Karai Kasang A Mungga - Pran Wan Ladaw Laban 12, 2021

Kadai raitim, Karai Kasang a Sasana dam lada wa na hpe pat shingdang n lu ai

Hkristu hta tsaw ra ai nu wa hpu nau ni e, ndai laban gaw Pranwan Ladaw hta (12) ngu na laban rai nga ai.

Ga shaka dingsa prat hta machyi makaw byin ai gaw mara galaw ai majaw ngu hkam la ma ai. Ga shaka ningnan prat hta machyi makaw byin ai gaw Karai Kasang a hpung shingkang dan hkrung na lam re ngu Yesu Madu tsun da ai.

Daini na anhte ni gaw machyi makaw byin ai hpe hpa majaw re ngu hkam la ga ai kun? Hka hpyen, wan hpyen, nbung laru hpyen zawn re ai shingra tara hyen ni a majaw, malu masha n sadi ai majaw, ana zingli amyu myu a majaw, zingri zingrat ai a majaw ngu hkam la ga ai kun? Teng ai, ndai lam ni gaw moi prat kaw nna ya prat, hpang prat du hkra anga nga na ra ai.

Hka len hta nna Kasa ni hkrat kajawng nga ma ai hpe Madu Yesu shazim kau ya ai hpe San Petru jahkring hkring tsun dan lai wa ai. Hkristan masha langai agung alau hkrum yang gara hku hkap la chye ra ai hpe ndai laban na chyum daw ni hta mahtai jaw da nga ai.

Yoba Matsan Jam Jau Hkrum Ai Shaloi Karai Kasang Jaw Ai Mahtai

Yoba gaw lu su nga mai nna makam masham lam hta dinghpring dingman hkan nang let dai makam hta ngang kang lai wa ai masha langai rai nga ai. Matsan jam jau hkrum wa ai aten ni hta rai tim, Karai Kasang hpe ga sadi dung ai wa mung rai nga ai lam Yuda ni gaw shi a mahkrum madup hpe prat hte prat myit dum lai wa ma ai.

Ga shaka dingsa prat hta anhte hkrak n chye lu ai masha langai wenyi a shadut ai a majaw Yoba kaja wa nga lai wa ai zawn Yoba laika hpe ka lai wa ai rai nga ai.

Laika Sara gaw masha ni, shi a laika sumroi laika hta na Yoba zawn, Karai kasang a mai kaja ai lam hpe kam sham kam hpa let matsan jam jau lam hpe hkap la hkam jan lu na matu, wenyi a marang e, n-gun jaw da ai rai nga ai.

Yoba gaw a kajawng sha shi a kasha ni hte madu da ai sutgan yawng hpe jasum shamat kau nna, machyi kaba hkrum lai wa ai. Hkum ting matsat shabat manam shakram rai nga ai.

Yoba gaw, “ngai zawn re ai dinghpring dingman ai masha wa ndai zawn re ai machyi kaba hkrum yak hkak jam rau hkam ra ai baw rai nni,” ngu Karai Kasang hpe aput angut lai wa ai.

Yoba aput angun di ai lam hte htingbu manang ni e shut shai ai hku hkam la nna shi hpe sa shadum ai lam ni hpe na lu ai shaloi Karai Kasang gaw lapran kaw nna shading sharai ya ai. Shingra maka a shamu shamawt ai lam ni hte ga shadawn tsun nna sang lang dan ai: nbung laru hte myihprap wan gara hku byin wa ai lam, panglai hka gara hku gring nga ai lam, shagan ni lamu ntsa gara hku gayin nga ai lam ni hpe sumru hpa tsun dan let shalan shabran ya ai.

Yoba Karai Kasang a ga san langai hpe mung n chye htai lai wa ai hpe anhte tsun shara n nga ga ai. Shi hta machye machyang n-gun yawm nga ai hpe mu ai Karai Kasang gaw shi hpe “shingra tara a shamu shamawt nga ai hpe nanhte n chye na ai rai yang, nanhte a bawnu myit nyan atsam hte n dep lu ai hpe gara hku chye lu na rai?, ngu shadum da ai.

Shaloi, Yoba mung shi myit mang shut ai hpe chye jang Karai Kasang hpe tawngban lai wa ai. Karai Kasang tsun mayu ai hpe shi atsawm chye na hkawn hkrang wa ai.

