Karai Kasang A Mungga - Pran Wan Ladaw Laban 24 ( Shaning C, 2019)

Chyum Laika Ni –

Daw I - Pru 32:7-11, 13-14, Daw II - 1 TM 1:12-17, Kabu Gara - Luka 15:1-32

Karai Kasang a Mungga ngu ai gaw shani shagu anhte Karai Kasang hpe grau grau chye chyap wa lu hkra garum ya ai lam ni rai nga ai. Shi Madu Karai Kasang hpe grau grau chye chyap wa lu na matu ngu ai hta, anhte shing gyim masha ni a nyan marai hte ndep nchye lu ai Karai Kasang a lam ni hpe chye wa lu na matu dai mungga ni anhte hpe garum ya nga ai ngu ai masa nrai, Karai Kasang a tsawra ai lam ni hpe anhte grau chye na wa lu na matu garum ya ai lam she rai nga ai. Dai re ai majaw,Karai Kasang a mungga ni hpe myit sum ru nna akyu hpyi ai lam ni gaw, Karai Kasang anhte hpe tsawra nga ai ngu ai mahtai hpe anhte mu tam la lu hkra anhte hpe garum ya nga ai. Anhte a mara ni hpe raw kau ya na matu shi Madu Karai Kasang galoi mung shajin da nga ai ngu ai lam gaw Karai Kasang anhte hpe tsawra ai ngu ai ngu ai lam a sakse rai nga ai.

Karai Kasang gaw tsawra matsan dum chye ai wa re ngu ai lam hpe anhte hpung masha ni dum chye nga lu na matu ya sha ya sha Nawku hpung hku nna anhte hpe shadum ya ai lam ni galaw ya nga ai. Hpajaw nga yang, anhte hkum shagu gaw aten shagu Madu Karai Kasang a matsan dum la na hpe ra kadawn nga ai ni rai nga ai hte, Karai Kasang a tsawra matsan dum lama ai lam ni gaw kade hkyik hkam kaba la nga ai ngu ai lam hpe anhte a prat tup sawnk sagawn hka ja nga tim ngut lu na lam ni nre ai majaw ya na zawn Nawku hpung kaw nna ya sha ya sha Madu Karai Kasang a tsawra ai mai kaja ai lam ni hpe shadum ya ai lam ni galaw nga ai rai nga ai.

Karai Kasang a raw dat hkyam sa jaw ai lam ni hpe shing gyim masha ni hkam la lu nga ai, ngu ai lam hte seng ai ja chyum Mungga daw ni hpe kabu gara ai shiga hta mu hti shagu anhte myit dum mai ai lam lahkawng nga nga mali ai.

Nam bat langai ngu na gaw, shing gyim masha ni a shut hpyit ai lam ni hpe raw dat hkyam sa jaw ya ai hta, galoi mung kabu gara sharawng awng ai lam shi a Madu Karai Kasang hta nga nga ai. Lachyum gaw anhte a mara ni hpe raw kau ya ai lam ni galaw ya shagu Karai Kasang shi hta mung kabu gara ai lam nga nga ai, ngu ai lam hte lahkawng ngu na lam gaw, anhte shing gyim masha ni a prat hta kaba dik, jet dik masa hte hkam sha lu la mai ai kabu myit dik myit pyaw lam ngu ai gaw, tinang a mara ni a matu karai kasng kaw nna raw dat hkyam sa lu la ai aten hta hkam sha lu ai kabu myit dik myit pyaw lam nan re ngu ai lam rai nga ai.

Ndai zawn re ai kaba la ai Madu Karai Kasang a tsawra myit kaba hpe shing gyim masha ni mu chye wa lu mu ga shaleng ya na matu she Madu Yesu ding hta ga de yu hkrat sa wa ai rai nga ai. Dai re ai majaw, Madu Yesu a shawng nnan hpaw tsun ai mungga gaw, “myit malai lu nna, dai kabu gara ai shiga hpe kam sham nga mu” nga nna saw shaga ai mungga rai nga ai. Ndai mungga a lachyum gaw, tinang a shut hpyit mara ni a matu myit malai lu mu, tsa dan wa a mayam prat kaw nna nanhte hpe shalawt dat ya na matu mung, shi a kasha ni shatai da nna shi a mung dan hta shi hte rau nga nga lu hkra lajang ya na matu mung kawa Karai Kasang ra sharawng dik nga ai, ngu ai lam rai nga ai.

Ndai bat na kabu gara ai shiga hta mu lu ai Madu Yesu tsun ai ga shadawn ni hku nna mung, Kawa Karai Kasang gaw anhte a shut hpyit mara ni hpe raw dat kau ya na matu jin jin rai nga ai ngu ai sha n-ga, dai zawn rai anhte a mara ni hpe raw kau ya ai lam hta shi Madu a myit masin hta mung kabu gara nga ai, ngu ai lam ni hpe Madu Yesu shadum sharin ya nga ai.

Sagu latsa hta na mat mat ai sagu langai mi a lam, ga shadawn hku nna Madu Yesu tsun sharin ya mayu ai mungga gaw, kawa Karai Kasang gaw, anhte a shut hpyit ai lam hpe raw dat kau ya na matu ala dung nga ai nrai, shut hpyit nna lam dam nga ai ni hpe pru hkawm hkan tam sagawn la nna myit malai ai hte shi hpang de bai wa lu na matu tsawra ai myit kaba hte lam woi ya ai Madu Karai Kasang re ngu ai lam hpe shadum sharin ya ai lam rai nga ai.

