Karai Kasang A Mungga - Pran Wan Ladaw 31 (All Saints’ Day), 2019

Chyum Laika Ni :

Shing ran laika -  7: 2-4, 9-14, 1 Yawhan 3: 1-3,  Mahte 5: 1-12

Tsawra ai shiga madat nga ai nu wa hpu nau ni hpawt ni gaw san pra ai ni yawng mayang a poi nhtoi laban rai nga ai.

San pra ai masha ni ngu nna tsun nga ga ai shaloi, dai masha ni gaw kaning re lam ni hpe galaw lai wa ai majaw san pra ai masha ni tai wa ma ai kun, ngu ai lam hpe mung sumru yum ai nga ga ai. Ndai bat na kabu gara ai shiga hta, “Wenyi hta matsan mayan hkrum ai, yawn hkyen hkrum ai, myit sum nung ai, ding hpring ai, matsan chye dum ai, myit san seng ai, shangwi shapyaw chye ai, ding man ai lam a majaw zing ri zing rat hkrum ai ni gaw A lu ma ai” nga nna Madu Yesu sharin matsun da nga ai. Ndai lam ni gaw anhte hpe san pra ai masha tai wa lu shangun ai lam ni rai nga ai. 

San pra ai ni yawng ngu ai hta, nawku hpung kaw nna tara shang san pra ai masha ni ngu nna dang da hkrum sai San pra ai masha ni chyu sha nrai, lahta de tsun lai wa sai A lu ai lam ni hpe shanhte a prat hta dik wa hkra shakut shaja lai wa sai anhte a hpu nau ni yawng mung lawm nga ai. Ndai poi hta shanhte ma hkra hpe anhte myit dum shagrau nga ga ai mung rai nga ai. 

Langai ngu na ja chyum mung ga rai nga ai, Yawhan shingran laika 7: 9 hta, “yu u masha mungdan shagu hta na mung, baw lakung shagu hta na mung, amyu baw shagu hta na mung, ga amyu shagu hta na mung, kadai ndang hti ai wunawng wu wa kaba ngai mu nngai, dai ni hpraw ai bu hpun palawng bu hpun nna, tinang a lata hta namhtan hpun lakung lang let, dai tinyang a man e mung, sagu kasha a man e mung tsap nga ma ai” nga ai. Ndai law la ai chyoi pra masha ni hta, anhte hte rau nga lai wa yu sai anhte a kaji kawoi, kanu kawa, dum nta masha ni, makyin jinghku ni, ma ma ni tara hkaw sara sarama ni, manaw manang ni, jau ni, hting bu hting byen ni law law mung lawm nga na rai nga ai. Dai ni yawng hpe ndai san pra ai ni yang mayang a poi nhtoi hta anhte myit dum shagrau nga ga ai.

Bai ndai poi gaw anhte hkum shagu hpe myit mada shara jaw ya ai poi mung rai nga mali ai. Hpa majaw nga yang anhte shakawn shagrau nga ai ndai san pra ai masha ngu ai ni mung anhte zawn ndai ding hta ga hta nga pra lai wa sai ni hkrai rai nga ma ai. Ya anhte nga pra nga ai shara hta shanhte nga lai wa yu masai hte ya shanhte ning ngai nga lu sai shara hta lani mi anhte mung du shang wa lu na rai nga ga ai. Anhte hkristan ni a matu, anhte a asak aprat ngu ai gaw anhte shangai wa ai ten kaw nna si mat wa ai shani laman lapran na labau san san sha nrai nga mali ai. Anhte a labau ni gaw anhte garai nshangai wa shi ai aten kanu a hkri tung kaw nau-una sin wa ai aten kaw nna hpang wa ai zawn si mat wa ai hpang htani htana asak ngu ai lam ni naw nga nga mali ai. Dai re ai majaw si mat wa sai ni hpe loi loi sha malap kau ai lam ni anhte n galaw ga ai.

Rai timung dai htani htana asak de shang wa lu nna dai chyoi pra ai ni hte jawm pawng nga lu na ngu ai lam gaw shi chyu shi byin wa lu ai baw chyawm gaw nrai nga mali ai. Mahte a laika 7: 21 hta, “ngai hpe Madu e Madu e nga ai hte yawng mayawng gaw sumsing lamu na mung dan hta shang lu na ma ai nrai, sum sing lamu hta nga ai, nye wa a myit hkan ai wa sha shang lu na ra ai” nga nna tsun da nga ai. Dai rai yang sum sing lamu hta nga ai kawa Karai Kasang miyt ra ai lam ni ngu ai gaw hpa ni rai na rai ta.

Mahte a kabu gara ai shaiga 5:1-12 lapran hta ndai Karai Kasang ra sharwng ai sak hkrung lam masa hpe madu yesu asan sha tsun sharin da nga ai. Ndai hpe alu ai lam matsat ngu nna mung shamying ai rai nga ai. Dai gaw htani htana ngwi pyaw ai de shang wa lu na lam mung rai nga ai. Ya anhte myit dum shagrau nga ai san pra ai ni mung ndai alu ai lam matsat ni hpe hkan shatup let gyip ai chying hka hku shawng wa lu hkra shakut lai wa sai ni rai nga ma ai. Bai ndai san pra ai ni yawng a poi nhtoi hta nawku hpung hku nna mung anhte yawng hpe dai alu ai lam matsat hte maren asak hkrung hkawm sa lu hkra shakut na matu n gun jaw saw shaga nga ai rai nga ai.