Kadai raitim, matsan jam jau, yak hkak hkrum jang Karai Kasang hpe ga san n san ai sha, n chye na ai raitim, hkap la nna Karai Kasang a hpung dagu hte matsan dum lama ai hpe kam sham ra ga ai.

Hpang jahtum hta Yoba gaw shi a matsan jam jau hkrum ai hta Karai Kasang hpe sadi dung ai a majaw shi jasum kau sai sutgan ni hta grau ai chyeju htam latsa Karai Kasang kaw na bai hkam la lu ai.

Yoba laika a ga hpungdim ginchyum dat shiga gaw kadai raitim, matsan jam jau hkrum ai shaloi Karai Kasang hta kam hpa kam shamyat nga ga ai rai yang, myit daw myit hten lam galoi mung n hkrum na ga ai ngu ai rai nga ai.

Yesu Madu sang lang da ai matsan jam jau hkam ai lam

Kabu gara shi ga hta tsun da ai hka li gaw Nawku Hpung hpe hkrang shala ai kumla rai nga ai.

Moi shawng na Hkristan ni gaw Yesu hte Kasa ni jai lang ai hka li hpe nawku hpung a kumla hku hkam la ma ai. Yesu Madu Kasa Petru a hka li hpe jai lang nna shawa masha ni hpe sharin shaga lai wa ai (Lk 5:5).

Yesu Madu gaw Nawku Hpung ngu ai hka li hpe kasa ni kaw ap jaw da lai wa ai. Shanhte a bungli lit magam gaw hka nawng hpe rap di nna sumsing mungdan ngu ai hka hkinggau/ hka danam de du lu na matu rai nga ai.

San Marku tsun ai, “hka li ni rap lai wa ai” ngu ai gaw anhte ni hte rau Hkristan wuhpawng wuhpawng ni hpe tsun ai rai nga ai. Hka nawng hpe rap lai na matu myit dating let shakut ra ai. Raitim, Kasa ni anhte hpe makawp maga ya ai, grau nna Yesu Madu a ga sadi hte anhte hpe matut makawp maga hting hkang da ya ai. “Lamu ga prat htum hkra Ngai nanhte hte rau dinggrin anga nga na nngai law,” (Mt 28:20).

Yesu Madu Yup Pyaw Taw Ai (Mk 4:38).

Yesu Madu yup pyaw taw ai ngu ai gaw anhte shinggyim masha ni zawn sha pu ba ai majaw n-gun la taw ai lachyum rai nga ai. Dai shani tup sharin shaga ai lam galaw da ai majaw pu ba sai rai nga ai. Hkrit kajawng na zawn re ai nbung laru hte hka len ni e pyi sharawt n lu na daram yup pyaw taw ai rai nga ai.

Nbung laru hte hka len ni lapran makawp maga ya na matu Kawa Karai Kasang hta Yesu Madu kam myit tawn da ai hpe Kasa ni n sumru, n myit la lu ma ai. Kawa Karai Kasang ra sharawng ai lam n rai yang gaw hka li lup mat na n rai nga ai.

Yesu Madu gaw Shi a Nawku Hpung (hka li) hpe anhte a lata hta ap jaw da ai. Shi a ja mungdan rawt jat wa na matu anhte a ladat nga manga hpe jai lang shangun mayu nga ai. Kasa ni hta li hkang ai shaloi nbung laru hte hka len kaba kaw nna lawt lu hkra lam amyu myu hku shakut ma ai zawn, anhte ni n dang galaw ai lam ni nga yang Yesu hpe kam sham kam hpa nga na matu ra sharawng nga ai. Hkristu Madu gaw anhte hta grau nna Nawku Hpung hpe shim lum lam a matu myit tsang ya nga ai. Anhte marai hkum shagu a shimlum lam a matu mung myit tsang ya nga ai. Matsan jam jau lam ni hkrum shagu Yesu madu hpe kam hpa nga na n mai malap ga ai. Shi gaw anhte marai hkum shagu a yak hkak ai hpe kata lam du hkra chye ya ai wa rai nga ai.

Kasa Ni Aput Angun Di Ai Lam

“Sape ni gaw Yesu hpe jasu nna, Sara e, anhte si wa hkyen nga ai hpe nang hpa n nawn nga n ni?, ngu nna tsun mu ai (Mk 4:38). Kasa ni shanhte a asak hpe dingbai dingna jaw wa hpe hkrum jang Yesu hpe mara shagun ai ga hte hpyi nem ma ai.

