Karai Kasang A Mungga (Pran Wan 29, 2019 Mission Sunday)

Chyum Laika ni

Prumat wa ai laika 17: 8-13;        2 Timoti 3:14-4:2;      Luka 18: 1-8

Tsawra ai nu wa hpunau ni hpawt ni na laban gaw Mission Sunday ngu ai sasana laban re.

Makam masham ngu ai gaw manu dan ai chyeju kum hpa kaba langai rai nga ai majaw dai hpe gam garan jaw ai, shachyam shabra ai ngu ai sasana magam mung grai nan ahkyak nga ai. Karai Kasang hpe tsawra chye wa lu na matu anhte a myi ni hpe hpaw ya ai mung ndai makam masham rai nga ai. Dai makam masham ngu ai hpe anhte hkap la sak hkrung na ra ga ai. Lachyum gaw, Karai Kasang a shadawn ndang ai tsawra myit hpe chyeju dum nga let dai tsawra ai tha sak hkrung nga lu hkra anhte hkum nan shakut ra ga ai, ngu ai lam rai nga ai. Makam masham ngu ai gaw chyeju kum hpa re, raitimung, masha nkau mi a matu chyu sha san da ai lam nrai, shawang tsawra myit kaba the yawng hpe jaw ya ai kum hpa rai themasha kaga ni mung dai nam chyim hpe hkam sha lu wa hkra gam garan ya ai lam galaw na ra ga ai. “Ndai makam masham chyeju kum hpa hpe tianng a matu hkrai zing da kau ai rai yang, anhte gaw kashu kasha nshaprat ai mau dung num zawn tai nna hkam nkaja ai hkristan masha ni tai nga na rai ga ai” nga nna Wa Sarabyin Francis tsun shadum ai lam mung nga nga ai. Kabu gara ai shiga hpe shachyam shabra ai ngu ai lam hte hkristan prat ngu ai hpe garan ging hka da mung nmai nga ga ai. Hkristian uhpung uhpawng shagu gaw, madu Yesu hpe garai nchye shi ai ni chye wa lu hkra kabu gara ai shiga hpe ding run shachyam shabra ai lam galaw nga ra na rai ga ai.

Sasana galaw ai, kabu gara ai shiga hpe shachyam shabra ai ngu ai hta, lamu ga shara madin ni hpe lai di nna grai grai tsan ai shara buga ni de kabu gara ai shiga du chyam bra wa na matu galaw ai lam chyu nrai, shing gyim masha ni a masin salum kata shing gyim masha ni a htung hkying, lai htung masa kata ni de Madu Yesu a kabu gara ai shiga du shang wa lu hkra galaw ai lam ni mung lawm nga ai. Kaga shara de pru hkawm nna kabu gara ai shiga hpe shachyam shabra ai lam ni galaw ai lam ni hpe garai ntsun shi yang, “Kashin kamum hkam la sai hkristain ni ma hkra tinang nga ai saradaw ginwang, jau ginwang, mare buga ni hta, anhte a mai kaja ai nga sat nga sa kasi akji ni hte sak hkrung nga sa ai hku nna Madu Yesu a lam hpe shadan shaleng ya ai hku nna kabu gara ai shiga hpe shachyam shabra na lit, anhte yawng hta nga nga ai,” nga nna 2 ngu na Vatican zup hpawng matsun hta mung matsun da ai lam nga nga mali ai.

Dai re ai majaw, Kasa laika 1:8, kasa ni hpe matsun dat ai Madu Yesu a mungga hta,  “nanhte gaw Jerusalem mare hte Yuda mung ting, Samari mung hte lamu ga htum hkra, nye a sakse ni tai na marin dai” nga nna matsun dat ai lam gaw, anhte hpe nan matsun dat ai mungga re ngu yin la nna, hkan shatut nga na matu anhte hkristan masha ni yawng hta lit nga nga ai. Ndai mung ga hpe hkristan prat a ahkyak kri madung shatai da nna sak hkrung hkawm sa nga let kaba gara ai shiga hpe htawn shana ai masha ni tai nga na matu saw shaga da hkrum ai ni anhte rai ga ai.

