Karai Kasang A Mungga - Lu Sha Gam Ladaw Laban 4, 2021

 Hkristu hta tsaw ra ai nu wa hpu nau ni e, ndai laban gaw Lu Sha Gam Ladaw hta (4) ngu na laban rai nga ai. Karai Kasang a kaba la ai tsaw ra myit Anhte a shut hpyit mara a majaw Yesu Madu nni nkri hkam si hkam ra ai gaw myit npyaw hpa kaba rai nga ai.

 

Rai tim, Nawku Hpung gaw ndai lu sha gam ladaw laban 4 ngu na hta “kabu gara nga mu! Hpa majaw nga yang Karai Kasang anhte yawng hpe tsaw ra ai majaw rai nga ai.” Karai Kasang ngai hpe tsaw ra ai. Galati 2:20 “Dai Kasa ngai hpe tsaw ra ai majaw ngai a matu shi a asak hpe jaw kau nu ai.”

Karai Kasang gaw Israel myu sha ni hpe tsaw ra ai.

 

Ndai Laban na chyum mungga daw langai (1) gaw Hkawhkam laika hta na rai nga ai. Ndai chyum laika hpe Yesu Madu n shangai shi yang 250 ram hta ka da ai rai nga ai. Israel myu sha ni a labau hpe ka da ai rai nga ai. Kadai ka da ai gaw hkrak n chye ai rai tim, mabyin masa lam hte ji woi ji wa ni a labau hta na manu dan ai kasi kamang ni hpe hkam la lu na matu ka da ai rai nga ai.

 

Karai kasang gaw Israel myu sha ni a labau ting hta shanhte hpe kaja wa sha nan tsaw ra matsan dum ai. Ji woi ji wa ni law malawng gaw Karai Kasang hpe ga sadi ndung ma ai hte shi a chyeju hpe chyeju n dum chye ma ai.

 

Ndai laban na chyum laika hpe maram yu ai yang, Israel myu sha ni mayak mahkak lam law law hpe hkrum lai wa ma ai hpe sam maram lu ga ai. Sawk dik ai gaw, Yerusalem hte Nawku Htingnu hten run mat ai lam rai nga ai. Myu sha law law mung tara maigan mungdan de mayam shatai hkrum lai wa ma ai.

Dai zawn byin ai lam gaw Karai Kasang shanhte hpe mara dam jaw ai a majaw gaw n rai nga ai lam hte dai zawn hkrum sha ra ai gaw shanhte ni a yak hkak jam jau lam a matu tsi tsi shamai ai lam she re ai hpe Chyum laika sara tsun dan ai rai nga ai.

 

Karai Kasang gaw shi a myu sha ni hpe galoi mung n kabai kau ai. Tara maigan mungdan de mayam tai mat ai kaw nna shanhte a mungdan, mare buga, dum nta de bai wa shangun nna, mare hte Nawku htingnu ni hpe bai gaw gap ya let shinggyim wuhpung wuhpawng hpe bai gaw gap ya ai.

Shanhte ni a labau hpe sam maram yu ai a marang e, jiwoi jiwa ni a labau nnan hpe tsawm htap ai hku bai gaw de sa wa lu hkra Karai Kasang lajang ya ai hpe Chyum laika sara tsun hkai da ai rai nga ai.

 

Yaweh Karai Kasang gaw jiwoi jiwa ni hpe tsaw ra ai rai nna, shanhte hpe galoi mung matsan dum lanu lahku yu lakawn ai rai nga ai.

 

Tara maigan mungdan hta mayam prat hku nga ra ai aten hta shanhte hpe tsaw ra ai. Yaweh Karai Kasang gaw shi hpe sadi ndung ai ni jiwoi jiwa ni zawn n re ai sha, shanhte hpe galoi mung sadi dung ai Wa rai nga ai.

 

Yesu Madu gaw shinggyim masha hkum shagu hpe Karai Kasang a tsaw ra myit hpe madun na matu mungkan ga de yu sa wa ai rai nga ai. Ga shaka dingsa chyum laika hta Karai Kasang shinggyim masha ni hpe tsaw ra ai lam ka da ai law law rawng nga ai.

 

Shinggyim masha ni chyeju htang n chye ma ai rai tim, Karai Kasang gaw shanhte hpe hkyela na matu masin jahkrat da ai hpe galoi n dawm la kau ai. Israel myu sha ni myit malai lu nna shi hpang de kayin wa shagu ya ju ya hkyen mara dat hkyamsa ya ai.

 

Ndai laban na Kabu Gara Shiga chyum daw gaw Yesu Madu mungkan ga de yu sa ai a marang e Karai Kasang a tsaw ra myit hpe dan len dik htum hku madun dan nga ai. Kawa Karai Kasang gaw shi a kashi shingtai hpe mungkan ga de shangun dat ai a marang e, shi a tsaw ra myit hpe madun dan ai rai nga ai.

 

Yesu Madu mungkan ga de du sa ai shaloi, shi hpe kadai ni chyam dinglik yu ma ai rai? Sara e, nang gaw Karai Kasang a ja mungdan lam hkum hkum tsup tsup anhte hpe sa nna sharin ya ndai. Raiyang, nang Madu shawng de sharin ya ai lam ni hpe laika ga yan langai hte sha hkum tsup hkra tsun lu a ni, ngu kadai tsun lu na rai.

