Karai Kasang a Mungga - Pran Wan Ladaw Laban 25 , 2019

Pran Wan Ladaw Laban 25, 2019

Chyum Laika Ni - Amo 8:4-7;   1Timoti 2:1-8; Luka 16:10-13

Tsawra ai nu wa hpu nau ni, dai ni na anhte a prat masa hta, galaw lu galaw sha yak ai, grau nna mungdan nsim nsa byin nga ai lam ni a majaw sut masa, hpaga dingga lam ni hpe atsawm akawm galaw sha nmai ai, ndai zawn re ai lam ni a majaw anhte a sak hkrung prat hta yak hkak jam jau ai lam ni law law hkrum nga ga ai rai nga ai. Kalang lang bai rai yang gaw, nmyit mada ai akajawng sha, tinang a prat hta, tinang a ding hku prat hta shing nrai, tinang galaw lu galaw sha nga ai sut hpaga lam hta, mang hkang kaba hkrum nna, chyip mak rai jam jau hkrum wa ai aten ni mung nga chye ga ai. Dai zawn re ai masa aten hta anhte kaning rai chye ga ai kun, ngu ai lam hpe anhte tinang a prat hpe bai sum ru yu mai nga ga ai.

Ndai bat na kabu gara ai shiga hta na madu yesu tsun ai ga shadawn mabyin hta, sahti wa hta kunhting langai nga ai, dai kunhting wa mang hkang nga ai majaw madu gaw shi hpe shaga la nna kunhting aya kaw nna jahkrat kau na matu shana ai, Dai shaloi kunhting wa gaw kun thing aya kaw nna jahkrat kau hkrum ai hpang masha ni shi hpe matut hkap la nga na matu kaning di na rai kun, nga nna ladat shaw ai, dai shaloi shi myit lu ai gaw, shi a madu hta hka kap ai masha law law nga ai hpe shi myit dum lu nna, dai ni hpe langai hpang langai shaga la nna, shanhte wa ra ai hka jahpan ni hpe byeng kau ya ai, naman joi latsa hka kap ai wa ai jahpan hpe 50 ngu lai ya ai, dai the maren hkau len man dang latsa hka kap ai wa hpe mung 80 ngu lai kau ya ai. Dai ntara ai kunhting wa hpaji the chye galaw ai majaw madu gaw shi hpe shakawn wu ai, nga ai lam kabu gara ai shiga hta anhte na la lai wa saga ai rai nga ai.

Madu yesu tsun ai ndai mabyin the seng nna anhte nau nchye na ai, shing nrai ndai kunhting wa a masu malu galaw ai lam hpe hpa rai shi a madu sahti wa shakawn ai rai kun, madu yesu mung ndai ga shadawn hta na masu malu galaw chye ai kunhting wa hpe hpa rai shakawn ai rai kun, ngu ai lam ni hpe anhte san mayu ga ai rai nga ai.

Tsawra ai nu wa hpu nau ni, kabu gara ai shiga hta Madu Yesu tsun madi madun mayu ai lam madung gaw, shi a kan bau bungle madung rai nga ai kunhting bungli tat shamat kau ai hpang shi a shawng lam prat maji shim ai lam lu la hkra dai masha wa ladat shaw galaw ai, ngu ai lam rai nga ai. Shi a bungli madung tat shamat kau ra sai majaw myit ru kaba hkrum nga ai dai masha wa hku nna, shi a ntsawm ai gam maka hpe myit ru ai nga nna aput angun galaw let majoi dung nga ai nrai nga ai. Shi a madu hpe hka kap nga ai masha ni a hka jahpan ni hpe byeng dat ya nna, dai masha ni a man hta myi man lu hkra shi lama ma ladat shaw galaw dat ai rai nga ai. Ndai mabyin hta sut masa hpaga dingga galaw sha ai lam the seng nna hpaji jaw ai lam Madu Yesu galaw nga ai nrai. Hkye hkrang la ai hkrum lu na lam the seng nna sharin shaga nga ai lam she rai nga ai. Ja gum hpraw tam ai masha ni ladat shaw nna bungli galaw shakut chye ma ai zawn wenyi lam hta mung ladat shaw nna aja awa shakut shaja ai lam ni galaw ra ai ngu ai mungga rai nga ai.

Ndai kabu gara ai shiga hku nna anhte hpe sharin shadum ya mayu ai lam nlaw htum hpan lahkawng nga nga mali ai. Dai gaw, matsan mayan ru yak jam jau hkrum nga ai ni a matu akyu hpyi ya ra ai ngu ai lam the, matsan mayan ni a tara rap ra ai lam a matu tsun tsap shaga ya ra ai ngu ai lam rai nga ai. Ndai hpan lahkawng gaw langai the langai matut mahkrai hkri shawn hkat nga ai.

Ndai bat na lahkawng ngu na ja chyum mungga rai nga ai Timothy hpang de kasa Pawlu shagun dat ai laika gaw, laban nawku the missa hkungga hta anhte hpyi ai shawa akyu hpyi ga lajang ai shaloi myit shalawm mai ai lam ni rai nga ai. Anhte a shawa akyu hpyi ga hta yawng hpe malawm magawm di nna yawng a matu akyu hpyi ya ai lam galaw ra ga ai, grau nna matsan jam jau hkrum nga ai ni, myit daw myit hten hkrum nga ai ni, adip arip di hkrum nga ai ni, mungkan masha ni e n gawn nasawn di da hkrum nga ai ni, ndai ni a matu lak lai ai masa the akyu hpyi ya ai lam anhte galaw ya ra ga ai.

