Karai Kasang A Mungga - Pran Wan Ladaw 32, 2020

  Hkristu hta tsaw ra ai nu wa hpu nau ni e, ndai laban gaw pranwan ladaw hta (32) ngu na laban rai nga ai.

Misa Hkungga nawng jau shagu jau gaw Muk hte Tsabyi a ntsa ta ladawn akyu hpyi let Madu Yesu a Hkum hte Sai shatai ngut ai hpang “Ndai gaw Makam Masham a Mungsung rai nga ai” ngu ndau ya ai shaloi Jau hte rau hpung masha ni yawng gaw “Hkristu si hkam sai! Hkristu bai hkrungrawt na ra ai! Hkristu bai du sa na ra ai!, ngu Makam masha hpe sakse hkam ai.

Dai gaw, Yesu Madu wudang ntsa si hkam ai lam nnga ai rai yang, anhte ni yawng yubak mara kaw naw lup taw na rai ga ai hpe shadum nga ai. Yesu Madu bai hkrungrawt ai lam nnga ai rai yang anhte ni htani htana asak hpe lu la na n rai ga ai. Hkristu bai n du sa ai rai yang, anhte a matu hpang jahtum hta hkam la na htani htana ngwi pyaw ai sumsing mungdan hpe hkam la lu na n rai nga ai.

Yesu Madu galang bai du sa na lam Nawku hpung sharin shaga ai gaw anhte hpe jahkrit shama na matu n rai nga ai. Anhte a myit masin hte makam masham hpe bai n htang sumru na matu rai nga ai. Karai Kasang saga la ai hta sak hkrung hkawm sa nna, nawku hpung masha langai mi gara hku sak hkrung nga pra ra ai hpe sharin shaga ya ai rai nga ai.

Hpang jahtum shani sunsing mungdan hta ning ngai lu na kun, ngarai mung hta dam hkam nga ra na kun, je yang ai hpe hkrum ra na rai ga ai.Teng man ai hpaji byen nya hpe hkam la lu hkra sharin la ra ga ai.

Hpaji ningli hpe shaning law law hka ja hkam la ai ni hpe hpaji chye ai ni ngu anhte ni myit la hkam la chye ga ai.Laika n chye ai ni gaw laika hpaji jawng n lung ai ni hpe tsun ga ai.

Raitim, ndai laban na chyum mungga daw 1 hta tsun ai hpaji byen nya hpe tsun ai gaw n rai nga ai. Hpaji byen nya gaw num hpawmi langai shing n rai, kaga masha langai hpe tam mu ai hte bung ai ngu shabung da ai. Rai jang anhte hti nna, na ai chyum daw hpe gara hku chye na ga ai kun?

Ndai laban na Chyum laika daw langai gaw teng man ai hpaji byen nya hte hpring na matu shinggyim masha yawng hpe shaga ai hpe dan len ai hku mu mada ga ai. Shinggyim masha yawng wa hpaji chye ai ni tai lu na kun? Masha shagu jawng laika hpe sharin la lu ai kun? Ga shadawn Dak kasu jawng lung lu ai madang nga ai ngu ga.

Raitim, laika chye hti ai chye ka ai hte hpaji byen nya rawng ai ngu tsun n lu ga ai. Bum ga ginra shara law law ni hta, laika sharing jawng kaji ni hta laika sharin hkam la lu ma ai. Lahta tsang jawng ni hta laika hpaji matut sharin hkam la na yak wa ai lam ni nga wa ai. Lahta tsang jawng nga grin ai daram nnga ai majaw mung, kun dinghku nta masha ni hta ja gum hpraw yak hkak ai majaw mung, jawng sa lung ra ai shara tsan  ai majaw mung lahta tsang jawng matut lung n mai ai ni law law naw rai nga ai. Dai ning nga yang chyambra ana zingli Covid 19 a majaw, mungdan shara shagu hta laika hpaji jawng ni pat da ra mat ai.

Anhte shinggyim masha ni a shawng lam na matu hkyen lajang na matu laika hpaji jawng lung ai gaw akyu rawng ai re ngu hkam la ga ai re. Hpaji jawng lung ai kashu kasha ni gaw hkam ja ma ai hte nga sat nga sa sat lawat tsawm htap ai hku nga chye ma ai.

