Karai Kasang A Mungga - Pran Wan Ladaw Laban 28, 2021

Mungga gaw Sak Hkrung let anhte hpe lam woi ya nga ai

Hkristu hta tsaw ra ai nu wa hpu nau ni e, ndai laban gaw Pranwan Ladaw hta (28) ngu na laban rai nga ai.

Anhte ni, laban shagu hte “solemnity” ngu ai Nawku Hpung a poi kaba ni hta, ahkyak dik htum ai nawku daw jau lamang shagu, chyum mungga daw masum hpe hti ga ai. Ndai laban na chyum daw 1 gaw “Hpaji Ningli” chyum laika, chyum 2 gaw Hebrew ni kaw shagun dat ai laika, Kabu Gara Shiga gaw San Marku chyum laika ni hta na rai nga ai.

Chyum daw 1 hte 2 gaw Kabu Gara Shiga hpe madi ai, tau nau shajing ai chyum daw ni rai nga ai. Ndai laban gaw chyum daw 2, Hebrew laika hta na hpe galu ai hku sumru mai nga ai. Kadun ai raitim ahkyak ai majaw rai nga ai.

Laban shani hpawng de nawku daw jau ai hta Yesu Madu hkum nan dai Hkristan masha ni hpe ga shaga nga ai re. Chyum laika ni hpe aten langai hta sha ka da ai gaw n rai nga ai. Prat hte prat matut manoi ka hkrat wa ai rai nga ai. Karai Kasang a chyoi pra ai wenyi e myit jahtoi ya ai hte ka hkrat wa ai rai nga ai. Lata hte sha ka nna prat hte prat hti yu wa ai rai nga ai. Dai zawn ka hkrat yu wa ai hta ahkyak dik lam ni hpe galai shai lam n nga hkra Karai Kasang makawp maga da ai. Laika dip jak ging shalat lu ai hpang gaw grau masan sa wa ai. Ya daini na prat hta myusha ga hpan amyu myu hte myusha ga amyu myu hte hti sumru la mai nga sai. Prat dep matut mahkai lam ni rai nga ai, laika dip jak, Radio, hkrang mu nsen na Video, Television, internet mahkrun lam ni hte Karai Mungga ni hpe mungkan masha wan kaba n ga re ai masha ni hpang du lu ai majaw Karai Kasang hpe chyeju dum ra nga ai.

Chyum Laika buk mung moi na zawn chyum laika langai sha n rai sai. Myusha ga langai hte sha n rai sai. Wenyi lam matsun, shinggyim nga sat nga lam chyum laika labau zawn re ai shi a shi seng ai lam ni hpe sang lang sung lang ai lam ni mung grai nga taw sai.

Ndai gaw yu maya laika buk ni hte shai ai mung rai nga ai. Yawng gaw laika hte ka da ai chyum laika hte maren sha rai nga ai. Ndai gaw Karai Kasang a mungga, Karai Kasang a Kabu Gara Shiga nan rai nga ai. “Karai Kasang hpe chyeju dum ga ai” ngu hpung masha ni htan ai.

Karai Kasang a mungga gaw dai ni du hkra sak rawng ai.

Karai Kasang a mungga gaw laklai ai. Hebrew laika hta, “Karai Kasang a mungga gaw ahkrung nga ai” ngu tsun da ai (Hebrew 4:12).

Apu asi pu si na, akyu ara byin na ngu ai hpe tsun ai rai nga ai. Lani mi na nhtoi hta Karai Kasang gaw, “lamu ga ntsa hta, hpun ni, u ni, dusat yam nga ni yawng hpe hpan dat ai hte rau yawng gaw shi a nga shara hte shi nga pra wa ma ai. “San seng wa mu” (Mk 1:41) ngu mang gang kap masha hpe Yesu tsun shamai ya ai hte rau mai wa ai.

Hpang shani gaw ma langai hpe “rawt u ma e,” ngu tsun ai hte kalang lata mai tsai wa ai hte ma mung kalang lata rawt hkawm nga ai (Mk 5:41). “Nanhte yawng ndai hpe la nna sha mu, ndai gaw nye a hkum rai nga lit ai. Ngai hpe a dum nga na matu ndai galaw mu! Bai, Nanhte yawng ndai gawm hta na lu mu, n dai gaw nye a sai rawng ai gawm rau nga ai. Ngai hpe adum nga na matu ndai galaw mu!,” ngu Yesu Madu hkang da nga ai (Mk 14:22,24).

