Karai Kasang A Mungga - Pran Wan Ladaw Laban (26), Shaning A

Karai Kasang a Mungga, Pran Wan Ladaw 26, 2020

Thursday, September 24, 2020

Hkristu hta tsaw ra ai nu wa hpu nau ni e, ndai laban gaw pranwan ladaw hta (26) ngu na laban rai nga ai.

Karai Kasang gaw, shi a kaba la ai tsawra myit hte anhte hpe hkye la na matu lam law law, lang law law, matut manoi galaw nga ai. Raitim, Karai Kasang a hkye hkrang la ai hpe hkrum lu na matu anhte marai hkum shagu mung tinang maga hku galaw shatup ra ai lam ni nga nga ai.

Tinang Hkum Tinang Ga San San La Ga

Anhte ni hkye hkrang la hkrum hkra, Karai Kasang anhte hpe madung hpyi shawn ai hpa rai ta? Mt 7:21 hta, “ngai hpe Madu e, Madu e, nga ai ni yawng mayawng wa, sumsing lamu a Mungdan hta shang lu na ma ai n rai; Sumsing lamu hta nga ai, Nye Wa a myit ra ai lam hte maren hkan galaw ai ni chyu sha shang lu na mara ai.,” ngu ka da ai. Tsun mayu ai gaw, anhte ni gawng kya ai ni rai ga tim, Karai Kasang jahkrat da ya ai masin mahkyen hta anhte ni atsam marai bang ra ga ai. Dai lam hte sha hkye hkrang la lam lu na pahkam hkam lu ga ai.

Yesu Madu anhte hpe hkye hkrang la na matu Kawa Karai Kasang a hkang da ai lam hpe hkrak tup hkan sa lai wa sai. Kasha lahkawng ga shadawn hta Yesu Madu gaw Kawa Karai Kasang a hkang da ai hpe, ga hte n nrai, ta tup magam hte hkrang shapraw sa wa ai re lam shadum da ai hpe mu lu ga ai.

Karai Kasang gaw myi sai htuk ai ni hpe sha hkye hkrang la ai n rai nga ai; Karai Kasang a shawng hta myi sai n htuk ai masha mung n’nga ai. Karai Kasang gaw kadai hpe mung mara n shagun ai. Shinggyim masha ni shut hpyi mara galaw nna, myit n’malai ni, shanhte hkum nan hten run na lam hpe lata la ai she rai nga ai.

Labau hta, wuhpung ting hpe tara jeyang lai wa ai ladat

Moi shawng na labau hta, kun dinghku nta masha ni a prat gaw laksan shingtai sak hkrung nga pra na matu n loi la nga ai. Grau nna, hkrit hpa dingbai dingna hkrum katut wa ten hta, myu rusai bung ai ni hpawng de nna, arau nga pra ra ma ai. Anhte a jiwoi jiwa ni mung dai zawn nga pra lai wa masai. Amyu rusai bung ai masha ni hpawng de ai kun dinghku wuhpung kaba hku nga pra lai wa ma ai.

Chyum laika hta, Abraham gaw shi a amyu rusai bung ai wuhpung kaba a ningbaw re ai lam tsun da ai. Dai amyu rusai bung ai wuhpung kade kaba ai lam sam maram lu nga ai. Abraham gaw, shi a mungdan hpe gasat la kau ya ai hkawhkam 4 a lata kaw nna, shi a kanam daw ai Lawt hte dinghku masha ni hpe hkye la na matu, shi a nta kaw shangai shaprat wa ai la sha 381 hpe shangun dat ai hpe yu yu yang, moi shawng de dinghku masha kade law ai hpe mu lu nga ai. Dai amyu hta, Abram a kahpu kanau yan rai nga ai, Eshkola hte Anera yan hpe rim woi ai hkawhkam (4) a lata kaw na bai nhtang gasat woi la na matu shi kasha kahkri daw ai ni marai (381) hpe shaga mahkawng la nhtawm dai hkawhkam mali hte hpe Dan mare du hkra hkan shachyut kau ma ai ngu ka da ai hpe hti yu yang chye lu nga ai (Ningpawt Ninghpang 14).

