Karai Kasang A Mungga - Pran Wan Ladaw 32, 2021

Hkristu hta tsaw ra ai nu wa hpu nau ni e, ndai laban gaw Pranwan Ladaw hta (32) ngu na laban rai nga ai.

Matsan Mayan Ni Hpe Makawp Maga Garum Ai Lam

Nawku daw jau shaning htum maga de na chyum daw ni hpe maram yu yang, Yesu Madu, kasa ni hpe shajing ya ai lam gaw, jawng sara ni gaw jawng ma ni san poi htai ten ni wa mahka e shajing ya ai hte bung nga ai. Shaning htum maga de Sara ni gaw jawng ma ni san poi hta atsawm sha htai lu na matu ahkyak dik ai sharin ginlam ga baw ni hpe kahtap kahtap nna sang lang dan chye ma ai.

Hkristan prat hta ahkyak dik ai lam ni, bai, dingbai dingna lam ni hpe Nawku hpung e sang lang dan ai a majaw anhte ni a matu madi shadaw kaba tai nga ai. Hkristan pat hta shaning shagu a Nawku daw jau magam hpe nawku daw jau shaning htum maga de bai san jep yu ra ga ai. Kahtawlik nawku hpung a nawku daw jau shaning gaw Hkristu Hkawhkam poi nhtoi laban shani hta htum ai. Nawku daw jau shaning ningnan gaw Du Sa Ladaw hpang ai shani rai nga ai.

Ndai laban hta, Nawku Hpung gaw anhte marai hkum shagu hpe, Satan a gumlau ai hta n hkrat sum u ga, sumsing mungdan hta Karai Kasang hte rau htani htana prat dingsa kabu pyaw let nga lu u ga matu sumru san jep woi nga ai.

Gaida Num Gaw Karai Kasang Hta Kam Sham Myit Kaba Ai Majaw Myit Daw Hten Ai Lam N Nga

Chyum daw langai hta Myihtoi Elijah a lam tsun da ai. Elijah gaw Yesu n paw pru shi yang BC 850 daram aten hta sak hkrung nga lai wa ai wa re lam sawk sagawn da ma ai. Dai ten laika ga hte ka matsing da ai lam ni n nga shi ai raitim, Yuda myusha ni, Madu Yesu a prat hta, shi hpe hkungga lara ai hte hkap la nga ma ai. Shi asak bai rawng wa nna Messiah hpe shachyen ya na ra ai ngu pyi myit mada lai wa ma ai.

Yesu Madu bum ntsa kaw nsam galai ai ten hta Petru hte kasa ni Yesu hpe ga san san ai hte byin mayu ai lam tsun ai hpe myit dum na ma ai (Mk 9:11-13).

Israel myusha ni hpara sumla nawku ma ai kaw nna Karai Kasang hpang de bai kayin wa na matu Myihtoi Elijah hpe Karai Kasang lit kaba jaw da lai wa ai. Solomon hkawhkam si mat ai hpang, mungdan lahkawng garan mat ai rai nna, Israel mungdan hpe gaw Ahab hkawhkam up hkang lai wa ai. Shi gaw Yezebel ngu ai tara maigan hkawhkam kasha hpe hkungran la ai. Dai hkawhkam jan e woi shalen la hkrum ai Israel masha law law gaw Bar nat hpe nat jaw nawku mat ma ai hte akyang lailen mung hten run mat ma ai.

Ahab hkawhkam a law la ai shut hpyi mara ni a majaw Karai Kasang gaw Elijah a marang e, mungdan hpe masum ning jan lapran lamu marang taw lai wa shangun ai. Karai Kasang hkum nan Israel myusha ni shi hpang bai kayin wa na matu ndai zawn yaw shada let galaw ai rai nga ai.

Ahab hkawhkam gaw Elijah hpe sat na gyam nga ai. Raitim, Karai Kasang gaw Myihtoi Elijah hpe Hkerit hka shi nga ai Yawdan hka a sinpraw hkran na Wadi zaibru jang kaw makoi da ai. Uhka langai mi shi sha na matu shani shagu lusha (muk) hpe sa jahkrat ya ai. Raitim, gade nna yang dai Wadi zaibru jang pa hta mung hka n rawng mat sai. Karai Kasang gaw Elijah hpe dingdung maga na tara maigan mungdan rai nga ai Sidon makau e nga ai Zarephat de htawt nga na matu lam madun ya ai. Myihtoi Elijah gaw Karai Kasang lam matsun ai hte maren hpang gara nga ma ai masha wuhpawng lapran hku lai di nna, dai shara de sa mat ai. Ahab hkawhkam mung dai hpe n chye kau dat ai.

