Karai Kasang A Mungga - Pran Wan Ladaw Laban 26

Masha Shagu Hkye Hkrang La Lam A Matu Shaga La Hkrum Ai

Hkristu hta tsaw ra ai nu wa hpu nau ni e, ndai laban gaw Pranwan Ladaw hta (26) ngu na laban rai nga ai.

Hpaji jawng ni hta laika sharin yang labau laika (history) mung hpaji hpan gabaw langai hku galoi mung sharin ya ma ai.

Nawku Hpung gaw anhte hpe laklai ai hkyehkrang la ai labau hpe sharin ya nga ai. Dai labau gaw majan hte seng ai labau n re ai. Simsa lam hpe gaw de ai labau rai nga ai. Karai Kasang shinggyim masha ni hpe hkye hkrang la ai labau rai nga ai. Hpaji jawng ni hta sharin ya ai labau hte Nawku Hpung tsun dan ai labau yan hta shai hkat ai lam nga nga ai. Hpaji jawng hta sharin ai labau ni gaw moi shawng de byin lai wa ai mabyin ni hte dai ten sak hkrung nga lai wa ai ni a lam hta lai jan nna n tsun n hkai dan ai. Nawku Hpung tsun ai hkye hkrang la labau gaw Karai Kasang shinggyim masha ni hpe hkye hkrang la na matu dai labau a shawng na mau hpa hpung dagu ni hpe mung, dai ten na labau mabyin ni hpe mung, anhte a prat hta hkye hkrang la ai lam matut manoi nga ai hpe mung mahkri shawn tsun dan ya ai.

Dai majaw gaw, Karai Kasang a hkye hkrang la labau hpe sharin la na gaw anhte a matu grai nan ahkyak dik ai. Dai gaw anhte hkum nan a labau mung rai nga ai. Anhte hpe hkye hkrang la na matu galaw lai wa ai magam matsing sumhting ni rai nga ai.

Anhte a labau hpe bai yu yang, nkau laika pa hta kaman rai nga ai hpe bai mu na ga ai. Karai Kasang a shani shagu na labau matsing gaw laika maisau pa shagu hpring tup rai nga ai. Lani mi mung hkring ai ngu n nga ai. Aten shagu mungkan masha ni hpe hkyela magam hpe galaw nga ai. Anhte shinggyim masha ni a labau laika matsing gaw langai hte langai shai hkat nga ai. Nkau ni gaw labau tsawm htap lam n nga ai. Nkay ni hta kaman lila rai nga ai.

Hkye hkrang la labau laika gaw Karai Kasang ka ai maga mi, ngai ka ai maga mi rai nga ai. Karai Kasang ka da ai maga kaw gaw hpring tup rai nna, ngai ka ai maga gaw kaman rai nga na kun? kachyi mi sha ka da ai rai na kun? Ngai a hkye hkrang la labau a matu ngai ka ra ai labau hpe ngai hkum nan ka jahpring la da ra ai.

Hkye Hkrang La Hkrum Ai, Shing N Rai, Jeyang Hkrum Ai Ngu Ai Gaw Hpa Rai Ta?

Ndai mungkan hta nga pra ten jam jau lam, mayak mahkak lam ni hte hkrum katut chye ga ai; machyi makaw hkrum ai, ndum shami hkala hkrum ai, lagu lagut e lagu ai, damya ni e jahkrit shama kashun la ai lam ni hkrum na ga ai. Ask hpe pyi jahte tam hkrum chye nga ga ai.

Raitim, kaba dik ai dingbai dingna gaw anhte si ai shaloi Karai Kasang a hpyen tai nna, shi hte htani htana hka mat ra ai lam rai nga ai. Dai gaw Karai Kasang hte htani htana hka ra mat na jeyang dawdan hkrum lam rai nga ai. Karai Kasang gaw anhte ni hkye hkrang la hkrum na matu lam jaw da ai; anhte gaw dai lam hta Karai Kasang hte rau hkawm sa ra ai; shaloi hkye hkrang la lam lu na ga ai.

Karai Kasang, Mawshe a marang e Israel myusha ni hpe up hkang ai hta shinggyim masha hpe jai lang ai. Shinggyim masha ni hpe hkye la ai magam hta shinggyim masha ni a garum la ai hpe hkam la na matu Mawshe hpe hkang da ai.

Chyum daw langai hta, Israel myusha ni gaw grai tsun yak ma ai rai nna Mawshe hte Karai Kasang hpe aput angun di  ai lam ka da ai. Karai kasang gaw sak kung sai masha marai (70) hpe woi awn salang ni hku dang da nna, Ga shaka sumpu sutdek tawn da ai ginsum a shawng kaw hpawng de shangun ai.

Ndai gaw, makau grupyin myusha ni galaw chye ai htung lailen hte maren Karai Kasang Mawshe hpe hkang da ai lam rai nga ai. Akyu rawng ahkyak ai kun dinghku ni hta woi awn ningbaw ni hpe lata san nna, up hkang lam hta shang lawm shangun na matu matsun ai rai nga ai. Mawshe gaw ahkyak dik daw dan lam hpe galaw na matu sha rai nga ai.