Amyu rusai bung ai ni rau jawm nga pra ai hta, akyu ara nga ai zawn, akyu ara hkrat sum ai lam mung nga ai. Ga shadawn hta, Amyu rusai bung ai masha langai mi tara tawt lai nna mara galaw shut jang, shi hkrai tara jeyang hkrum ai n rai nga ai; shi a kun dinghku masha ni yawng, shing nrai, amyu rusai bung ai ni yawng hta lit nga ai ngu hkam la ma ai. Kanu Kawa ni gaw, kasha ni a matu hka wa ya ra ai. Galang marang, tinang shut da ai amyu rusai kaga wa n-gun grau kaba ai majaw, tara tawt lai ai wa a nta masha ni yawng hpe matai htang wa chye ma ai.

Dai zawn amyu rusai bung ai ni yawng hpe tara jeyang ai ladat hpe makau grupying htingbu ni kaw shawng jai lang hpang ma ai rai nna, Yuda myusha ni kaw du shang wa ai rai nga ai. Mau hpa kaba langai gaw, chyum laika hta, Karai Kasang, dai zawn jai lang ai htung lai len hpe hkap la ya ai sha n ga, grau nna, Yawshu a laika hta ka da ai hte maren, ga sadi tawn da ai ginra buga ni hpe zing la shaloi, masha law law hpe sat nna, ngam nga ai masha ni hpe mung tara jeyang ai lam galaw ai hpe hkap la ya ai.

Pru Mat Wa Ai Laika 20: 5 hta, “Kaning re ai hpara sumla hpe mung hkum kadawng, hkum nawku et. Ngai gaw dai Madu na a karai Kasang rai nga nngai majaw shingjawng kashun ai hpe ngai hkam sharang nngai n rai; ngai hpe n dawng n yaw tai amyu matu ni hpe ban masum mali du hkra ngai ari jaw nngai,” ngu ka da ai.

Ndai chyum daw hpe hti ai shaloi lachyum n nga ai ngu myit la nna, myit hten mat na lam n nga ga. Karai Kasang gaw dai ten na Israel myusha ni shinggyim htung lailen hte bung ai hku hkawm sa nga ai hpe myit galu kaba ai hte hkan shatup ya ai rai nga ai hpe dum shai nna hkap la manu shadan ra ga ai. Karai Kasang ndai zawn ga si ni hpe jai lang nna tsun ai gaw, hpara sumla naw ma ai Shi a myusha ni Karai Kasang hpe shut hpyit ai mara gaw grai sawng ai re ngu ai hpe shadan shadawng ai rai nga ai.

Dai ten hta, Karai Kasang a amyu masha ni a hkam la ai lam ni gaw Karai Kasang ra sharawng ai lam hte galoi mung n-bung ma ai hpe mu lu ga ai. Raitimung, Karai kasang a shawang tsawra myit gaw shanhte a ntsa e galoi mung a nga nga ai lam dan dawng nga ai.

Pru Mat Wa ai Laika 20:6 hta, “Rai ti mung, ngai hpe tsaw ra nna nye a tara ni hpe madat mara ai ni hpe chyawm gaw prat ban hkying mun du hkra, nye a tsaw ra myit madun nga nngai,” ngu ga sadi jaw da ai.

Amyu rusai bung ai wuhpung wuhpawng hpe mara dam jaw ai hte seng ai Karai kasang a myit masa hpe Tara Jahprang Laika hta mu lu ai. Tara Jahprang laika 24:16 hta, “Kasha ni shut hpyi kau ai ru hkra amu a majaw kanu kawa ni si ai hkrum na nrai; kanu kawa ni shut hpyi kau ai ru hka amu a majaw kashu kasha ni si ai hkrum na n rai; tinang nan shut hpyit kau ai ru hka amu a majaw tinang nan si lu na rai nga ai,” ngu bai mu lu ga ai.

