Karai Kasang A Mungga - Pran Wan Ladaw Laban 21, 2021

Hkristu hta tsaw ra ai nu wa hpu nau ni e, ndai laban gaw Pranwan Ladaw hta (21) ngu na laban rai nga ai.

 

Nawku Hpung gaw, Laban shani ni hta, Hkristan sak prat a matu ahkyak dik ai chyum daw ni hpe lata la nna hkaw tsun ai.

 

Hkum hkrang a matu lusha gaw Karai Kasang jaw ai chyeju kumhpa rai nga ai. Anhte a matu Karai lajang da ya ai wenyi lusha gaw Hkristu hkum nan re ai majaw kaba dik htum ai Karai a chyeju kumhpa nan rai nga ai.

 

Hkristu hpe malu masha hku n hkam la ga ai rai yang, anhte ni kaw si hpang gara nna si mat na sha rai nga ai. Hkristu hpe kam sham ai, Karai Kasang a mungga hpe madat hkam la ai, Hkristu a hkum hte sai rai nga ai Chyoi Pra Hkum hpe hkam la ai a marang e, anhte hta wenyi atsam lu nna sak hkrung lu ga ai.

 

Ndai laban na chyum daw hta, Yesu Madu a mauhpa chyeju kumhpa rai nga ai Shi a hkum hte sai hpe jaw sha na ngu tsun ai shaloi, masha ni lam amyu myu hku myit la nna bai htang ma ai.

 

Anhte mung shanglawt ai myit hte hkam la hkap la mai ai zawn, ningdang kau mung mai nga ai. Raitim, anhte a lata la ai a majaw byin wa na akyu ara hpe gaw anhte ni lit la ra na ga ai.

 

Yesu a Hkum hte Sai chyeju kumla hte seng ai nawku daw jau lam gaw mungsung kaba rai nga ai. Dai hpe anhte kashin kamun hkam la ai shaloi, ga sadi tawn shagrin da saga ai rai nga ai. Dai gaw ndai laban na chyum mungga daw langai hta na, Sinal bum ntsa Karai Kasang hte Israel myusha ni lapran tawn da ai ga shaka zawn rai nga ai.

 

Chyum mungga daw lahkawng hta San Pawlu a sharin shaga ai lam rai nga ai, “Hkristan langai mi gaw ga shaka ningnan hta machyu nna kaga masha langai hpra hte mung kun dinghku masha zawn tsaw ra ai lam, hte jahtum ginchyum dat da ai.

 

Ga sadi tawn da ai lamu ga ginra de du ai shaloi, Yawshu gaw Israel myu sha ni hpe Sinal bum ntsa hta Karai kasang hte myit hkrum ga shaka tawn da ai hpe bai shagrin masat da na matu saw shaga lai wa ai.

 

Mawshe gaw Karai Kasang, shi hpe ga sadi tawn da ai Canon mare de n shang lu ai. Shi a malai hku Yawshu hpe Karai Kasang lata la ai rai nna, shi hpe matsun da ai hte maren hkan shatup lai wa ai lam Buhk 31:1-8 hta rawng nga ai.

 

Yawshu a lam woi ai hte rau Israel myusha ni Karai Kasang ga sadi tawn da ai lamu ga ginra hpe zing la lu ma ai. Shanhte gaw Karai Kasang hpe law law lang ga sadi n dung ma ai majaw dai ga sadi tawn da ai lamu ga ginra de du na hpang hkrat ma ai.

 

Ga sadi da ai lamu ga ginra kaw du ai shaloi, Yawshu gaw dai lamu ga a ka-ang daju shara, Shekin hta myusha yawng hpe shaga zuphpawng da ai. Dai shara Israel myusha ni a matu moi chyaloi nhkoi kaw nna nan manu shadan dik ai mare kaba rai nga ai.

 

Shebin mare hta Abraham hpe Karai Kasang Shi a hkum hpe madun dan ai shara rai nga ai. Lani mi na nhtoi hta shi a myu sha ni a matu tai wa na shara re ngu Karai Kasang ga sadi jaw da ai shara rai nga ai (Np.Nhp 12:7).

 

Shaning 700 ning daram na ai hpang Yawshu gaw dai shara hpe Israel myu sha ni madu ai shara hku woi awn lu sai rai nga ai.

