Karai Kasang A Mungga - Pran Wan Ladaw Laban 26 , 2019

Pran Wan Ladaw Laban  26, 2019

Daw I - Amos 6:1, 4-7; 

Daw II - 1Tim 6: 11-16;

Kabu Gara - Luka 16: 19-31

Tsawra ai Nu Wa Hpu Nau ni, ndai bat na ja chyum mungga ni hta, anhte a ja gum hpraw sut gan ni hte seng nna, sadi sahka ra ai lam shadum sadi jaw ai lam ni hpe anhte na la nga ga ai. Ja gum hpraw sut gan hpe njaw n-ang ai masa hte tam mahkawng ai lam, shing nrai, njaw n-ang masa hte jai lang asung jashawn ai lam ni gaw, hpun hpe latung sha jahten kau ai zawn, anhte a myit masin salum hte, anhte a uhpung uhpawng hpe mung sha jahten kau ya lu nga ai.

Anhte hkristian ni ngu ai gaw, Mungkan sut gan hpe chyu sha baw bang nga na malai, madu Yesu anhte hpe jaw ya ai manu dan la ai wenyi hte seng ai sut gan hpe madaw she madung da nna hkan tam shakut nga let sak hkrung nga na ahkyak nga mali ai.

Sut gan ni ngu ai hpe tara rap ra ai masa hte jawm tam jai lang ai, jawm gam garan lang ai, ngu ai masa lam ni nnga ai rai yang, uhpung uhpawng ni hten za mat wa lu nga ai.

Ga shaka ding sa myit htoi Amo a prat hta, sut gan law law lu su ai ni, shanhte a dum nta ni hpe tsawm htap ai, manu grai grai hpu ai arung arai ni hte mawn sum li da ai. Grai grai tsan ai sum tsan mung dan ni hkan na lu la ai magwi kawng zawn re ai manu dan ai arung arai ni hte galaw ai lahkum ni hte nta kata arung arai ni law law mawn sum li da nna nga ai.

Kaja dik ai malu masha ni lajang da nna daw sha poi ni chyahkring hkring galaw ai. Raitimung, dai lam ni gaw na na grin lai wa ai nrai, Myi htoi Amo shadum ya lai wa ai hpang kade nna yang dai Mare ni mahkra mai gan mung dan ni a gasat dang la kau ai hpe hkrum lai wa ai hte, dai masha ni mayam shatai na matu woi la mat wa hkrum masai lam, langai ngu na ja chyum mungga rai nga myit htoi Amo a laika hta anhte mu lu nga ga ai.

Madu Yesu tara hkaw ai shaloi sa du madat nga ai masha ni hpe nlaw htum hpan lahkawng garan mu lu mai nga ai. Langai ngu na hpan gaw, malawng maga rai nga ai matsan mayan re ai masha ni, bai lahkawng ngu na hpung ni gaw, makam masham a ning baw ning la ni ngu nna shanhte a hkum hpe matsat da ai Hparishe ni rai ma ai.

Hparishe ni gaw sut gan law law lu su ai ni rai ma ai hte, shanhte a lu su ai lam ni gaw, Karai Kasang a tara ni hpe hkan nang shatut ai lam ni a majaw shahte hpe Karai Kasang shaman ya ai lam ni re, ngam ai masha ni gaw tara nhkan lang ai a majaw Karai Kasang kaw nna ari dan hkrum nna, matsan mayan hkrum sha nga ma ai ni rai ma ai, ngu nna yin la da ai masha ni mung rai ma ai.

Dai re ai majaw, ndai bat anhte na la lai wa sai kabu gara ai shiga hta, MaduYesu tsun ai sahti wa hte matsan ai Lazaru a ga shadawn gaw, Hparishe ni a myit mang ai lam hpe sharai na matu, shanhte hpe ading tawk sha-ang nna tsun ai lam nan rai nga ai zawn, matsan mayan ni hpe shalan shabran la na matu tsun ai ga shadawn mung rai nga ai.

