Karai Kasang A Mungga - Pran Wan Ladaw (27) Shaning A, 2020

Pran Wan Ladaw Laban 27, Shaning A

 Hkristu hta tsaw ra ai nu wa hpu nau ni e, ndai laban gaw pranwan ladaw hta (27) ngu na laban rai nga ai.

Ndai laban kaw nna pranwan ladaw htum ai ten du hkra, Nawku daw jau shaning a chyum laika ni gaw Yesu Madu mungkan ga ntsa sak hkrung ai hpang jahtum nhtoi ni a mabyin ni hpe madung da tsun dan ai hpe na la lu na ga ai.

Yesu Madu Betheni kaw na manang kaja yan nau ni rai nga ai Matha, Maria, hte Lazaru ni a dum nta hta sa dam aten shama ai hpe mu lu ga ai. Ndai aten gaw Yesu Madu a matu, Yuda masha ni hte ahkyak la dang rang hkat ai ten rai nga ai. Madu Yesu shi hpang maga lawm hkra Yuda masha ni hpe galung gahkring ai gaw shanhte ni hkye hkrang la hkrum mu ga matu rai nga ai. Raitim, shanhte ni baw naw ja nga ma ai hte shi hpe ningdang ma ai.

Ga shadawn hta Yesu Madu gaw shinggyim masha ni a myit ja ai a marang e byin wa na lam hpe sadi jaw da ai. Lai wa sai laban hta sang lang da ai kasha lahkawng ga shadawn; ndai laban hta na lu ai, n’hkru ai sum shap ni a ga shadawn; du na laban hta na lu na hkrungran poi ga shadawn ni rai nga ai.

Ndai ga shadawn ni gaw masha myu hpan lahkawng hpe madun dan ai hpe mu lu ai. (1) Isreael myusha ni, grau nna, shanhte a ningbaw ningla ni hte (2) Prat shagu na Hkristan masha ni rai nga ai.

Mt 21:43 hta, “Dai rai nna ngai nanhte hpe tsun made ga, Karai Kasang a Mungdan hpe nanhte kaw na shaw la kau nna asi atsawm sha shapraw ya lu ai amyu hpe jaw kau na ru ai,” ngu tsun da ai.

Kaja wa nga yang, Yaweh Karai Kasang gaw Isreael myusha ni hpe shi a sabyi sun hta magam gun na matu ra sharawng ai re. Raitim, Isreael myusha ni Karai a hkang da tara hpe n hkan ma ai. Dai majaw, Myihtoi Isiah Laika 5:4 hta, “Nanhte gaw dingnye lu myit dai, nanhte gaw yubak kap ai amyu baw rai nga myit dai, nanhte gaw matsat shabat re ai hte n hkru ai amyu masha ni rai nga myit hka! Nanhte a yubak ni gaw nanhte hpe gang kadawng kau nga manit hka! Nanhte gaw dai madu chyoi pra ai Isreael a Karai Kasang hpe ningdang kau nna shingdu kayin kau manit dai,” ngu ka da ai.

Karai Kasang gaw Isreael myusha ni hpe Pharol hkawhkam a lata kaw nna hkye hkrang la ai. Ga sadi tawn da ai Canon de 40 ning lam woi ningshawng tai, makawp maga lai wa wa nna, ga sadi da ai Canon hta shara jahkrat ya na matu mung pahkam hkam ga jaw da ai.

Dai daram kaba la ai Karai Kasang a tsawra myit hpe Israel myusha ni gara hku bai htang ma ai rai. Karai Kasang a tsawra myit ngu ai apu asi hpe hkam la na malai, Isreael myusha ni mara galaw ma ai. Shanhte a makau grupyin kaw mu lu ai nat sumla ni hpe nawku hpa ai; akyang lailen hten ai hku sak hkrung ma ai hte matsan mayan ni hpe roi rip up sha ma ai.

Isreael myusha ni galai shai na matu myihtoi Isaiah hpyi nem ai raitim, Yuda ningbaw ningla ni gaw mara hta matut hkawm sa ma ai hte masha ni hpe mung mara galaw na matu lam dam woi ma ai.

Karai Kasang a hkang da ga hpe n madat ma ai majaw, Isreael mungdan hte Samari mungdan, hpang daw de Yuda mungdan hte Yerusalem hpe hpyen ni a jahten sharun ai hkrum ma ai. Bai tara maigan myusha ni rim la nna, mayam shatai ai hkrum ra ma ai.

