Karai Kasang A Mungga - Pran Wan Ladaw Laban 24, 2021

Nni nkri hkam ai gaw kabu pyaw ai a npawt rai nga ai

Hkristu hta tsaw ra ai nu wa hpu nau ni e, ndai laban gaw Pranwan Ladaw hta (24) ngu na laban rai nga ai.

San Marku gaw shi a Kabu Gara Shiga Laika hpe San Petru a mungga ni hpe mahkawng nna ka da ai rai nga ai. Dai majaw Marku a Kabu Gara Shiga Laika gaw San Petru Hkristan ni hpe hkaw tsun ai munnga ni a ginchyum dat laika buk ngu mung tsun mai nga ai. Ndai laban na Kabu Gara shiga laika hpe daw masum (3) garan nna sumru mai ga ai.

1. San Petru gaw, kasa ni yawng a malai Yesu hpe “Messiah” ngu sakse hkam da ai,
2. Yesu Madu gaw nni nkri hkam si hkam nna, bai hkrungrawt na ngu kasa ni hpe tau nau tsun da nga ai,
3. Madu Yesu gaw kasa ni hpe Shi a mungga madat hkam la nna, Shi hpang hkan ai tengman kasa/sape ni tai mayu yang nni nkri hkam, wudang hpai ra na lam tsun da ai.

San Pawlu a mungga gaw prat shagu na Hkristan ni yawng a matu yaw shada ka da ai rai nga ai. Masha langai mi, Yesu madu hpe karai kasang hte hkyela madu hku hkap la nna, tinang a myit kraw kata hta San Petru Yesu Madu hpe “Messiah” hku hkap la ai zawn kabu pyaw lam teng sha lu la na rai nga ai.

Yesu Madu a sape langai hpra gaw sara Madu a nni nkri yubak hkam ai hta shalawm hkam la ra ai. Hpa majaw nga yang, Yesu Madu zawn sumsing mungdan de lung wa na matu Karawari kawng hpe lai di ra ai.

Kabu Pyaw lam gaw wudang hte galoi mung tsan gang nga na n re; Hkristan ni a matu bai hkrungrawt ai a kabu pyaw ai la gaw nni nkri hkam ai hta nhtoi shingkang langai rai nga ai.

San Petru gaw Yesu Madu hpe “Messiah” rai nga ai ngu kabu gara let sakse hkam ai. Kasa ni gaw Yesu Madu hte lahkawng ning rau nga lai wa ma ai. Sara langai hku sharin shaga ya ai. Shaloi tinang a sharin shaga ai lam ni hpe n matut shi yang kasa ni hpe ahkyak ai ga san langai san hpang ai.

Kasa ni a matu gaw, Yesu Madu a matu mungkan ting a matu, langai hpra a matu, kadai rai ma ai hpe chye na na gaw grai nan ahkyak nga ai. Dai gaw Yesu Madu hta byin wa na lam a ra ahkyak ai lam langai rai nga ai.

Yesu Madu gaw, kasa ni hpe shi Madu hpe masha ni kadai re ngu tsun ma ai, ngu san hpang ai. Kaja wa nga yang Yesu Madu gaw shanhte tsun dan na hpe n madat ra ai. Masha shagu a lam shi atsawm sha chye ai. Shawng na ga san gaw, hpang na ga san a matu san ai ga san rai nga ai. “Nanhte mung ngai hpe kadai ngu myit la ma ai rai?” San Petru gaw Kasa ni yawng a malai htan mu ai. “Madu gaw Hkristu rai nga ai” (Mk 8:29).

Yesu Madu gaw kasa ni hpe “ya ten hta dai shiga hpe makau grupyin ni hta n chyam bra shi u ga, matu hkang da ai. Dai ten, shi hte seng ai dai lam hpe chye n ra shi ai majaw gin htim ai rai nga ai. Shi a matu ahkyak ai gaw shinggyim masha ni hpe hkye la na matu mungkan ga de du sa ai lam hkaw tsun na ai rai nga ai, (Mk 16:16).

Yesu Madu gaw “Messiah” re ai lam ndau ai, hkap la ai lam gaw Petru hte kasa ni a matu kaba la ai kabu pyaw lam rai nga ai. Yesu madu mung kabu pyaw ai rai nga ai. Hpa majaw nga yang sape ni a rawt jat, hkawn hkrang ai a a majaw kabu pyaw ai rai nga ai. Shi a sharin shaga ai lam hpe kasa ni chye na hkawn hkang wa ai majaw kabu payaw ai rai nga ai.

