Karai Kasang A Mungga - Pran Wan Ladaw Laban 16, 2021

Pran Wan Ladaw Laban 16, Shaning B, 2021

Friday, July 16, 2021

Hkristu hta tsaw ra ai nu wa hpu nau ni e, ndai laban gaw Pranwan Ladaw hta (16) ngu na laban rai nga ai.

Lai wa sai laban hta Kabu Gara Shiga gun sa ai ni dai Kabu Gara Shiga hpe sadi dung let gun sa hkaw tsun na matu lam matsun ni hpe na lu saga ai. Karai Kasang a mying ningsang hta na la lu ai dai Kabu Gara Shiga hpe anhte ni gara hku hkam la ra ga ai hpe mung matsun da nga ai.

Ndai Laban na Kabu Gara Shiga gaw, (1)Wenyi hte seng ai sagu rem ni gaw tinang hkum hpe n myit ai sha sagu hpung a ra kadawn ai lam ni hpe sha myit lawm ra ai. (2) Shanhte gaw Yesu madu zawn sagu hpung ni a simsa lam hte galung kahkying gumding lam a matu Kabu Gara Shiga gun sa ai ni tai ra ai. (3) Nawku Hpung masha ni mung shanhte a lapran galung kahkying gumding lam hpe makawp maga hting hkang sa wa ra ai yaw shada lam ni rai nga ai.

Israel Myu Sha Ni A Prat Hta Sagu Hpung Hte Sagu Rem Ni A Ahkyak Ai Lam

Palestine kaw atsawm n nga lu shi ai shaning latsa daram hta Israel myu sha ni sagu rem prat hte nga lai wa ra ma ai. Mare kaw n nga lu ai sha mare hte tsan ai shara ni hta sagu hpung ni hte rau ginsum gap nna htawt hkawm nga ra ma ai. Dai zawn nga pra ra ai ni hpe “Nomad” ngu shamying ma ai.

Shanhte gaw yi sun hkauna n lu ma ai rai nna, kan bau na lam hta ra kadawn ai sagu chyu ntsin, nga chyu ntsin, sagu mun hte chyu chyana (sagu chyu hpe shadu da ai chyu shage) ni hpe buga gat seng ni kaw hkan dut ma ai, shing n rai, shanhte ra kadawn ai arung arai ni hte kalai la ma ai.

Ahbraham ka aru arat ni mung dai hte maren sha nga pra lai wa ai lam Ningpawt Ninghpang laika hta mu lu nga ai. Yaku a kasha Yawsep gaw Pharoah hkawhkam si mat ai hpang Egutu mungdan hta daru maga kaba dik htum wa tai wa ai shaloi, shi a kawa hte kahpu ni kanau ni hpe Egutu mung de shaga la ai.

Np. Nhp 46: 32 hta, “Nanhte gaw sagu bainam, yam nga rem sha nna nga ai sagu rem ni rai nga myit dai rai nna nanhte a sagu, bainam hpung ni hpe mung nanhte a yam nga hpung ni hpe mung, nanhte lu malu mahkra hpe mung la sa mara ai, ngu nna hkawhkam wa hpe wa tsun shana na nngai” ngu rawng nga ai.

Mawshe a prat hta Egutu mung na lawt wa ai ni sagu, bainam, yam nga ni hpe shanhte hte rau woi la ma ai. “Nanhte a sagu, bainam hte dumsu yam nga hpung ni hpe la mat wa nna pru mat wa manu. Ngai hpe mung shaman ya da mi ngu nna tsun wu ai” (Pru mat 12:32). Egutu mung na hkawhkam tsun ai ga rai nga ai.

Palestine mungdan hta mung sagu rem let kan bau magam naw galaw lai wa ma ai. 1Samuela 16:11-13 hpe hti yu yang, Yese hpe Samuela “ngan kaw kaga shadang sha ni naw nga a ni, ngu san ai shaloi, Yese gaw, “Kaji htum wa gaw naw nga ai, rai ti mung, shi gaw shinggan de sagu rem hkawm nga ai ngu nna htan ai, hpe mu lu ga ai.

Sagu rem ni gaw mare kaba ni kaw nna tsan ai shara hta nga nna, shani aten hta sagu hpung ni hpe rem nna, shana aten hta gaw yup sin ra ma ai. Marang htu ai raitim, jan ja/kahtet ai raitim, katsi la ai raitim, sagu ni hte rau nga ra ma ai.

Sagu langai hpra hpe masha hpe zawn sha mying shamying da ma ai. Shanhte a matu sagu ni gaw manu dan dik sut gan rai ma ai.

Kaja wa nga yang, Chyum laika hta Karai Kasang Shi a myu sha ni hpe sagu hpung hte sadawn tsun da ai gaw mau hpa n rai nga ai. Yuda myu sha ni Karai Kasang a tsawra matsan dum lama ai hpe chye na hkap la na matu kaja dik ga shadawn jaw shingdawn ai lam rai nga ai.

