Karai Kasang A Mungga - Pran Wan Ladaw Laban 4,2021

Pranwan ladaw (4), ShaningB, 2021

31 January 2021

 

          Hkristu hta tsaw ra ai nu wa hpu nau ni e, ndai laban gaw Pranwan ladaw hta (4) ngu na laban rai nga ai.

 

Jan, shata, shagan ni, dusat dumyan ni, hpun kawa hkum sum hpa, dum nta, nta wang ni, dum nta masha ni hte manau manang ni yawng gaw anhte hpe kabu pyaw lam jaw ai rai yang yawng gaw kaja ai ngu hkam la ga ai.

 

Kawsi hpang gara ai lam, machyi makaw ai lam, garan ginhka ai lam, ga sadi run ai lam ni gaw anhte hpe myit hkri ba lit li shangun ai hte jahkrit shama ai lam ni rai nna, hten run lam hpe jaw ai re majaw n kaja ai re ngu hkam la ga ai.

 

Si hkrun si htan lam gaw grau nna anhte a matu n kaja dik htum rai nga ai. Anhte a ji woi ji wa ni gaw kaja ai lam mahkra gaw Karai Kasang jaw ya ai re ngu hkam la ga ai hte, n kaja ai lam hpe gaw sadan jaw ai re ngu hkam la ga ai.

 

Nsi naisi, nai mamam ni n kaja ai raitim, nta masha langai ngai machyi makaw ai raitim, nta kaw rem da ai dusat dumyen langai ngai mat mat ai shaloi raitim, sadan a kajam kalam ai lam re ngu hkam la chye ga ai.

 

Sadan hpe gasat dang kau na matu laknak hkum sum hpa galaw shapraw dai lu sai raitim akyu n pyu ai; kaman lila sha tai nga ai. Nat jaw ai lam ni, gahta mandan kawut ai lam ni chye galaw ai ni hpe kam hpa nna lam amyu myu hku nat sadan hpe nawng jau ma ai.

 

Ya anhte ni Hkristan ni tai wa sai raitim nat sadan hpe naw hkrit nga ga ai kun? Hkristan masha langai mi hku nna nat sadan hpe hkrit n ra sai gaw rai nga ai. Raitim, nat shung ai lam zawn re ai ni hte hkrum katut wa jang anhte ni a makam yawn wa chye ga ai. Sadan hpe dang kau lu na matu hkungga nawng jau ai lam hpe galaw na matu myit um ang chye ga ai.

 

Anhte ni nat sadan hpe kam ra na kun? Nat sadan gaw anhte hpe dingbai dingna jaw lu ai kun? Hkristan masha langai mi nat sadan a kajam kalam galaw ai kaw nna tinang hkum tinang makawp maga lu ai kun? Ga san ni anhte hta law law nga nga ai.

 

Hkristan makam masham hta, nat sadan a lam anhte hpe gara hku sharin shaga da ai rai? Hkristan makam masham a sharin shaga ai hta Karai kasang gaw nga yawng nga pra hpe hpan da ai. Karai Kasang n hpan da ai sha nga ai hpa n nga ai.

 

N kaja ai lam hpe Karai Kasang, shing nrai, kadai mung n hpan da ai. Dai ni na aten hta n kaja ai ni yawng gaw lani mi na aten ni hta kaja lai wa ai. Mara a majaw n kaja mat ai she rai nga ai.

 

 “Karai Kasang gaw si hkrun si htan hpe hpan da ai n rai; nat sadan a n ju n dawng ai myit a majaw she si hkrung si htan gaw mungkan ga de du shang wa ai,” (Hpaji Ningli 1: 13; 2: 24).

 

Nat sadan gaw kadai rai? Hpan da magam hpe yu dat ai shaloi, Karai Kasang gaw hkum hkrang n rawng ai wenyi ni hpe hpan da ai lam mung tsun da ai. Shanhte hpe lamu kasa ni ngu shamying ai rai nga ai. Shanhte gaw shinggyim masha ni hta grau ai hpaji byen-ya hte hpung dagu madu da ma ai.

 

Raitim, lamu kasa nkau ni gaw Karai Kasang lajang da ai ngwi pyaw lam hpe n hkap la ma ai majaw Karai Kasang a hpyen kaba ni tai ma ai. Shanhte hpe anhte ni nat sadan ngu shaga shamying ga ai (Yawhan a Shingran laika 12: 7- 17).