Ndai laban na chyum daw langai gaw dai Zarephat mare hta du makoi nga ai aten na Myihtoi Elijah a lam hpe na lu ai rai ga ai. Gaida num wa hte Myihtoi Elijah hkrum ma ai shaloi na mau hpa mabyin mung rai nga ai. Shawng nnan, Myihtoi Elijah, dai gaida num hpe hka kachyi mi hpyi ai. Elijah hpe shi n chye ai raitim, hka jaw lu ai. Dai hpang muk hpe matut hpyi ai. Gaida jan mung shi hta yak hkak jam jau nga ai mabyin hpe bai tsun dan wa ai. Shi hte shi a kasha hpang jahtum sha na muk kachyi mi shadu na matu matu hpun sa hta ai re lam tsun dan ai. Elijah mung gaida jan tsun dan ai hpe madat ngut jang dai muk shi hpe garan jaw na matu hpyi shawn let dai akyu shan nu hta ya jang jang hkam sha lu na re lam ga sadi jaw ai. Gaida jan mung Karai Kasang a shadut ya ai a marang e Elijah hpyi shawn ai hpe hkap la lai wa ai. Dai gaida jan gaw Israel myusha n rai nga ai. Kaga tara maigan myusha she rai nga ai. Kaja wa nan sha Elijah ga sadi jaw ai hte maren shan nu akyu chyeju hkam la lu ma ai. Lamu marang taw ai aten hpe tawt lai lu hkra lu sha na muk hte sau yam hta hpring tup rai nga ai. Myihtoi Elijah tsun ai ga hta Karai Kasang hpe kam sham wa ai. Raitim, hpang daw hta Karai Kasang a chyam dinglit ai hpe hkrum mu ai. Shi a kasha, n myit mada ai sha, si mat ai. Myihtoi Elijah hpe shaga nna shi kasha hpe bai jahkrung la lu ai (1Hk.Hk 17:17-24).

Ndai gaw Myihtoi hpe Karai Kasang jaw da ai hpung dagu hte gaida jan a makam masham rai nga ai. Kadai n shakawn ai nga na law.

Ndai mabyin a hpang, shaning 800 daram na ai hpang, Yesu Madu dai shara de lai hkawm ai shaloi tara maigan num sha langai mi nat kap ai shi a kasha hpe shamai ya na matu hpyi shawn wa ai. Dai num gaw Yesu Madu hta kam sham myit kaba tawn da ai majaw Yesu mung ningdang ai lam n nga ai sha hkap la let ma hpe shamai ya ai (Mt 15:21-28; Mk 7:24-30).

Rai Dum Ai Hte Lawhpa Myit Gaw Karai Kasang Hpang De Sa Ai Lam Hpe Pat Shing Dang Ai; Shagrit Shanem Nna Myit Hkriba Lit Li Ai Gaw Karai Kasang Hpang Woi Sa Ai

Ndai laban na Kabu Gara Shiga hta Yesu Madu, Yuda masha ni hpe lam woi kahkyin la lu na matu shanhte hte tara jawng hta hpang jahtum laja lana rai dang rang hkat ai hpe mu lu ga ai. Shanhte gaw gade n na yang Yesu Madu hpe jeyang sat ma ai.

Yuda ningbaw ni Yesu hpe n hkap la ai gaw ahkyak dik manghkang lahkawng a majaw rai nga ai. (1) Shanhte gaw gawngba, rai dum ma ai; kaga masha hta tinang gaw dinghpring dingman lam kaba dik ai ngu hkap la ma ai; hkye hkrang la lam hte grindan ai ni re ngu hkam la ma ai. Tara ni hpe htep lahti hkan shatup ai majaw Karai Kasang shanhte hpe hkye la na lit nga ai ngu hkam la ma ai. (2) Shanhte gaw nangmak law hpa myit kaba ma ai; matsan mayan re ai ni jaw bang ai alu hte sut su nga ma ai. Dai zawn re ai masa kaw rai tim, Karai Kasang a ntsa sadi dung ai majaw chyeju hkam la lu ai re ngu myit la hkam la shut ma ai.

Shanhte a tara hkan ai gaw Yesu Madu a matu akyu n rawng rai nga ai majaw shanhte hpe mara shagun jahprak ai rai nga ai. Shanhte Karai Kasang hpe tsaw ra ai majaw n rai, gawng ba, rai dum myit ni a majaw makau grupyin masha ni a shakawn ai hpe hkam la mayu myit ni a majaw mara shagun ai rai nga ai. Shanhte a nang mak law hpa myit gaw Karai lam, tara lam hpe n re ai hku jai lang ma ai (aloi tung tsa di ma ai) majaw grau nna matsan shabat rai nga ai.

Kabu Gara Shiga hta na myu shayi a alu hte dai masha ni a akyang lailen hpe masam maram shingdaw yang, lamu hte ga hpa shai nga ai. Nawku Htingnu kata alu sutdek hta myu shayi a alu gaw masat hku kachyi mi sha raitim, kaga yawng a lu hta manu law grau ai ngu Yesu Madu shingdaw dan ai hpe anhte na yu saga ai. Hpa majaw nga yang shi hta nga ai yawng hpe alu jaw bang kam ai majaw rai nga ai.

