Karai Kasang A Mungga - Pran Wan Ladaw Laban 3,2020

Pranwan ladaw (3), B, 2020

         Hkristu hta tsaw ra ai nu wa hpu nau ni e, ndai laban gaw Pranwan ladaw hta (3) ngu na laban rai nga ai.

Galai shai na aten rai sai

Laban shani shagu na Chyum laika hpe sang lang ai hta Nawku Hpung kaw nna lata masat da ai chyum daw hte hpang ai re.

Ndai laban gaw Marku 1: 15 hta na rai nga ai. “Dai  aten ladaw dik wa ai hte, Karai Kasang a mungdan gaw ni wa magang ra ai! Nanhte a yubak mara ni kaw na kayin wa nna Karai Kasang a Kabu Gara Shiga hpe kam sham nga mu!”

Yona hpyi shawn ai lam

Ga Shaka Dingsa na Yona a lam anhte ni chye ga ai. Yona a laika gaw “sumroi laika” sha rai nga ai. Kaga masha ni chye na yak ai lam hpe tsun sang lang dan na matu anhte ni gaw “sumroi laika” hpe jai lang nna tsun dan chye ga ai.

Karai Kasang gaw anhte shinggyim masha ni hta grau ai sharin shara rai nga ai. Ga Shaka Dingsa prat hta na masha ni chye na yak ai sharin ginlam hpe masha langai ngai hku Yona laika hpe ka shangun nna sharin shaga da ai rai nga ai.

Karai kasang gaw shinggyim masha yawng mara dat hkyamsa hkam la lu na matu myit malai lu shangun mayu ai.

Karai Kasang gaw myit malai lu ai ni hpe mara dat ya na galoi mung jing jing rai nga ai. Anhte yawng gaw Karai Kasang a kashu kasha ni rai ga ai.

Yona hte shi prat na Yuda myusha ni lapran ningmu n bung hkat ma ai. Syria mung na Ninewe mare masha ni gaw Israel myusha ni hpe sawn n lu ai mayak manghkang amyu myu jaw ma ai.

Yona a ningmu hta “Karai Kasang gaw n hkru ai ni hpe mara dat ya ai gaw n tara ai re ngu hkam la lai wa ai. Dai majaw, Karai Kasang shi hpe Ninewe mare masha ni mara hta na kayin wa na matu sa du hkaw tsun shadum na matu shangun ai shaloi Palestine mungdan masha ni n chye ai dingda Spain kaw nna Tarshi de sa ai sanghpaw hta hkan mat ai.

Panglai hta laru kaba wa nna hkalen hta wa ai majaw shagawn yu ai shaloi Yona a majaw dai zawn byin ai re hpe chye lu ai majaw, Yona hpe panglai hka de kabai jahkrat bang da ma ai. Nga kaba langai mi shi hpe mayu la ai. Masum ya na jang dai nga gaw shi hpe panglai hka hkingau hta bai madawn shale da ai.

Yaweh Karai kasang mung Yona hpe myit galu kaba ai hte kalang bai shangun dat ai. Yona mung myit lawm n lawm rai madat mara ai. Ninewe mare de sa ai raitim, masha ni myit malai lu na matu n galaw ai sha, hten run mat shangun mayu ai myit masin hte sha shadum da nna, makoi lat yu taw ai.

“Nhtoi mali shi ya laman, Ninewe mare hen run mat na ra ai” ngu nna jahtau tsun wu ai (Yona 3: 4).

Karai Kasang shanhte hpe mara dat ya na matu jing jing rai nga ai, ngu ga hkaw mi mung n tsun ai sha, laja lana re ai mara dam hpe sha tsun dan ai. Shi gaw Karai Kasang a hkang da ga hpe ningdang ai lam n nga ai sha, masha ni kaw na Madu Karai Kasang a hkang da ai hpyi sawn lam hpe gaw makoi magap da nna, shanhte hpe jahten sharun mayu ai myit hpe sha shadan shadawng ai zawn rai nga ai.

Raitim, n myit mada ai sha, Ninewe mare masha ni, moi na htung lai nga ai hte maren, shanhte myit malai lu sai hpe madun na matu kaba grau ai kaw nna kaji htum ai wa kaw du hkra, masha shagu lachyit nba hpun let lusha gam na matu daw dan da nga ma ai hte maren galaw ma ai. Karai Kasang mung shanhte a mara hpe dat ya nna hkye hkrang la ai.