Tsibyi sun shap ai n’hkru ai nshawp ni

Isreael myusha ni hpe tsawra ai Karai Kasang gaw parsian hkawhkam Sairus hpe jahkrat kau nna, Yuda masha ni hpe tinang buga ginra de bai nhtan wa shangun ai hte Isreael mungdan ngu ai sabyi sun hpe bai gram shatsawm lai wa ai. Du sa na ra ai, shanhte a Hkye la Madu Messiah hpe hkap la mu ga matu hkyen lajang ai hku Isreael myusha ni hpe bai bau maka ai. Messiah kaja wa du wa ai shaloi, myit malai lu mu ga shi a tsawra myit hte shaw shaga ai hpe hkap la na malai, n kaja ai apu asi si nna, tsabyi chyahkri rai nga ai rai dum myit, law hpa myit hte n ju n dawng ai myit ni sha shanhte kaw nga nga ma ai.

N’hkru n’shawp ni tsibyi sun shap ai ga shadawn tsun ai shaloi, ndai laban hta hti ang ai chyum mungga daw langai hpe Yesu Madu myit dum nga na re. Ndai ga shadawn hpe madat la ai Yuda masha ni hte dum hprang ai ni yawng hpe Myihtoi Isiah a mahkawn hpe Yesu Madu madi nna tsun ai hpe chye na ma ai.

Myihtoi Isiah a mahkawn mangwi hte Yesu Madu a ga shadawn n bung pre ai zawn raitim, madat ai ni a matu jahtum hta dan len nga ai. (1) Lamu ga madu gaw Karai Kasang rai nga ai. (2) Tsabyi sun wang gaw Karai Kasang a ja/sumsing mungdan rai nga ai. (3) Sun wang shap ai ni gaw Israel myusha ni, grau nna, shanhte a ningbaw ningla ni hpe tsun ai rai nga ai. (4) Tsabyi sun wang de shangun dat hkrum ai ni gaw Myihtoi ni rai nga ai; Myihtoi ni yawng gaw tinang myusha ni a zingri zingrat sat kau ai hpe hkrum sha ma ai. (5) Tsabyi sun shap ai ni sat kau ai tsabyi sun madu a kasha gaw Yesu madu nan rai nga ai.

Ndai ga shadawn hpe madat na la ai shaloi, Yesu Madu a hkam sha lam hpe sawn dinglik la lu nga ai. Tsabyi sun madu a kasha hpe sat kau na lam tsun ai hta, ndai mabyin hte maren, kade nna yang Yesu Madu hkam la ra na si hkam ra na lam hpe chye na na ga ai.

Ndai ga shadawn hpe San Mahte, San Marku hte San Luka kabu gara shiga laika masum hta ka da ai hpe mu lu ga ai. Ga shadawn hpe madat na la ai Yuda ningbaw ningla ni atsawm sha chye na la ma ai lam dan dawng nga ai. “Nanhte a mare gaw jahten kau ai hkrum na ra ai; dai mare gaw Yerusalem mare nan rai nga ai” ngu  Yesu Madu tsun ai shaloi, Yuda ningbaw ningla ni “ndai ga n’ten u ga; n byin u ga!” ngu marawn jahtau ma ai, (Lk 20:16).

Karai Kasang a myit galu kaba hkam sharang ai hpe, Shi a shangun ma, Myihtoi ni langai hpang langai shangun dat ya ai lam a marang e shadan shadawng da nga ai. Lamu ga madu shangun ma n’nga mat sai majaw, hpang jahtum shi a kasha shingtai hpe shangun ra ai lam hpe tsun ai zawn rai nga ai. Yuda myusha ni a sadi run ai a majaw, shanhte a lata kaw nna, sumsing mungdan hpe bai dawm la kau ya ai; apu asi si hkra lajang ya ai ni a lata de ap ya na madang de du mat ai. Karai Kasang ningnan bai lata ai masha gaw Yuda myusha n’re ai ni hta na rai mat ai, (Mt 21:43).

Dai ni na nhtoi ni hta magam gun taw nga ai anhte ni gaw tsabyi sun ngu ai Karai Kasang a ja mungdan hpe shap da ai ni rai ga ai. Sumsing mungdan gaw anhte a masin salum hte hpunau shada tsawra ai masin salum rai nna, apu asi si na gaw anhte a lit magam rai nga ai.

Karai Kasang a ja mungdan hta anhte ni magam gun na matu, hkum ting dep rai tim, wuhpung wuhpawng hte rai tim, lit shatsam da hkrum saga ai. Kun dinghku nta masha langai mi hku apu asi si shangun na lit anhte hta nga ga ai. Dai zawn n’rai yang, Yesu Madu a ga shadawn hte maren anhte ni kaw na mung sumsing mungdan hpe bai dawm la kau ya na teng sha rai nga ai.