Wenyi hta matsan mayan hkrum ai, yawn hkyen hkrum ai, ding man ai lam a majaw zing ri zing rat hkrum ai, ndai zawn re ai lam ni anhte a prat hta du pru wa ai rai yang Karai Kasang hpe kam hpa ai myit hte dai lam ni hpe kabu gara hkap la lu hkra shakut nga na matu mung, myit masin hta sum nung shing di ai, myit san seng ai, matsan dum chye ai masha ni byin tai nga lu hkra shakut nga na matu mung saw shaga hkrum ai ni anhte rai nga ga ai. Chyoi pra san seng ai lam hta hkawm sa nga lu hkra kun ding  hku kata ni hta mung, uhpung uhpawng ni hta mung shada kanawn mazum ai lam ni hta mung simsa ai lam hpe gaw gap chye ai ni zawn nga pra ganawn mazum na matu saw shaga nga ai, bai ndai zawn mai kaja ai lam ni galaw nga ning len zing ri zing rat ai lam ni hpe hkrum hkra wa yang, myit nhten ai sha dai nni nkri lam ni hpe hkam sharang la let matut nna mai kaja ai lam ni hta hkawm sa lu hkra shakut nga na matu, saw shaga ai lam ni rai nga ai. Hpa majaw nga yang, ya anhte myit dum shagrau nga ga ai san pra ai masha ni mahkra gaw, mung kan sut gan law law lu su na matu hte tinang a arawng sadang gum hkawng ai lam ni lu la, jat la lu na san san a matu sha asak hkrung lai wa ai ni nrai ma ai. Kadun la ai mung kan asak aprat hkrun lam htum mat ai hpang Karai Kasang jaw ya na ra ai htani htana asak hpe lu la na she myit mada let shanhte sak hkrung lai wa sai ni rai ma ai.

Madu Yesu saw shaga nga ai ngwi pyaw sim sa lam gaw, mung kan masha ni chye na hkap la da ai ngwi simsa lam ngu ai hte chyawm gaw nbung na rai nga ai. Mung kan myi jut hku nna yu dat yang, matsn mayan ai hkrum ai lam tha, yawn hkyen ai lam hta, zingri zing rat hkrum ai lam hta, ngwi pyaw sim sa ai lam ngu ai hpe gara hku nna mung lu la mai na nrai nga ai. Rai timung, wenyi hta matsan mayan ai hpe hkam la ai a marang e, karai kasng hkum nan hpe mu madu lu nna, kaja wa jet ai myit dik myit pyaw lam lu la mai nga ai. Wenyi hta hpang gara ai hte Karai Kasang hpe hkan tam ai a marang e karai kasng a mungga kaw nna n gun atsam nnan ni lu la ai. Ting nang a shut hpyit mara ni a matu yawn hkyen ai a marang e gyit hkang da hkru nna lit li nga ai anhte a wenyi ni lawt wa lu na rai nga ga ai.

San pra ai masha ni a mai kaja ai arawn alai ni hte shanhte a akyu hpyi garum ya ai lam ni gaw anhte a matu n gun tai nga let anhte hpe garum ya ai lam mung tai nga na rai nga ai.

Ndai alu ai lam hku nna sharin ya ai chyoi pra san seng ai lam hta hkawm sa ai ni mahkra a matu, jahtum lani mi na nhtoi hta dai san pra ai ni hte rau jawm pawng lu na re ngu ai anhte a makam msham mung anhte hpe n gun ban ya nga ai. Bai, Madu Yesu tsun ai, anhte lu la na sum sing mung dan a kabu pyaw hpa lam ni gaw ndai mung kan ga ntsa hta anhte hkrum hkra nga ga ai ru yak tsin yam ni mahkra hta shadawn nmai hkra law htam kaba nga ai, nga ai.

Ndai lam ni ma hkra hpe hkan sa ngut ai hpang, Mahte laika 25: 21 hta rawng nga ai zawn “ara, kaja ai hte sadi dung ai mayam e, arai loi sha hta nang kang ka rai lit dai, arai law law a ntsa e ngai nang hpe san tawn da na de ai, na a Madu a kabu kara ai hta shang lawm u” nga nna tsun let, anhte a madu hkum nan kabu gara ai hte hkap hkalum hkap tau la ai hpe lani mi anhte hkrum lu na rai nga ga ai. 

Akyu hpyi saga: Wa karai kasng e, nang madu hpe tsawra ai myit hte hpang gara chye ai myit masin ni anhte hta bang ya rit. Htani htana asak de woi wa ya lu ai lam hpe mung madun ya rit. Shing rai mung kan lam ma hkra hta nang Madu hpe grau tsawra chye wa lu nna hkum tsup ai ngwi pyaw sim sa lam ni lu la mi ga garum ya rit, anhte a madu Hkristu a marang e hpyi nem nga ga ai.