 

Yaku gaw shi a katsa Yelalarban hpe nchyang chyang ngut ai hpang kun dinghku masha ni hte rau bai htang wa ai shaloi Shebin mare madu ni kaw nna lamu ga lawk mi mari la nna, dai shara hta Yaweh Karai Kasang a matu masat shadaw langai mi jun da let, shanhte kun dinghku masha ni gun wa ai hpara sumla ni yawng hpe kabai kau ai masat dingsat hku ga hta lup makoi kau ma ai. Dai aten kaw nna Karai langai hpe sha hkap la nawku lai wa ma ai lam Np.Nhp 33:18-20 hta rawng nga ai.

 

Dai shara hta sha shi si wa mahka matsan laika ka da ai rai nna, dai matsin laika hta, Egyip mungdan kaw nna la gun wa ai Yawsep a nrut nra ni hpe mung lup da ai lam Np.Nhp 50:24; Yawshu 24:32 hte maren chye lu nga ai.

 

Yawshu gaw Israel myu sha ni Sinal bum ntsa kaw Karai Kasang hte ga shaka tawn da ai hpe ningnan bai shatsawm da na matu, dai shara hta Israel myusha ni hpe saw shaga zuphpawng hpawng woi ai.

 

Yawshu gaw Israel myusha ni a jiwoi jiwa ni a matu Karai Kasang a jahkum shatsup ya lai wa ai lam ni hpe bai myit dum shangun ai; Egyip mungdan kaw nna mauhpa lamyit kumla ni hte rau gara hku bai woi shalawt wa ai lam, nam maling hta lai di wa ai shaloi Karai Kasang a matsan dum lama ai lam, ya du taw ai ga sadi da buga de gara hku woi shang wa ai lam ni hpe woi sumru myit dum shangun ai rai nga ai.

 

Yaweh Karai Kasang a lam Israel myu sha ni hpe tsun shang lang dan ai hpang shang lawt ai myit hte tinang ra ai hpe lata la mai ahkaw ahkang jaw da ai.

 

“Nanhte shi hpe daw jau na n ra sharawng myit yang chyawm gaw Mesopotamia mung e nanhte a nji nwa ni nawku ai hpara ni, shing n rai, ya nanhte nga nga ai mung na Amori hpara ni hta gara hpe mahtang jaw jau na gaw, dai ni jang daw dan la mu. Ngai hte nye a nta masha ni chyawm gaw dai Madu hpe nawku daw jau na ga ai law, ngu nna Yawshu tsun wu ai,” (Yawshu 24:15).

 

Shanhte a ga sadi hpe myit dum na matu Yawshu gaw dai shara hta masat shadaw langai jun da ai. Ndai gaw Sinal bum kaw ga shaka tawn da ai hpe ningnan bai shatsawm gaw de da ai ga shaka sakse rai nga ai.

 

Anhte Chyoi Pra Hkum chyeju kumla hte seng ai nawku daw jau lamang galaw shagu, Kashin Kamun hkam la ai shaloi Karai Kasang hte tawn da ai myit hkum ga sadi hpe bai gaw de ai rai nga ai.

 

Kashim kamun hkam la ai shaloi, anhte langai hpra gaw anhte a hpara sumla rai nga ai tingkyen myit, gawngba rai dum ai myit, nangmak lawhpa ai myit, mungkan pyaw hpa lam machyu ai myit ni hpe lup makoi kau da nna, Hkristu hpe lata la saga ai.

 

Anhte hkum nan lata la ai re majaw gaw Karai Kasang hte tawn da ai ga shaka majing rai nga ai. Nam chyim hku shingdaw ga nga yang ga shaka dingsa prat na ga shaka hte wa bung nga ai. “Ngai gaw nanhte hte rau anga nga nna nanhte a Karai Kasang tai nga na nngai, nanhte mung nye a amyu masha ni tai nga na rai myit dai,” (Jaw Jau 26:12).

 

Hkristu gaw Shi a tsawra myit hte chyeju jaw ai, makaw maga ai, grau nna Shi a asak rai nga ai Wenyi asak anhte hpe jaw ya sai. Karai Kasang a tsawra ngu ai ginchyum dat ga hpe jaw da ai rai nga ai, (Yawshu 13:34).

 

Misa Hkungga hta, anhte langai hpra hte mung, wuhpung wuhpawng hte mung Yesu Madu ga shaka bai tawn da mayu nga ai. Dai gaw Shi a tsawra myit rai nga ai. Anhte a htingbu langai ngai hpe mara shagun da ai rai yang Chyoi Pra Hkum hpe hkam la na n grindan nga ai ngu Yesu Madu hkang da nga ai.