Karai Kasang gaw anhte hte Madu hpe hkye la na matu shakut nga ai; Madu gaw hpa rai yup taw nga n-ta? ngu Yesu Madu hpe tsun shadum ai zawn rai nga ai. “Anhte a matu n tsang a ni?” Ndai gaw yak hkak jam jau hkrum ai ni a aput angun tsun chye ai ga rai nga ai.

Anhte ni Karai Kasang hpe kam sham ai lam yawm wa jang, Madu Yesu hpe n hten n tsen ai lam ni nga wa chye ga ai. Anhte a akyu hpyi nsen hpe Wa Karai Kasang n madat ya ai, n shaman ya ai ngu myit la hkam la shagu Yesu Madu anhte hpe n yu n lakawn ai ngu aput angun di mara shagun chye ga ai.

Yesu Madu A Bai Htang Ai Lam

Yesu Madu yup hprang wa ai shaloi, shawng ningnan nbung laru hte hkaleng ni hpe shawng shazim kau ai. “Dai majaw shi rawt tsap nna nbung hpe, atsin sim rai nga u ngu nna hkang dat wu ai hte hkaleng ni mung sim mat u, ngu nna hkang dat wu ai. Dai nbung num mat wa nna dai yang e akatsi sha rai mat wa ai,” (Mk 4:29).

Yesu Madu nat shung ai masha kaw nna satan hpe gawt shapraw kau ai shaloi na ga si hte bung ai ga si hpe jai lang ai majaw (Mk 1:25), Yuda masha ni nbung laru gaw satan kaw na re ngu hkap la ma ai.

Nbung num mat ai hpang Yesu Madu Shi a Kasa ni hpe sharing shaga hpang ai. “Shaloi Yesu gaw shi a sape ni hpe, Nanhte hpa majaw hkrit kajawng nga myit ta? Nanhte kam sham ai myit grai n rawng nga myit ni? Ngu nna shanhte hpe tsun wu ai,” (Mk 4:40).

Yesu gaw, Shi a lam hpe Kasa ni sharing hkam la ai grai lanyen (hpang hkrat) nga ma ai majaw, n-gun n lu byin nga ai masa hta nga ai. “Nanhte ngai hta hpring tup kam sham myit jung na aten rai sai. Nanhte n kam n sham yang gaw, nanhte a matu myit tsang shara kaba nan rai nga ai, ngu Yesu tsun nga ai zawn rai nga ai.

Yesu Madu a shadum sharing shaga ai ga ni gaw anhte a matu mung rai nga ai. Hkristu hta kam sham myit jung (kaba) nga ga ai rai yang, Shi azim sha nga ai ngu anhte shadu ai raitim, htuk manu ai aten hta anhte hpe sa hkye la na ra ai.

“Wa e, Na a lata de nye a wenyi ap ya de ai,” (Lk 23:46).

Yesu Madu A Tsaw Ra Ai Hta Kam Sham Myit Kaba Ai San Pawlu

Chyum mungga daw lahkawng hta matsan jam jau hkam ra ai lam hkum tsup ai hku San Pawlu tsun da nga ai. (1) Yesu Madu gaw si ai kaw nna bai hkrung rawt wa sai hte anhte a makam hpe shangang shakang ya ai. (2) Hkristan masha langai mi gaw, kade ram wa jam jau kaba ai hpe hkrum ang ai raitim, n di lu ai sumri zawn, Hkristu Madu hte rau gyit hkang da ai hkrum nu ai. (3) Hkristu Madu gaw anhte a matu si hkam nna bai hkrung rawt wa sai; Anhte mung Hkristu a matu asak hkrung nna si ra na rai ga ai. Yesu Madu a matsan dum lama ai a marang e anhte a matsan jam jau hkam ai lam ni gaw bai hkrung rawt na matu lagaw lahkam rai nga ai. (4) Anhte a prat hta matsan jam jau hkam ra ai lam ni hpe htani htana ngwi pyaw lam hte shingdaw dat yang kachyi mi sha rai nga ai, ngu San Pawlu anhte hpe shadum da nga ai.

Akyu hpyi saga

Wa Karai Kasang e, Yoba hte Kasa ni matsan jam jau hkrit kajawng ai aten ni hta lam woi la ya ai zawn anhte hpe mung lam woi ya nna sumsing chyeju hkam la shangun ya rit law. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, Pranwan Ladaw hta (12) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) – Yoba 3:1, 8-11

Chyum Mungga Daw (2) – 2Kor 5:14-17

Kabu Gara Shiga – Mk 4:35-41

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.