Ndai zawn karai Kasang jaw ai tara jeyang ai lam hpe Madu Yesu a prat du hkra Isreael myu sha ni kam lai wa ma ai. Kasa ni hta mung dai makam nga nga ma ai masa hta nga ai. Yawhan a Kabu Gara shiga hta na, kanu a hkritung kaw nna nan myi n-mu ai wa a lam hte seng ai hta dan dawng nga ai. Yawhan 9:2 hta, “Sara e, ndai wa myi n mu ai shangai wa ai gaw, gade a mara majaw rai ta? Shi nan a mara rai ni? Shing n rai, shi a kanu kawa ni a mara rai ni?”, ngu nna san ma ai.

Yesu Madu gaw, Kasa ni a myit mang shut ai lam hpe galang lata shading sharai ya ai. Yawhan 9:3 hta, “Ndai wa a myi n mu ai lam gaw, shi a mara hte mung, kanu kawa ni a mara hte mung, hpa n seng nga ai. Shi myi n mu ai gaw Karai Kasang a n-gun atsam shi hta magam bungli galaw nga ai lam mu lu na matu rai nga ai,” ngu sharing shaga ya ai.

Karai Kasang gaw, shi a hkang da ai lam hpe hkan nang ai ni hpe hkye hkrang la ai. Shi a hkye hkrang la ai ga sadi gaw a ga hte sha n re ai; lata tut magam hte rai nga ai.

Ndai laban na shadang sha lahkawng a ga shadawn a shingdu hta anhte hpe shadum sharin shaga ai lam nga nga ai.

Yesu Madu gaw Yerusalem na nawku htingnu wang kata hta gat dut mari nna hpaga yun ga ai ni hpe gawt shapraw kau ai. Karai Kasang a tara kanu lam shi a shawng nnan na tara kanu langai hta, hpara sumla ni hpe nawku ai lam n galaw na matu pat shingdang da ai.

Madu Yesu a prat hta, Palestine mungdan kaw shinggyim masha ni jai lang ai gumhpraw hte n hprang arung arai galai ai lam law law nga ma ai. Yuda masha ni shani shagu na kan bau magam bungli a matu dai ladat hpe jai lang ra ma ai. Rai ti mung, hkawhkam a sumla dem shakap da ai gumhpraw hpe Nawku Htingnu ni hta jai lang na ahkang nnga ma ai. Yuda myusha ni a gumhpraw hpe sha dai Nawku Htingnu ni hta jai lang mai ai ahkang jaw da ai.

Nawku Htingnu de shang nna alu bang mayu ai ni gaw shanhte lu ai Palestine mungdan na hkawhkam sumla lawm ai gumhpraw hte Yuda masha ni a gumhpraw hpe galai la nna alu bang ra ma ai. Dai zawn galai ai hta manu law law hte galai shangun nna, matsan masha ni hpe maw sha mawp sha ai lam ni galaw nga ma ai.

Dai hpe mu lu ai Hkingjawng ni hte Hpung ningbaw ni gaw shanhte a shang gumhpraw hpe jahkrit shama taw sai ngu myit tsang nga ma ai. Hpa majaw nga yang, gumhpraw galai sha ai ni hte du sat hpaga ga ai ni a amyat ni shanhte hpe garan ya ra nga ai majaw rai nga ai. Dai hku galaw jang she, Yuda ni a Nawku Htingnu ni hta gat dut gat mari hpaga yun ga galaw lu na rai ma ai. Yesu Madu gaw shanhte a ahkaw ahkang yu hkrat wa ai lam hpe n ra sharawng ai majaw lawt lu ai myit hte dai zawn gau shapraw kau ai lam hpe galaw ai rai nga ai.

