Karai Kasang A Mungga - Pran Wan Ladaw Laban 5, Shaning B, 2021

               Pranwan ladaw (5), Shaning B, 2020

07 January 2021

 

          Hkristu hta tsaw ra ai nu wa hpu nau ni e, ndai laban gaw Pranwan ladaw hta (5) ngu na laban rai nga ai.

 

Si mat sai anhte a ji woi ji wa ni kaw na marai langai ngai wa mi ya bai hkrung rawt wa ai rai yang, ya na anhte a prat hta galai shai lam kaba byin nga ai hpe shi mu nna mau nga na gaw teng sha rai nga ai.

 

Lang ji u zawn pyen hkawm nga ai nbungli, gumra nlawm ai sha hkawm nga ai mawdaw ni, mungdan langai hte langai grai tsan ai kaw nga taw ai ni shada myi man hkrum shaga taw ai lam ni hte shi mu nna mau nga na re.

 

Anhte nga taw ai dum nta hte makau grupyin ni mung shi a prat hta grau masan sa taw ai hpe mu na rai nga ai. Shi a prat hta grau madang tsaw ai prat hpe mu na mau nga na re. Shara shagu tsi rung, tsi gawk ni hpe mu nna mau nga na re. Shi a myi hte mu mamu gaw shi hpe mau shangun ai lam chyu rai nga na gaw teng sha rai nga ai.

 

Raitim, jiwoi jiwa ni a prat hte maren sha rai nga ai lam langai hpe gaw shi dum chye na re. Dai gaw shanhte a prat hta n nga ai tsi rung, tsi gawk ni kade law ai rai tim, machyi masha shanhte a prat hta na zawn sha naw nga taw ai lam rai nga ai.

 

Machye machyang lam rawt jat wa ai hte maren shinggyim masha gaw mayak manghkang ni hpe hparan lu wa ai gaw mara rai nga ai. Raitim, jiwoi jiwa ni a prat hta yak hkak jam jau jaw ai lam gaw dai ni na aten du hkra naw nga taw ai.

 

Shinggyim masha gaw hpa majaw machyi makaw hkrum nna matsan jam jau hkrum ra nga ai kun?

 

Yoba hparan n lu ai manghkang

Ndai laban na chyum mungga daw langai hta na Yoba gaw sut du kaba langai rai nga ai. Bai shi gaw dingman dinghpring ai wa mung rai nga ai. Shi hta kasha la kasha 5 hte num sha 3 nga ai rai nna, dusat yam nga ni mung grai su ai wa rai nga ai.

 

Raitim, Yoba n myit mada tawn da ai machyi kaba hkrum hpang wa ai. Kasha ni yawng si mat ma ai rai nna, dusat yam nga, sut gan ni hte lamu ga ni yawng hpe mung masha ni e maw sha kau ai hpe hkrum mu ai. Shi a baw kaw na lagaw lamyin du hkra, hkum ting matsat shabat re ai ana zingli kaba kap nga ai rai nna, kadai mung n dang hkam lu ai manam shagram rai nga ai. Grau nna shi a madu jan hkum nan pyi shi hte seng ai lam ni hpe n hkam jan lu wa nna, shi hpe ning hkap wa ai.

 

“Karai Kasang ngai hpe hpa majaw ndai zawn re yak hkak jam jau lam hpe jaw ai kun?”, Yoba Karai Kasang hpe ga san san wa ai; aput angun nga wa ai madang rai nga ai.

 

Hku hkau ai masha marai masum Yoba kaw sa gawan nna, shi hte rau mahtai tam garum ya ma ai. Raitim, shanhte Yoba a mabyin lam sumru ya ai gaw Yoba a matu tsi n tai ai sha grau ru tsan hkam sha shangun ai tai nga ai. Yoba n dang hkam sharang ai machyi kaba hkrum ten grau machyi hkam sha shangun ai gasi hpe sha tsun nga ma ai.

 

Hpang jahtum hta Yoba gaw Karai Kasang hpe aput angun nga na malai, shi hta kam sham kam hpa let shi a hkum hpe Karai Kasang kaw ap da na matu myit daw dan tawn da ai.

 

Karai Kasang Yoba a kam sham myit hpe mu nna, shi jasum kau ai hta htam law law bai shaman ya ai; Yoba mung ngwi pyaw simsa ai hte nga lu ai masha bai tai wa ai.

Masha langai ngai macyi makaw hkrum nna matsan jam jau hkrum yang Yoba a kasi hpe la, Karai Kasang kaw kam hpa kam sham nga ra ga ai. Shaloi Karai Kasang gaw dai masha a prat hpang jahtum hta shaman ya na rai nga ai.