“Dai rai nna Yesu gaw, Yawhan a kasha Simun e, nang a lu ndai; ndai lam hpe yu maya masha langai mi hku nna nang n chye lu ndai; sumsing lamu e nga ai nye Wa gaw dai hpe madun dan da ndai,” (Mt 16:17).

Yesu Madu shi hkum nan nni nkri hkam si hkam na lam hpe matut manoi rai nna tau nau tsun dan da ai hpe anhte mu lu ga ai.

“Dai shaloi Yesu gaw, dai masha kasha gaw nni nkri law law wa hkrum nna, agyi salang ni, hkingjawng agyi ni hte tara sara ni e nyet kau ai hkrum na ra ai. Shi hpe sat kau na mara ai, rai ti mung, masum ya nhtoi a hpang e shi bai hkrung rawt wa na ra ai, ngu nna shi a sape ni hpe sharin achyin ya hpang mu ai. Dai lam shanhte hpe dan dan leng leng tsun dan mu ai. Dai rai nna Petru gaw shi hpe shara langai mi de shaga la nna, daru kau magang wu ai, (Mk 8:31-32).

Ndai ga hpe na ai kasa ni grai kajawng lai wa ma ai. Messiah hte seng ai shanhte a sumru ai gaw, dai aten hta, Yuda ni yawng zawn sha “Messiah” gaw mungkan hte seng ai hpung shingkang hpring tsup ai awng padang lu ai wa rai na re ngu hkam la ma ai. Shanhte gaw “Messiah” nni nkri hkam si hkam ai, grau nna, wudang ntsa si hkam ra na hpe n myit mada da ma ai.

San Petru gaw Yesu hpe shadum na lit nga ai ngu hkam la ai wa rai nga ai. Dai majaw “Messiah” hte n seng ai ga n tsun na matu Petru Yesu Madu hpe shadum ai. Shaloi jang Madu mung Petru hpe daru sharin kau wu ai; Ja dik ai ga si hte nan Petru hpe sadi jaw ai.

“Yesu gaw kayin wa ai hte shi a sape ni hpe mada yu let, Petru hpe, Satan e, ngai kaw na pru mat wa u. Na myit ai lam ni gaw Karai Kasang kaw na n rai, masha kaw na she rai nga lit dai, ngu nna daru kau wu ai (Mk 8:33).

Kade nna shi yang Yesu Madu gaw San Petru hpe Kawa Karai Kasang hpaw tsun da ai majaw, Madu Yesu hpe “Messiah” ngu tsun hpaw dan na ahkang lu ai wa ngu hkam la let ndau tsun da ai. Kaja wa nga yang, ya na lang Petru tsun ai ga gaw Yesu Madu hpe Satan tsun lai wa ai ga rai nga ai. Yesu Madu, Petru hpe Satan a ladat hpe jai lang ai ngu daru kau mu ai.

San Petru, Yesu Madu a hpang hkan nang mayu yang shi a myit sumru hkam la ai lam ni hpe galai shai kau ra ai.

Yesu Madu gaw Hkristan ni yawng nni nkri ngu ai tinang wudang hpai ra ai lam ndau ai. Yesu Madu gaw shi a nni nkri hkam si hkam ai lam hpe ndau ngut ai hpang ahkyak dik ai Kabu Gara Shiga hpe tsun dan maw ai shaloi zawn kasa ni hte na lu ai ni hpe madat hkam la na matu makau kaw shaga zuphpawng da lai wa ai lam San Marku ka da ai.

“Dai hpang Yesu gaw shawa masha ni hte sape ni hpe shi hpang de shaga la nna, Kadai rai ti mung, ngai hpang de hkan sa mayu ai wa gaw, tinang hkum hpe ndang kau nna, shi a wudang hpai let, ngai kaw hkan nang ru ga,” (Mk 8:34).