Yesu Madu Gaw Matsan Mayan Re Ai Ni Hpe Laklai Tsaw Ra Ai

“Wenyi hta matsan mayan re ai ni gaw a lu ma ai,” ngu Yesu bum ntsa na mungga hkaw ai hta tsun da nga ai (Mt 5:1; Lk 6:20). Anhte ni matsan jam jau, kaw si hpang gara ai majaw Karai Kasang kabu ai ngu tsun ai gaw n rai nga ai. Prat hta n nga n mai ra kadawn ai lam ni n lu n su ai rai yang gaw mara a majaw matut manoi hkam sha ra ai ra rawng gawng kya lam ni rai nga ai. Shinggyim masha ni kaw si hpang gara ai gaw n kaja ai lam ni a majaw hkam sha ra ai rai nga ai.

Raitimung, Karai Kasang gaw mai kaja ai wa rai nga ai majaw, n kaja ai matsan hku kaw nna matsan ai ni hpe laklai mahkrun lam hku nna mung, Yesu Madu a hkye hkrang la ai lam hpe hkap la ai a marang e mung, kaja shangun lu ai. Dai lam ni hte Karai Kasang a lapran dut dang ai lam kachyi mi hpyi n nga lu ai. Hpang jahtum hta shanhte gaw, lu su ai ni hta grau nna tsawm htap kam maga hpe hkam la lu ma ai.

Chyum laika hta matsan mayan ni hte myit san seng, dingman dinghpring ai ni gaw Yesu Madu a Kabu Gara Shiga hpe shawng hkam la lu ma ai rai nna, sumsing mungdan shang lu ai ni rai ma ai lam tsun da ai. Yesu Madu, Kabu Gara Shiga hpe yawng a matu hkaw tsun ai; raitim, matsan mayan re ai ni hpe ahkyak tawn hkaw tsun ai (Is 61:1; Mk 11:5; Lk 7:23).

Yesu tsun ai “matsan mayan ni hpe ahkyak tawn ai gaw Shi hkum nan Nazereth mare kaw shaning sumshi (30) tup matsan jam jau hkam lai wa ai rai nna shanhte a prat hpe chye na ya ai majaw rai nga ai. “Chyahkyawn ni nhkun lu ma ai, ntsa malen pyen ai u ni mung u tsip ni lu ma ai, dai Masha Kasha chyawm gaw baw tawn na shara pyi n lu nga ai,” (Mt 8:20).

Yesu Madu Gaw Matsan Mayan Ni A Matu Hkristan Nawku Hpung Hpe Mung, Shi Zawn Sha Myit Pu Myit Tsang Shangun Mayu Ai

Lk 7:11-17 hpe hti yu yang, Yesu Madu gaida num a kasha shingtai si mat ai shaloi yawn hkrap hkrap taw ai dai gaida num hpe “hkum hkrap sa” ngu shalan shabran n-gun jaw ai hpe mu lu ga ai. Dai hpang dai si mat sai ma hpe bai jahkrung sharawt ya ai. Yesu Madu Shi a kanu hpe bai myit dum ai mung mai byin nga ai. Dai aten gaw shi a kawa Yawsep si mat sai majaw shi a kanu Nu Maria gaida da ai ten mung mai byin nga ai (Chyum laika labau sawk sagawn ai ni a ningmu rai nga ai). Bai lani mi hta Yesu shi hkum nan si hkam na nhtoi hta kanu Nu Maria dai gaida num zawn hkam sha nga na hpe mung dum sai na re.

Nawku Hpung gaw de hpang ai aten ni hta kun dinghku masha n hkum sai gaida ni hpe ahkyak tawn garum lai wa sai hte maren ya aten du hkra mung ahkyak tawn garum ya nga ai rai nga ai (Kasa 6:1).

“Shanhte gaw anhte hpe matsan mayan ni a ra ai lam hta garum la na matu n malap na hpe sha htet dat mi ai hte ndai lam gaw ngai grai shakut gun hpai mayu ai amu nan rai nga ai, ngu San Pawlu sakse hkam da nga ai (Gal 2:10). Ndai gaw anhte nawku hpung hta lawm ai ni yawng sharin hkam la, hkan galaw shatup sa ra ai lam kaba rai nga ai.

Ngai na prat hta kadai  hpe, galoi, gara shara kaw, gara masa hku myit la sawn la nna garum shingtau pawn ba la yu sai kun? Anhte tinang hkum tinang bai sawn sumru dinglit yu let, matut nna mung ra kadawn nga ai ni hpe Kanu Nawku Hpung a mying hte Karai Kasang a mying ningsang hta garum sa wa nga ga.

Akyu Hpyi Saga

Wa Karai Kasang e, matsan mayan re ai ni, machyi makaw re ai ni, kaw si hpang gara hkrum nga ai ni hte ra kadawn nga ai ni yawng hpe tinang lu ai chyeju atsam mahkra hte garum shingtau chye ai chyeju anhte hpe jaw ya rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, ndai laban gaw Pranwan Ladaw hta (32) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) – 1Hkaw Hkam 13:10-16

Chyum Mungga Daw (2) – Hebre 9:24-28

Kabu Gara Shiga – Maraku 12:38-44

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.