 

Shanhte gaw Karai Kasang hpe dingbai dingna n jaw lu ai. Raitim, Karai Kasang madu d ai shinggyim masha ni hpe gaw dingbai dingna yaw lu ma ai. Dai zawn sha shinggyim masha langai mi tinang n dawng ai kaga shinggyim masha langai hpe dingbai ding naw n jaw lu yang, shi madu da ai arung arai ni hte shi masha ni hpe jahten kau lu ai rai nga ai.

 

Sadan gaw masha ni n hkru ai lam galaw shangun ai re majaw shi gaw ninghkap ai wa rai nga ai. Shi a bungli gaw Karai Kasang hte kaja ai masha ni hpe yaw shada myit hte nan jahten sharun na matu rai nga ai.

 

Sadan gaw hpan da magam hpang ai kaw nna nan lapu hkrang sumla hte Adam yan Eve hpe Karai Kasang hpan nna shan a matu yaw sin da ai lam hpe sa du jahten sharun ai hpe mu lu ga ai (Ningpawt Ninghpang 3: 1-7). Sadan gaw Yesu Madu hpe shangai shaprat ya ai Nu Maria hta lai nna Adam yan Eve hte rau shinggyim masha yawng hpe gumlau ai. Roma 3: 23 hta, “Yawng mayawng gaw yubak mara galaw ma ai hte, Karai Kasang a mawai la ai lam hte tsan gang mat masai,” ngu San Pawlu tsun da ai.

 

Shinggyim masha gaw sadan hpe ninghkap n lu ai gaw n rai nga ai. Raitim, shawng na kanu kawa yan shut hpyi ai majaw Karai Kasang a myit ra ai lam hpe ninghkap nna sadan a gumlau ai hpang hkan nna tinang hkum kabu pyaw ai lam hpe jasum kau ra ai.

 

Dai majaw Yesu Madu hkum nan nat sadan hpe “ndai mungkan ga na Duwa” ngu shamying da ai (Yh 12: 31). Kalang marang nat sadan gaw shinggyim masha a wenyi hpe sha n ga, hkum hkrang hta pyi shang nna jahten chye nga ai. Raitim, masha langai kaw nat shung ai ngu loi loi hte n mai hkap la ga ai.

 

Shinggyim masha ni hkam la ai hku n re ai sha, sadan gaw anhte hpe loi loi hte sha dingbai dingna jaw n lu ai. Ana ahkya, shing n rai, si hkrung si htan gaw sadan jahten ai a majaw gaw n rai nga ai.

Sadan gaw anhte saw saga ai lam nnga ai sha anhte a wenyi hpe dingbai dingna n lu jaw ai. Anhte ni sadan hpe loi loi hte hkap la ai a majaw she sadan a gunlau ai gaw anhte hpe jam jau jaw ai rai nga ai. Dai gaw sadan a kungkyang ai lam langai rai nga ai.

 

Shinggyim masha hpe Karai Kasang hpang de woi la ai laklai Myithoi

Chyum mungga daw langai hta Moses gaw shi hpe Karai kasang ga sadi tawn da ai Canon mare de shaning 40 na hkawm sa nna dai mare hpe mu ai shaloi Yaweh Karai Kasang a ntsa ga sadi dung nga na matu shi a myusha ni hpe sadum da ai.

 

Shi a lit magam kade yak ai gaw Moses shi sha chye na re. Mara a majaw Yaweh Karai kasang kaw na hka matu ai ni hpe shi hpang de bai kayin wa na matu chyahkring hkring bai shaga la ra ai.

 

Moses si mat ai hpang raitim, myit n htum na matu; ningbaw ningla ni hte myihtoi ni hpe shi zawn sha Karai Kasang a yaw sin ai lam hpe madun na hte mara hta hkawm ai shaloi mung bai shaga la na matu Yaweh Karai a mying ningsang hta shanhte hpe htep da ai.

 

Moses gaw shi hta grau ai Myihtoi langai mi paw pru wa nna, Yaweh Karai Kasang hpe asan hkrak chye lu na hte Karai Kasang hpang de sa ai lam hpe sin lum ai hku hkawm woi na ra ai lam numhtet ga jaw da ai. Moses gaw du sa na ra ai Messiah hkye la madu hpe tsun ai rai nga ai.