Raitim hpaji chye ai a majaw lu la ai ahkaw ahkang ni hpe shut shai ai hku jai lang ai ni mung law law nga ma ai. Nbyin grin ai mabyin ni dai laika hpaji chye ai ni kaw byin chye nga ai.

Asuya magam gun nkau ni, bawng ring magam gun nkau ni hte laika hpaji hpe jai lang nna magam gun ai nkau ni gaw tinang galaw ra ai lit magam hpe teng man, jaw ang ai hku galaw n lu ma ai. Tinang hte seng ai bungli hpe htep lahti n galaw ai sha, mayun kumhpa sha ai lam ni galaw chye ma ai; tinang a magam rum ni hte kaga masha ni kaw na amyat htuk la chye ma ai. Nkau ni gaw lu lai sha lai nna, nang hpam hta hkrat sum nna, akyang lailen hten run mat ma ai.

Ndau zawn re masha ni hta Hkristan re ngu tinang hkum tinang ndau ai raitim, shi a shani shagu na sak prat hta Hkristu n nga ai hpe mu lu nga ai. Karai Kasang a Kabu Gara Shiga rai nga ai Ja Chyum Mungga hte maren sak hkrung nga pra ai lam nnga ma ai. Dai ni gaw Hpaji chye ai ni ngu hkap la lu tim, Hpaji byen nya rawng ai ni, hpaji hpe jai lang chye ai ni n rai ma ai. Laika hpaji chye tim, Hpaji byen nya n nga ai ni, angawk ai ni rai ma ai.

Laika hpaji n chye tim, hpaji byen nya rawng ai ni, hpaji hpe jai lang chye ai ni law law nga ma ai. Anhte a makau grupyin hpe maram yu shaloi, laika hpaji jawng n lung ga ai ni, tsang kaji kajaw sha lung ai laika hpaji n chye ai ni mung, laika hpaji chye ai ni hte shing daw lu ai nga nga ma ai. Shanhte hpe laika buk jaw hti ai shaloi, laika buk hpe n htang hku yu yang yu na re; Rai ti mung, shanhte a prat hpe yu dat ai shaloi, masha law law kam hpa ging ai ni rai nga chye ma ai. Ga sadi dung ai ni rai nna, jaw da sai ga sadi hpe galoi mung, gara hku mung, ja hten kau ai lam n nga ma ai. Kun dinghku a matu, mare buga a matu, myu hte mungdan a matu, nawku hpung a matu, yak hkak jam jau hkam, sak jaw ap nawng, daw jau chye ma ai. Ra gadawn ai ni hpe garum shingtau ya na jing jing rai nga chye ma ai. Asak kung sai Salang ni hpe san yu yang, dai zawn re masha ni gaw, ndai prat hta moi na prat hta grau law ma ai lam tsun dan chye ma ai. Shanhte ni hta Hkristu a lam n na yu ai ni law law rai ma ai. Raitim, Karai Kasang gaw shanhte hte ni ni htep htep rau nga nga ai rai nga ai. Shanhte gaw laika hpaji n chye tim, hpaji byen nya rawng ai ni rai ma ai.

Karai Kasang gaw teng man ai Hpaji Byen nya rai nga ai. Shawng de tsun sai hta, laika hpaji chye ai hte hpaji byen nya rawng ai gaw grai shai ai hpe mu lu saga ai. Anhte shinggyim masha wuhpung wuhpawng kata ni hta, masha hpe sam maram ai shaloi, laika hpaji chye ai, n chye ai; arawng ana power nga ai, n nga ai; zet tsang ai lam nga ai, n nga ai; masha shada hku hkau lam nga ai, n nga ai zawn re ai sam maram lam ni hpe galaw chye ga ai.

Karai Kasang langai sha, hkum zup ai hpaji byen nya rawng ai wa rai nna, hpung dagu hte hpring ai wa, zet tsang dik nna tsaw ra myit kaba htum ai wa re ai hpe gaw anhte ni myit hkrum ai hte hkap la ga ai.