Madu Yesu si ai hpang San Petru Madu Yesu a sharin shaga lam ni hpe bai sharin shaga ya ai. (1) Anhte tinang hkum hpe nyet kau ra ai. Karai Kasang hte nhtan shai ai lam rai yang anhte kade ra sharawng ai raitim, nyet kau ra ai. (2) Anhte a Hkristu Madu zawn tinang a wudang hpai let shi hpang hkan ra ai (Mk 6:35). (3) Mungkan hta sak hkrung ai prat hte htani htana prat lahkawng yan gaw Karai kasang jaw ai chyeju kumhpa sha rai nga ai. Htani htana asak hpe lu la na matu mungkan sak prat hta ap nawng ra ai lam ni hpe n mai jahkring kau da ai. Htani htana asak gaw ahkyak dik htum rai nga ai.

San Petru, shi a mungga hpe ndai hku ginchyum dat da ai. “tsawra hkungga ai kashu kasha ni e, ya aten hta, nanhte chye na yak na ma ai. Ngai mung Yesu Madu hkaw tsun ai ten hta chye na hkap la na yak lai wa ai. Ya aten gaw loi li chye na hkawn hkrang wa nngai. Raitim, yawng gaw n chye na shi nngai. Ngai hpe nni nkri hkam wudang hpai shangun ai majaw karai kasang hpe chyeju kaba la nngai,” ngu tsun shadum da nga ai.

Yesu Madu hkum nan hkam la ai nni nkri lam ni gaw anhte yak hkak jam jau ten ni hta nhtoi hte n-gun atsam tai ya nga ai.

Ndai laban na chyum mungga daw langai, Myihtoi Isiah laika gaw, Myihtoi Isiah si mat ai hpang shaning grai na jang she ka da ai chyum daw re lam chyum laika shawk sagawn ai ni masam maram da ma ai. Dai hpe “Yaweh a shangun ma a mahkawn mangoi” ni ngu mung shamying ma ai. Yesu Madu a nni nkri hkam si hkam na lam hpe shi hkum nan mu ai zawn ka da ai rai nga ai.

Raitim, ndai chyum daw gaw Yesu n shangai shi ai shawng shaning kaba na ai aten hta ka da sai rai nga ai.

“Jahpawt shagu shi gaw ngai hpe shi kaning rai sharin ya na lam hpe na la na lam sharawng shangun nga ai,” (Is 50:4).

Tsun mayu ai gaw, Karai Kasang gaw Yesu a marang e, nni nkri a lachyum hte akyu ara ni hpe chye na na matu nhtoi jaw da ai. Dai hte maren sha, anhte ni nni nkri hkam jam jau hkrum ten hta mung garum ya na ra ai. Ahkyak ai gaw Karai Kasang a nsen hpe maja madat hkam la na ra ga ai, ngu ai rai nga ai.

“Ngai hpe kayat ai ni hpe nye a shingma shakrin ja ya nngai. Shanhte ngai hpe n kaw n law di nna, nye a nhka mun ni hpe gang baw ai hte nye a myi man hpe mayen mahtaw bun ai shaloi, ngai shanhte hpe jahkring we ai n rai,” (Is 50:6).

Hpyen la ni Yesu hpe kayat zingri, ju hka-gup shagup ya ai hpe mu lu ga ai. Yaweh Karai Kasang a shangun ma (Yesu) gaw yuk dik ai nni nkri hkam la ai hpe mau hpa mu lu ga ai ngu ai rai nga ai. Shi a hpang hkan Hkristan ni gaw Karai Kasang a wenyi a marang e, matsan jam jau hkam ai shaloi mau hpa n-gun atsam hpe lu la ga ai.

“Tsaw htum ai dai Madu gaw shi nan ngai hpe makawp maga ya nga ai,” (Is 50:9).

Yesu madu nni nkri hkam na shawng hta, Kawa Karai Kasang a tsawra matsan dum lama ai hpe kam hpa myit kaba hte hpyi shawn lai wa ai. Anhte mung Karai Kasang kaw na dai tsaw ra matsan dum lama ai hpe nni nkri hkam sak jaw ap nawng shagu hpyi la ra ga ai.

Akyu hpyi saga

Wa Karai Kasang e, Madu Yesu a nni nkri hkam si hkam ai a marang e, anhte ni hkye hkrang la hkrum na lam hpe lu la saga ai hte maren, Shi a nni nkri hkam si hkam ai hta jawm pawng let anhte hkum nan hte hpu nau ni hpe sumsing lam de woi sa lu na atsam marai anhte hpe jaw ya rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, ndai laban gaw Pranwan Ladaw hta (24) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) – Is 50:5-9

Chyum Mungga Daw (2) – Yaku 2:14-18

Kabu Gara Shiga – Mk 8:27-35

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.