 

Moses a numhtet ga hpa dum hprang nga ai Yuda myusha ni gaw Yawhan Baptista du sa ai shaloi shi hpe Messiah rai na re ngu htang ma ai hte shi hpe san yu ma ai. “Nang kadai rai nta” “dai myihtoi n rai n ni” ngu shi hpe san ma ai (Yh 1: 19-21). Yawhan mung “ngai n rai nngai” ngu bai htan ai.

 

San Petru gaw lagaw lata katsing si ai wa hpe shamai ai shaloi, “Moses hkaw da ai wa” ngu Yesu a mying gang let shamai ya ai (Kasa 3: 22). Stephen mung shi hpe nlung hte kabai sat maw ai shawng hta dai hte maren tsun da ai, (Kasa 7: 37).

 

Mungkan ga de Yesu Madu yu sha wa ai gaw mara a mayam prat kaw na shinggyim masha ni hpe hkye la na matu rai nga ai. Yesu Madu gaw shinggyim masha yawng hpe Karai kasang a up hkang ai n pu hta nga shangun na matu, shing n rai, Karai Kasang a ja mungdan de woi bang la na matu ningshawng tai ya ai.

 

Yesu Madu gaw sadan a mungdan hpe Karai Kasang a ja mungdan shatai na matu yu sa wa ai.

 

Adam yan Eve n madat mara ai a majaw Karai Kasang gaw Sadan hpe matan let shinggyim masha ni a ntsa awng dan ai lam gaw htani htana gring nga na re ngu hkaw da ai. Lani mi na nhtoi hta masha langai du sa nna sadan hpe dang kau na ra ai; shi gaw sadan baw hpe kabye nna jahten kau na ra ai.

 

Ningpawt Ninghpang 3: 15 hta, “Ngai gaw nang hte shinggyim mumsha a lapran hta mung, na a amyu matu hte shi a myu matu hpe mung n ju n dawng shangun nna galoi mung gumlau hpyen atai shangun nga na nngai. Shi a amyu matu gaw na a baw hpe abyep nna nang mung shanhte a lahtin hpe achye na ra ai,” ngu nna tsun wu ai.

 

Ndai kaw hkye la madu a awng dan lam hpe tsun shalawm da ai. Shi gaw anhte zawn sha shinggyim hkum sa la nna, numsha langai kaw nna shangai na wa rai nga ai. Raitim, Sadan gaw laja lana rai dingbai dingna jaw nga na rai nna asum loi loi hte jaw na n rai nga ai.

 

Yesu Madu Sadan hpe nam maling hta awng dang kau ai. Yawhan Baptista a lata hta kashin kamun hkam la ngut ai hpang Yesu Madu hte Sadan yan majan byin ai lam tsun da ai. Masum lang tup Sadan gunglau ai hpe dang kau ai. Sadan gaw Yesu Madu hpe loi ai lam hpe sha hkan na matu gunglau ai. Lk 4: 13 hta, “Nat gaw, Yesu hpe gunglau ai lam yawng shatup ngut jang, shi kaw na tawng marang mi pru nna nga nga ai.” Lachyum gaw nat sadan gaw ahkaw ahkang nga yang bai sa gunglau na hpe tsun ai rai nga ai.

 

Yesu Madu shi a prat ting hta nat sadan hpe matut matut nna awng dang kau ai. Nat sadan gaw Yesu a prat ting hta gunglau lai wa ai. Dai zawn gunglau ai hta arawng ana lu ai ni, Yuda hpung salang ni, bai kasa ni hkum hkun nna lam amyu myu hpe jai lang nna gunglau ai.

 

Yesu Madu mung hpyen wa sadan a gunglau ai lam amyu myu hpe hpung ja dik ai ningbaw langai mi zawn rai awng dang kau lu ai.

 

Yesu gaw shinggyim masha ni a wenyi hta kap nga ai mara ni hpe raw kau ya ai hte Sadan hpe dang kau ai. “Sha e, na yubak dat kau ya sai” (Mk 2: 5).