 

Chyum mungga daw lahkawng hta San Pawlu gaw Ehpesu mare na Hkristan kun dinghku langai hpra gaw ningrum ningtau langai hte langai gara masa hku tsaw ra hkat ra ai lam tsawm htap ga si ni hte sharin shaga da nga ai. Shanhte shada a tsaw ra ai gaw Yesu Madu Nawku Hpung hpe tsaw ra ai hpe kasi la tsaw ra hkat ra ai ngu sharin shaga da nga ai.

 

Anhte gaw Hkristu hte tawn da ai Ga Shaka hpe laban shani shagu ningnan bai tawn da ra ga ai.

 

Misa Hkungga nawng jau na Jau ni n law ai majaw Misa hkungga n lawm lu ai raitim dai zawn re ai masa hta lawm nga ai ni gaw Hkristu hta galum kahkyin gumding ai hta n lawm ai ngu gaw n mai tsun ai.

 

Yesu Madu gaw anhte hpe tsawra myit kaba hte mung, Shi a mungga hte mung, anhte akyu hpyi ai a marang e mung, anhte hte rau nga nga ai.

 

Jau nga ai shara hta Laban Misa Hkungga nawng jau ai shaloi ga shaka hpe hkam la ga ai zawn sha, Jau n nga ai shara hta laban nawku hpe ai tara hkaw sara, shing n rai, woi awn ai wa langai ngai e nawku daw jau woi ai hta mung ga shaka hpe hkam la ga ai.

 

Ndai laban na Kabu Gara Shiga hta, Yesu Madu shi a hkum hte sai hpe chyeju kumla shatai da ya na ngu ga sadi jaw ai shaloi, Carpanaum mare masha ni lam amyu myu hku bai htang ma ai hpe mu lu ga ai.

 

Yesu Madu hpe hpyen hku hkap la ai Yuda hpung salang ni gaw Yesu Madu hte Shi a hpang hkan ai ni hpe aten tup ninghkap lai wa ma ai. Yesu a hpang hkan ai ni mung dai ga na ai hte Shi kaw na pru mat ma ai (Yh 6:66). Shanhte a makam gaw ntsa lam sha rai ma ai. Kasa ni hpe mung, Yesu gaw “Nanhte mung pru mat wa mayu ma a ni,” ngu san ai, (Yh 6:67).

Shaloi Simun Petru gaw, “Madu e, anhte kadai hpang de wa na rai nga a ta? Nang gaw htani htana asak jaw ya ai mungga lu ndai, ngu bai htan ai,” (Yh 6:68).

 

Kasa ni hta na Yuda Iskarut gaw dai masha myu hpan ni hta n lawm ai. Shi hkrai san san rai nga ai. Hkum hkrang hku nna gaw Yesu hte nihtep ai raitim, myit masin, myit masa hku nna gaw Yesu hte tsan dik rai nga ai. Yesu madu jaw na Shi a hkum hte sai hpe nyet kau ai lam n nga ai; Raitim jahprap asawng lai wa ai rai nga ai. Dai gaw shi Yesu hpe dut sha ai sakse nan rai nga ai.

 

“Nanhte shi lahkawng (12) hpe ngai lata la masa de ai n rai ni? Rai ti mung, nanhte hta na langai mi gaw nat matse rai nga ai, ngu nna shahte hpe Yesu htan mu ai,” (Yh 6:70).

 

“Shing nga tsun ai gaw, Simun Iskarut a kasha Yuda Iskarut hpe sha-ang nna tsun ai rai nga ai, ngu Yawhan a laika hta ka da ai gaw Yuda hpe sha-ang nna tsun ai hpe Yawhan asan sha chye ai hpe shadan nga ai.

 

Anhte gaw Yuda a kasi hpe n la ai sha, Petru a kasi hpe la ra ga ai. “Madu e nang gaw htani htana asak jaw ya ai mungga lu ndai. Nang gaw Karai Kasang kaw na du sa ai Chyoi Pra ai Wa rai nga ndai hpe anhte kam sham ai hte chye lu saga ai,” (Yh 6:68-69).

 

Akyu Hpyi Saga

Wa Karai Kasang e, anhte a prat hkrun lam hta teng man jaw ang ai Nang Madu hkang da ai lam hpe chyu sha lata hkan sa lu na chyeju jaw ya rit. Anhte a Madu Hkristu a marang e hpyi nem nga ga ai.  Amen.

 

Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, Pranwan Ladaw hta (21) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) – Yawsu 24:1-2, 15-18

Chyum Mungga Daw (2) – Ehp 5:21-32

Kabu Gara Shiga – Yh 6:60-69

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.