Saradaw ni, anhte jau ni, mung bawng salang ni, nawku hpung hte sen ai uhpung uhpang shagu na lit nga ai ni, bai hpung masha masha hkum ding dek, anhte yawng hta sasana myit rawng ra ga ai, kabu gara ai shiga gat hkai na sharawng ai myit rawng ra ga ai. Sasana magam hte seng nna masing masa jahkrat ai nawku hpung a magam lam ni hta m ung shawng lawm ra ga ai. Sasana magam bungli, nawku hpung a amu gun hpai na, Jau ma ma, Brother, tara hkaw sara/sarama ni hpe shapan shalat ai, hkrang jaw ya ai lit magam ni hpe lit la  gun hpai nga ai ni hku nna mung, jau ma ma, Brother, tarahkaw sara/sarama ni tai wa na ni hpe sasana myit rawng wa hkra shapan shalat hkrang jaw ya ai lam ni galaw ya ra ai ngu ai lam hpe atsawm sha myit shalawm ra na rai ga ai. Anhte a bungli masing ni hta ndai kabu gara shiga hpe shachyam shabra na, Madu Yesu hpe sake hkam na ngu ai lam ni nshalawm lu ding sa gaw anhte hpe Madu shatsam dat ai magam bungli ni hpe gun hpai ai lam hta kangka hkum tsup sai ngu nna anhte kadai ntsun lu na rai nga ga ai.

Tsawra ai nu wa hp unau ni, Kabu gara ai shiga shachyam shabra ai ngu ai magam bungli hta ding bai ding na ngu ai lam ni mung law lawa hkrum lu mai ai. Kabu gara ai shiga hkaw tsun ai lam ni hta sharawng awng ai lam ni, kabu gara ai lam ni, myit n-gun marai ni, myit mada shara ni nnga ai zawn nga hka sha ai aten ni mung anhte hta nga mai ai. Kalang lang gaw manang ni a ahkaw ahkang hpe htim kashun la ya ai lam ni tai mat na kun ngu myit nna, kabu gara ai shiga tsun shabra na, gat hkai na myit tsang ai lam ni mung nga chye ga ai.

Wa sarabyin Pawlu VI a Evangelii Nuntiadi ngu ai matsun laika hta “kaga hpu nau ni a myit masin kata de lama ma hpe atik anang anyin bang ya ai lam gaw shut ai lam byin tai lu ai, raitimung, shanhte a ahkaw ahkang hpe hkungga manu shadan ya ai myit masa ni hte Madu Yesu a kabu gara ai shiga lam ni, hkye hkrang la ai lam ni hpe shanhte hkap la wa lu hkra tsun sang lang tang madun ai lam ni galaw ai gaw shanhte a ahkaw ahkang hpe tawt lai ya ai lam ntai lu na re,” nga nna matsun sharin da ai lam nga  nga ai. Dai re ai majaw, Madu Yesu hpe masha ni chye wa lu hkra galaw ai lam ni hta magrau grang ai myit ni nga ra ai zawn kabu gara ai myit ni hte galaw lu na matu mung anhte shakut ra ga ai.

Anhte kaw Madu Yesu du sa ai gaw hkye hkrang la ai de du wa lu la lam hpe madun ya na matu rai nga ai. Dai magam bungli hpe, mungkan htum hkra matut galaw nga na matu anhte hpe lit jaw da ai rai nga ai. “Kabu gara ai shiga shachyam shabra ai bungli ngu ai gaw, ya anhte a prat hta ya ya jang hkyak hkyak galaw gun hpai ra ai magam lit rai nga ai. Ndai magam lit hpe nawku hpung kata kaw nna gun hpai ra na re” ng anna Wa sarabyi Francis tsun shadum da ai lam mung nga nga ai. Sasana magam bungli hpe nawku kata kaw nga nna galaw ra ai, ngu ai lam hte seng nna  Wa sarabyin Francis matut sang lang da ai hta, “nawku hpung ngu ai nlawm ai sha madu Yesu a kabu gara ai shiga hpe shachyam shabra lam kadai n-galaw mai na rai nga ai. Bai, Kabu gara shiga shachyam shabra ai ngu ai magam bungli gaw ting kyeng hte seng ai magam bungli nrai nga ai. Ndai gaw nawku hpung hte seng ai magam bungli rai nga ai. Ndai lam ni a majaw, Kabu gara ai shiga shachyam shabra nga ai wa gaw shi hkra nrai, shi a hpang hta chyoi pra ai wenyi e lam woi nna kahkyin da ai nawku hpung ngu ai nga nga ai, nawku hpung shi a hpang e nga nga ai ngu ai lam gaw shi galaw nga ai magam a matu n-gun atsam tai ya nga ai,” nga nna wa sarabyin Francis shadum sharin da nga ai.   