 

Yesu madu gaw machyi ai masha ni hpe ana ahkya shamai ya ai hte mara hpe mung raw dat ya ai. Mk 1: 34 hta, “Yesu gaw ana ahkya amyu myu hte machyi ai masha law law hpe shamai ya nna, nat law law hpe mung shaden kau mu ai.” Ndai laban na la ai chyum laika hta mung n san n sen ai nat kap masha langai kaw na nat hpe gawt shapraw kau ya ai (Mk 1: 23-27).

 

Yesu Madu hte nat sadan yan a hpang jahtum gasat ai majan gaw wudang ntsa hta rai nga ai.

 

Yesu Madu gaw nat sadan hpe Wudang ntsa hta jahtum htum hkra gasat dang kau ai rai nga ai. Sadan gaw Yesu Madu hpe wudang ntsa jan sat kau na matu Yuda myusha ni hpe gunglau ai. Yuda masha ni Yesu hpe wudang hta jan sat kau ai raitim, Yesu Madu Sadan hpe dang kau ai.

 

Yesu Madu nni nkri hkam let si hkam ai a marang e, myit malai lu ai ni a mara dat hkyam sa lu la ai. Adam yan Eve shut hpyit mara a majaw shamat kau ai Karai jaw ya ai asak hpe Yesu Madu hta kam sham ai a marang e bai lu la ai.

 

Yesu Madu hte nat sadan yan a majan gaw Hkristan masha shagu a myit masin salum hta matut byin taw nga ai.

 

Yesu Madu hkum nan wudang ntsa si hkam ai a marang e, sadan hpe ngut du hkra dang manga kau sai re. Raitim, dai awngdang lam gaw anhte marai hkum shagu hta hpringtsup nga ra ai.

 

Nat sadan gaw anhte hpe mara matut galaw na matu matut gunglau taw nga ai. Nat sadan a agung alau hpe dang kau lu na matu laknak kaba ni rai nga ai akyu hpyi ai lam, chyum laika hti ai lam hte sakramentu ni hpe mawn mawn hkam la ai lam ni galaw ra ga ai. Kaga mai kaja lam ni hku nna mung sadan a agung alau ni hpe dang lu na matu garum ya ai. Hkristan masha langai mi gaw sadan hpe asum jaw ai shaloi she hkrat sum ai rai nga ai.

 

Hkristu gaw nat sadan hpe mungkan htum ten du hkra, hpang jahtum aten du hkra awng dang ai wa rai nga ai.

 

“Dai hpang, shanhte hpe hkalem ai Nat mung, wan hte kan grung ai nawng hta jahkrat bang kau ai hkrum wu ai. Shanhte gaw shani shana nni nkri hkrum let, htani htana prat dingsa arawng nga lu na mara ai,” (Yawhan a Shingran Laika 20: 10).

 

“Shi gaw shanhte a myi hta na myi prwi pru mapru yawng katsut kau ya na ra ai: htawm hpang de si hkrung si htan ngu ai n nga lu na sai; sharung shayawt, hkrap ngu hkrap ngoi ai hte machyi makaw, hki si ba si ai mung n nga lu na sai. Shawng na byin ga ai lam dingsa nga manga hte gaw hkoi mat sa sai,” (Yawhan a shingran laika 21: 4).

“Dai hpang e jahtum ladaw du na ra ai; dai shaloi e Hkristu gaw up madu sha nga ai wenyi minla ni, ahkang aya lu ai ni hte hpung dagu yawng mayawng hte hpe dang kau nna, dai mungdan hpe Kawa Karai Kasang a lata de ap ya na ra ai,” (1Kor 15: 24).

 

Akyu hpyi saga

Wa Karai Kasang e, anhte hpe gunglau ai nat sadan hpe dang kau lu na atsam nang Madu hta kam sham ai a marang e hkam la lu ai hpe dum chye let dai makam hta ngang kang let hkawm sa lu na chyeju jaw ya rit. Anhte a Madu Hkristu a marang e hpyi nem nga ga ai.  Amen.

 

Hkristu hta tsaw ra ai hkung ga ai Tara hkaw sara/num ni hte nu wa hpu nau ni e, ndai laban gaw Pranwan ladaw hta (4) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) Tara Jahprang 18: 15-20

Chyum Mungga Daw (2) 1Kor 7: 32-35

Kabu Gara Shiga Mk 1: 21-28

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.

 

Wa Jau Patrick Gawmaw Hkawng Yae