Karai Kasang A Mungga - Pran Wan Ladaw Laban (25), Shaning A

 

         Hkristu hta tsaw ra ai nu wa hpu nau ni e, ndai laban gaw pranwan ladaw hta (25) ngu na laban rai nga ai.

          Ndai laban na Madu Yesu a ga shadawn gaw, Pharisee ni hpe shawng myit ya ai lam tsun da ai hpe mu lu nga ai.

          Karai Kasang gaw Yuda myusha ni hpe sha hkye la na matu shaga ai re ngu ai, shut shai ai myit masa hpe la kau na matu Yesu ndai ga shadawn hpe tsun da nga ai. Karai Kasang a yaw shada ai lam gaw shingyim masha yawng hpe hkye hkrang la na matu rai nga ai majaw Yuda masha ni myit n pyaw lam n mai nga ai; kabu gara na matu she rai nga ai.

         Karai Kasang gaw Yuda myusha ni hpe shaga ai rai nga ai; shanhte mung Karai Kasang shaga ai hpe hkap la hkan sa nna, sumsing mungdan de shang lu na matu shakut shaja nga masai rai nga ai. Kabu gara nga ra ma ai. Raitim, shanhte hkam la lu na Karai Kasang kaw na laklai chyeju hpe shanhte hta lai nna kaga ni mung hkam la lu na re lam na chye wa ai shaloi hkap la n lu wa ma ai. Tingkyen myit kaba dan dawng wa ma ai.

          Sabyi sun ga shadawn gaw anhte ni hte mung seng nga ai. Chyum mungga daw langai hte lahkawng gaw sabyi sun ga shadawn hpe grau hkum tsup hkra chye na shangun ai.

          Shawng de, anhte a ginra ni hta sabyi sun n-nga ai. Daini na prat hta gaw shara nkau ni hta sabyi sun daram nrai tim, sabyi hpun langai lahkawng hpe mu ga wa ai. Anhte a matu gaw, yi sun hkauna galaw ai n-chyang ngu yang grau chye na na nhten!

          Hkristu Madu Mungkan ga ntsa sak hkrung nga ten, Palestine mungdan hta lamu ga law law hpe lu su sahti nkau ni sha madu lu ma ai. Ngam ai masha ni gaw tinang kun dinghku masha ni sak hkrung nga lu na matu lu su sahti ni a sun ni hta shani shagu n-chyang shang ma ai da. n-chyang ni a kan hku lam gaw sun madu ni n-chang shaga na, n shaga na hta sha madung rai nga ai. N chyang n shaga jang kawsi hkam ra na lam sha nga ai.

          Dai zawn re masha ni hpe, Chyum laika hta, “Yaweh a matsan ma ni” shing nrai, “lamu ga n lu ai matsan masha ni,” ngu shaga ai. Dai majaw shanhte a prat gaw lu su sahti ni a lata kaw sha nga ai ngu tsun mai nga ai. Sharaw matsan dum jang she, dumsu lawt lu na ngu ai ga malai zawn rai ma ai.

          Matsan masha ni gaw jahpawt jau jau rawt nna, sun sa lam kaw sun madu ni n chyang saw na hpe tsap la nga ra ma ai. Gam kaja ai ni gaw, dai shani bungli madu ni a lata la ai hpe hkrum ma ai. Lani mi hta, n chyang langai mi a matu gumhpraw lap mi rai nga ai (Denarius langai). Dai gumhpraw manu gaw nta masha ni lani mi kan jahkru la lu ai ram sha rai nga ai. Anhte mungdan hta hkrum sha lai wa sai manu shabrai zawn rai nga ai.

          Ndai ga shadawn gaw yu maya mabying hta grau ai mabyin langai rai nga ai. Kaja wa byin ai mabyin hta gaw, jahpawt jau jau rawt nna, n chyang shaga hkrum na matu bungli madu ni a hpang hkan nang ma ai rai nna, lata la n hkrum ai ni gaw, hpang shani ni hta gam kaja u ga myit mada let aten shama nga shalai kau ma ai.

Ga shadawn hta gaw, sun madu wa, jahpawt jau jau kalang, hkring 9 hta kalang, hkring 12 hta kalang, shana maga hkying 4 daram hta kalang sa du lata la ai hpe mu lu ga ai.

          Jahpawt jau jau shaga la hkrum ai ni gaw, hkying 12 daram bungli galaw ra ma ai rai nna, shana daw hkying 4 hpang shaga hkrum ai ni gaw hkying hkum mi daram sha galaw ra ma ai. Yesu Madu dai ga shadawn hpe tsun ai yaw shada lam gaw masha wuhpung wuhpawng hpe Kabu Gara shiga myu hpan lahkawng hpe tsun dan mayu ai majaw rai nga ai.