Chyum laika hta, Hkawhkam ni hte Myihtoi ni hpe mung sagu rem ni ngu shaga shamying da nga ai. Shanhte gaw Karai Kasang a tsawra matsan dum lama ai lam ni hpe shadan shadawng ai ni rai ma ai majaw sagu rem ni ngu shaga shamying ai rai nga ai.

Yeremiah Gaw Laklai Ai Sagu Rem Ni Paw Pru Na Ra Ai Lam Myihtoi Htoi Da Ai

Chyum mungga daw langai hte maren, Myihtoi Yeremiah a prat hta Israel myu sha ni Babylon hkawhkam a mayam hku woi la hkrum ma ai. Ngam nga ai Israel myu sha ni hpe mung kade nna yang bai woi la na rai nna, Nawku Htingnu hte Yerusalem mung jahten kau hkrum sana rai nga ai.

Yeremiah gaw dai zawn byin ai lam mungdan daru magam gun ni hte nawku hpung woi ni a majaw re ngu mara shagun da ai. Hpa majaw nga yang, sagu hpung ni a akyu ara matu n myit ai sha, shanhte tingkyen akyu matu sha tam ma ai majaw rai nga ai. Sawng dik gaw shanhte Israel myu sha ni gade n na yang mara hta lup mat sana rai nna, dai mara a majaw mungdan kaga de mayam tai ra mat sana rai ma ai.

Dai zawn re yawn hpa lam hta Yeremiah gaw Karai kasang a shadum shadut ai a marang e ndai zawn re ai ndai lam hpe shapraw dat ai. (1) Karai Kasang gaw kadai mung n myit mada, n sawn da lu ai aten hta shi a myu sha ni hpe tara maigan mungdan kaw nna bai shaga la na ra ai. (2) Aten ladaw gu jang Karai Kasang gaw ga sadi dung ai sagu rem wa David hkawhkam a aru arat kaw na sagu rem langai hpe shangun dat na ra ai. (3) Ga sadi dung ai kaga sagu rem ni hpe mung du sa na ra ai sagu rem wa Hkawhkam a lam woi ai hta Shi a myu sha ni hpe bau sin makawp maga na matu ahkang aya jaw lit shatsam da na ra ai.

Yeremiah A Myihtoi Ga Gaw Yesu Madu Hta Hpring Tsup Wa Ai

Ndai laban na lu ai Kabu Gara Shiga hta na Yesu Madu hte kasa ni gaw Yeremiah myihtoi htoi da ai sagu rem wa hkawhkam hte garum ai ni rai nga ai.

Lai wa sai laban hta Yesu Madu kasa ni hpe lata la nna shi zawn kabu gara shiga hpe hkawm tsun na matu shangun dat ai. Dai zawn galaw ai a yaw shada ai gaw, shanhte hta shi ngam da na lit magam a matu shajing shachyip ai rai nga ai. Shi zawn sha hkaw tsun hkawm na matu rai nga ai.

Kasa ni mung mare hkan hkawm kawan hkaw tsun nna pu ba ma ai raitim dai magam ni hta kabu pyaw ma ai. Yesu Madu shanhte hpe ap jaw da ai hpung dagu ni hpe jai lang lu ai mahkrum madup ni a marang e myit rawt nga ma ai.

Shanhte gaw Yesu Madu a sagu hpung ni kaw nna lata la ai sagu rem ni rai ma ai rai nna, shanhte a ra kadawn ai lam ni hpe gaw Yesu hkum nan ahkyak la garum ya ai. Shanhte pu ba nga ma ai hpe chye ai Yesu gaw Shi hte rau simsa ai shara hta hkring sa la na matu saw shaga woi sa ai. Dai shara hta masha wunawng kaba du wa ai ten, Shi hkum nan shanhte hpe hkaw tsun, shamai shatsai ya ai. Yesu Madu pu ba ai raitim, dai pu ba ai lam hpe malap da nna, masha ni a ra kadawn ai lam hpe daw jau ya ai, mungga hkaw tsun ai. Dai gaw kasa ni hpe sharin ya ai lam mung rai nga ai.

Yesu Madu a prat hta chyum laika sara ni, Pharisee ni hte Yuda hkingjawng ni grai law ma ai raitim, Yeremiah mara shagun da ai sagu rem shaje ni zawn tinang tingkyen akyu tam ai ni sha rai ma ai.

Yesu Madu hte Kasa ni gaw Myihtoi Yeremiah a myihtoi ga hta na kaja ai sagu rem wa hkawhkam hte shi a salum sala ni rai ma ai. Yeremiah tsun ai sagu rem wa kaja gaw tinang akyu hpe malap da nna, shi a sagu hpung a kyu ara langai hpe chyu sha myit tsan let galaw daw jau ai wa rai nga ai.

