni a matu she rai na rai nga ai, ngu Yesu Madu ginchyum dat ga tsun shadum da ai hpe Mk 10:40 hta mu lu ga ai.

 

Shinggyim Myit Mada Lam Hte Karai Kasang A Yaw Sin Ai Lam Gaw Kaja Hkak Ai Dik Ai Re Hpe Yesu Madu Kasa Ni Hpe Chye Shangun Ai.

San Marku tsun da ai hte maren nga yang, Yaku hte Yawhan shan nau Yesu kaw dai ahkaw ahkang sa hpyi ai na jang, ngam nga ai kaga kasa ni masin pawt nga ma ai. Masa hpe maram yu yang, shanhte mung dai ahkang aya hpe myit mada nga ma ai majaw rai nga ai dan dawng nga ai. Yesu mung, hkrunlam n matut shi yang dai manghkang hpe shawng hparan ai, mu lu ga ai. Myit hpe shazim da na matu tsun ai; hting hkang da na matu shawng tsun ai. Dai hpe yu yang ndai mabyin manghkang laja lana byin ai masa hta nga ai.

 

Yesu Madu, shanhte sumru lu ai ga shadawn lahkawng hte sharin shaga ai. (1) Dinghta mungkan daru magam ahkang aya lu ai ni a myit masa, hte (2) Shi Madu hkum nan a nga sat nga sa hte myit masa rai nga ai. Ndai masha hpan lahkawng gaw kaga ga rai nga ai; hti htang rai nga ai. Yesu Madu a yaw shada ai hte galaw ai sat lawat ni gaw dinghta mungkan daru magam lu ai ni hte shai ai.

 

Mungdan Asuya ni ningbaw kaba ni hkawm sa yang, shanhte hkawm sa na shara ni hta shimlam jaw ai ni gaw shanhte a salang kaba a myit sharawng ai hte maren, malu masha ni, hkringsa shara ni hpe tau nau lajang tawn da chye ma ai. Hkawm sa ai salang ni masan n sa ai rai yang buga ginra kaw na masha ni hpe sadi jaw chye ma ai. Dinghta mungkan a daru magam ahkang aya lu ai ni hpe kaja dik htum daw jau ra ai gaw teng sha rai nga ai.

 

Yesu Madu hte Kasa ni gaw dai zawn n rai ma ai. “Hpa majaw nga yang, dai Masha Kasha wa pyi, masha hpe yam sha na nga nna du sa ai n rai; Masha hpe galaw daw jau ya na hte shi a asak hpe nawng kau nna masha law law hpe hkye mawai shaw la na matu she du sa ai, ngu nna tsun mu ai (Mk 10:45).

 

Mayam gaw lam amyu myu hku nna lawt lam nga wa chye nga ai. Nkau ni gaw ja gumhpraw jaw nna lawt lu ma ai. Dai zawn gumhpraw jaw nna bai shaw la ai gumhpraw hpe “Ransom” “bai shaw la ai gumhpraw” ngu tsun ga ai.

 

Lawt lu ai masha mung, mayam wa mung, myu lahkawng yan gaw mara a majaw mayam tai ra ai ngu tsun lu ga ai. Yesu Madu anhte hpe bai hkye shaw la na hte, Karai Kasang a kashu kasha ni bai shatai na matu du sa ai. Dai majaw Yesu Madu gaw yawng a shangun ma, yawng hpe daw jau na teng sha rai nga ai.

 

Anhte hpe gara hku hkye shaw la ai rai? “Nanhte a kaji kawa ni kaw na hkan dagraw la ai manu n rawng ai asak hkrung lam a arawn asam hta na nahte hpe hpa baw hte galai hkrang la sai lam nanhte chye nga myit dai. Dai gaw jahten sharun kau lu ai ja gumhpraw zawn re ai arai lama ma hte n rai,.. Hkristu a asak hpe nawng ya kau ai hku nna, hkye hkrang la ai lam rai nga ai,” (1Pt 1:18).

 

Yesu Madu Hte Anhte Shangun Ma Tai Ai A Marang E Lu La Ai Hpung Shingkang Lam

Chyum daw langai hta “Yaweh Karai Kasang a shangun ma ni a mahkawn ni” ngu Myihtoi Isaiah chyum laika hta mu lu ga ai. Dai wa gaw Yesu hkum nan rai nga ai. Dai (sumrai) laika hpe ka ai wa gaw Yesu Madu n du sa shi ai shaning law law kaw nna nan shi hkum nan hkrum katut ai zawn nni nkri hkam jam jau hkam ai lam hpe ka da ai rai nga ai.

 

Chyum daw langai gaw laika yan lahkawng sha rai nga ai. “Nni nkri hkrum sha ai asak hpang, shi gaw kabu gara ai lam bai lu la na ra ai; shi gaw kaman lila nni nkri n hkam kau ai lam hpe chye wa na ra ai. Ngai sharawng awng ai hte ding man ai nye a shangun ma gaw, law law a ari hpe gun kau ya na ra ai; shi a jaw e, ngai shanhte hpe mara dat ya na nngai,” (Is 53:11).

 

Myihtoi Isiah a a myihtoi ga gaw ndai laban na Kabu Gara Shiga hta Madu Yesu tsun ai mungga hte bung nga ai. “Ngai sharawng awng ai hte ding man ai nye a shangun ma gaw, law law a ari hpe gun kau ya na ra ai; shi a jaw e, ngai shanhte hpe mara dat ya na nngai” (Is 53:11). “Masha Kasha wa pyi, masha hpe yam sha na nga nna du sa ai n rai; Masha hpe galaw daw jau ya na hte shi a asak hpe nawng kau nna masha law law hpe hkye mawai shaw la na matu she du sa ai,” ngu nna Yesu Madu tsun mu ai (Mk 10:45).

 

Yesu Madu zawn sha anhte hkum nan mung shangun ma tai ai, nni nkri hkam sharang ai, tinang a wudang hpai ai lam ni gaw anhte hkum nan hte kaga hpu nau ni hpe hkye la ai rai nga ai. Hebru 4:16 hta tsun shadum da ai hte maren Anhte a nden ja ai myit hte Karai Kasang a chyeju tingnyang man de sit shang wa ga. Shing rai yang anhte gaw matsan dum ai lam hkam la lu na hte, ra kadawn ai aten hta nan anhte hpe garum ai chyeju lu la na ga ai.

 

Akyu Hpyi Saga

Wa Karai Kasang e, Hkingjawng Agyi kaba Yesu Hkristu gaw anhte a ra rawng gawng kya ai lam hpe galoi mung matsan dum, mara dat ya let bau sin makawp maga daw jau ai wa rai nga ai hpe kam sham ga ai. Yesu Madu a matsan dum lama ai myit anhte hta mung jaw bang ya rit. Anhte a Madu Hkristu a marang e hpyi nem nga ga ai.  Amen.

 

Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, ndai laban gaw Pranwan Ladaw hta (29) ngu na laban rai nga ai.

 

Hti ang ai Ja Chyum Mungga ni gaw

Chyum Mungga Daw (1) – Isaia 53: 10-11

Chyum Mungga Daw (2) – Hebre 4:14-16

Kabu Gara Shiga – Marku 10:35-45

 

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.

 

Add new comment

7 + 3 =