Yesu Madu Yerusalem de shang wa ai shaloi, mung shawa masha law law hkap tau hkalum la ma ai hpe mu lu ai dai hpaga yun ga ga ai ni gaw Yesu Madu galaw ai lam hpe galang lata bai tai htang galaw n gwi ma ai. Rai tim, hpang shani hta, dai zawn hpa rai galaw ai hpe ga san san da ma ai.

Yesu Madu mung, shi san ai ga san langai hpe shawng htai ai rai yang, shi mung shanhte a ga san hpe htai ya na ngu ginrat ai lam galaw da ai. Yesu Madu san ai ga san gaw “Kashin Kamun jaw ai Yawhan Baptista hte seng nna shanhte a ningmu gaw hpa rai ta? Shi gaw Karai Kasang kaw na sa ai Myihtoi kun? Shing nrai, shinggyim masha ni kaw na kun?,” ngu san da ai rai nga ai.

Yuda Hpung Ningbaw ni Yesu a dai ga san hpe n htai gwi ma ai. Hpa majaw nga yang, mung shawa masha ni gaw Yawhan hpe Karai Kasang kaw na sa ai Myihtoi re ngu hkap la da ma ai hte shi a sharin shaga ai lam ni hpe hkap la hkan sa nga ma ai majaw rai nga ai. Dai Yuda Hpung Ningbaw ni myi man sum nga ma ai rai nna, kadai mung lit la htai na n gwi ma ai. Yawng gaw, “Ngai N’chye ai” ngu sha htai ma ai (Mt 21:27).

Yesu Madu, Nawku Htingnu kaw na hpaga yun ga ai ni hpe hpa majaw gau shale kau ai hpe n htai ya ai sha, shadang la sha lahkawng a ga shadawn hpe matut hkai dan sanglang dan ai.

Shadang sha lahkawng hta na marai langai gaw sun de sa na matu Kawa shangun ai hpe ninghkap lai wa ai. Raitim, hpang de, dai sun de sa nna bungli galaw ai. Laga shadang sha langai gaw Kawa shangun ai hpe hkap la ai rai tim, lata tut hta dai sun de bungli sa galaw ai lam nnga ai.

Yesu Madu gaw, dai lahkawng hta na kadai gaw Kawa a hkang da ai ga hpe hkan shatup ai rai?, ngu san ai. Shanhte gaw lata tut bungli sa galaw ai wa rai nga ai ngu htai na hta kaga htai na mahtai nnga masai (Mt:21:31).

Yesu Madu sharin ya mayu ai gaw ndai hku rai nga ai. Nanhte ni Kawa Karai Kasang hpe n-gup a ga hte ga sadi jaw ma ai raitim, lata tut hta bungli hprai ma ai. Nanhte gaw, Karai Kasang lata la ai amyu rai ga ai nga nna arawng mala chye ma ai. Tara kanu hpe mung hpying tup hkan shatup lu ga ai ngu tsun chye ma ai. Raitim, Yawhan Baptista gaw Karai Kasang a mying ningsang hta nanhte ni myit malai lu mu ngu saw shaga ai hpe nanhte ni ninghkap ma ai zawn ya mung ngai hpe ning hkap ma ai ngu ai rai nga ai. “Mai sa” ngu n gup a ga hte tsun ma tim, lata tut magam hte n’kam ai” ngu ninghkam ma ai.

Yesu Madu gaw, Kawa Karai Kasang hpe galoi mung “mai sa” ngu madat mara ai Kasha rai nga ai. Chyum mungga daw lahkawng hta San Pawlu gaw Hpilipi na Hkristan Hpung masha ni hpe grai tsaw ra ai. Dai majaw prat hte prat Hkristan masha ni hpe dingbai dingna jaw nga ai jahkrit shama ai taw ai langai a lam shadum sadi jaw da ai. Dai gaw Hkristan masha ni hta byin wa chye ai “myit n hkrum ai lam” rai nga ai.