1 Tim 2:1 the 3 hta “Tara hkungga nna sut ang ai lam amyu myu hpe hkan galaw lu let, anhte ngwi pyaw ai the sum nung shingdi ai hta hkrung nga lu hkra shinggyim masha ma hkra a matu mara mung, hkaw hkam ni the ahkang aya lu ai ni mahkra a matu mung, hpyi nem ai, akyu hpyi ai, hpyi htinglu ya nga ga, dai gaw anhte a hkye hkrang la ai madu karai kasang a man hta e mai kaja ai the sharawng awng ai lam rai nga ai” nga nna yawng a matu akyu hpyi ya ra ai lam matsun da nga ai.  

Akyu hpyi ya ai ngu ai lam mung, akyu hpyi ya ai lam san san sha nrai, akyu hpyi ya ai lam gaw ta tut magam bungle galaw shapraw ya ai masa de woi yawng wa ya ai lam tai ra na rai nga ga ai. Ta tut magam bungle hkrang shapraw ai ngu ai lam the seng nna ndai bat na langai ngu na ja chyum mungga rai nga ai myi htoi Amo a laika hta mu lu nga ga ai. Myi htoi Amo gaw shinggyin nga pra lai htung masa lam ni the seng nna sharin matsun ya ai myi htoi rai nga ai the, ntara ai masa the matsan mayan ni a lamu ga ni hpe gashun mya la ai masha ni hpe tsun mara shagun lam galaw ai myit htoi mung rai nga ai.

“Matsan mayan ni hpe gum hpraw hte, hpa nlu ai ni hpe kyepdin man mi hte, mari la lu nna, hkau len man shingrun dut lu na matu, dang hpe kaji, joi hpe kaba shangun nna, maw sha mat sha let, anhte man dut lu na, laban nhtoi lau lai u ga, nga nna tsun let hpa nlu ai ni hpe gamaw kau mayu ai ni e ndai ga madat mu” nga nna ntara ai masha ni hpe myit htoi Ama tsun daru sharin ai lam hpe myi htoi Amo 8:4-6 hta mu lu nga ai.

Tsawra ai nu wa hpu nau ni, matsan mayan ni hpe garum lakawn chye ai masha ni rai ma ai, ngu ai masa hku nna anhte hkristian ni hpe masha ni mu mada ra na rai nga ga ai. Anhte Hkrsitian ni gaw, ndai mungkan ga a sut rai ni hpe matsan mayan ni hte gam garan jaw hkat nga let matsan mayan masha ni a jing hku kaja ni tai nga na matu saw shaga da hkrum ai ni anhte rai nga ga ai. Mungkan ga a sutgan ni hpe hting hkang sum hting da na, kunhting kaja san da na matu karai kasang man e kam ram ai masha ni mung anhte Hkristian ni rai nga ga ai, hpa majaw nga yang anhte Hkraitian ni hku nna ndai mungkan sut rai ni hpe lahpawt nchye ai myit hte masha kaga ni hpe gam gara ya chye ai ni anhte rai nga ga ai. Anhte Hkraitian ni gaw mungkan sut gan law law lu su ai sahti kami ni tai gyin ai, karai kasang e kam hpa gying ai masha ni rai ga ai, ngu ai lachyum rai nga ai.

Dai re ai majaw anhte Hkristian ni hku nna anhte dang lu ai daram yak hkak jam jau hkrum ai matsn mayan ni hpe akyu hpyi garaum ya ai, ta tut garum shing tau lam galaw ya ai lam ni hpe ning shawng shaw woi awn galaw ai lam ni galaw ra na rai ga ai, shaloi she mai kaja ai tsawra chye ai, shawang tsawra myit kaba ai, hkyik hkam ai kawa langai a kashu kasha ni anhte rai ga ai, ngu ai lam hpe sake hkam ai lam tai nga na rai nga ga ai.

Tsawra ai nu wa hpu nau ni, Myi htoi Amo a prat hta byin lai wa ai zawn dai ni anhte a makau grup yin ni hta mung, matsan mayan ni hpe adaip arip di, ntara ai hku maw lu maw sha di nna sut gan lu su jat wa ai ni kade she naw nga nga ma ai kun? Matsan mayan ni maga de karai kasang tsap ya na re nga nna myit htoi Amo hkaw tsun lai wa ai hpang kade nna yang, Samaria mung daw gaw Assyria ni a kasat dang la kau ai hkrum nna dai matsan mayan ni hpe adi arip di lai wa ai sut su ai ni mahkra mung Assyria mung dan de mayan shatai na matu woi la hkrum lai wa masai rai nga ai. 

Sut gan ja gum hpraw hta ladu shalai baw bang ai lam ni nnga hkra Karai kasang hta chyu sha anhte n-gun atsam lu la mai nga ga ai. Bai, ntara ai magam bungli ni galaw nna tinang a sut gan ja gum hpraw shalaw la lam galaw nga na malai, ntara ai lam ni hpe manga kau lu hkra shakut galaw ai magam hta kachyi sha re ai tinang a sut gan ni gin lut kau ai hpe madaw hkam la gwi hkra shajin da na gaw grau mai kaja ai magam lam rai na rai nga ai.

Akyu hpyi saga: Wa karai kasng e, nang hpan da ai arung arai ni mahkra hpe tsawra ai myit the nang yu lanu lahku ya nga ndai, anhte shada da tsawra ai hta pawn ba hkat nga let, nang lajang da ya ai htani htana asak de shang wa lu u ga, na a tsawra ai kasha ni anhte hpe mung matsun madun lam woi la ya rit, anhte a madu hkristu a marang e hpyi nem nga ga ai.