Karai Kasang hta, moi, ya, hpang, galoi raitim, myi kraw na n na, machyi makaw ai ni yawng hpe shamai ya lu ai hpung dagu nga nga ai. (1) Anhte ni Kashin Kamun hkam la ai shaloi Kawa, Kasha, Chyoi Pra ai Wenyi Karai Kasang gaw anhte hpe wenyi chyeju teng sha jaw ya ai. Shing rai, anhte Karai Kasang a kashu kasha ni tai wa ga ai. Mara raw sacramentu hkam la ai shaloi, mara raw ai Wa Jau gaw “Kawa, Kasha, Chyoi Pra ai Wenyi a mying ningsang hte ngai na a mara raw dat ya nngai,” ngu tsun ai hte rau mara raw sakramentu hkam la ai wa a mara dat ya hkrum sai rai nga ai.

Misa hkungga nawng jau ai shaloi, Yesu Madu a hpang jahtum daw sha poi hta, Madu Yesu hkum nan tsun ai ga hpe Jau tsun ai. “Ndai gaw nye a hkum” “ndai gaw nye ai sai” ngu tsun ai; dai ga gaw Yesu Madu hkum nan tsun ai re ngu hkam la, kam sham ga ai. Kaja wa nan mung, dai shaloi, muk hte tsabyi gaw Madu Yesu a hkum hte sai tai wa ai.

Karai Kasang A Mungga Na La Ai Shaloi Anhte Shinggyim Masha Ni A Salum Hta Nli Tum, Shing N Rai, Chyamna Tai Wa Ai

Karai Kasang a mungga gaw hpung dagu ja ai. Masha law law a matu, masha langai hpra a matu, Nawku Hpung a matu, akyu amyu myu jaw ya ai.

(1) Karai Mungga gaw nli tum rai nga ai. Yesu Madu hkum nan shingdaw tsun da ai hpe Mk 4:1-9 hte kaga chyum laika ni hta mung mu lu ga ai. Lam ntsa kaw, lung rawk ntsa kaw, ju hpun sumwun kaw, ga sau kaja ai kaw hkrat ai nli tum ni a lam anhte shaning shagu na lu ga ai. Nli tum gat ga shadawn hte maren nga yang anhte hkam la ai ni a masin salum gaw grai ahkyak nga ai. Hebrew laika hta mung, “Karai Kasang a mungga gaw, ahkrung nga ai hte alet nga ai rai nna, nshan lahkawng maga dai ai nhtu hta mung grau dai nga ai, ngu tsun da ai (Heb 4:12). Dai gaw Karai Kasang a hpung dagu atsam nan rai nga ai.

(2) Karai mungga gaw tara agyi wa zawn rai nga ai. Tara agyi wa gaw masha langai a tsun shaga, magam bungli ni hpe, jaw ai, shut ai hpe daw dan ya ai wa rai nga ai. Anhte Karai mungga hpe na la ai shaloi myit hta n chyi n mu hkam sha chye ga ai. Anhte Karai Kasang myit ra ai hte nhtan shai ai hku nga ang nga hkrup ai majaw re ai hpe dum hprang wa chye ga ai. Tara agyi wa a shawng kaw manghkang masa lam hpe san jep joi hkrum ai shaloi na zawn hkam sha ai rai nga ai. Karai mungga gaw anhte a tsun shaga, sat lawat kyang lailen hpe sha n ga, makoi magap taw ai hkam sha lam ni hpe mung sumru jep joi ya ai.

Dai majaw Yaku mung, Karai mungga gaw chyamna hte bung ai ngu shingdaw da nga ai (Yk 1:23). Chyamna a shawng kaw du ai shaloi anhte a hkum hte maren mu lu ga ai. Anhte a hkum hkrang, myiman nsam, bu hpawn mawn sumli ai lam ni n tsawm htap ai hpe mu lu jang, jahtuk shatsawm sharai la chye ga ai. Dai hte maren sha anhte a prat hta mungga hpe madat hkam la ai shaloi Wenyi e shadut ya ai a marang e shading sharai sa lu ga ai. 

“Karai Kasang n mu n chye hkra makoi magap da lu ai hpa mung n nga ai; yawng mayawng gaw shi a man e dan leng nga ai rai nna anhte galaw ai lam shagu shi hpe jahpan dan lu na rai nga ga ai,” (Heb 4:13).

Myi kyaw, myi n mu ai wa tinang a makau kaw ga shaga ai nsen na ai shaloi, masha hpe n mu ai rai tim, shi hpe yu nna shaga taw nga ai hpe dum chye nga ai. Yesu Madu gaw dai mungga hku nna anhte a masin salum kata de du hkra shang yu nga ai. Yesu Madu a myi n pu kaw nna gara hku mung lawt lam lu na n rai ga ai. Shi hpe hpyi nem tawng ban na lam langai sha anhte hta nga ga ai. Shing n rai yang mung, Shi kaw na pru mat nna mara galaw na kun? Anhte gaw mungga hta Hkristu a myit ra ai hte maren sak hkrung nga na hpe dum chye hkan shatup ra ga ai.

