Karai Kasang A Mungga - Paska Ladaw 2, 2021

 Hkristu hta tsaw ra ai nu wa hpu nau ni e, ndai laban gaw 2 ngu na Paska ladaw laban rai nga ai.

 

Anhte ni Paska poi hpe matut manoi galaw nga ga ai. Paska poi a kabu pyaw ai lam anhte a masin salum hta manu dan dik sut gan zawn zing da na matu Nawku Hpung anhte hpe saw shaga nga ai.

 

Hkristu Madu a bai hkrung rawt ai lam gaw shinggyim masha ni yak hkak jam jau ai lam a matu pahkam hkam ya ai lam jaw ya ai.

 

Ndai laban hte hpang na laban bat ni a chyum mungga daw lahkawng gaw San Yawhan a shagun laika lahkawng hta na shaw la ai rai nga ai. Kasa laika gaw Wenyi yu hkrat wa ai hpang Kasa ni gaw de da ai Hkristan wuhpawng masha ni a lam ka da ai rai nna, Yawhan a shagun laika lahkawng gaw Yesu bai hkrung rawt ai hpang shaning 60 ning hta Hkristan masha ni hpe hpaji jaw shadum da ai laika rai nga ai. Hkristan makam a majaw Hkristan masha ni zingri zingrat kaba hkrum lai wa ma ai.

 

Kabu Gara Shiga gaw bat hte bat bung ai kabu gara shiga hpe kahtap kahtap nna tsun dan nga ai. Dai gaw Hkristu Madu Kawa Karai Kasang hpang bai htang wa ai raitim, Kasa ni hte Hkristan ni a lapran hta arau nga nga ai lam pahkam hkam ai ga rai nga ai.

 

Dai majaw laban shani na chyum mungga ni hpe hti sumru ai a marang e, shinggyim hpan myu masum hpe garan ginhka chye lu ai. (1) Kasa ni a lam, (2) Kasa ni a ntsa Chyoi Pra ai wenyi yu hkrat wa nna law htam wa ai Hkristan masha ni a lam hte, (3) Hkristu bai hkrung rawt ai hpang shaning 60 hta Yawhan a woi awn ai npu hta nga taw ai Hkristan ni ngu garan nna chye lu ga ai.

Anhte gaw mali ngu na Hkristan masha ni rai ga ai. Anhte gaw ndai mungkan ga hta naw nga ai aten hta shawng na Kasa ni zawn Hkristu madu a hkum hkrang hpe hkrak n mu lu ga ai.

 

Raitim, anhte ni gaw shawng na Hkristan ni hpe manawn masham ai lam n nga ga ai. Bai hkrung rawt sai Hkristu gaw shawng na Hkristan ni hte arau nga nga ai zawn anhte a lapran hta mung anga nga ai lam shanhte a kabu gara shiga ni a marang e anhte hpe n gun jaw ya nga ai.

 

Nawku daw jau na matu hpawng de nga ai Hkristan ni yawng hpe bai hkrung rawt sai Hkristu Madu gaw Kasa ni hpe jaw da ai chyeju kumhpa hpe matut jaw ya nga ai.

 

Yesu Madu Kasa ni hpe simsa lam jaw ya ai. Bai hkrung rawt ai hpang Kasa ni hte hkrum ai shaloi shawng nnan tsun ai ga gaw “Ngwi pyaw ai gaw nanhte hte rau anga nga u ga,” ngu ai rai nga ai (Yh 20:19).

 

Yesu Madu jai lang ai ga “Shalom” ngu ai gaw “Simsa Lam” ngu ai lachyum rai nga ai. Kaja wa nga yang “shalom” ai gaw “simsa lam” ngu ai hta lachyum grau sung ai gaw rai nga ai. “Shalom” ngu ai simsa lam hta yawng hkyawm nna lawm ai rai nga ai.

 

Jau ni akyu hpyi woi shagu hte Kabu Gara Shiga Chyum laika hti mungga htawn shagu “ngwi pyaw simsa ai lam gaw nanhte hte rau nga nga u ga” ngu shakram ai. Dai gaw Madu Yesu a ga nan rai nga ai. Raitim, anhte a shakram ai lam hpe Madu Yesu hkum nan shakram ai hte hkrak shabung la gaw n mai nga ai.

 

Anhte a shakram ai lam gaw shakram hkrum ai ni hpe kaja shangun mayu ai majaw, shing n rai, akyu hpyi ya ai lam rai nga ai. Yesu Madu gaw “shalom” simsa ai lam hpe nan byin shangun na matu jaw ya ai rai nga ai.

 

Lani mi Kasa ni Yesu hte rau Generzareth hka nawng hpe hkali hte lai rap wa ma ai. Yesu Madu dai shani tup hkaw tsun ai lam ni galaw ai majaw pu ba nna hkali hta yup pyaw taw nga ai. Dai shaloi nbung laru kaba wa nna hkaleng hta wa ai majaw Yesu a Kasa ni hkrit tsang nga ma ai rai nna Yesu hpe “Sara e,anhte si wa hkyen nga ai hpe nang hpa n nawn nga n ni?” ngu tsun ma ai. Yesu Madu rawt tsap nna nbung hpe “Atsin sim rai nga u,” ngu nna hkang dat jang dai nbung num mat wa nna dai yang e akatsi sha rai mat wa ai ngu chyum laika hta rawng nga ai (Mk 4:35-39).