Masa lam amyu myu a majaw lata san da ai salang marai (70) hta na marai lahkawng (2) Eldad hte Medad yan gaw shara san da ai ginsum a shawng kaw n du hpawng lawm lu ma ai. Raitim, shan a ntsa Karai Kasang a Wenyi yu hkrat wa nna kaga masha ni zawn sha myihtoi htoi lu ma ai. Mawshe hpe garum ai hkringmang ngu na, Yawshu gaw shi a sara Mawshe hpang lawan sa nna, dai salang lahkawng gaw kaga ni hte rau n rai ma ai majaw myi htoi htoi na ahkang n lu gin ai ngu mara shagun ga tsun ma ai. Mawshe gaw “Ngai hte seng ai amu hta myit hkan tsang nga nni? Dai madu gaw shi a amyu masha ni yawng hpe wenyi jaw ya nna myihtoi ni zawn shanhte yawng hpe marawn jahtau shangun na, ngai ra sharawng nga nngai,” ngu bai htan wu ai (Buhk 11:29).

Karai Kasang gaw shi a magam hpe shi hkum nan woi awn let Mawshe hpe ap jaw da ai. Hpang daw de, Mawshe hpe garum na matu salang (70) hpe lata san da ya ai. Ga shaka dingsa prat na ndai mabyin gaw Yesu madu sape ni hpe sharin shaga na lam a ga hpaw npawt daw rai nga ai.

Yesu Madu gaw shinggyim masha ni hpe hkye la na matu shinggyim masha shagu a garum shang lawm ai hpe akyu jahkawn jai lang ai.

Ndai laban na Kabu Gara Shiga gaw Yesu Madu hpe “Mawshe nnan” ngu anhte hpe tsun dan nga ai. Yesu Madu gaw shinggyim masha yawng hpe mara a mayam prat kaw nna hkye la na matu nam maling ngu ai ndai mungkan kaw nna ga sadi tawn da ai Canon ngu ai sumsing mungdan de lam woi ningshawng ya nga ai.

Yesu Madu shi langai a marang e sha yawng hpe hkye la lu ai raitim, yawng a garum shang lawm ai hpe hkap la ai. shinggyim masha ni a garum shang lawm ai lam yawng gaw Yesu Madu a matu n re ai; shinggyim masha ni a matu she rai nga ai. Anhte hpe kam da ai gaw anhte hpe tsawra ai lam madun na matu mung rai nga ai. Yesu, Kawa Karai kasang hpang bai lung wa ai rai tim, Shi a hkye la magam hpe matut gun hpai na matu kasa shi lahkawng (12) hpe lit shatsam ap da ai rai nga ai.

Kasa ni mung Wenyi a garum matsun ai a marang e shanhte hpe garum na masha ni hpe lit matut shatsam ap da ma ai. Dai majaw Wa Sarabyin gaw Nawku Hpung hpe, Yesu Madu a malai woi awn ai; Saradaw ni gaw kasa ni a magam ni hpe gun hpai nga ma ai; Jau ni gaw Saradaw ni hpe shingdep shingtau garum nga ma ai; Deacon ni, ma ma ni, tara hkaw sara ni, brother ni hte mungbawng, num hpung, la hpung, ram hpung ni gaw Jau ni hpe shingdep shingtau garum ya nga ma ai. Shanhte hta lai nna kashin kamun hkam la da sai ni yawng mung wenyi a lam woi ya ai hta hkye hkrang la magam hta shang lawm garum nga ma ai.

Kalang marang Hpung woi ni gaw shanhte chyu sha wenyi hpe hkam la da lu ai zawn rai hkrang shapraw shut chye ma ai. Ndai laban na chyum mungga hte maren shanhte myit ai, galaw ai lam ni gaw shut ai dan dawng nga ai.

Yesu a sape ni hta n lawm ai masha langai, Satan hpe gawt shapraw shaden taw nga ai hpe mu ai Yawhan hte kasa nkau ni Yesu hpe wa tsun den dan ma ai. Shi hpe mung Yesu a mying hkum gang na matu jahkring da ma ai. Raitim, Mawshe zawn sha Yesu madu shanhte hpe tsun ai gaw “shi hpe hkum pat shingdang myit, nye a mying gang nna mauhpa lamik kumla langai mi galaw ai hpang, ngai hpe n kaja ai hku alawan tsun lu na masha kadai mung n nga ai. Hpa majaw nga yang, anhte hpe gumlau ai maga e n nga ai wa gaw anhte hpang maga nga ai wa rai nga ai, ngu bai sang lang jahpra dan ai (Mk 9:39-40).

“Ngai hpang maga de n nga ai wa gaw, nye a gumlau maga de rai nga ai: ngai hte kahkyin gumdin n re ai wa gaw ayai aya rai nga ai, ngu Mt 12:30 hta Madu Yesu bai tsun sang lang da ai.

Ndai chyum daw lahkawng hpe maram yu yang Yesu madu gaw shi a magam bungli galaw na matu masha law law hpe ra taw nga ai; shanhte hpe saw shaga ra nga ai hpe mu lu nga ai.