Mungkan sutgan sut su ai lam gaw Karai Mungga a apu asi hkam la ai hta dingbai dingna, dutdang ai lam byin shangun ai.

Sut su nga mai ai masha law malawng gaw dai sut su nga ai ai dam hpe n hkam lu ma ai lam ndai laban na Kabu Gara Shiga hta Madu Yesu asan sha tsun da nga ai. Ramma langai mi sumsing sutgan rai nga ai hkye hkrang la lam hte seng nna chye mayu myit kaba hte Yesu kaw sit sa ai. “Yesu bai hkawm sa wa na matu pru sa wa magang nga yang, masha langai mi shi kaw gat sa du nna, shi a man e hput di let, Mai kaja ai Sara e, nhtum n mai asak lu la hkra, ngai hpa mi galaw na rai ta, ngu nna san wu ai” (Mk 10:17).

Shi gaw myit san seng ai masha, tara hkan shadik ai masha rai nga ai. “ Yesu Mung shi hpe tsaw ra ai hte azi yu let....,” ngu Mk 10:21 hta tsun da nga ai. Yesu hta dai ramma a matu masin nga chyalu rai nga ai. “Nang wa nna, nang lu malu hpe duk kau nna, matsan mayan ni hpe garan jaw u. Shing rai jang sumsing lamu ntsa e nang sutgan lu na rin dai; dai hpang ngai kaw sa nna hkan nang rit, ngu nna shi hpe hkang dat wu ai.”

Dai ramma gaw shi lu su ai mungkan sutgan ni hpe kau da na matu nyet kau ai. Yesu Madu saw shaga ai hpe n hkap la ai. “Dai wa gaw, dai ga na ai shaloi, myi man sum mat nna, myit yawn la ai hte hprang rai wa mat ai, hpa majaw nga yang, shi grai lu su ai wa rai nga ai,” (Mk 10:22).

Dai ramma gaw teng man ngwi pyaw, kabu gara lam kaw nna pru mat wa ai. Chyum laika hta shi a lam hpe bai matut n tsun dan da sai rai nga ai. Shi a prat hta myit n pyaw hpa byin lai wa na gaw teng sha rai nga ai. Karai Kasang tsun ai hte maren, ngai lama she hkap la galaw ai rai yang, ngu gade lang myit lai wa sai kun.

Hkristu hte tsan gang mat ai wa kadai mung teng man ai kabu pyaw lam hpe lu la na n rai nga ai. Yesu Madu mung dai ramma wa nhtang wa mat ai shaloi myit n pyaw ya nga ai. “Yesu gaw sape ni hpe kayin mada yu nna, sut su ai ni gaw, Karai Kasang a mungdan hta shang na gade wa yak la nga a hka, ngu nna tsun mu ai (Mk 10:23).

Sut su ai mi rai rai, matsan ai mi rai rai, anhte lu su ai hta teng man jaw ang ai myit masin tawn da ra ai. Lu su ai n law ai rai tim, law ai rai tim, Karai Kasang kaw nna re ai hpe n mai malap da ga ai. Sut su ai lam gaw n kaja ai gaw n rai nga ai. Sut su ai kaw na byin wa ai nangmak lawhpa myit rawng wa shangun ai majaw dingbai dingna, dut dang ai lam byin shangun ai rai nga ai.

Chyum mungga daw langai hta Solomon hkawhkam gaw Karai Kasang kaw, sutgan hpe n hpyi ai sha, hpaji byen-ya hpe mahtang hpyi ai na lu saga ai. Karai Kasang solomon hpe hpaji byen-ya jaw ai ai rai nna, dai hpaji byen-ya a marang e, Solomon hkawhkam sutgan hte rau kaga akyu ara ni law law hpe mung hkam la lu lai wa ai.

Akyu hpyi saga

Wa Karai Kasang e, Nang Madu a chyeju kumhpa, sutgan hpe sumsing sutgan tam mahkawng ai hta jai lang chye na hpaji byen-ya anhte hpe jaw ya rit. Dinghta mungkan sutgan myit marin ai lam hpe koi yen nna, Solomon hkawhkam hpe jaw ya ai hpaji byen-ya anhte hta mung jaw ya rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, ndai laban gaw Pranwan Ladaw hta (28) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) – Hpaji Ningli 7:7-11

Chyum Mungga Daw (2) – Hebre 4:12-13

Kabu Gara Shiga – Marku 10:17-30

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.