 

Yoba chyum laika gaw “Sumroi Laika” rai nna, shinggyim masha langai ngai a prat hta hkrak sha hkrum lai wa ai lam n re ai hpe anhte chye na da ga ai. Raitim, Karai Kasang ndai Chyum laika hpe ka ai wa hpe shadut shadum da ai gaw “machyi makaw hkrum nna matsan jam jau hkrum ai ten hta shinggyim masha shagu Yoba zawn sha Karai Kasang hta kam sham kam shamyet nga let shi a mai kaja ai lam hpe mu chye hkam sha lu na matu rai nga ai.

 

Hkristan masha nre ai ni a matu gaw “machyi makaw lam” gaw myit um ang hpa kaba langai rai nga ai. Machyi makaw hkrum ai ni makam n nga ai rai yang, ndai laban na chyum mungga daw langai hta mu lu ai Yoba a shawng daw na prat zawn sha, prat hpe n kaja ai hku sha mu na rai ma ai.

 

Dai zawn re ai masha ni gaw “Sak hkrung ai lam gaw n grin dan ai; prat gaw dumsu nga len zawn tsaw dat nem dat rai kri hkawm nga ra ai; kadun la ai prat hta matsan jam jau lam ni hte hpring chyat rai nga ai; yak hkak jam jau lam hte machyi makaw ai lam gaw jahpawt jan pru ten kaw nna shana yup tung ten du hkra nan rai nga ai majaw ngwi pyaw simsa lam nan nnga ai,” ngu mu na ma ai.

 

Hkristan masha ni gaw matsan jam jau yak hkak ai prat hpe kaja ai hku mu la hkam la chye ra ai. Hpa majaw nga yang, Yesu Madu hkum nan anhte zawn shinggyim hkum sa la nna, matsan jam jau yak hkam ai a mungsung lam hpe myit mada shara hku jaw da ai majaw rai nga ai.

 

Kabu Gara Shiga hta na Madu Yesu a mungga hkaw ai prat hpe sumru yu ga.

 

Yesu Madu Kabu Gara Shiga hpe tsaw tsun lai wa ai; kabu gara shiga hpe hkaw tsun ai; kaja ai mungga hpe sha hkaw tsun ai; dum nta ni hta, lam ntsa hta, bum ntsa hta, pa layang hta, hka li ntsa hta rai tim mungga hkaw tsun lai wa ai.

 

Machyi makaw ai ni hpe tsi shamai ya ai; kadai rai tim, Yesu Madu kaw woi sa ai machyi masha ni hpe shamai shatsai ya ai lam n galaw ai ngu gaw n-na yu ai.

 

Yesu gaw Kawa Karai Kasang hte akyu hpyi ga ni hte ga shaga na matu simsa ai shara sa nna akyu hpyi ai.

 

Machyi masha hpe Yesu shamai shatsai ya ai gaw (1) Machyi ai masha hpe shi a tsaw ra matsan dum lama ai hpe madun na matu rai nga ai. Yesu Madu gaw mara hpe jahten kau na matu du sa ai. Bai dai mara a majaw machyi makaw hkrum nga ai masha ni hpe shamai ya ai. (2) Machyi ai masha ni hpe Yesu Madu shamai shatsai ya ai gaw shi hta kam sham ai ni hta shi galaw ai hpung dagu a marang e, shi hpe kam sham wa na matu rai nga ai. Machyi makaw ana ahkra ni hpe shamai ya ai gaw Myihtoi ni a ga shi hta dik wa ai lam shadan shalen ai mung rai nga ai.

 

“Shi gaw anhte hkam sha ang ai nni nkri hte anhte gun ang ai nchyi nmu hpe hkam sharang ya nga sai,” (Is 53: 4; Mt 8: 17).

 

Mara a majaw shinggyim masha ni kaw kap wa ai ana ahkya hpe madung tsun ai n re ai sha, hkum hkrang machyi makaw ai lam hpe shamai shatsai ya ai gaw Hkyela Madu Mesaiah du sa na lam hpe Myihtoi Isaiah madung tsun ai rai nga ai.

 

Raitim, Yesu Madu gaw Mungkan tin hta nga ai ana zingli ni hpe tsi tsi ai lam n galaw lai wa ai. Shi hta tsi tsi hkam la ai ni mung bai si na sha rai nga ai. Shi a kawa Yawsep hpe machyi nna si mat hpe mu dat na re; Shi kawa hpe kade tsaw ra ai rai tim, hpung dagu madun nna sak jahkrung ya ai lam n galaw lai wa ai.

Lachyum gaw, kaga matsan mayan ai ni zawn sha, machyi makaw hkrum ai gaw n kaja ai rai tim, dai n kaja ai kaw nna kaja ai de gale ya lu ai shi a Kawa Karai Kasang a matsan dum lama ai hpe Yesu chye na ai rai nga ai.

 

Yesu Madu gaw masha ni gara hku matsan jam jau hkam nna si mat ma ai hpe yu nna sharin shaga ai lam hpe n galaw ai. Shi hkum nan matsan jam jau hkam si hkam ai a marang e she anhte hpe sharin shaga ya ai.