Anhte marai hkum shagu gaw, tinang a masin salum hta Wenyi e shadut ya ai hte maren, Yesu Madu ap jaw ai magam hpe gun hpai na lit nga ga ai rai nna, dai masin salum hpe sadi sahka let baw bang myit maju jung nga na ra ga ai.

Hta sha n ga, anhte hpe kam hpa ai nau na ni a masin salum hpe mung myit shang sha ra ga ai. Dai nau na ni a masin salum mung gaw, Karai Kasang anhte hpe shap ya da ai rai nga ai. Anhte Hkristan kun dinghku gaw mungkan n-tsa hta Karai Kasang gaw de da ai sumsing mungdan a adaw achyan ni rai ga ai. Dai majaw, mungkan ntsa hta mung, anhte galaw ra ai magam hpe ap da hkrum saga ai hte maren, hkauna pa hta mam ni myin tsawm nga hkra gaw anhte a lit magam nan rai saga ai.

Nsi naisi pu si myin tsawm awng ai a lachyum hpe anhte ni chye ga ai. Ja Chyum Mungga hte maren, shani shagu, sak hkrung nga pra lu na matu, Karai Kasang a shawang tsawra myit hta tinang hkum hpe ap tawn da nna hkawm sa ai a marang e hkam la lu ai chyeju rai nga ai. Dai chyeju hpe hkam la lu na matu gaw, masha hkum shagu shakut shaja ra ai rai nna, tinang a makau grupyin na nau na ni hpe mung dai zawn shakut shaja lu na matu garum shingtau ya ra ga ai.

Tinang hkum tinang bai san la ga. “Lai wa sai aten ni hta, ngai kaning re apu asi hpe pu si da lu sai kun?; ya ten hta gaw, kaning re apu asi hpe pu si shangun taw ai kun? Karai Kasang hpe tsawra ai; htingbu wa hpe tsawra ai ngu ai dwi sau ai apu asi hpe pu si shaga ai kun? Shing n rai, tingkyen myit kaba ai; shut mara amyu myu hta hkawm sa ai, (hkri jap hkup) ai apu asi ni hpe sha pu si nga ga ai kun?

Anhte ni gaw Yuda masha ni hta kam maka grau kaja ga ai. Anhte ni gaw, san san re ai tsabyi ru ni n rai ga ai. Anhte ni gaw, Hkristu Madu ngu ai teng man ai tsabyi ru madung hta na lakung lakyin ni rai nga ai, (Yawhan 15:1).

Yesu Madu hte rau n rai jang, shi hte hka mat jang, kade daram hkrit tsang ra ai dingbai dingna hkrum ra na hpe sadi jaw da ai. Yawhan 15:5 hta, “Ngai gaw sabyi ru madung rai nga nngai, nanhte gaw lakung lakying ni rai nga myit dai. Kadai rai tim mung, ngai hta noi nga nna ngai mung dai wa hta noi nga ai rai yang gaw, dai wa gaw asi law law si wa lu ai; hpa majaw nga yang, ngai hte hka jang, nanhte hpa mung n galaw lu myit dai,” ngu tsun shadum da ai.

Anhte hta hkrit tsang na lam hpa n nga ai. “Hpa lam hta mung myit hkum ru hkum tsang nga myit; lam shagu hta akyu hpyi nna tawng ban ai hte chyeju dum ai myit masin hte shakawn kungdawn let nanhte a ra mara hpe Karai Kasang kaw shana ya mu. Shaloi masha a chye chyang ai nyan hta grau lai ai Karai Kasang a ngwi pyaw ai gaw nanhte a kraw lawang ni hte myit masin ni hpe Hkristu Yesu hta e bau sin na ra ai,” (Hpilipi 4:6-7).

Karai Kasang jaw ya sai tsawra myit a matu shi hpe chyeju dum let, ra mara chyeju ni hpe bai hpyi ai gaw anhte shinggyim masha ni a sak prat hta pu si myin tsawm awng ai hpe hkam la lu na ladat nan rai nga ai.

Akyu hpyi saga

Wa Karai Kasang e, Nang madu a tsawra myit hpe myit dum let chyeju dum chyeju htang, chyeju hkam la chye ai kashu kasha ni tai hkra anhte hpe lam woi la rit. Anhte a Madu Hkrsitu a marang e, hpyi nem nga ga ai. Amen.

 

Hkristu hta tsaw ra ai kanu kawa tara hkaw sara/num ni hte nu wa hpu nau ni e, ndai laban gaw pranwan ladaw hta (27) ngu na laban rai nga ai.

Hti ang ai Ja Chyum Mungga ni gaw

  • Chyum Mungga Daw (1) Isaia 5:1-7
  • Chyum Mungga Daw (2) Philipi 4:6-9
  • Kabu Gara Shiga Mahte 21:33-43

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.

 

Add new comment

4 + 3 =