Hkristan masha ni hta myit hkrum ai lam nga yang, n kaja ai lam mahkra kaw na shaw la hkrum na; shamai shatsai ya hkrum na ga sadi lahkawng jaw da ai. (1) Tinang hkrai sha masha ni hta grau ai wa re ngu n mai myit la ai. (2) Hkristan Hpung masha shagu gaw tinang a akyu ara matu ngu na hta Hkristan kun dinghku masha ni a akyu ara hte ra kadawn ai lam ni hpe madung da myit nna lata tut galaw sa ra ai.

Hkristan kun dinghku ni katsi kamang la ai hta, Hkristu Madu hta grau ai laga kadai nnga ai hpe dum chye da ra ga ai. Kanu Nu Maria a hkritung kaw Mungga gaw masha tai wa na matu hpang ai magam hta nan Kawa Karai Kasang a hkang da ai lam hpe gun hpai na matu myit daw dan myit da ting da sai rai nga ai (Is 10:7).

Yesu Madu, shinggyim atai sa dagraw la ai hta shi hkum nan shangun ma hku hkam la ai sha n ga, mayam tai hkam ai lam hpe San Pawlu Hpilipi hpung masha ni hpang shagun dat ai laika 2:7 hta tsun da ai. Yesu Madu gaw, Karai Kasang a shangun ma tai ai sha nrai nga ai. Anhte shinggyim masha ni yawng a shangun ma mung sa tai ai rai nga ai. Shangun ma tai ai sha nrai nga ai; Shi a asak hpe nan ap nawng si hkam ai rai nga ai.

Mt 20:28 hta, “

Yesu Madu gaw hpang jahtum aten du hkra wudang ntsa kaw “Mai Sa” ngu ai lata tut magam hte Kawa Karai Kasang hpe madat mara ai wa rai nga ai. Yesu Madu wudang ntsa hta, nsa n-htum shi yang, “yawng ngut mat Sali ai” ngu tsun da ai (Mt 19:30). Tsun mayu ai gaw, Kawa Karai Kasang hkang da ai mungkan ntsa hta gun hpai ra ai magam ni yawng hpe gun hpai shangut da sai lam hpe tsun ai rai nga ai. N-ngut ai sha ngam da ai hpa nnga ai ngu ai lachyum rai nga ai.

Yesu Madu Kawa Karai kasang a ga hpe madat mara ai a majaw lu la ai hpung shingkan hpe chye na hkra San Pawlu Hpilipi Hpung masha ni hpe garum ya ai.

Lamu Kasa ni hte San Pra ai ni yawng gaw sumsing mungdan hta Madu Karai hpe shakawn shagrau nga ma ai.

Mungkan ga ningtsa kaw nga ai shinggyim masha ni gaw Karai kasang a shawang tsawra myit hte up hkang ai n pu e, gawng ngwi ngwi rai du magang nna, hkye hkrang la hkrum ma ai.

Ngarai mung hta nga ai Sadan ni gaw Yesu Madu hpe Karai Kasang re ngu yin la nkam tim, hkap la ra ma ai.

Yesu Madu anhte a masin salum sa akawk nna shang wa shagu, “mai sa shang wa rit” ngu hkap la let Madu Hkristu hte rau htani htana nga nga lu hkra shakut nga ga.

Akyu hpyi saga

Wa Karai e, Nang Madu Hkang da ai lam yawng hpe “Mai sa” ngu hkap la let “Mai Sa” ngu ga sadi jaw ai hpe lata tut hta mung hkan shadik lu na chye ju jaw ya rit. Anhte a Madu Hkrsitu a marang e, hpyi nem nga ga ai. Amen.

Hkristu hta tsaw ra ai kanu kawa tara hkaw sara/num ni hte nu wa hpu nau ni e, ndai laban gaw pranwan ladaw hta (26) ngu na laban rai nga ai.

Hti ang ai Ja Chyum Mungga ni gaw