Karai Kasang A Mungga - Pran Wan Ladaw Laban 30, 2021

Karai Kasang A Mungga

Hkristu hta kam sham ai gaw nhtoi mu lu ai hte bung ai

 

Hkristu hta tsaw ra ai nu wa hpu nau ni e, ndai laban gaw Pranwan Ladaw hta (30) ngu na laban rai nga ai.

Palestine mungdan hta myi n mu ai, myi kyaw ai ni grai law lai wa ai lam chye lu ai. Ga Shaka Dingsa prat na Myihtoi ni a myihtoi ga hte maren myi n mu ai ni hpe myi mu shangun ai gaw Messiah du sa ai kumla langai rai nga ai (Is 35:5; Shk Kd 146:8; Mt 11:5). Kabu Gara Shiga Chyum laika hta Yesu Madu myi n mu ai ni hpe shaman nna myi shamu ai, manga lang shabyin ai hpe mu lu ga ai. (1) Jairus a kasha num ma hpe jahkrung sharawt ai hpang myi n mu ai masha marai lahkawng hpe shamai ya ai (Mt 9:27-31). (2) Myi kyaw ai hte n chye shaga ai nat kap ai masha langai hpe shamai ai lam Mt 12:22 hta mu lu ai. (3) Betsaidader mare hta myi kyaw ai wa hpe shamai ai lam Mk 8:22 hta mu lu ai. (4) Yerihko mare hta myi kyaw nna hpyi sha ai Bartimi-yas (Bartimaeus) ngu ai wa hpe shamai ya ai lam Mt 20:29-34; Mk 10:46-52; Lk 18:35-43 ni hta mu lu ai. (5) Kanu a hkritung kaw nna nan myi kyaw ai wa hpe shamai ya ai lam Yawhan a Kabu Gara Shiga daw kaba jahku (9) hta mu lu ga ai.

Dai zawn tsi shamai ya ai lam ni kaga mabyin ni mung byin lai wa ai lam Chyum Laika hta nan tsun da nga ai. San Luka ka da ai rai nga ai, “Yawhan a kasa yan hpe Yesu htan mu ai gaw, wa nna Yawhan hpe nan mu lu, na lu ai lam ni tsun dan mu, myi n mu ai ni myi bai mu lu ma ai,......(Lk 7:21). Shawng na Hkristan ni gaw ndai mabyin ni hta na, grau nna, Bartimaeus hte kanu a hkritung kaw nna myi n mu ai yan hpe shamai ai mabyin hpe ahkyak kaba hku myit la, hkam la ma ai. Dai shamai ai lam ni hpe mungga hkaw tsun ai hta ga baw ginlang hku jai lang ma ai.

Hkristan makam hpe jasum kau yang, anhte ni nsin htawng hta hpa mung n mu lu ai sha hkawm sa nga ra na; Makam masham gaw Karai Kasang a chyeju kum hpa hte mau hpa matsan dum lama ai apu asi rai nga ai. De a matu anhte ni Karai Kasang hpe aten shagu chyeju dum ra ai.

 

San Marku tsang hte tsang tsun hkai dan ai lam

 

Chyum laika sara ni hta na San Marku langai chyu sha dai myi n mu ai wa hpe Bartimaeus ngu shamying da nga ai. Aramic ga “Bar” ngu ai ga  gaw “kasha” “a kasha” ngu ai lachyum rai nga ai. “Timaeus a kasha” ngu lachyum rai nga ai. Masha langai ngai a kasha ngu dan dan len len tsun dan mayu ai shaloi jai lang ai ga si rai nga ai.  

 

Myi n mu ai wa gaw “David a kasha Yesu e, Ngai hpe matsan dum la e law” ngu nsen kaba hte jahtau ai. Lachyum gaw Yesu Madu gaw Messiah rai nga ai hpe kam ai majaw “ngai hpe matsan dum la e law” ngu tsun ai rai nga ai. Ndai gaw Yesu hte Shi a lam kaji kajaw sha na chye da ai rai tim, n dum shami, n myit mada ai sha kam sham ai lam hpe yin la ai rai nga ai.