Chyum mungga daw langai hta na “Hpaji byen nya” ngu ai ga si malai “Karai Kasang” ngu shaga jang kade ram namnak rawng ai lachyum pru na hpe mu lu na ga ai.

Karai Kasang gaw galoi mung htoi tu ai rai nna, dai htoi tu ai lam galoi mung yawm mat na nre. Shi hpe tsaw ra ai wa gaw dan len ai hku atsawm sha mu lu na re. Tam mu, mu na ra ai da. Sak prat naw ram ten, Karai Kasang hpe tam ai rai yang shi a prat hta mayak mang hkang ngu ai lam nga na n re ai. Nga wa ai yak hkak jam jau lam ni hpe hkam jan lu na re.

Karai Kasang hkum nan mung, Shi hte ging dan ai ni hpe hkan tam nga ai re. Shi hte ging dan ai ni ngu ai shaloi, kadai mi rai tim, shi hpe hkap la yin la ai ni hpe tsun mayu ai rai nga ai. Shi hpe sa hkrum mayu ai ni hpe a la ding da nga ai. Shi kaw sa ai ni kadai hpe rai tim, hkap apup let hkalum la nga ai.

Karai Kasang a matsun maroi hpe hkap hkam la ai gaw Karai Kasang hkyen lajang da ya ai shawang tsaw ra myit hkap la na matu hte garan gachyan ya na matu, aten shagu shakut tam la na myit nga ai rai nna, dai wa gaw kaja wa sha, “hpaji byen nya” rawng ai wa rai nga ai. Dai zawn hpaji byen nya rawng ai wa hkye hkrang la hkrum na lam de Karai Kasang, shi hkum nan lam madun lam matsun ya nga ai.

Karai Kasang gaw Hkristu Madu a marang e, Shi a hpaji byen nya hpe anhte hta laklai ai hku garan jaw ya ai.

Yesu Madu mungkan ga de yu sa wa ai gaw, anhte shinggyim masha ni hpe hkye hkrang la na matu, Kawa Karai Kasang a hpring tsup ai tsaw ra ai lam hpe madun na matu hte dai tsaw ra ai hta anhte ni nga pra lu hkra ninghtoi hte n gun atsam jaw ya na matu rai nga ai.

Yesu Madu gaw Shi hta grau ai Sara hpang de sa na matu lam matsun madun n lu ai. Hpa majaw rai? Shi hta grau ai Sara n nga sai majaw rai nga ai. Yawhan 14:6 hta, “Yesu gaw, lam gaw ngai rai nga nngai, teng man ai hte asak mung, ngai rai nga nngai, ngai hta na n rai yang kadai mung, nye Wa kaw n du wa lu ai,” ngu yawng hpe tsun ndau da ai.

Tsun mayu ai gaw, Hkristu Madu a hpang hkan ai ni gaw lam n dam na, lam n shut na ngu ai rai nga ai. Hkristu Madu hte hka ai masha gaw shut hpyit ai lam sha katut shana rai nga ai.Madu karai langai chyu sha n si lu ai asak hpe jaw ya lu ai wa rai nga ai.

Tinang a prat tup hta Hkristu Madu hpang sadi dung let hkan nang ai wa gaw teng man ai hpaji byen nya rawng ai wa tai nga na re. Hkristu Madu a hpang hkan ai hta masa lam hpe yu nna hkan ai wa chyawm gaw, Hkristu Madu hkum nan tsun ai hte maren, num ningnan marai (10) la ningnan hpe sa hkrum ai ga shadawn hta na angawk dik ai marai (5) zawn rai mat na re.

Tinang a htung hking hta hkan nna shinggyim masha ni hkungran poi hpe amyu myu galaw chye ma ai. Hkungran poi shagu gaw kabu pyaw ai poi aten re ai hpe yawng hkap la ma ai. Num sha La sha ni a prat hta tsaw dik htum ai kabu pyaw ai aten rai nga ai.

Yuda myusha ni gaw shanhte a hkungran poi hpe shana aten hta galaw ma ai. Mungdan nkau ni hta ya ten du hkra shana aten galaw nga ma ai. Yuda masha ni a hkungran poi langai hpe (7) tup galaw ma ai. Hpang jahtum shani hta ramma num sha ni gaw lata hta wan kawk shatu lang nna, mahkawn hkawn ka manawt let hkungran num ningnan hpe hkrungran la ningnan a nta de sa sa ma ai.