“Hpa majaw nga yang, ngai nang hte rau rai nga nngai, nang hpe kadai mung hkra lu na n rai, ndai mare hta nye a masha ni law law nga ma ai ngu Karai Kasang San Pawlu hpe shingran sa jaw ai lam San Pawlu sakse hkam da nga ai (Kasa 18:10).

Karai Kasang a hkye hkrang la magam hta tinang a matu raitim, kaga masha a matu mi raitim, kaman nga nga n mai ai; lapran hpatwat kaw nga nga n mai ai. Hkristan prat hta sak hkrung let Yesu Madu hpe garum ai hku nna mung, tinang hkum hte hpu nau ni hkye hkrang la ra ai hku nna mung nga pra ra ai. Shing n rai yang ga sadi run let dingbai dingna jaw ai ni byin chye nga ai.

Masha kaga ni hkye hkrang la hkrum na hpe dingbai dingna jaw ai gaw Hkristan masha langai mi a matu hkrit tsang shara kaba rai nga ai. “Ngai hpe kam sham nga ai ndai ma kaji ni hta na langai mi hpe myit kataw shangun ai wa kadai rai ti mung, shi a du hta htum rin lung kaba langai mi gyit noi nna, panglai hta kabai bang kau na gaw shi a matu grau nna mai nga ai. Dai rai nna na a lata gaw na a makam masham hpe myit kataw shangun a yang gaw, dai hpe kahtam di kau u! Lata lahkawng ahkum ara hte ngarai wan hta shang na hta lata maga mi n tu ai hte asak hkrung ai de shang na gaw grau mai nga ai. Na lagaw gaw na a makam masham hpe myit kataw shangun a yang gaw, dai hpe kahtam di kau u! Lagaw lahkawng ahkum ara hte ngarai mung de jahkrat kau ai hkrum na hta, lagaw maga mi n tu ai hte asak hkrung ai de shang na gaw grau mai nga ai. Na a myi gaw, na makam masham hpe myit kataw shangun a yang gaw, dai hpe malawk kau u! Myi lahkawng maga ahkum ara hte ngarai dmung de jahkrat kau ai hkrum na hta, myi maga mi n hkum ai hte Karai Kasang a mungdan de shang na gaw grau mai nga ai,” (Mk 9:42-47).

Yesu madu gaw si mani ai wa rai tim, dai zawn re ai ga si ni hte anhte hpe sharin shaga shadum jahprang da nga ai. Hpa majaw rai?

Mahtai gaw asan sha rai nga ai. Yesu gaw Wenyi a sari manu hpe atsawm chye na ai. Shi a hkum shan sai hpe ap nawng let Kawa Karai Kasang a tsawra myit hpe madun nna, yawng hpe hkye hkrang la ai rai nga ai hpe Yesu chye ai.

Anhte grai nan shakut shaja nna lu la da ai manu dan arai hpe jahten kau ai wa hpe, shing n rai, manu law law jaw nna mari da ai sut gan hpe jahten kau ai wa hpe n pawt ai sha kadai nga na rai?

Yesu Mung Wenyi hkye hkrang la lam hpe jahten ai ni hpe n pawt n daru ai sha nga na nni? Dai majaw Wenyi hkye hkrang la lam matu dingbai dingna jaw ai lam ni hpe sadi jaw ai rai nga ai. Wenyi hpe mai byin ai made shakut nna hkye la ra ai.

Anhte a lagaw, lata myi ni yawng gaw manu dan ai, teng ai. Raitim, Karai Kasang gaw shadawn n lu manu dan dik htum ai wa rai nga ai. Karai Kasang hpe jasum kau na hta kaga lam ni yawng hpe jasum kau gwi ra ga ai.

Anhte hpe tsawra ai, hku hkau ai ni nga ai raitim, anhte hpe mara de woi bang woi maw ai hpe gaw hkrat sum lam kade kaba ai raitim, kalang lata kau da ra ai, jahka kau ra ai. Karai kasang hpe htani htana n jasum kau na ahkyak ga ai.

Chyum daw lahkawng hta Yaku anhte hpe “sut su ai lam hte seng ai hpe sadi jaw da nga ai. Masha law law ra marit ai myit ni a majaw hten run mat ma ai. N tara ai sutgan a majaw masha ni ngarai mung du ra ma ai. Teng man ai sut su lam gaw sumsing mungdan hta sha nga ai. Ndai mungkan hta Karai Kasang jaw da ai sut gan ni gaw sumsing sutgan mahkawng na hta madi shadaw jai lang na matu sha rai nga ai. Dai ni hpe sadi maja let jai lang sung lang ra ga ai.

Akyu hpyi saga

Wa Karai Kasang e, Nang madu a hkye hkrang la magam hta anhte hpe shang lawm magam gun hpai shangun rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, ndai laban gaw Pranwan Ladaw hta (26) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) – Buhk 11:25-29

Chyum Mungga Daw (2) – Yaku 5:1-6

Kabu Gara Shiga – Mk 9:38-43, 45, 47-48

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.