Ya dai ni na prat hta, prat dep matut mahkai lam ni hte hkawm wa hkawm sa galaw nga ma ai majaw, shara langai kaw nna langai de thinggaw nawng nawng htawt nawt sit nga hkawm ai ni mung law law nga nga ma ai. Ndai lam ni a majaw, sasana magam ni hta grau grau yak hkak ai lam ni mung nga nga mali ai. Ga shadawn, jau gin wang kata hta kadai ni gaw ding run nga nga ai ni rai nna kadai ni gaw chya hkring chya hkra sa nga ai ni rai ma ai kun, ngu ai lam ni hpe ginhka chye lu na grau yak wa ai lam ni mung nga nga ai. Ndai zawn rai htawt nawt nga hkawm  ai lam ni, htung hkying makam masham nbung ai ni kayau kaya htawt gayau nga hkawm wa ai mabyin ni a majaw, kashim kamun hkam la da sai ni nkau mi mung tinang a makam masham hpe nhkan sa mat wa ai zawn re ai lam ni mung nga wa ai hte makam masham hpe bai jasu ya ai lam ni mung galaw ra wa nga ga ai rai nga ai. 

Bai, dai ni anhte, sut masa mang hkang, ja gum hpraw mang hkang, malu masha hte kaga shing ra tara hte seng ai mang hakng zawn re ai lam ni law law nga nga ai a lapran sak hkrung nga ga ai. Dai hta grau nna shing gyim masha shada manu shadan hkat ai lam ni hte seng nna mung langai hte langai nbung ai masa ni hte shing gyim prat a jet ai lachyum ni hpe shamat kau mat wa ai masa zawn re ai prat masa aten hta, anhte sak hkrung nga ga ai. Ndai lam ni a majaw, sim sa ai hte rau jawm nga lu na ngu ai lam ni mung grau grau yak wa ai masa, galoi mung shim nlum ai zawn re ai masa zawn re ai ni mung nga wa ai rai nga ai. Ndai zawn rai ai yak hkak ai masa hta myit mada shara, shada mahku mara lam, sim sa ai hte rau jawm hpawng lu na lam ni ngu ai Madu Yesu a kabu gara ai shiga hpe nden marai hte hkaw tsun lu na matu mung ahkyak nga mali ai. Kabu gara ai shiga hpe sakse hkam ai hku nna makam masham e jaw ya ai myit mada shara hpe, mungkan ga hpe anhte jaw ya lu hkra jawm shakut ra ga ai.

Tinang a makam masham a majaw ru yak jam jau hkrum, zingri zingrat hkrum sha nga ra ai mungkan jut shara shagu na hpu nau ni hpe mung anhte myit dum ra ga ai. Shanhte gaw magrau grang ai hte kabu gara ai shiga hpe sakse hkam  nga ai anhte a hpu nau ni rai nga ma ai. Wa sarabyin Francis tsun yu ai “Dai ni na prat hta, tara a matu zing ri zing rat hkrum, sat kau hkrum ai ni, lai wa sai ten na tara sakse ni hta grau nna law nga ai” ng anna, tara a matu zingri zingrat hkrum nga ai hp unau ni law law nga nga ai lam hpe namalat kau na matu Wa sarabyin anhhte hpe chyahkring hkring shadum ai lam mung nga nga ai.  Shanhte a matu mung akyu hpyi ya ra ga ai. “Dakring dakan rai nga mu, ngai gaw mung kan ga hpe dang kau na ni ai” nga ai Madu Yesu a mungga hpe myit dum n gun la let, yu ai yak ai lam ni law law a lapran Kabu gara ai shiga hpe n gup aga hte mung, mai kaja ai Hkristian nga sat nga sa kaja madun nga sa ai hku nna mung, shachyam shabra gat hkai nga lu hkra matut nna shakut nga ga law.

Akyu hpyi saga: Wa Karai Kasang e masha yawng hkye hkrang la ai de du wa lu na hpe nang ra sharawng nga ndai, na a magam yi ngam de amu galaw na masha ni hpe shangun dat ya rit, shing rai  masha amyu baw shagu hpe kaba gara ai shiga anhte hkaw dan lu u ga garum ya rit, anhte a madu hkritu a marang e hpyi nem nga ga ai.

Wajau Bernard Dashi Tang Ji