Karai Kasang A Mungga - Pran Wan Ladaw Laban 19, 2021

Wenyi Lusha – Karai Mungga

Hkristu hta tsaw ra ai nu wa hpu nau ni e, ndai laban gaw Pranwan Ladaw hta (19) ngu na laban rai nga ai.

Lai wa sai laban hta muk hte nga hpe shalaw ngut ai hpang Yesu Madu Carpernaum mare kaw na tara jawng hta hkaw tsun ai lam hpe na la lu saga ai.

 

Ndai laban aw dai hte matut manoi ai lam rai nga ai. “Nanhte ni Karai Kasang a mungga hpe lusha hku lu sha ma ai rai yang, ngai gaw dai lusha rai nga nngai, ngu Yesu tsun ai rai nga ai. Lachyum gaw, “ngai gaw asak rawng ai mungga rai nngai ngu ai rai nga ai.

 

Ndai mungsung lam hpe chyoi pra ai wenyi a marang e sha atsawm chye na na ga ai. “Karai mungga ngu ai gaw shinggyim masha anhte a matu Karai Kasang kaw na na la lu ai Kabu Gara Shiga ni hpe tsun ai rai nga ai.

 

Prat shagu na masha ni chye na hkap la hkan sa lu na hku ka matsing da na hpe Karai Kasang ra sharawng ai rai nga ai. Yesu Madu mungkan ga de du sa ai gaw Kawa Karai Kasang a matsan dum lama ai hpe anhte ni grau chye na hkawn hkrang na matu rai nga ai.

 

Dai majaw Yesu Madu gaw kaja dik htum Karai Kasang a Kabu Gara Shiga gun sa ya ai wa rai nga ai. Dai majaw mung Yesu Madu hpe “sara” ngu shaga ma ai rai nga ai. San Yawhan a Kabu Gara Laika hta shiga gun sa ya ai Yesu Madu hpe Karai a Mungga ngu mung shaga shamying da ai. Lahyum gaw, Yesu Madu hkum nan Karai Kasang a Kabu Gara Shiga gun sa ya ai hte Shi hkum nan mung dai Kabu Gara Shiga rai nga ai.

Yesu Madu gaw anhte ni asak hkrung nga let htani htana asak hpe lu la na matu Karai Kasang a mungga hpe gun sa ya ai wa rai nga ai. Anhte ni Karai Mungga hpe hkap la hkan sa ga ai rai yang Yesu Madu gaw anhte a matu hkum hkrang wenyi lusha tai ya na rai nga ai.

 

Elijah A Gawng Kyang Lam Hte Kasi La Hpa

Chyum mungga daw langai hta Myihtoi Elijah gaw Yaweh Karai Kasang kaw nna n-gun atsam lu la na matu Sinal bum de hkrun lam hkawm mat ai lam tsun da nga ai.

Elijah sak naw hkrung nga ten, HKawhkam Ahab gaw Solomon n si shi yang garan mat ai mungdan lahkawng hta na Israel mungdan hpe up hkang nga ai ten rai nga ai. Shi gaw n kaja ai hkawhkam langai rai nna, tara maigan hkawhkam a kasha Jezabel hpe hkawhkam jan shatai la ai majaw grau sawng mat ai rai nga ai. Dai hkawhkam jan a ka-up dang ai lam gaw Israel myusha ni Yaweh Karai Kasang hpe kau na nna tara maigan ni a hpara Bar nat karai hpe nawku na lam madung rai wa ai.

Elijah gaw Yaweh Karai Kasang a n law la ai Myihtoi ni hta na langai mi rai nga ai; hkawhkam jan woi awn nna Bar nat hpe nawku ai myihtoi ni mahtang tsa kaba hku rai ma ai.

Karai Kasang gaw Israel myusha ni hpe shi hpang de bai woi la na matu dai ginra hta hkraw hkun mat shangun nna hku wa kaba hku shangun ai. Hkawhkam wa gaw Myihtoi Elijah hpe hkrum na hta kaga lam n mu mat sai. Myihtoi Elijah mung Carmel bum ntsa kaw shawa masha ni hte rau Bar myihtoi ni yawng hpe jahpawng da shangun ai.