 

Dai zawn sha Yesu Madu Kasa ni hpe “Nanhte hta ngwi pyaw ai gaw anga nga u ga!” ngu tsun ai shaloi shanhte a masin salum hta simsa ai hpe hkam sha ma ai. Hkrit tsang ai lam ni hkoi mat ai. Dang rang hkat nna ga rawng rawng ai lam ni hkrin mat ai. Shanhte ni ngwi pyaw simsa lam hpe hpring tup hkam la lu ma ai. Kalang pyi n hkam sha yu ai ngwi pyaw simsa lam rai nga ai. “Sape ni mung Madu hpe mu lu nna nawku ma ai rai nna ngwi pyaw kabu gara ma ai” (Yh 20:20).

 

Masha hkum shagu, kun dinghku shagu, wuhpung wuhpawng shagu Hkristu hpe kamhpa kam shamyet let nawku ai rai yang ngwi pyaw simsa kahkyin gumdin lam hpe lu la na rai nga ai. Dai lam ni n nga ai ni gaw Hkristu hpe kau da ai majaw rai nga ai.

 

Yesu Madu Kasa ni hpe Wenyi jaw bang ya lai wa sai. Dai wenyi hta kaga chyeju kumhpa ni yawng lawm nga ai. Wenyi hpe jaw bang ya ai ngu ai hta san na lam langai gaw Kasa ni hpe Yesu Madu bai hkrung rawt ai shaloi jaw ai rai kun, shing n rai, Chyoi Pya Ai Wenyi yu hkat wa ai shaloi rai kun?

 

Mahtai gaw Yesu Madu Kasa ni hpe Shi bai hkrung rawt ai nhtoi hte Wenyi yu hkrat wa ai shani lahkawng ni hta jaw bang ya ai rai nga ai. Shanhte hta htani htana asak hpe mung jaw bang ya ai. Anhte ni yawng hpe mung dai wenyi hte asak hpe jaw bang ya nga ai.

 

Anhte kashin kamun hkam ai shani kaw nna n-gun shaja sakramentu hkam la ai shani du hkra shut hpyit mara raw ya ai sakramentu hkam nna, shut hpyit ai lam nnga ai  sha chyeju nga nga ai rai yang Wenyi hpe jaw bang ya ai.

 

Dai gaw hpun kaw nna hpun lakung lakying alap apu asi ni de du wa ai zawn Kawa Karai Kasang kaw nna Kasha Yesu Madu, bai, Yesu Madu kaw nna anhte hta matut manoi ru bang ya nga ai (Yh 5:1-6).

 

Yesu Madu Kasa ni hkan shatup na lit magam langai hpe shatsam da ai.

 

Dai gaw “Kawa Karai Kasang ngai hpe shangun dat ai zawn, nanhte hpe mung ngai shangun dat we ai,” ngu ai rai nga ai. Ndang gun ai lit gun shangun ai hku n re ai. Grai nan manu dan dik ai kumhpa langai hpe jaw ai she rai nga ai. Dai shangun dat hkrum ai ni hta Shi hkum nan mung lawm nga ai.

 

Yesu Madu gaw Sape ni hte sha arau nga ai n re. Hkristan ni yawng hte mung ni htep dik ai hku nga nga ai gaw mau hpa kaba nan rai nga ai. Anhte ni yawng gaw makau grupyin masha ni hpe kabu gara shiga hkaw tsun nna hkyehkrang hkrum lu na matu saw shaga hkrum ai rai ga ai.

 

Anhte a magam hpe gun hpai ai gaw Karai Kasang hpe hkap la ai, lam madun ai ngu na hta, ap nawng daw jau ai hta shang lawm lu ai majaw Madu hpe chyeju shakawn ra ga ai.

 

Hpu nau ni hkyehkrang la hkrum lu na matu garum shingtau ya ai gaw anhte ni a sak prat hta kabu pyaw lam a npawt rai nga ai.

 

Yesu Madu Kasa ni hpe mara dat hkyam sa ya lu ai ahkaw ahkang jaw da ai.

 

Yesu Madu gaw shinggyim lam hpe shinggyim masha ni hta, grau chye na ai wa rai nga ai. Shinggyim masha ni a gawng kya ai hte mara a majaw myit masin hta n sim n sa n ru n ra byin taw nga ai hpe Yesu chye ai. Mara a majaw simsa lam n nga wa ai, kabu pyaw lam ni n nga wa ai, wenyi lam hta jahten hkrum wa ai. Hkristu Madu anhte hpe ap jaw da ai lit magam ni hpe gun hpai na matu dingbai dingna byin shangun wa ai.

