Karai Kasang A Mungga - Pran Wan Ladaw Laban 30, 2019 Year C

Chyum Laika Ni

Daw I - Sirak 35: 12-14, 16-19,  

Daw II - 2 Timoti a laika 4: 6-8, 16-18;

Kabu Gara Shiga - Luka 18: 9-14

Anhte a Hkristan prat hte akyu hpyi ai ngu ai lam hpe garan ging hka kau nmai nga ga ai.

Shani shagu anhte galaw nga ai anhte a akyu hpyi lam ni hpe bai sung sung ding lik maram yu ai lam ni galaw na matu ndai bat na ja chyum mungga ni hku nna anhte hpe shadum ya nga ai. Anhte a akyu hpyi ai lam a ningja nsam ni hpe maram yu na matu mung rai nga ai. Lachyum gaw, anhte akyu hpyi ai ngu nna karai kasang hpang de sit shang ai lam ni galaw ga ai aten, nam bat langai, anhte tinang a hkum hpe tinang gara hku mu mada hkap la da ga ai kun, lahkawng karai kasang hpe ganing re ai masa hte mu mada hkap la da nna shi hpang de sit shang ga ai rai kun, masun ngu na hta, tinang a makau grup yin thing bu ni hpe anhte gara masa mu mada ga ai kun ngu ai lam ni hpe, asan sha ding lik masam maram yu ai lam ni galaw na matu rai nga ai.

Lahta de tsun mat wa sai ga san masum a mahtai ni gaw anhte a akyu hpyi ai lam a ning ja nsam ni gaw ganing re ai masa re ngu ai hpe madi madun ya na rai nga ai. Karai kasang hpe, tinang a hkum hpe, thingbu wa hpe mu mada ai anhte a ning mu ni gaw jaw ang ai masa hte mu mada ai myit jasat ni anhte hta nnga ding sa gawa, anhte a hkristian prat gaw Madu Yesu ra sharawng ai hkristian prat masa garai nrai shi ga ai ngu ai lachyum rai nga ai. 

Ndai bat na kabu gara ai shiga hta, Hparishe langai mi hte Kang hta sha ai masha langai mi a akyu hpyi ai lam hte seng nna Madu Yesu tsun ai ga shadawn mabyin hpe anhte na la nga ga ai. Akyu hpyi ai nga ai aten Hparishe wa shi a hkum hpe shi gara hku mu mada ai, karai kasang ngu ai hpe shi gara hku chye na hkap la da ai, bai, shi a hting bu wa hpe shi gara masa hte mu mada ai ngu ai lam ni hpe shawng ding lik yu ga.

Hparishe wa a akyu hpyi ga hta “Karai Kasang e, ngai gaw hpya lu hpya sha nding nman ai, num shut num shaw re ai masha gale ni hte nbung nngai, bat mi na nhtoi hta ngai 2 lang lu sha gam nga nngai, ngai lu malu hta na htam shi hta htam mi, alu jaw nngai” nga nna tsun nga ai. Ndai shi a akyu hpyi ga hpe maram yu yang, shi a hkum hpe shi mu mada ai masa gaw, shi gaw hpa mara shagun shara nnga ai chyoi pra san seng ai wa re, Moshe a tara hta matsun da ai hta pyi lai hkra tara hkan shatut nga ai wa re, ngu ai masa rai nga ai.

Shi a akyu hpyi ai ga hta, shawng nnan Karai Kasang hpe shakawn nna hpang wa ai raitim, hpang daw de gaw shi a hkum hpe shi shakawn shagrau ai de yawng mat wa ai rai nga ai. Karai Kasang jaw ya ai law la ai chyeju ni a majaw karai kasang hpe chye ju dum nga ra ai ngu ai masa nre ai sha, Hparishe wa, shi galaw ai mai kaja ai amu magam ni law law a majaw karai kasang madaw she shi hpe shaman chyeju jaw ya ra ang ai ngu ai masa rai nga ai. Kadun dik ai hku tsun ga nga yang, Hparishe wa shi a hkum tsup ai masa hte tara hkan shatut ai lam ni a majaw karai kasang shi hpe hkye hkrang la ai lam jaw ya ra ai ngu nna tsun nga ai masa rai nga ai.

Bai, shi a hting bu wa hpe shi mu mada ai masa gaw, shi hte shi a Hparishe manang ni chyu sha chyoi pra san seng ai, kaga ni mahkra gaw shut hpyit ai ni nsan seng ai ni rai ma ai ngu ai masa rai nga ai.

Shut hpyit mara lu ai hkang hta sha ai wa a akyu hpyi ai lam hte seng nna Madu Yesu matut tsun mat wa ai shaloi gaw, shi a nsen ni lai mat wa ai hpe anhte mu lu na ga ai, “hkang hta ai wa chyawm gaw, tsawm ra naw tsan ai kaw tsap nna, lamu de pyi nmada ai, shi a sin da adup let” ngu nna tsun hpang ai rai nga ai. Karai Kasang shanu nga ai shara ngu ai lamu de sharawt mada yu na pyi shi n gying dan ai ngu nna yin la let, shut hpyi ai wa ngai hpe matsan dum la e law, ngu ai akyu hpyi ga hpe chyu kahtap nna tsun nga ai rai nga ai.