Madu Yesu a ga shadawn hta, sahti wa gaw hkyeng ai hpun nba hte mani ai hpun palawng bu hpun ai, nga nna tsun da nga ai, shi kade lu su ai ngu ai lam hpe shakawng madun na matu, hpu reng dik htum ai bu hpun palawng bu hpun da ai ngu ai lachyum rai nga ai. Matsan Lazaru wa ai hte seng nna gaw, hkum ting kahkraw hpye ai, mying hpe mung Lazaru nga nna Madu Yesu tsun ai, bai gwi ni shi a nma ni hpe sa mata ya ai lam du hkra shalawm da nga ai, sahti wa hta gwi ni pyi grau nna tsawra matsan dum chye nga ma ai, dai mastan wa shi a nta man hta sa nga nga re ai hpe sahti wa law law lang mu yu na sai rai nga ai, rai timung shi dai matsan wa hpe lakawn la ai lam galoi n-glaw lai wa yu ai. Sut su ai ngu ai lam ni gaw masha a masin salum kata na tsawra matsan dum lama ai ngu ai myit ni hpe sat shamit kaw chye nga ai ngu ai lam rai nga ai.

Ga shadawn hpe grai kadun ai hku nna Madu Yesu gin chyum dat ai, sahti wa hte matsan ai Lazaru lahkawng yan si wa ai, sahti wa gaw katsan ga de du nna na chying wa nni nkri hkrum ai, Lazaru gaw Abraham a lahpyen hta du nga ai, nga ai. Ndai shara hta, sut gan lu su ai lam gaw shanhte a chyoi pra san seng ai lam hpe Karai Kasang shaman ya ai kum la lam re ngu ai lam hte, matsan mayan hkrum ai lam gaw ding ye lu ai ni rai ma ai, ngu nna Hparishe ni a myit mang ai lam ni gaw nteng ai, njaw ai ngu ai lam hpe Madu Yesu shadum ai lam rai nga ai. Karai Kasang hpe kam hpa ai ni hpe shi Madu galoi nkau da na hte, sut gan hpe chyu sha baw bang ai ni, jahtum  nhtoi hta e mu kajawng ai lam ni hkrum na mara ai, ngu ai lam rai nga ai.

Bai, ga shadawn hta, sahti wa hta, asak naw hkrung nga ai shi a kanau ni marai 5 naw nga ai lam shalawm da ai hku nna, sut su ai ni gaw shanhte a sut gan ni gaw tsang shara nga ai ngu ai lam hpe galoi mung n matsing la chye ma ai lam hpe shadum ya ai. Ndai kanau ni manga ngu ai mung, dai yang e Madu Yesu hpe madat nga ai Hparishe ni hpe dan tawng sha-ang nna tsun ai lam rai nga ai. Lachyum gaw, nanhte Hparishe ni, ngai sharin ya ai sum sing Mungdan lam hpe hkap la na matu naw matut ning dang nga ma ai hta n-ga, dai mung dan de shang wa na matu mung ning dang kau nga ma ai, nye a sharin shaga ai lam ni hpe, nye a bai hkrung rawt wa ai ngu ai lam hte, matut nna shagrin mat wa na rai tim nanhte matut nna naw ning dang kau nga na rai myit dai, nanhte a gum rawng gum tawng ai, nam mak law hpa ai, matsan mayan ni hpe n-gawn nsawn di kau ai lam ni, ndai lam ni gaw dai mung dan de shang wa na matu pat shing dang kau ai lam ni rai nga ai, ngu nna Madu Yesu shadum ai lam rai nga ai.