Yona gaw myit n pyaw ai hte Karai Kasang shpe marawn jahtau let aput angun di mu ai. Shi gaw Ninewe mare masha ni myit malai lu nna mara dat hkyam sa hkam la na hpe myit tsang lai wa ai.

“Madu e, ngai nta kaw na garai n pru sa wa yang, nang ndai hku galaw na nit dai ngu nna ngai tsun ni ai n rai ni? Dai re ai majaw nye a matu kaja htum ai lam rai u ga ngu nna Spain mung de hprawng mat wa nngai! Nang gaw tsaw ra ai, matsan dum ai, myit galu kaba ai, n gaw n wai ai hte galoi mung ari jaw na hkyen ai myit hpe galai kau na jin nga chyalu re ai Karai Kasang rai nga ndai,” (Yona 4: 2).

Karai Kasang gaw Yona hpe sharin shaga nna, Ninewe mare masha ni mung Shi tsaw ra ai kashu kasha ni re ai lam, shanhte a matu mung tsang nga ai lam tsun dan nna chye shangun ai.

Yona gaw shinggyim masha shada da lapran kaning re myit rawng chye ma ai hpe danlen dik ai hku tsun dan ai rai nga ai. Shinggyim masha ni gaw kaji dik ai hta pyi mara dat ya na matu yak ma ai. Karai kasang a matsan dum lama ai hpe chye na na matu shi hta yak nga ai.

Karai kasang a matsan dum lama ai hpe Yona chye na ging ai rai nga ai. Shi n madat mara ai a majaw Karai kasang gaw shi hpe mara n shagun ai sha hkam sharang let hkye la ai. Bai nna mung, Ninewe mare masha ni myit malai lu na matu mung shi hpe matut hkaw tsun shangun ai. Dai hpe grai li ai lit magam re ngu n mai myit la ai.

Karai kasang gaw Yona hta madat mara ai masha langai ngai hpe shangun dat mai nga ai. Karai Kasang she matsan dum lama ai shawang myit kaba n nga ai rai yang, Yona gaw Karai Kasang kaw na htani htana tsan gang mat na teng sha rai nga ai.

Yesu Madu a hpyi shawn ai lam

Prat shagu na shinggyim masha ni hpe Karai Kasang hpyi shawn ai gaw Yona hpe hpyi shawn ai hte n shai nga ai, maren sha re ngu tsun mai nga ai.

Mk 1: 15 hta, “Dai aten ladaw dik wa ai hte, Karai Kasang a mungdan gaw ni wa magang ra ai! Nanhte a yubak mara ni kaw na kayin wa nna Karai Kasang a Kabu Gara Shiga hpe kam sham nga mu,” ngu nna Yesu Madu hkaw dan mu ai.

Yesu Madu gaw masha hkum shagu hpe saw shaga nga ai; n gun jaw nga ai; hpyi shawn nga ai. Dai gaw mara dam jaw na matu, jeyang na matu n rai nga ai. Karai Kasang a ja mungdan de shang lu na matu tsaw grau ai myit mada bandung nga nga ai hpe madun ai she rai nga ai.

Yh 12: 31 hta, “Ndai mungkan ga gaw, ya jang pyi tara jeyang ai hkrum, nga sai. Ya ndai mungkan up ai Duwa gaw shinggan de kabai kau ai hkrum na rai sai,” ngu shadum da ai.

Mungdan shagu gaw hkawhkam a myit ra ai hte maren rai ra ai. Ya na Hkawhkam ningnan gaw nga taw sai. Ngai gaw Hkawhkam rai nngai. Mara hpe tawn kau nna nanhte a hkye la na Kawa Karai Kasang a n pu hta shang mu. Dai gaw ngai du sa wa ai a yaw shada ai lam re ngu Madu Yesu tsun ai rai nga ai.

Yesu madu gaw anhte yawng lagaw lahkam lahkawng hpe gwi gwi htawt na matu saw shaga ai. “Myit malai lu mu” ngu ai gaw mara hpe kau da na matu rai nga ai. Dai gaw galai shai lam hpe tsun ai rai nga ai. “Kabu Gara Shiga” hpe hkap la mu ngu ai gaw Madu shi hkum nan sharin shaga ai (hkang da ai) hpe hkap la nna shi hpang hkan na matu tsun ai rai nga ai.

Galai Shai Ai Lam

Galai shai ai lam ngu ai gaw tinag a lagaw lahkam yawng ai lam hpe galai shai kau ai lam rai nga ai. Shinggyim masha gaw mara galaw ai a majaw, Karai Kasang kaw na tsan ai hte pru mat ai rai nga ai. Galai shai ai ngu ai gaw Karai Kasang hpang de ni htep lu ai made ni htep grau lu hkra bai n htang wa ai lam rai nga ai.

