Karai Kasang A Mungga - Pran Wan Ladaw Laban 24, Shaning A 2020

PRANWAN (24), A, 2020

13 September 2020

Hkristu hta tsaw ra ai nu wa hpu nau ni e, ndai laban gaw pranwan ladaw hta (24) ngu na laban rai nga ai.

Anhte gaw shinggyim masha ni re majaw mara lu ai ni rai ga ai. Karai Kasang yaw shada ai lam hpe aten shagu hprai chye ga ai. Dai zawn hprai ai a marang e, anhte a hpu nau ni a makam masham hpe dingbai dingna jaw chye ga ai.

Anhte, shinggyim masha re majaw, hpu nau ni hpe shut shai chye ga ai hte maren hpu nau ni mung anhte hpe shut shai chye nga ai. Dai mara a majaw bying wa ai dam ana hpe tsi lajang ai lam n-nga jang, anhte a Hkritan myit hkrum galung kahkring lam hten run mat wa na rai nga ai.

Daini na chyum mungga gaw, anhte hpe hkra machyi hkra galaw ai ni hpe mara dat ya na lam a yak dik ai Hkristan lit magam hpe shadum ya nga ai.

Anhte a Karai Kasang gaw Mara dat ya nga ai Karai Kasang rai nga ai. Kabu gara shiga hta (1) Karai Kasang gaw shinggyim masha ni a mara hpe dat ya na matu myit ra nga ai lam tsun da ai. Shinggyim masha ni myit la ai hpyen masa kaw nna jinghku shatai la mayu ai. (2) Karai Kasang gaw shinggyim masha yawng hpe shi a kashu kasha ni shatai la mayu ai. Madu Karai hte rau kabu pyaw ai lam hta htani htana shang lawm shangun mayu ai.

San Pawlu gaw “..

.Dai rai nna, anhte gaw Hkrsitu a lam htinglet ya ai kasa ni tai let, Karai Kasang shi nan anhte n-gup aga hku nna nanhte hpe lajing nga ai. Nanhte gaw shi hpe hpyen ai ni tai nga ai kaw nna shi a jinghku ni tai wa mu ngu, hkristu a malai anhte hpyi nem nga ga ai,”

nga nna, 2Kor 5:18-19, hta sakse hkam da ai.

San Pawlu gaw buga ginra shara shagu hkawm sa ai wa rai nna, “kabu gara nga mu! Nanhte a matu kabu gara shiga lawm sa ga ai. Karai Kasang gaw nanhte a mara ni hpe dat ya na matu ginrat taw nga ai. Lawan dik ai hku hkap la mu,” ngu masha shagu na lu hkra hkaw tsun shadut ya ai wa rai nga ai.

Karai Kasang gaw shinggyim masha ni hpe mara dat ya ai. Shinggyim masha ni, tinang a mara matu myit malai lu ai hte mara dat hkyam sa hpe hkam la lu ai. Madu Karai gaw, shawang myit kaba hte mara dat ya ai zawn, jarit masat n-nga ai sha mara dat ya na matu mung jing jing rai nga ai.

Dai zawn mara dat ya ai hta, Karai Kasang gaw, hka wa na matu htingrai arung arai hpyi ai lam n-nga ai; masat jarit n-nga ai myit malai lu na matu sha hpyi shawn da ai. Raitim, mara dat ya ai lam hta, htingrai htingrat hkam la ai zawn, anhte ni gaw anhte hpe shut hpyi ai ni hpe ga hpunda (ngam tawn da ai lam) n-nga ai sha mara bai dat ya na matu hpyi shawn da ai.

Yesu Madu Mungkan ga ntsa de yu hkrat wa ai gaw, Karai Kasang anhte a mara ni hpe raw dat ya na matu jing jing re ai lam; anhte gaw hpu nau ni hpe mara dat ya na matu ningdang ai rai yang Karai Kasang a mara dat hkyam sa lam hpe pat shing dang la ai re lam chye na hkap la na matu rai nga ai.

Jaw Jau Laika 19:17,18 hta, “Kadai hte mung n pyaw n ngawn hkum rai myit; kadai hpe mung matai hkum htang myit; na a htingbu wa hpe na a hkum hte maren tsaw ra lu na rai ndai,” ngu ka da ai.

Raitim, Yuda masha ni gaw dai tara hpe shanhte Yuda myusha shada a matu sha hkap la nna, Yuda Chyum laika sara ni, Yuda myusha nre ai ni hpe gaw mara n-dat ya ma ai hte, matai htang ai gaw tara masa jaw ai ngu sharing ya ma ai.

Yesu Madu gaw, shanhte hkam la ai sharing shaga lam ni hpe ninghkap lai wa ai. Mara dat ya na lam hte seng nna, Yesu Madu a sharing shaga lam gaw, Yuda sara ni a sharing shaga ai lam hte shai nga ai rai nna, mau hpa kaba mung rai nga ai. Kasa ni hkum nan Yesu Madu a sharing shaga ai lam hpe hkap la na matu yak lai wa masai.