 

Shi hkum nan matsan jam jau hkam nna Karai Kasang a hkang da ai lam hpe hkap la ai gaw dai matsan jam jau ai kaw nna apu asi ni hpe hkam la lu na hpe Yesu Madu chye ai.

 

Yesu Madu a matsan jam jau hkam si hkam ai a marang e, shinggyim masha yawng a hkye hkrang la hpaw wa ai.

 

Anhte a matsan jam jau ai hpe hkam la ai rai yang, Yesu Madu a matsan jam jau ai hta jawm pawng nna anhte hte kaga masha ni a hkye hkrang lam hpe jaw ai ni hte hkye hkrang la hkrum ai ni tai wa ga ai.

 

Hkristan ni a matsan jam jau hkrum ai lam hte seng nna dum chye da ra ai lam ni

Machyi makaw hkrum ai lam gaw n kaja ai.

Tsun mayu ai gaw Karai Kasang a myit ra ai lam mung n rai nga ai; Karai Kasang a majaw mung n rai nga ai; Karai Kasang ahkang jaw da ai lam sha rai nga ai. Anhte ni myit galu kaba ai hte hkam sharang lam nnga ai majaw akyu pru ai lam nnga ai rai yang, galoi mung ahkang jaw na n re.

 

Machyi makaw hkrum ai lam hpe mara a majaw ngu tsun ai raitim, Karai Kasang gaw mara langai ngai a majaw, shing n rai, shut hpyit ai lam langai ngai a majaw anhte hpe dam jaw ai ngu hkam la ai gaw Hkristan myit masa n rai nga ai.

Karai kasang gaw shinggyim masha ni zawn dam n jaw ai; shinggyim masha ni hpe mara n shagun ai; shinggyim masha ni hpe galoi mung tsaw ra ai.

 

“Sara e, ndai wa myi n mu ai shangai wa ai gaw, gade a mara majaw rai ta? Shi nan a mara rai ni? Shing n rai, shi a kanu kawa ni a mara rai ni?, ngu nna san mu ai. Yesu gaw, ndai wa a myi n mu ai lam gaw, shi a mara hte mung kanu kawa ni a mara hte mung, hpa n seng nga ai. Shi myi n mu ai gaw Karai Kasang a n-gun atsam shi hta magam bungli galaw nga ai lam mu lu na matu rai nga ai,” ngu htan mu ai (Yh 9: 2 -3).

 

Dai majaw machyi makaw ai lam gaw anhte hpe Karai Kasang hte nihtep shangun ai; Karai Kasang hpe shinggyim masha ni hte nihtep shangun ai; anhte shada da hpe mung nihtep shangun ai;

 

Anhte Hkristan Nawku Hpung masha ni gaw machyi makaw hkrum ai ni hpe tsaw ra chye ra ai.

 

Machyi ai masha ni a matu Yesu Madu myit tsang ai gaw mungkan ga hta Karai Kasang a Ja Mungdan du nga ai lam a kumla rai nga ai. Anhte mung machyi ai masha ni hpe yu ahkyak tawn yu lakawn ai a marang e, hpung masha n re ai ni hpe Yesu hpang de woi sa ai lam rai nga ai.

 

Anhte a myit lawm ai lam hpe n-gup a-ga hku n re ai sha, ta tut magam hku madun dan ra ai. Ra kadawn ai ni hpe arung arai hte garum ga; machyi ai wa hte shi nta masha ni kaw sa gawan n-gum jaw shalan shabran ga; grau nna, machyi ai masha a wenyi lam hpe garum ya ai hku shi hte rau akyu hpyi, myit malai tawng ban let Yesu madu a kasi ningli hte maren Karai Kasang a hkang da ai lam hpe hkam la nga ga.

 

Anhte Hkristu Madu hpe kam sham kam hpa ai marang e, matsan jam jau ai a lachyum hpe hkrak chye lu na rai ga ai.

 

Akyu hpyi saga

Wa Karai Kasang e, anhte hkum nan hte machyi makaw jam jau nna yak hkak hkrum nga ai ni hpe mara dat ya rit. Hkum hkrang myit masin, wenyi yawng hkam ja let nang Madu hpe dau jau chyeju hkam la lu na matu lam woi ya rit. Anhte a Madu Hkristu a marang e hpyi nem nga ga ai.  Amen.

 

Hkristu hta tsaw ra ai hkung ga ai Tara hkaw sara/num ni hte nu wa hpu nau ni e, ndai laban gaw Pranwan ladaw hta (5) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) Yoba 7: 1 – 4, 6 -7

Chyum Mungga Daw (2) 1Kor 9: 16 – 19, 22 - 23

Kabu Gara Shiga Mk 1: 29 - 39

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.