Yesu Madu tsun dan ai hkungran poi ga shadawn ndai gaw kaja wa shinggan hta byin ai mabyin hta loi laklai nga ai. Kaja wa nga yang poi hkap ai shara hta chyinghka la da ai lam galoi mung nnga ai; kadai num sha rai tim, shi a wan kawk lana mi tup n hkam lu na sau wan kawk hpe n hpai hkawm ai.

Yesu Madu tsun mayu ai lam hpe dan dawng hkra hkungran poi lamang hpe ga shadawn jai lang ai sha rai nga ai. Yesu Madu tsun mayu ai lam gaw (1) Hkristu gaw hkungran la rai nga ai. (2) Hkungran poi gaw Karai Kasang a ja sumsing mundan rai nga ai. (3) poi sa num sha ni gaw Hkristu Madu du sa na aten hpe la ding da nga ai Hkristan masha ni hpe tsun ai rai nga ai. Masha hkum shagu gaw, tinang a sak prat hpe hpaji byen nya rawng ai Hkristan masha tai na, shing n rai, angawk ai Hkristan masha tai na hpe daw dan ra ai.

Kashin Kamun Sakramentu chyeju kumla hpe hkam la ai shaloi, Karai Kasang kaw na, htoi tu ai wan shatu da ai wan kawk langai hpe kum hpa hku hkap la lu sa ga ai. Dai wan kawk gaw, n sin chyip rai nga ai mungkan ga hta hkawm sa ai shaloi, ninghtoi jaw na matu Wenyi e jaw ya sak prat hte Hkristu Madu hta kam sham manoi nga lu ai chyeju lahkawng hpe shadan shalen nga ai.

Anhte a wan kawk na wan hpe n sat kau ai sha, aten shagu wan sau jahpring da na ra ga ai. Wan sau gaw teng man ai Hkristan sak prat hpe tsun ai rai nga ai. Hkristan masha law law wa, wan sau jahpring na matu n dum ma ai. Sak prat galu, wan kawk hta wan n chyi ai sha sak hkrung chye ma ai. Dai gaw, angawk ai wa a hkawm sa ai lam rai nga ai.

Bai nna, anhte sadi da ra ai gaw, n bung laru kaba wa shagu (prat hta agun alau hkrum ang shagu), anhte a wan kawk si u ga nga jahkrit shama ai lam nga taw ai majaw, shimlam nga hkra, dai wan kawk hte wan hpe atsawm sha makawp maga ra ga ai.

Hkristu Madu du sa na aten hpe ala ding da nga let wenyi lam yan hta, kadai mung, yup pyaw mat n mai ga ai. Anhte si mat ai shani gaw anhte a wan kawk hta wan sau jahpring na matu hpang hkrat mat sai re. Anhte a shut hpyit mara kaba majaw anhte a wan kawk na wan si mat ai rai yang, lawan dik ai hku bai shachyi lu hkra galoi mung maja nga ra ga ai.

Daini anhte hkrum sha nga ra ai mayak mahkak ni gaw, moi na Hkristan masha ni hkrum sha lai wa ai mayak mahkak ni hte maren sha zawn rai nga ai. Ga sadawn, Hkristu Madu galang bai du sa na hpe ala ding da nga ai ni gaw lagawn wa ai. Ga shadawn hta num sha ni maja ai lam nnga ai zawn, Hkristan masha anhte ni tinang si na aten hta hkristu du ai aten hpe ndum kau dat na hpe tsang ra ga ai.

Hkristu Madu hpe asharawng ashara rai myit mada ala ding da nga ma ai Htesaloni kaw na Hkristan ni a lam ndai laban na chyum daw lahkawng hta mu lu ga ai.