Dai shara kaw Myihtoi Elijah Yaweh Karai Kasang hte Bar Karai Kasang yan hta gara Karai Kasang wa mahtang teng man Karai Kasang re ai hpe sakse madun hkat na matu tsun ai. “Dumsu ala lahkawng la sa wa mu; hkungga nawng jau na tawn hkungri lahkawng galaw mu; dumsu lahkawng hpe sat nna dai tawn hkungri ntsa tawn da mu; wan n wut ai; dai hkungga hpe ntsa de nna hkrat wa ai wan hte hkungga nau jau ga; teng man ai Karai Kasang gaw lamu ntsa de nna dai hpe wan nat hkungga shatai ya na ra ai” ngu shanhte hpe tsun ai. Shawa masha ni mung dai hpe hkap la ma ai.

Bar Myihtoi ni jahpawt kaw nna dai tawn hkungri grup hkra wang tawn da nna Bar Karai hpe shaga ma ai; Raitim, lachyum n pru rai nga ai.

Myihtoi Elijah gaw Yaweh Karai Kasang kaw jahkring mi akyu hpyi ai hte tawn hkungri hta lamu de nna wan yu hkrat wa let dai tawn hkungri ting hpe wan nat hkungga shatai ya ai.

 

Shawa masha ni dai mabyin hpe mu ai hte rau Yaweh Karai Kasang hpe shakawn shagrau ma ai. Elijah mung lam woi shadam ai Bar myihtoi 400 hpe sat na matu hkang dat ai rai nna, shawa masha ni mung myihtoi tsun ai hte maren galaw hpang ma ai. Ngut jang Yaweh Karai hpe nawku shakawn ma ai. Dai shana aten kaw nan marang kaba htu nna hkun hkraw hku hku ai lam mung hkring mat sai.

 

Ndai shiga hpe na ai hkawhkam jan Jezebel gaw masin pawt nna Elijah hpe hkying hkum 20 lapran lu hkra sat na matu myit daw dan let shi a hpyen ma ni hpe hkang dat ai.

 

Elijah mung dai lam na ai hte lawt lam tam nna Yuda mungdan maga de hprawng shang wa ai. Dai hpang dingda maga de matut hkawm sa wa ai.

 

Ndai laban na chyum daw hta Carmel bum ntsa kaw awng dang lam lu tim, hprawng hkawm ra ai majaw myit htum nna shi a asak hpe dawm la kau ya na matu Karai Kasang hpe hpyi shawn da ai mu lu ga ai. Ga ntsa galau taw nna bai rawt jan lu na pyi hkrit tsang nga ai.

 

Madu a lamu kasa langai gaw shi hpe jasu nna tsun ai; “rawt nna lusha sha u.” Shi dum wa jang shi a makau kaw muk hte hka ntsin nga taw ai hpe shi mu ai. Dai lusha a majaw Myihtoi mung n-gun lagaw bai rawng wa ai rai nna, nhtoi 40 ya lapran shi yup malap nga ai shara kaw nna kilomitre 500 daram nga ai Sinal bum de matut hkawm sa lu ai.

 

Sinal bum ntsa kaw Yaweh Karai Kasang hte ga shaga ai. Karai Kasang a ga marang e mung shalan shabran n-gun lu wa nna, Israel mungdan de matut hkawm sa let dai shara kaw na masha ni hpe Karai Kasang hta ga sadi dung nga na matu shadum jahprang ya ai.

 

Ndai mabyin ni gaw anhte Hkristan ni a matu Karai Kasang a mungga gaw n nga n mai ra kadawn ai mungga re ai hpe sumru shangun ai.

 

Karai Kasang Shinggyim Masha Ni Hpe Ga Shaga Nga Ai.