 

N-gun kaba ai hpyen hpe gasat dang kau lu na matu n-gun kaba ai laknak ni ra ai. Yesu Madu dai laknak Nawku hpung hpe Kasa ni hku nna ap jaw da ai. Dai gaw myit galu kaba ai hte mara dat hkyam sa ya lu ai ahkaw ahkang rai nga ai. Mungkan shinggyim masha wan kaba hte re ai anhte ni gaw mara a majaw hkrat sum mat ai ngwi pyaw simsa lam hpe bai lu la ga ai.

 

Kabu Gara Shiga hte maren, hpyen wa hpe mara dat akyu hpyi ya na matu Yesu Madu Kasa ni hpe hkang da ai. N kaja ai lam hpe si mani ai ladat hte kaja ai hku bai nhtang na matu numhtet ga atsawm sha jaw da ai (Mt 5:44; Lk 23:24).

 

Shinggyim masha ni mara dat ya na matu hpang hkrat chye ma ai hte matai htang myit kaba ai lam hpe Yesu Madu atsawm sha chye na da ai. Yesu Madu Kasa ni hpe wenyi jaw bang ya nna mara dat hkyamsa na ahkaw ahkang jaw ya ai zawn anhte hpe mung wenyi jaw bang ya nna hkrat sum mat ai lam ni hpe yin la mara dat ya na ahkaw ahkang jaw da ya ai. Mara dat hkyamsa lam gaw anhte hta nga ai wenyi a apu asi ni rai nga ai.

 

Hkristan ni a ngwi pyaw simsa lam a npawt madung masum hpe chyum mungga daw langai hte lahkawng hta tsun da ai hte maren Nawku Hpung masha wuhpung lahkawng a lam tsun dan let shadan shaleng da nga ai. (1) Wenyi yu hkrat wa ai poi ngut ai hpang Yerusalem kaw shanu nga ai Hkristan masha ni hte (2) Shaning (60) ning na aten hta sak sum wa mahka Kasa Yawhan woi awn ai Hkristan masha ni rai ma ai. Chyum laika lahkawng yan hta manu daw dan n lu ai Kabu Gara Shiga rawng nga ai.

 

Ngwi pyaw simsa lam gaw Hkristan nawku hpung hpe ka-up da ai rai nna, shanhte ni ndai npawt madung masum hpe manu shadan hkung ga lara di ma ai. (1) Yesu Madu a tara hte maren shada da tsawra ai, (2) Garum shingtau la ai, grau nna, ra ahkyak nga ai ni hpe garum ya ai, (3) Kahkyin gumdin ai. Ndai masum gaw Madu Yesu hkang da ai ngwi pyaw simsa lam hpe jaw ya ai npawt madung ni rai nga ai.

 

“Hpa majaw nga yang Karai Kasang a kashu kasha shagu gaw dai mungkan ga hpe dang kau lu nga ai. Mungkan ga hpe anhte padang dip lu ai lam gaw anhte a makam masham a majaw rai nga mali ai,” (1Yh 5:4).

 

“Nye a kandang hpai loi ai hte, nye a lit mung tsang nga li ai,” (Mt 11:30).

 

Mahte 22:34-40 hpe hti sumru yang, Yesu Madu Karai Kasang a tara ni yawng hpe Madu Karai hte ni htep ai ni hpe tsawra u ngu ai ga hkaw lahkawng hte ginchyum dat da ai. Raitim, Shi nsa hti mahka hta dai ga hkaw lahkawng hpe langai sha bai galaw da ai. “Nanhte hpe ngai tsawra made ai zawn, nanhte shada da tsawra nga mu,” (Yh 13:34).

 

Kahkyin gumding lam n nga ai rai yang tsawra myit mung n nga lu ai. Kadai gara wuhpung wuhpawng mi rai rai, ningdang kalang hkat ai lam nga na sha rai nga ai. Dai re majaw anhte lapran tsan gang hkat shangun ai lam ni hpe lawan dik ai hku sharai shatsawm shani la ra ga ai. Ginlum kahkyin gumdin lam hte shada tsawra ai lam gaw Hkristan wuhpung wuhpang masha shagu hpe ngwipyaw simsa ai lam jaw ya ai.

 

“Ngai hpe n mu lu ai sha kam sham ai ni gaw a lu ma ai,” (Yh 20:29). Yesu Madu anhte hpe a lu ai ni ngu tsun hkrum ga ai rai yang anhte ni kaja wa sha tengman ai kabu pyaw lam lu na ga ai.

 

Akyu hpyi saga

Wa Karai Kasang e, Yesu Madu a tara hte maren anhte shada da tsawra, garum shingtau hkat let kahkyin gumdin nga lu na matu lam woi ya nna dai lam hta hkawm sa ai a marang e Madu Yesu ga sadi jaw da ai ngwi pyaw simsa lam hpe hkam la lu ai chyeju jaw ya rit. Anhte a Madu Hkristu a marang e hpyi nem nga ga ai.  Amen

.

Hkristu hta hkung ga tsaw ra ai Tara hkaw sara/num ni hte nu wa hpu nau ni e, ndai laban gaw Paska ladaw hta 2 ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) Kasa 4:32-35

Chyum Mungga Daw (2) 1Yh 5:1-6

Kabu Gara Shiga Yh 21:19-31

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.