 

Shawng de Yesu hpe Messiah ngu shaga ai shaloi, dai lam kadai hpe mung n tsun dan na matu Yesu sape ni hpe ginhtim da sai rai nga ai (Mk 1:3; 3:12; 5:43; 8:30). Raitim, ndai myi kyaw ai wa gaw Messiah ngu dan dan len len tsun hpaw wa ai; aten du sai majaw Yesu ahkang jaw ai mung rai nga ai. Hpang shani kade nna yang Yerusalem mare de shang wa ai shaloi mung Messiah ngu tsun shapraw na hpe ginhtim da ai lam n galaw sai rai nga ai (Mk 11:9-10). Yuda salang ni san jep ai shaloi Yesu hkum nan hkam la ai majaw mung si dam hkam la ra ai lam Mk 14:61-64 hta ka da nga ai.

 

San Marku chyum laika hte maren, myi kyaw ai wa dai zawn marawn jahtau ai gaw makau grupyin masha ni a matu dingbai dingna tai ai lam San Marku shadan dan ai mung rai nga ai. Myi kyaw ai wa gaw shi a makau grupyin hta Yesu hpe chyu sha madung da wa ai hpe mu lu ai. Yesu a ntsa kam sham ai lam nan rai nga ai.

Myi kyaw ai wa, “Yesu e” ngu shaga ai gaw dai myi kyaw ai wa a myit mada lam anhte hpe mung hkam sha shangun na matu San Marku yaw shada nna ka shalawm da ai rai nga ai. Hpyi sha taw ai dai myi kyaw ai wa gaw shi hpun nba tawn kau da let langai ngai shi hpe Yesu hpang shaga woi sa na hpe ra sharawng nga ai. Shi hpyi sha nna lu da ai gumhpraw hta myit manoi ai lam n nga sai.

 

San Marku gaw Yesu Madu a matsan dum lama ai hpe mung hkam sha shangun ai. “Ngai na a matu hpa di ya na ra nta?” ngu Yesu Madu san ai (Mk 10:51). Dai ga san hpe na lu ai ni anhte gaw, shi myi mu mayu ai hta lai nna kaga n nga ai ngu Yesu hpe tsun na ga ai. Rai tim, Yesu gaw dai myi kyaw ai wa hte anhte kaw nna lang mi bai na mayu ai majaw san ai ga san rai nga ai. San Marku, dai myi kyaw ai wa a ga hpe Aramic ga hte ka da ai gaw dai wa a hpyi nem hpyi shawn ga gaw grai ra marin ra sharawng ai hte hpyi shawn ai hpe shadan dan mayu ai majaw rai nga ai. “Rabi, Sara e, ngai myi bai mu mayu nngai law,” (Mk 10:51). Shi a hpyi nem ai ga gaw akyu hpyi ga rai nga ai. Kam sham myit mada ai mung rai nga ai. Yesu Madu hpe kam hpa ai majaw mung rai nga ai.

 

San Marku gaw, Myi kraw ai wa myi bai mu lu ai hpang, anhte hpe matut tsun ai “shaloi jang dai wa gaw myi mu lu nna Madu sa wa ai lam e shi kaw hkan nang nga ai,” ngu ai rai nga ai (Mk 10:52). Bartimaeus gaw hkum hkrang hte seng ai myi hpe mung bai mu lu ai; wenyi hte seng ai myi hpe mung mu lu ai rai nga ai. Dai gaw Yesu Madu a hpang bai hkan nang sa ai sakse nan rai nga ai.

 

Moi shawng na Hkristan ni Bartimaeus hpe shamai ai lam sumru woi ai hta myit lawm myit shang sha ma ai

 

Myi kyaw ai ni gaw Hkristu hpe n mu hkrum, n kam sham shi ai shaloi, wenyi lam hta matsan mayan rai nga ma ai. Shanhte n myit mada lu ai matsan dum lama hpe Yesu Madu hta kam sham ai a marang e, shanhte ni mau hpa hkam la lu ma ai. Yesu Madu gaw hkye la madu hku, shangun ma magam hte dau jau ai a marang e shanhte hta laklai galai shai lam hkam la lu ma ai.

 

Hkristu hta kam sham ai lam yawm ai masha yawng gaw wenyi lam hta myi n mu, myi kyaw rai ma ai. Kam sham myit n rawng ai ni gaw Yesu Madu lai sa wa ai hpe mung n mu, tinang a prat hta hkam sha ai lam mung n nga rai ma ai. Shanhte a matu Karai Kasang lajang da ai masing hpe n mu lu ma ai. San Pawlu gaw, kam sham myit n rawng ai prat gaw lachyum n nga ai sha n ga, mara mung rai nga ai ngu tsun shadum sadi jaw da nga ai. Hpa majaw nga yang, nang mak law hpa, arawng mala, gawng ba nna pyaw daw kadaw myit gaw anhte hpe Karai Kasang hte tsan gang shangun ai rai nga ai.