Shawng na Hkristan ni gaw mungkan htum mat ai shani hta Hkristu Madu shanhte a prat hta bai du wa na re, ngu hkam la kam sham nga ma ai. Shanhte hkam la ai lam gaw n shut ai. Hpa majaw nga yang Hkristu gaw anhte masha hkum shagu si mat ai shaloi bai du sa ai. Anhte a hpang jahtum shani gaw (si mat ai shani) hpaji byen nya rawng ai, n rawng ai hpe je yang daw dan hkum na shani rai nga ai.

Dai zawn hpang jahtum shani hpe myit mada lam kaba hte ala ding da ai hpe “Parousia” ngu shamying da ma ai. Lachyum gaw Hkristu bai paw pru wa na, shing n rai, Hkristu madun ya na, ngu ai lachyum rai nga ai. Shanhte ni myit mada ala ding da nga ma ai aten grai na sai rai tim, Hkristu du sa ai lam nnga ai hpe hkam sha wa nna hpang daw de myit htum myit kaji wa ma ai.

Hkristu du sa na hpe myit mada ala nga ai Htesolani hpung masha ni gaw Hkristu Madu hpung shingkang hte bai du sa ai lam nnga shi a aten hta si htum mat ma ai Hkristan masha ni hpe mu mada nga ga ai majaw matsan mayan rai hkam sha nga ga ai nrai ni, ngu madai nga ma ai.

Ndai mang hkang hpe Timothy Korintu kaw tara hkaw taw nga ai San Pawlu hpe sa shana ya ai. Ndai laban na chyum daw lahkawng gaw dai mang hkang a matu mahtai jaw da nga ai.

Myit tsang ai lam hkum nga mu! Si ai rai tim, hkrung ai rai tim, Hkristu Madu bai du sa wa ai shaloi, anhte yawng sak ningnan hte bai hkrung rawt na ga ai. Ahkyak ai gaw, Yesu Madu si ai kaw nna bai hkrung rawt sai; ndai gaw anhte a bai hkrung rawt ai lam hpe shangang shakang ya sai; pahkam hkam ya sai re. Hkristu Madu hta si mat sai ni hte Hkristu Madu bai du sa ai shaloi sak hkrung let nga ai ni yawng gaw Karai Kasang hte htani htana rau nga lu na rai ga ai. Tsun mayu ai gaw anhte si mat ai shaloi, anhte a wan shadaw ni htoi tu nga ai hpe Yesu Madu sa mu ya na sha ahkyak ai ngu ai rai nga ai.

1Htesaloni 4:1-3 hta, “Jahtum e hpu nau ni e, Karai Kasang sharawng awng na matu nanhte kanin rai asak hkrung ra ai lam anhte kaw na nanhte sharin la manit dai. Nanhte dai lam masa hku nna asak hkrung hkawm sa nga manit dai. Dai hta grau nna galaw lu na matu Madu Yesu a mying ningsang hta nanhte hpe anhte hpyi nem shadut jahkat dat ga ai. Hpa majaw nga yang, nanhte kaning rai asak hkrung hkawm sa mai na hkang da ai lam ni hpe Madu Yesu a ahkaw ahkang hte nanhte hpe anhte jaw da saga ai gaw nanhte chye nga myit dai,” ngu San Pawlu n gun jaw da ai.

San Pawlu gaw Madu Yesu a shadum ai mungga hpe sha madi madun ai rai nga ai.

“Nshang e shingkyit kyit nna pyengdin ni hpe shachyi da mu”, Lk 12:35.

AKYU HPYI SAGA

Wa Karai Kasang e, Hkristu Madu du sa na aten du hkra anhte hpe nhtoi jaw ya nna, dai nhtoi hta hkawm sa let, anhte hkum nan mung hpu nau ni a matu nhtoi tai nga lu na chyeju jaw ya rit. Anhte a Madu Hkrsitu a marang e, hpyi nem nga ga ai. Amen.

Hkristu hta tsaw ra ai kanu kawa tara hkaw sara/num ni hte nu wa hpu nau ni e, ndai laban gaw pranwan ladaw hta (32) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) Hpaji Ningli 6:12-16

Chyum Mungga Daw (2) 1Htesaloni 4:13-18

Kabu Gara Shiga Mt 25:1-13

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.

Wa Jau Patrick Gawmaw Hkawng Yae (RVA-Jinghpaw Coordinator)