Dai gaw Karai Kasang a ja mungdan du mayu ai ni hta n galaw n mai ladat nan rai nga ai. Anhte mara hta naw lup nga ga ai rai yang Yesu madu a hpang hkan ni gara hku mung n mai tai ga ai. Mara gaw Madu Yesu a hpang hkan na matu pat shingdang ai dingbai dingna kaba nan rai nga ai.

Karai kasang gaw kadai hpe mung kabai da ai lam nnga ai sha, galai shai na matu saw shaga nga ai. Chyum laika buk yawng hta myit malai lu na matu saw shaga nga ai. Karai Kasang gaw Myihtoi ni hku nna shinggyim masha ni mara kaw na shi hpang de kayin wa na matu saw shaga nga ai. Galai shai ai lam gaw Karai Kasang aten shagu anhte hpe saw shaga ai ga rai nga ai.

Raitim, anhte dum chye da ra ai gaw, mara a matu kalang sha myit malai lu ai hte n hkum tsup shi ai. Mara gaw anhte hta noi kap taw nga ai. Karai Kasang kaw na anhte ni hpe galoi mung jahka ya taw nga ai majaw Karai Kasang hpang de bai htang wa na matu aten shagu shakut ra ga ai.

Mara hpe kau da ai wa hta Karai Kasang a hpung dagu hte matsan dum lama ai gaw htoi tu nga na re. Karai Kasang chye sha shinggyim masha ni a myit hta myit malai lu na matu shadut ya lu ai. Karai kasang gaw Yona hte Ninewe mare masha ni hpe mara hta na kayin wa na matu shadut ya ai. Masha hkum shagu hpe mara hte sadan a lata kaw nna hkye la na matu Karai Kasang a hpung dagu hte matsan dum lama ai lam hpe ra kadawn ai. Raitim, teng ai lam langai gaw, Karai Kasang shinggyim masha ni a masin salum hta shadut shagyen nna shang na nre ai. Madu gaw shinggyim masha ni myit malai lu na matu garum ya ai; shadut ya ai. Hkap la ai ni gaw mara dam hta na lawt lu na, shing nrai, n hkap la ai ni gaw mara hta naw lup nga ra na rai nga ai. Anhte hpe Madu gaw shang lawt ai myit jaw bang da sai rai nga ai.

Karai Kasang gaw myit malai lu ai wa hpe mara dat ya na matu jing jing re. Karai Kasang gaw anhte hkum hpe anhte myit lawm ai hte grau myit shang sha ai wa rai nga ai. Masha hkum shagu hta myit malai lu ai rai jang Karai Kasang mara ndat ya lu ai ram nan n hkru ai ngu nnga ai. Yona gaw hkap la na matu jing jing n re ai gaw Karai Kasang a myit masa hpe n chye ai majaw rai nga ai. Karai Kasang a lam gaw shinggyim masha a lam n rai nga ai.

Yesu Madu gaw anhte Kabu Gara shiga hpe hkap la kam sham na matu saw shaga nga ai ngu tsun ai gaw hpa lachyum rai ta? Shi hpe kam sham ai ngu tsun ai gaw shi hpe kam hpa ai lachyum rai nga ai. Shi tsun ai lam yawng hpe teng man ai ngu hkap la ai. Kabu Gara Shiga hpe hkap la ai, Yesu Madu hpe kam sham ai ngu ai mung dai hte maren rai nga ai.

Kabu Gara Shiga hpe hkap la ai ngu tsun ai gaw Hkristu Madu a sharin shaga ai lam ni hpe hkrak tup hkap la ai; Shi a tsaw ra myit hpe kam shut lam n nga ai; kaja wa sha kam sham ai ngu ai rai nga ai.  Lachyum gaw anhte hta byin ai lam yawng, anhte madu lu ai lam yawng shi kaw hpring tup ap da ai ngu ai rai nga ai. Anhte ni pyit ngwi myit pyaw lam matu Madu Karai ra sharawng ai hpe kam ai rai nna, tinang hkum hpe dai Madu hta ap da ai rai nga ai. Karai Kasang a tsaw ra myit kaba hte anhte hpe shi myit ra ai hte maren lam woi ya na matu ap da ai rai nga ai. Chyum laika hte maren tsun ga nga yang, anhte hkum hpe Madu Yesu kaw ap tawn da ai lam gaw “Karai Kasang a ja mungdan shang ai lam” ngu ai rai nga ai.