          Manu shabrai jaw ai lam

          Jaw Jau laika hte Tara Jahprang laika hta, n chyang ma ni a bungli galaw shabrai hpe shani shagu jaw ra ai ngu tara rawng nga ai. Hpa majaw nga yang, n chyang chyang sha ai ni gaw shanhte nta masha ni a matu dai shabrai gaw dai shani na malu masha na matu ra ahkyak nga ai majaw rai nga ai (Jaw Jau 19:13; Tara Jahprang 24:15).

Ga shadawn hta, hpang jahtum shang ai n chyang ma ni hpe shabrai shawng gam jaw ai hpe mu lu ai. Shanhte ni hkying hkum mi sha galaw nna shani tup galaw ai shabrai hpe lu ai majaw kabu nna gum lawt na ma ai.

          Hpang jahtum shang ai n chyang ni a ntsa shawang myit kaba ai hpe mu lu ai shawng nnan shang ai n chyang ma ni a matu shabrai law law lu la na re ngu myit mada da na ma ai. Raitim, shawng de myit hkrum da sai shabrai hpe sha hkam la lu ma ai majaw bungli madu hpe pawt sindawng ma ai.

          Shanhte a pawt sindawng ai gaw manawn masham myit kaw na byin pru wa ai rai nga ai. Hpang jahtum shang ai n chyang ni hpe n shaga ai rai yang, shana maga de shang ai n chyang ni hpe shanhte hta shayawm nna jaw ai rai yang, n chyang shang ai aten ni hta hkan nna shabrai garan ya ai rai yang, shawng shang ai n chyang ni kabu gara ai hte nta de nhtang wa na rai ma ai rai nna, gumhpraw lap mi hte sha tim myit dik na ma ai.

          Sun madu gaw, shanhte a pawt sindawng ai lam lachyum n nga ai; shanhte hpe myit hkrum da sai hte maren mara garan jaw ai zawn, masha kaga ni hpe mung Madu a shawang myit kaba ai hpe myit n dik na lam n nga ai hpe chye na shangun ai rai nga ai.

          Yuda masha ni a matu kasi la hpa

          Yesu madu a ndai ga shadawn hta na, katsi la hpa myu hpan lahkawng hpe madung yaw shada da ai. (1) Shi a mungga madat hkam la ai Yuda myusha ni a matu; (2) Shi a mungga madat hkam la ai Hkristan masha yawng a matu rai nga ai. Lani mi hta, San Mahte a kabu gara shiga hpe madat hkam la ai ni a matu hpe tsun mayu ai rai nga ai.

          Bungli hpe jahpawt daw nnan hpang ai kaw nna galaw hpang ai ni gaw, Yuda myusha ni rai nga ai. Karai Kasang a sumsing mungdan de shang lu na matu shawng ningnan shaga la hkrum ai ni rai ma ai.

          Shani ka-ang (chyingtung) aten hta shaga la hkrum ai ni gaw Yuda myusha ni n re ai, tara laga myusha (tara maigan) ni hpe tsun ai rai nga ai. Prat shagu na labau hta matut manoi rai shaga la hkrum nga ma ai. Aten ladaw amyu myu hta shaga la nga ai.

Kaja wa nga yang, Yuda myusha n re ai kaga myusha ni hpe Karai Kasang a ja mungdan shang na matu shaga la ai hpe Yuda myusha ni ninghkap na lam n mai nga ai rai nga ai. Karai Kasang a sun wang hta magam bungli galaw na matu myusha yawng hpe saw shaga nga ai re.

Bai, Yuda myusha n re ai kaga myusha ni a bungli shabrai hpe maren mara garan jaw ai hta mung kabu lawm ging ai. Yuda masha ni hte Yuda masha n re ai ni a matu Karai Kasang a sumsing mungdan hta shabrai kaba nga ai. Hpa majaw nga yang, gumhpraw lap mi gaw htani htana asak hpe shadan shalen ai ga shadawn kumla she rai nga ai.

Yuda myusha ni a matu, hkam la lu ai gumhpraw lap mi gaw lachyum langai hku naw sumru la mai nga ai. Dai gaw, Karai Kasang Israel myusha ni hpe jaw da ga shaka (ga sadi) hpe jahkum shatsup ai lam rai nga ai. Karai Kasang jaw da ai ga sadi hpe n hkan shatup ai, hpa mung n nga yu ai.

Yuda myusha n re ai kaga myusha ni a matu kasi la hpa

Yuda myusha nre ai ni a matu kasi la hpa mung law law rawng nga ai. Dai ni hta na langai mi gaw, sumsing mungdan shang lu na matu, tsawra myit hpe madung da nna hpang daw de shaga la hkrum ai hta anhte a matu mung jaw ang nga ai.