Yesu Madu Gaw Yawng Hpe Wenyi Jaw Bang Ya Nna Shinggyim N Bung Pre Ai Lam Hpe La Kau Ya Ai

Chyum mungga daw lahkawng hta na anhte na lu ai Ephesu hpung masha law malawng gaw tara maigan masha ni kaw na shang wa ai ni rai ma ai. Yuda myu sha ni kaw na pru wa ai Hkristan sara ni gaw Yuda htung hpe hkap la ai shanhte ni sha tsaw grau ai ni ngu hkam la ma ai.

San Pawlu gaw Yuda myu sha rai tim, shanhte zawn n myit ai. Hkristan n tai shi ai prat gaw ahkyak n re ai lam sang lang dan ai. Ahkyak ai gaw, Yuda mi rai rai, tara maigan masha mi rai rai, kashin kamun a marang e wenyi hpe hkam la ai shaloi she yawng gaw Karai Kasang a kashu kasha ni tai wa ai; Shi a kahpu kanau ni tai wa ai, ngu sang lang da ai.

Yerusalem htingnu hta masha ni nawku daw jau na matu jai lang ai dam pa kaba ni nga ai. Shinggan na dam pa shara gaw Yuda nawku hpung masha hku hkam la da ai Yuda myu sha n re ai ni a matu lajang da ai shara rai nga ai.

Raitim, kata hte lapran na dam pa shara hpe gaw Yuda myu sha ni a matu laksan masat da ma ai. Yuda myu sha n re ai ni dai shara de shang jang si ari dam hkam ra na ngu shadum sadi jaw laika ni shakap da ma ai. Gade n na shi ai aten hta dai laika hpe htu shaw la lu ai sakse nga ai.

San Pawlu gaw anhte hpe ja ja shadum sadi jaw da nga ai. Dai gaw, Yesu Madu si hkam ai a marang e dai garan ginhka ai madin ni hpe jahten sharun kau sai re lam, Yuda myu sha ni hte myu sha kaga ni yawng gaw kun dinghku langai hta sha jawm pawng nga ai lam rai nga ai. Yawng gaw wenyi hpe hkam la da ai ni sha rai ga ai majaw bung pre ai ahkaw ahkang nga ga ai rai nna, Yesu madu sharin shaga da ai tsawra matsan dum lama ai lam langai hte sha Karai Kasang hpe arau daw jau lu ai.

“Lamu tang hta na a myit dik nga ai hte maren, ga ntsa e mung dik wa ru ga,” (Mt 6:10).

“Hkristu gaw wudang hta si hkam ai hte shanhte a n dawng n yawt ai lam hpe jahten sharun yeng seng kau nhtawm, dai amyu lahkawng hpe langai sha shatai let Karai Kasang hpang de bai woi wa mu ai,” (Ephe 2:16).

Yesu Madu a marang e, Kawa Karai Kasang hte prinem lam bai lu la ga ai. San Pawlu Kawa Karai Kasang hte prenem lam lu hkra shakut wa ai lam tsun da ai. “Ngai gaw nanhte a matu mung, Ladoki masha ni a matu mung, ngai hpe myi man chyaw n mu yu ai kaga masha ni yawng hte a matu mung, ngai gade wa galaw gun hpai shakut shaja sa wa ai lam nanhte hpe ngai tsun dan made ga,” ngu San Pawlu ga hpaw da ai, (Kol 2:1).

Yesu Madu gaww yawng a matu simsa lam hpe gun sa ya ai. Yesu Madu hte seng ai sagu ni gaw sagu rem ni zawn sha lit kaba nga ai. Dai gaw simsa rapra ai hte galung kahkying gumdin lam hpe shabyin nna hting hkang da na matu rai nga ai.

Karai Kasang gaw anhte ni yawng hpe maren mara tsawra ai. Anhte ni yawng gaw bung pre ai Hkristan makam masham lu ga ai; bung pre ai Wenyi chyeju hpe hkam la lu ga ai; bung pre ai jahtum bandung nga ga ai. Dai bandung hta anhte ni yawng htani htana tsawra myit tawn da ra ga ai.

Akyu hpyi saga

Wa Karai Kasang e, anhte yawng gaw na a kun dinghku masha ni rai ga ai hpe myit dum nna, garan ginhka ai myit jasat hpe la kau ya let Madu Yesu a Nawku Hpung hta sagu rem wa Hkawhkam Yesu a hkang da ai tsawra ai lam hta nau na myit majing hte rau hkawm rau sa, shada daw jau lu ai chyeju jaw ya rit. Anhte a Madu Hkristu a marang e hpyi nem nga ga ai. Amen.

Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, Pranwan Ladaw hta (16) ngu na laban rai nga ai.