Salang gaw ma hpe, Asuya ningbaw kaba langai gaw yu maya mung shawa masha langai hpe, hkawhkam gaw mawhpyi langai hpe shaga ai shaloi dai shaga ai wa hpe myit grai kaja ai ngu hkam la chye ga ai. Karai Kasang gaw anhte shinggyim masha ni hpe ga sa shaga ai gaw grau nna matsun dum lama myit kaba ai n rai ni?

 

Karai Kasang gaw Adam, Noah, Mawshe, hte Myihtoi ni hte ga sa shaga lai wa ai. Hpa lam hte seng nna tsun ai rai?

 

Shanhte hpe Shi tsaw ra ai lam hte shinggyim masha ni yawng hpe hkye hkrang la na masin kaba a lam hte seng nna tsun shaga lai wa ai. Hkye la madu langai du sa na rai nna shi hpe hkap la na matu tsun da ai. Aten ladaw hta hkan nna shinggyim masha ni chye na hkawn hkrang hkap la lu na ga ni hte shanhte hpe ga shaga ai.

 

Karai Kasang Gaw Yesu Hkristu A Marang E Shinggyim Masha Ni Asan Sha Chye Na Na Ga Hte Tsun Shaga Ai.

Yesu Madu gaw anhte hpe hkye hkrang la na matu Kawa Karai Kasang a masin lam ni hpe hpaw tsun dan ai. (1) Madu Yesu gaw anhte a mara ni hpe raw dat ya nna, Karai Kasang a kashu kasha ni shatai ya ai. (2) Madu Yesu gaw Karai Kasang a asak rai nga ai Wenyi anhte hta jaw bang ya ai. (3) Madu Yesu gaw anhte yawng hte seng ai sumsing nta hta anhte hpe Shi hte rau htani htana asak garan hkam sha shangun ai.

 

Yesu Madu gaw Carpernaum, tara jawng hta, shi gaw “htani htana asak re ai (Yh 6:35,48), “sak hkrung muk” (Yh 6:51) re ai, hpang jahtum, “wenyi gaw asak hpe jaw ya ai lam, hkum hkrang gaw asak n rawng yang kaman re lam, Yesu Madu anhte hpe tsun shaga ai ga ni gaw wenyi a asak re ai lam (Yh 6:63) chyum mungga ni hta mu lu ga ai.

 

Satan gaw Yesu Madu hpe gunglau ai. “Rai ti mung Yesu gaw, Masha gaw muk hte sha hkrung nga lu na n rai, Karai Kasang a n-gup hta na pru ai mungga nlang hte hte hkrung nga lu na ra ai, nga nna chyum laika hta tsun nga ai ngu nna madu htan ya wu ai” (Mt 4:4).

 

Wenyi A Marang E Sha Karai Kasang A Mungga Hpe Chye Na Hkawn Hkrang Lu Ai; Satan A Tara Gaw Dai Mungga Hpe Dingbai Dingna Jaw Ya Nga Ai.

“Ngai hpe shangun dat ai nye Wa e shi hpe ngai hpang de lau la ai wa sha n rai yang gaw, kadai mung ngai hpang de sa lu na n rai, du sa ai wa hpe mung, hpang jahtum na nhtoi hta ngai sharawt la na we ai,” (Yh 6:44).

 

Tsun mayu ai gaw mungkan hpaji kade tsaw ai raitim, Karai Kasang a mungga hpe chyeu na lu na n re ai; Yesu Madu hta kam sham kam hpa nna Wenyi e shadum jahprang ai a marang e sha chye na lu ai ngu ai rai nga ai.

 

Chyum laika hpe hkaja ai chyum ninghkring sara kaba ni hte Pharisee ni hkum nan Karai Kasang a mungga hpe n chye na ma ai majaw Yesu Madu hte myihtoi ni hpe n hkap la lai wa ma ai.