Yesu gaw Andrew hte Petru, Yawhan hte Yaku ni hpe shaga ai shaloi ndai hku tsun da ai. “Yesu gaw shanhte hpe Ngai kaw hkan marit, masha hpe hkan hkwi na matu, ngai nan hpe sharin ya made ga ngu mu ai. Shaloi jang shan gaw sumgawn ni hpe kau da nna shi kaw hkan nang ma ai,” (Mk 1: 17).

Shanhte mung Yesu kaw na sanglang dan ai lam ni hpe n hpyi ma ai. Shanhte dum nta masha ni a matu ra mara lam hpe n sumra ma ai. Shanhte tawn kau da ra na, jahka kau da ra na lam ni hpe n sumru ma ai. Tsun ga nga yang Yesu Madu lajang ai lam hta shanhte yawng ap da ma ai rai nga ai.

Hkristan ni a matu mungkan sutgan ni ahkyak ai kun? Kasa ni gaw shanhte a matu Yesu Madu masin mahkyen jahkrat da ai hpe kaja wa sha nan hkap la ma ai. Yawng gaw Hkristu hpang hkan na matu shanhte a kun dinghku nta masha ni hpe kau da ma ai. Kabu Gara Shiga ni hpe du sa ai shara shagu hta hkaw tsun ma ai gaw mai byin na kun?

San Pawlu Korintu hpung masha ni hpe n gun jaw da ai mungga hpe yu yu ga. Shi a laika hpe hkrak chye na na gaw anhte a matu ahkyak nga ai. Hkristan ni gaw kun dinghku nta masha langai zawn rai nga ai. Dum nta, wang, yi sun hkauna nga ai. Asuya magam gun ai ni shata kumhpa lu ma ai. Hkristan nre ai ni zawn sha prat galu kaba wa na matu shakut ma ai.

Raitim, Korintu kaw na Hkristan hpung masha ni tara maigan myusha ni zawn mungkan sutgan ni hpe ra marin ai lam n nga na matu San Pawlu shadum n gun jaw da ai hpe mu lu ga ai. Hkristan hpung masha ni a hpang jahtum bandung gaw Hkristu hta myit machyu jung nga ra ai. Shanhte jai lang ai lam ni yawng gaw dai bandung de du lu na matu sha rai ra ai.

Tinang a ningrum ningtau hpe tsaw ra ai hta Karai Kasang hkang da ai hte maren tsaw ra ra ai. Raitim, Hkristu Madu hpe na a ningrum ningtau, na a kashu kasha ni hta grau manu shadan ra ai; grau tsaw ra ra ai. Na a kun dinghku masha ni gaw nang kaw na Hkristu hpe n la kau ya na, n jahka kau ya na matu sadi ra ai.

Anhte ra marin ai kabu pyaw lam gaw Hkristu Madu hta sha nga ai. Hkristu hpe jasum kau ai rai yang gaw galoi mung shabai la n lu ai yawnhkyen lam hpe hkrum sha ra na teng sha re. Nang hta nga ai yi sun hkauna, sun wang dum nta hte ja sutgan a matu Karai Kasang hpe chyeju dum nga mu. Yawng gaw Karai Kasang kaw na chyeju ni re. Raitim, dai sutgan ni gaw ntsa lam sha rai nga ai. Anhte Madu la ra ai teng man ai sutgan gaw Hkristu hkum nan rai nga ai. Hkristu hpe jasum kau ai sutgan gaw anhte a matu hpa akyu nga na rai.

Hkristan ni gaw Hkristu Madu hpe myit mada ala nga ai ni rai ga ai. Prat gaw htum lawan nga ai. Ahkyak dik ai gaw ndai prat n re, Hkristu hte htani htana rau nga nga lu na hpang na prat she rai nga ai.

Akyu hpyi saga

Wa Karai Kasang e, anhte Hkristan masha ni a matu ahkyak dik ai Hkristu hte shi gun sa ya na htani htana asak lu la na matu du sa na ra ai Madu Karai hpe myit masin san seng chyoi pra ai myit hte aten shagu jing jing la nga lu na chyeju jaw ya rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra ai hkung ga ai Tara hkaw sara/num ni hte nu wa hpu nau ni e, ndai laban gaw Pranwan ladaw hta (3) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) Yona 3: 1-5, 10

Chyum Mungga Daw (2) 1Kor 7: 29-31

Kabu Gara Shiga Mk 1: 14-20

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.

Fr.Patrick Gawmaw Hkawng Yae

Rva- Jinghpaw Coordinator