Bai, gum hpraw lap shi lu ai hta na lap mi shamat kau ai num sha, gumhpraw bai mu tam la ai shaloi gabu gara nga ai lam, ga shadawn hku nna mung, raw dat hkyam sa jaw ya ai lam hta Madu Karai Kasang galoi mung kabu gara nga ai ngu ai lam sharin ya nga ai. Dai hte maren sha kawa kaw nna Sali kum htaw garan la mat wa nna, jai shama, shamat kau ma jang bai wa ai kasha hpe kawa kabu gara hkap tau la ai ga shadawn mabyin hta mung raw dat hkyam sa jaw na matu galoi mung shajin da ai kawa Karai Kasang a galu kaba dik ai tsawra myit kaba hpe mu lu nga ga ai.

 Anhte kanu kawa ni hku nna tinang a kashu kasha ni hpe grai tsawra ai ngu raitim pyi, shanhte lama ma galaw shut nna hkyam sa jaw ya ai shaloi, dai shut ai ma hpe htawm de dai zawn bai nshut na matu jat jat sadi jaw ai lam ni galaw chye ga ai. Raitimung, Madu Karai Kasang a raw dat hkyam sa jaw ya ai ngu ai lam hta, n-gun jaw pawn ba lakawn la ai hta lai nna, hti htan hka jum ai lam zawn re ai ni Karai Kasang galoi n-galaw nga ai.

Bai, Karai Kasang a raw dat hkyam sa jaw ya ai lam hpe lu la ai shaloi anhte a myit masin hta pru wa ai kabu gara myit dik myit pyaw ai lam ni gaw anhte shing gyim masha ni a prat hta lu la hkam sha lu mai ai myit dik myit pyaw lam ni mahkra hta na kaba dik htum ai kabu gara myit dik myit pyaw lam nan rai nga ai. Ndai lam hpe mung ndai bat na lahkawng ngu na ja chyum mungga rai nga ai Timothy hpang de shagun dat ai kasa Pawlu ai shagun laika hta kasa Pawlu anhte hpe shadum ya nga ai.

Shi a si wa na aten ni wa magang sai hpe dum chye nga sai kasa Pawlu gaw, shi a hkang galai nna Ephesus hpung masha ni hpe lam woi lakawn la na lit hpe Timothy hpe shatsam ya ai. Asak naw kajai ai hte grai hkrit kaya agam chye ai Timothy hku nna hpung masha ni hpe woi awn wa ai aten yak ai lam ni hkrum hkra wa nna myit daw myit hte mat wa na hpe tsang ai majaw n-gun jaw na matu ka dat ai laika rai nga ai.

Kasa Pawlu ka n-gun jaw dat ai hta, “shut hpyit mara kap ai ni hpe hkye hkrang la na matu mara, hkristu yesu gaw mungkan ga de du ra ai, nga ai ga gaw kang ka re ai hte, kaja wa hkam la gying ai ga rai nga ai, dai mara kap ai ni hta ngai mahtang mara kaba htum ai wa rai nga nngai raitimmung, Hkristu Yesu gaw, shi matsan dum ai yawng mayawng, ngai mara kaba htum ai wa hpe madun dan lu nna, htani htana asak lu la hkra, hpang de shi hpe kam sham na masha ai ni a matu mara kumla tai na majaw ngai hkum nan chyeju lu la ni ai” nga nna Timoty hpe shadum da nga ai.

Kasa Pawlu tsun mayu ai ga a lachyum gaw, nawku hpung hpe zingri lai wa ai ngai hpe pyi mara raw ya nna shi a kasa shatai da ai rai yang gaw, Karai Kasang a raw dat hkyam sa ai lam hpe kadai raitimmung hkam la lu mai ai ngu ai hpe chye na da mai ga ai hte, Karai Kasang a tsawra matsan dum lama ai lam hpe ung ang shara kadai nnga mai ai, ngu ai lachyum rai nga ai.

Karai Kasang a mai kaja ai tsawra matsan dum lama ai lam ni hpe tut e sum ru ding lik yu nga ai lam a mahtai gaw, kasa Pawlu shi a prat hta ga si ni hte tsun shapraw dan nlu mai ai myit masain a kabu gara myit dik simsa lam ni hpe lu la ai lam rai nga ai hte, dai kaba la ai Karai Kasang a tsawra matsan dum lama ai lam ni a majaw Karai Kasang hpe chyeju dum shakawn shagran  nga ra ai ngu ai lam ni hpe mung shadum ya ai lam rai nga ai. Dai re ai majaw 1Tim 15: 17 hta “htani htana re ai, nhten nmat chye ai, myi e nmu lu ai, hkaw hkam ngu ai, karai kasng langai sha kaw, arawng sadang hte hpung shing kang gaw, htani htana prat ding sa e, anga nga u ga law” nga nna tsun pru wa ai rai nga ai.

Tsawra ai nu wa hpu nau ni, shut hpyit ai ni anhte rai ga ai majaw, Karai Kasang a raw dat hkyam sa jaw ya ai lam hpe mung hkrum kadup yu ai ni hkrai anhte rai nga ga ai. Ndai lam ni hpe myit dum nga nna, anhhte hpe shut kau ai hpu nau ni a mara ni hpe mung anhte raw dat hkyam sa jaw ya let anhte gaw shut hpyit mara raw ya chye ai tsawra mai kaja ai Karai Kasang a kashu kasha ni rai ga ai ngu ai lam hpe shaleng dan lu hkra matut shakut nga ga law.

Akyu hpyi saga: Wa Karai Kasang e, nang gaw anhte a hpan da madu rai nga ndai hte anhte a mara ni hpe mung tsawra myit kaba hte raw kau ya chye ai wa rai nga ndai majaw, anhte a myit masin salum mahkra hte nang hpe chyu sha nawku daw jau nga lu u ga garum ya rit, anhte a madu hkristu a marang e hpyi nem nga ga ai.AMEN

Wajau Bernard Dashi Tang Ji ( RVA Assistant Program Director)