Ndai grai kadun ai akyu hpyi ga hta, hkang hta sha ai wa shi a myit masin hta hpa baw ni rawng nga ai ngu ai lam hpe asan sha mu mada shangun ya lu nga ai. Karai Kasang hpe tsun shakawng dan na lam shi hta hpa nnga ai, shi a prat hpe shi mada dat yu yang shi mu lu ai lam gaw shut hpyit ai lam ni hte hpring chyat nga ai ngu ai lam rai nga ai. Karai Kasang gaw chyoi pra san seng dik ai wa re ngu ai masa shi mu mada nga ai sha n-ga, dai Madu hta tsawra matsan dum lam hpring tup nga ai ngu ai hpe mung shi dum chye nga ai majaw, shi hpe dai matsan dum lam jaw ya na matu kaja wa jaw ya na re ngu ai myit mada ai myit hte hpyi nga ai mung rai nga ai. Shi a thing bu ni a man hta mung, shi gaw dai ni hta grau ai wa re ngu nna myit la ai lam mung nnga nga ai, Karai Kasang a man hta shi yin la ai zawn sha htingbu ni a man hta mung shi gaw shut hpyit ai wa re ngu ai masa sha yin la ai wa mung rai nga ai.

Ndai zawn re ai akyu hpyia ga hpe Karai Kasang nmdat ya ai sha nga lu na nrai nga ai. Dai re ai majaw, Madu Yesu a mungga jahtum daw hta, “nanhte hpe ngai kaja wa teng teng tsun made ga, hkang hta ai wa gaw, Hparishe wa hta ding hpring ai grau lu la nna, nta de bai yu wa wa nu ai” nga nna gin chyum dat da ai rai nga ai. Karai Kasang hte jinghku bai hku la let, Karai Kasang a rawt dat hkyam sa ai chyeju ni a majaw myit masin hta kabu myit pyaw myit dik ai lam ni hpring tup rai nna nta de bai yu wa mat ai lachyum rai nga ai. Hparishe wa chyawm gaw mi na hta Karai Kasang hte grau tsan ai masa hte shi a gumrawng gumtawng ai myit ni hte shut hpyit mara ni hpe sha matut nna manang shatai let bai nhtang wa mat ai masa rai nga ai.

Tsawra ai nu wa hpu nau ni, Kasa Pawlu mung, Karai kasng hpe, tinang a hkum hpe, htingbu wa hpe jaw ang ai masa hte mu mda chye ai wa rai nga ai. Shawng de kasa Pawlu mung hparishe langai mi tai lai wa yu wa ai re, Jerusalem mare na kaja dik ai Yada makam masham jawng hta hpaji sharin la lai wa yu ai wa mung rai nga ai. Dai re ai majaw tara ni hpe dik hkrat chye ai wa rai ai hte, tinang a hkum hpe tinang chyoi pra san seng ai wa re ngu ai myit masa ni rawng lai wa yu ai wa mung rai nga ai, rai timmung, Madu Yesu hte Damascus lam hta hkrun kadup la ai hpang ndai lam ni yawng lai mat wa ai wa rai nga ai.

Ndai bat na lahkawng ngu na ja chyum mungga rai nga ai, Timoty hpang de shagun dat ai laika hta, kasa Pawlu gaw shi a hkum hpe Karai Kasang a tsawra matsan dum ai lam ni hpe shadan shalen na matu Karai Kasang e jai lang hkrum ai wa re ngu nna hkap yin la da ai lam, Karai Kasang gaw shadawn ndang ai shawang tsawra myit kaba hte kasa Pawlu shi hkam la ging ai hta pyi grau law htam hkra chyeju ni jaw ya chye ai Karai Kasang, bai Karai Kasang a tsawra ai lam hta tut e hkawm sa nga ai ni hpe mung dai hte maren sha chyeju jaw ya chye ai Madu re ngu nna hkap la da ai lam hpe mu lu na ga ai. Bai, kasa Pawlu gaw masha shagu hpe tsawra myit madun chye ai wa re ai lam hpe mung shi a laika ni hta law law anhte mu lu mai nga ga ai.

Tsawra ai nu wa hpu nau ni, anhte mung, tinang a hkum hpe anhte gara hku mu mada nga ga ai kun, Karai Kasang hpe gara hku mu mada nga ga ai kun, htingbu ni hpe gaw kara masa anhte mu mada chye na da ga ai kun, ngu ai lam ni hpe san ding lik maram yu ai lam ni galaw ra ga ai. Anhte a akyu hpyi ga ni hpe Karai Kasang teng sha hkap la ya na hpe ra sharawng ga ai rai yang gaw, anhte gaw shut hpyit ai ni rai ga ai, Karai Kasang gaw tsawra matsan dum chye ai wa re, ngu ai lam ni hpe atsawm sha chye na hkap la da ai masa hte yin la nna shi Madu hpang de akyu hpyi sit shang ai lam galaw ra na rai ga ai. Tinang a htingbu ni hpe mung tsawra ra na ga ai. Ndai lam ni hpe hkan shatup nna shagrit shanem ai myit masin hte Karai Kasang hpang de sit shang ga ai rai yang anhte a akyu hpyi ga ni gaw teng sha Karai Kasang hpang de du wa na rai nga ai.

Akyu hpyi saga: Wa Karai Kasang e, anhte a kam sham, tsawra, myit mada lam ni hpe shalaw jahtam ya rit, anhte shada tsawra ai myit hte daw jau hkat nga nna nang ndat da ai chyeju ni hpe hkam la lu hkra garum ya rit, anhte a Madu hkrsitu a marang e hpyi nem nga ga ai.

  Wajau Bernard Dashi Tang Ji (RVA Program Director)