 

Gade daram myi hpaji n chye ai masha raitim, Karai mungga hpe dingman dinghpring ai myit hte shagrit shanem nna madat hkam la ai rai yang dai mungga hpe chye na lu ma ai. “Nye a mying n’sang hte nye a Wa shangun dat na ra ai Karum ai Wa ngu ai Chyoi Pra ai Wenyi gaw, nanhte hpe lam magup sharin ya nna, ngai nanhte hpe tsun da ai ga yawng mayawng nanhte hpe shadum shahprang na ra ai,” (Yh 14:26).

Anhte hkum hpe anhte hkap la ra ai gaw (1) anhte n gingdan ga ai raitim, Karai Kasang a mungga hpe na lu ga ai, (2) Chyoi pra wenyi n lawm ai rai yang anhte hkum nan Karai Kasang a mungga hpe chye na lu ai atsam n nga ga ai.

 

Yesu a sharin shaga ai hpe n hkap la ai ni gaw Nazareth na mare masha ni zawn Yesu hpe n gawn n sawn di ma ai. “Dai rai nna, shanhte gaw, Ndai wa gaw Yawsep a kasha Yesu n rai nga a ni? Shi a kanu yan kawa hpe anhte chye gaw ai n rai ni? Dai re ai mi, ya shi, Ngai gaw sumsing lamu de nna yu wa nngai, nga nna kaning rai tsun lu a ta nga ma ai” (Yh 6:42). “Shi gaw Maria a kasha laksama wa rai nga ai hte Yaku, Yawsep, Yuda, Simun ni a kahpu shi rai nga ai n rai ni? Shi a kajan ni mung anhte hte rau nang e nga nga ma ai n rai ni?, nga nna san ma ai. Shing rai shanhte shi a lam myit kataw nna shi hpe n hkap la ma ai,” (Mk 6:3).

 

Anhte Gaw Karai Kasang A Mungga Hta N-Gun Atsam Hpe Chyahkring Hkring Hkam La Ra Ga Ai

Karai mungga hpe tinang kam ai shaloi hkam la na, shing n rai, n hkam la na ngu ai hku n mai rai ga ai. Anhte n hkam la ga ai rai yang, hten run ai lam de du mat na rai ga ai.

 

Myit n pyaw lam langai gaw, Jau ni chyahkring chyahkring n du lu ai mare hkan na Nawku Hpung Masha ni shata kaba hku Misa Hkungga hpe n hkam la lu ma ai. Rai yang, shanhte a matu wenyi lam hta sak hkrung lu na matu gaw sak hkrung mungga gaw grai nan ahkyak ai, n nga n mai ra kadawn ai rai nga ai.

 

Jau gaw Misa Hkungga nawng jau lu ai raitim, sak hkrung mungga hte nawku hpung masha ni hpe lusha tai hkra sumru shajin da ai lam n nga yang gaw akyu hkam la lam yawm mat na rai nga ai.

 

Nawku Hpung gaw chyum mungga hti sumru let Misa Hkungga nawng jau sak hkrung mungga hpe akyu rawng ai hku hkaw tsun lu na matu shajin hkyen lajang da na n–gun jaw ai.

Anhte ni chyum mungga ni hpe hti sumru ai lam n nga ai gaw yawn hpa kaba rai nga ai. Chyum mungga hti sumru ai lam n nga ai gaw chyoi pra hkum hpe hkam la ai raitim, wenyi kalu kaba lam hta hpang hkrat na sha rai nga ai.

 

Akyu Hpyi Saga

Wa Karai Kasang e, Wenyi lusha rai nga ai Karai Mungga hpe mawn mawn hti sumru hkaw tsun, sak hkrung nga pra lu na chyeju jaw bang ya let anhte hpe lam woi ya rit. Anhte a Madu Hkristu a marang e hpyi nem nga ga ai.  Amen.

 

Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, ndai laban gaw Pranwan Ladaw hta (19) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) – 1Hk.Hk 19:4-8

Chyum Mungga Daw (2) – Ehp 4:30 - 5:2

Kabu Gara Shiga – Yh 6:41-51

 

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.