Lahkawng ngu na ndai bat na ja chyum mungga rai nga ai, Timoty hpang de kasa Pawlu shagun dat ai laika hta, sagu hpung masha ni hpe woi awn ai shaloi nga ra ang ai kasa Pawlu shi a myit masa, Timoty hta bang ya ai lam rai nga ai. Chyoi pra san seng ai prat the nga pra na matu, tsawra myit, myit galu gaba ai myit ni the sagu hpung ni a ntsa si mani ai the woi awn chye na matu, bai, kabu gara ai shiga hkaw tsun ai lam tha nhkrit ntsang ai myit ni hte lu su matsan yawng hpe hkaw tsun nga na matu, shadum n-gun jaw dat ai laika rai nga ai. Ndai laika hpe matut hti mat wa ai shaloi, sut    su nga mai ai ni hta ganing re ai myit masa rawng ra ai, ngu ai lam ni hpe kasa Pawlu shadum ai lam mu lu na ga ai. 1Tim 6: 17-19 hta “ndai prat hta sut gan lu ai ni gaw, gum rawng gum tawng nre ai the, n grin ai sut gan hpe n shamyet nga ai sha, nga mu nga mai nga na matu, arai yawng mayawng anhte hpe n daw n hta jaw ai karai kasang hpe, shamyet shanat nga na the, nanhte mai kaja ai galaw nga na mai kaja ai bungli hta sut su let, karan kachyan jaw ai the jaw jahproi ai myit rawng nga nna, asak majing ngu ai asak hpe magra noi lu mu ga, du magang ra ai aprat a matu mara mai kaja ai sut gan npawt tinang dai mahkawng da mu” nga nna sut gan lu su ai ni kaning re ai myit masa nga ra ai ngu ai hpe Kasa Pawlu shadum sharin da nga ai.

Ndai kasa Pawlu shadum ai lam ni gaw, lu su matsan anhte hkristan ni yawng a matu akyu rawng ai mungga rai nga ai. Anhte lu ai kachyi sha re ai sut gan ni mi rai rai, law la ai sut gan ni hta mi rai rai, dai sut gan ni a ntsa nga ra ai hkristan myit masa anhte hta galoi mung tu kaba nga na matu grai ahkyak nga mali ai. Hpa majaw nga yang sut gan ni a ntsa hkristan myit masa the mu mada ai lam ni nnga wa ai shaloi, dai sut gan ni a marang e, anhte hta gum rawng gum tawng ai myit jasat ni, ting kyeng myit myit ai myit jasat ni tu kaba wa nna, anhte a makau grup yin na ra kadawn nga ai hpu nau ni a ra ai lam ni hpe nmu mada kau nna jahtum e dai sut gan ni gaw anhte a hkrsitan prat hpe du hkra jahten kau ya lu ai majaw rai nga ai.

Hkye hkrang la ai de du wa lu na matu, nbyin nmai nga ra ai lam lahkawng nga nga malu ai, langai ngu na gaw shagrit shanem ai myit hte Karai Kasang hpe chyu sha tut e kam hpa shamyet shanat nga ai lam hte, lahkawng ngu na gaw matsan mayan ni hpe yu lakawn nga ra ai ngu ai lam nan rai nga ai. Dai re ai majaw, anhte hpe Karai Kasang jaw ya ai sut gan ni gaw law ai rai tim, nlaw nla mi rai tim, shagrit shanem ai myit the karai hpe kam hpa shamyet shanat nga ai ngu ai hte, matsan mayan ni hpe yu lakawn nga ai ngu ai masa hte anhte asung jashawng jai lang nga ra na rai ga ai.

Akyu hpyi saga: Wa Karai Kasang e, tsawra ai myit hte nang shing gyim masha ni a mara ni hpe rawt dat hkyam sa jaw ai hta na a n-gun atsam hpe nang madun dan nga ndai, htani htana asak de woi wa ai lam hte kaba gara ai myit the anhte matut hkawm sa nga lu na matu mung garum ya mi anhte a madu hkristu a marang e hpyi nem nga ga ai.Amen.

Wajau Bernard Dashi Tang Ji