Anhte yawng gaw shaga la hkrum ga ai rai tim, grindan ai ni n rai ga ai. Asak kaba sai ni hpe Hkristan masha tai wa na matu shaga la ai hpe lawan ladan hkap la ging tim, n hkap la lai wa ai. Shangai wa ai ma ni hpe kashin kamun hkam ya na matu lakying taw nga chye ga ai. Shaga la hkrum ai ni yawng gaw Karai Kasang a sun wang hta magam bungli galaw na ra ga ai. Galaw ging ai magam hpe n galaw ai sha, aten jahtum taw ai rai yang wenyi lam hta kaw si hpang gara wa na ga ai.

Karai Kasang gaw shabri shabrai jaw ai hta shawang tsawra myit kaba dik htum ai wa rai nga ai. Karai Kasang, anhte a akyu hpyi nsen hpe jan shang ten du hkra n lat taw ai. Jahpawt yup rawt ten kaw na nan hpyi ai gaw dai lam hpe grau dum hprang shangun nga ai.

Shana jan shang ten ngu ai gaw, anhte a matu si ten hta gumhpraw lap mi hte bung ai htani htana asak rai nga ai, sumsing sutgan hkam la ten rai ra ai.

Shabrai kaba jaw ai sun madu a shawang tsawra myit kaba hpe madun nga ai. Dai majaw dai Madu a magam hta sadi dung let kangka gun hpai ding yang rai ra ga ai.

Ahkyak dik ai lam langai hpe matut sumru ga. Anhte, tinang hkum masu ai lam n nga ai sha Karai Kasang a magam bungli hpe myit marai bang galaw shaja ai rai yang shabrai kaba lu la na rai ga ai.

Karai Magam hpe sadi dung let htep lahti hkan galaw ai San Pawlu

Chyum daw 2 hta na, San Pawlu Philipi masha ni hpang de shagun dat ai laika hta, San Pawlu hte ni htep ai hku hkuhkau ai Hkristan masha ni a sak prat hta sadi dung let nawku hpung sharing shaga ai hpe hkan shatup ai ni rai ma ai. San Pawlu ndai laika hpe hkyuk htawng hta rawng ai ten ka shagun dat ai rai nga ai. Ndai laika hpe ka ai gaw, shi hpe garum ya ma ai majaw chyeju dun ai lam tsun mayu ai majaw mung rai nga ai.

Shi gaw kabu gara shiga hpe matut hkaw tsun mayu ai rai nna, Hkristu a magam bungli naw gun hpai mayu ai myit raw ng nga ai. Dai gaw, myusha ni hpe Karai Kasang a Ja mungdan de woi shang mayu ai majaw rai nga ai.

San Pawlu gaw, shi hkum shi, Karai Kasang a ja mungdan lam hkaw tsun na matu gingdan ai ngu n hkam la ai. Rai tim, shi hpe Karai Kasang jai lang ai majaw Hkristu Madu hpe chyeju dum nga ai. Shi a matu sumsing mungdan hta lajang da ai kumhpa, shi hte n gingdan ai ngu hkam la ai wa rai nga ai. Raitim, Dai sumsing kumhpa hpe galoi mung myit mada nga ai. Hpa majaw nga yang, dai kumhpa gaw arung arai n re ai sha, Hkristu Madu ngu ai Karai atai masha atai rawng ai wa rai nga ai majaw rai nga ai.

San Pawlu gaw anhte yawng a matu, Karai Kasang a ja mungdan hta, gara hku sak hkrung nga lu na, Karai magam hpe gara hku gun hpai ra na ngu ai kasi kamang tai ya nga ai. Anhte a sak prat hta karai kasang hkang da ai Magam bungli hpe, shagrit shanyem ai myit hte chyeju dum let sadi dung ai magam gun ni zawn myit marai kaba hte matut manoi gun hpai nga ra ga ai. Dai zawn gun hpai nga ai ni a jan shang ten du jang, anhte hpe Hkristu gaw shi hkum nan hpe kumhpa shatai let teng sha jaw na re ai hpe myit mada let Karai magam gun ni tai nga ga.         

 

Akyu hpyi saga

Wa Karai e, Nang madu shaga la ai hta hkawm sa let, Na a magam gun hpai na matu n gun atsam jat bang ya rit. Magam gun shada manawn masha lam nnga ai sha, shada garum shingtau hkat, shada pawn ba hkat, let hpunau hpa hkam la ai chyeju a matu kabu lawm chye ai myit ni hpe jaw bang ya rit. Anhte a Madu Hkrsitu a marang e, hpyi nem nga ga ai. Amen.

 

Hkristu hta tsaw ra ai kanu kawa tara hkaw sara/num ni hte nu wa hpu nau ni e, ndai laban gaw pranwan ladaw hta (25) ngu na laban rai nga ai.

Hti ang ai Ja Chyum Mungga ni gaw

  • Chyum Mungga Daw (1) Is 55:6-9
  • Chyum Mungga Daw (2) Phi 1:20-24, 27
  • Kabu Gara Shiga Mt 20:1-16

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.

 

Wa Jau Patrick Gawmaw Hkawng Yae

 

Add new comment

10 + 2 =