Yesu a mauhpa ga shadawn lahkawng rai nga ai,

“mat mat ai kasha a lam,” Lk 15:11-32 hte, “mara n-dat ya hkraw ai mayam a ga shadawn,” Mt 18:23-25, ni a marang e, mara dat ya na lam hte seng nna Karai Kasang a shawang tsawra myit kaba hte shinggyim masha ni a n-hkru ai myit hpe shingdaw da nga ai.

Ga shadawn lahkawng yan na kawa hte hkawhkam gaw Karai Kasang rai nga ai; kasha kahpu ba wa hte mara ndat ya ai hkraw ai mayam gaw shinggyim masha rai nga ai.

Yesu Madu sharing ya ai Karai Kasang a mara dat hkyam sa lam hte seng ai shawang myit hpe Madu Yesu Hkum nan wudang ntsa si hkam ai a marang e, ga hpunda n-nga ai sha shinggyim masha yawng mara dat hkyamsa hkam la ai lam tengman sakse madun ai rai nga ai.

Myit n pyaw hpa gaw, anhte shinggyim masha ni kahpu ba wa hte mara ndat ya hkraw ai mayam zawn hkan galaw ai lam rai nga ai. Madu karai a shawang myit kaba hpe katsi la hkan sa ra ga ai.

San Petru a ga san hte Yesu Madu a mahtai

San Petru gaw Yesu Madu tsun ai shada mara dat ya ai hte seng nna sharing shaga ai lam gaw shapau tsun ai zawn hkam la na masa hta nga ai. Dai majaw, “hpu nau langai ngai shut jang 7 lang mara dat ya ra na i” ngu ga san san da nga ai. Yesu a mahtai hta, dai ram rai jang gaw mara hkum dat sa ngu tsun wa na hpe San Petru myit mada da na masa hta nga ai.

Tim, Yesu Madu jaw ai mahtai gaw shinggyim masha yawng hpe mau mat shangun nga ai. “Sanit lang sha n rai, sanit shi e htam sanit lang du hkra mai rai nga ai,” ngu ngai tsun nngai (Mt 18:22). San Luka laika hta gaw “lani mi hta sanit lang mara dat ya ra ai ngu tsun da ai, (Lk 17:4). Lahkawng yan gaw lachyum maren sha rai nga ai. Anhte hpe tawng ban shagu mara dat ya ra ai lam tsun da ai rai nga ai.

Ga Shaka Dingsa prat hta, Cain a aru arat, Lamek gaw shi hpe hkra machyi shangun ai masha langai mi hpe, shi a madu jan lahkawng a shawng kaw sat kau ai; shi hpe shingna hte hkra ya ai ma langai hpe mung sat kau ai lam arawng la lai wa ai. Dai zawn galaw ai a marang e, Karai Kasang shi hpe mara dam jaw na re lam na ai shaloi, shi hpe dingbai dingna jaw ai masha ni hpe sanit shi e shani lang matai bai htang na ngu nna Lamek shi a arawng hpe shakawng tsun shapraw da ai (Ningpawt Ninghpang 4:23-24).

Yesu Madu, sanit shi e sanit lang” ngu tsun ai gaw anhte hpe shut hpyit ai ni hpe mara dat ai hta masat jarit nmai tawn ai hpe shadum da ai rai nga ai. Shinggyim masha ni a matai htang ai lam gaw, n hkru n kaja ai a majaw rai nga ai. Shi a n hkru n kaja ai lam kaba magang, matai htang lam hkrit tsang ra magang rai nga ai.

Karai Kasang mara dat ya nga ai. Madu Karai a mai kaja ai lam gaw masat jarit, masat shadang n nga ai rai nna, shi a mara dat ya ai lam mung masat shadang n nga ai. Anhte ni Karai Kasang hpe katsi la ra ga ai; sharing la ra ga ai. Shawang tsawra myit kaba hte mara dat ya ai gaw, n hkru n kaja ai wa a matai htang lam ni hta htam law law grau kaba nga ai. Shawang tsawra myit hte mara dat ya lu ai wa gaw Karai Kasang hte grau ni htep ai wa rai wa na ra ai.

 

Akyu hpyi saga

Anhte a Madu Hkrsitu a marang e, hpyi nem nga ga ai. Amen.

Hkristu hta tsaw ra ai kanu kawa tara hkaw sara/num ni hte nu wa hpu nau ni e, ndai laban gaw pranwan ladaw hta (24) ngu na laban rai nga ai.

Hti ang ai Ja Chyum Mungga ni gaw

  • Chyum Mungga Daw (1) sirach 27:33-28:7
  • Chyum Mungga Daw (2) Rom 14:7-9
  • Kabu Gara Shiga Mt 18:21-35

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.

 

Add new comment

10 + 10 =