 

Hkristu gaw Shi hpang sa na matu masha shagu hpe shaga nga ai; lam amyu myu hku, ladat amyu myu hte shaga nga ai.

 

Masha langai hta Yesu Hkristu a shaga la ai hpe hkap la na matu hkap la hkan sa ra ai lam lahkawng nga ra ai. (1) Shi gaw myi kyaw ai, matsan mayan re ai, mara kap ai, n jing n ngut ai wa re ai hpe hkap la nna Yesu a matsan dum hkye la ai hpe shagrit shanem ai hte hpyi nem ra ai. (2) Yesu Madu chyu sha tinang hpe hkye la lu ai wa re hpe kam sham ra ai.

 

Myi kyaw ai wa hpe, masha ni, “myit pyaw kabu nga nu. Rawt u, Shi nang hpe shaga nga ai” ngu sa tsun dan ma ai (Mk 10:49).

 

Hkristu hte hkrum katut ai shaloi, anhte hta laklai kaba dik galai shai ai lam byin wa ai. Kashin kamun hkam ai shaloi, wenyi myi hpaw wa ai. Karai Kasang a mai kaja ai lam, matsan dum lama ai lam, tsaw ra ai lam ni hte lajang da ai sumsing mungdan lam ni hpe Hkristu Madu hta kam sham ai a marang e mu lu ga ai. Dinghta mungkan ntsa nga manga yawng hpe kaja ai hku mu lu ai hte Karai Kasang a tsawra ai hpe mung mu lu ai. Grau nna gaw, shinggyim masha ni Karai Kasang a hpang hkan nang nna, Shi a sape ni tai wa let shawoi hkan shatup yak ai ngu hkam la ai tara lam ni hpe kabu pyaw ai hte hkan shatup lu ai, gun hpai lu ai.

 

Hkristu Madu chyu sha anhte ni shi hta kam sham ai a marang e hkye hkrang la lam jaw ya ai

Bartimaeus gaw shi myi mu lu hkra shamai ya lu ai gaw Yesu Madu langai chyu sha re ngu hpring tup kam sham ai. Dai majaw shi jahtau hpyi shawn ai hpe mara shagun ai ni hpe n hkrit n gaya ai sha matut marawng jahtau hpyi nem ai. Kaja wa nan shi a myi bai mu lu ai.

 

Ndai laban na chyum daw langai hta Myihtoi Yeremiah gaw maigan mung de mayam yam hkawm ra ai Israel myusha ni hpe shiga langai jaw ai. Karai Kasang gaw n -gun lagaw n rawng ai myusha ni hpe Shi a mungdan de bai shaga la na lam, myi kyaw ai ni, lam n lu hkawm ai ni, gaida num ni, sasana ma ni, ma hkum hte re ai myu shayi ni, hkrun lam galu n lu hkawm ai ni hpe tsun shana ya ai.

 

Karai Kasang a Kasha shingtai Yesu Hkristu hpe yaw shada myit hte nan mungkan ga de shangun dat ai. Anhte hpe, ga sadi da ai dum nta de shi hte rau shaga la matu rai nga ai. “Ngai hpe shangun dat ai nye Wa e shi hpe ngai hpang de lau la ai wa sha n rai yang gaw, kadai mung ngai hpang de sa lu na n rai, du sa ai wa hpe mung hpang jahtum na nhtoi hta ngai sharawt la na we ai,” (Yh 6:44).

 

“Lam gaw ngai rai nga nngai, teng man ai hte asak mung, ngai rai nga nngai; ngai hta nna n rai yang kadai mung, nye Wa kaw n du wa lu ai,” (Yh 14:6).

 

Akyu hpyi saga

Wa Karai Kasang e, anhte hpe myi jahpaw ya nna Yesu Madu a hpang hkang nang lu ai chyeju jaw ya let hkum hkrang wenyi lam hta Shi a teng man ai sharin shaga lam woi ai hta hkan sa lu shangun ya rit. Anhte a Madu Hkristu a marang e hpyi nem nga ga ai.  Amen.

 

Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, ndai laban gaw Pranwan Ladaw hta (30) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) – Yeremiah 31:7-9

Chyum Mungga Daw (2) – Heb 5:1-6

Kabu Gara Shiga – Mk 10:46-52

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.

 

Add new comment

1 + 2 =