 

Yesu Madu a mahtai gaw dai hte bung nga ai. “Ahkyak dik htum ai ngai a sharin shaga lam ni gaw Kawa Karai Kasang nanhte yawng chye na lu na daram tsaw ra la ai rai nga ai,” ngu Yesu Madu anhte hpe tsun nga ai.

 

Dai lam hte seng nna, ndai laban na chyum laika hta Yesu Madu Necodemus hkrak jaw ai hku tsun da ai. “Kaning rai nme law, Karai Kasang a Kasha hpe kam sham ai ni nlang hte gaw, hten bya n hkrum ai sha htani htana asak lu la mu ga nga, Karai Kasang gaw shi a kasha shingtai hpe jaw kau ai kaw du hkra mungkan ga hpe grai tsaw ra wu ai,” (Yh 3:16).

 

Ndai chyum daw gaw grai nan manu dan ai chyum daw rai nga ai. Nicordimu hpe ndai hku tsun ai rai nga ai. “Nicordimu e, Karai Kasang nang hpe tsaw ra ai ngu ai gaw ningdang n lu ai sakse nga ai hpe chye mayu nni? De a matu sakse gaw ngai rai nga nngai. Abraham gaw Karai Kasang hpe tsaw ra lam madun na matu shi a kasha shingtai Isac hpe hkungga nawng jau maw ai a marang e madun dan lai wa yu ai. Kawa Karai Kasang mung shi a tsaw ra lam hpe madun na matu Kasha shingtai rai nga ai ngai hpe yawng a matu hkungga nawng jau na matu shangun dat ai. Ngai du sa sai re majaw, kadai mung Kawa Karai Kasang a tsaw ra myit hpe myit um-ang shara nnga ra sai.

 

Yesu Madu gaw shi hta ang wa ai hte maren, anhte hpe hkyela na matu wudang ntsa hta si hkam ai a marang e, shi anhte hpe tsaw ra ai lam hpe madun dan nu ai.

 

Nikodimus gaw Moses a tara hte seng a chyum laika kung kyang ai wa langai rai nga ai. Daini na prat hku rai yang shi hpe Karai Hpaji Du kaba ngu shaga mai nga ai. Shi gaw chyum laika hpe nnan, ka-ang, jahtum yawng chye ai rai nna, ta tut hkan shatup chye ai wa rai nga ai. Dai majaw Yesu tsun dan wa ai shaloi mau mat ai rai nga ai.

 

“Moses gaw nam mali e magri mang lapu hpe sharawt da ai zawn, Masha Kasha hta kam sham ai ni nlang hte gaw, htani htana asak lu la hkra, Masha Kasha mung sharawt da ai hkrum na ra ai,” (Yh 3:14-15).

 

Nicordimu chyum laika hte seng nna kung kyang ai re majaw gara chyum daw hpe madi nna tsun ai hpe atsawm sha chye na ai. Dai chyum laika daw gaw Bu Hkawm Laika 21:4-9 hta na hpe tsun ai rai nga ai.

 

Iarael myu sha ni zaibu jang hte nam mali hku hkawm sa ai hkrun lam hta Karai Kasang hpe aput angun nga ma ai. Shaloi lapu ni shanhte hpe achye nna si htum ma wa ma ai. Israel myu sha ni myit malai let Karai Kasang hpe tawngban ma ai majaw Moses hpe magyi lapu galaw shangun nna sharawt da shangun ai. Dai magyi lapu hpe yu ai ni yawng gaw mai tsai wa nna asak bai lu na lam tsun shadum ai hpe kam sham let dai hpe yu ai ni yawng tsi shaman hkam la lu ai lam rai nga ai; asak bai lu la ma ai lam rai nga ai.

 

Moses galaw shachyaw ai magyi lapu hta hpung dagu nnga ai hpe Nicordimu atsawm sha chye na ai. Myit malai lu nna magyi lapu hpe yu ai ni mai tsai wa lu ai gaw dai Moses galaw ai magyi lapu a marang e n re ai sha, Karai Kasang a matsan dum lama ai hpung dagu a marang e she mai tsai wa lu ai lam hpe Nicordimus atsawm sha chye na ai rai nga ai. Dai lam hte seng nna ------16:5 Laika hta sang lang da ai hpe mu lu ga ai.

 

“  “ (pyin nya alinma chyan 16:5).

Nicordimu mau ai lam gaw Yesu Madu magyi lapu hpe lachyum shapraw ai lam rai nga ai. Dai gaw, wudang ntsa sharawt da hkrum ai Messiah Hkyela Madu a lam rai nga ai.

 

“Masha Kasha” ngu Yesu Madu tsun ai lam hpe masha kaba ni atsawm sha chye na na ma ai. “Masha Kasha” ngu ai lachyum gaw “Messaiah” ngu ai lachyum rai nga ai. Shi gaw Yesu Madu hkrum nan rai nna, Israel myu sha ni myit mada lai wa ai Messaiah hkyela madu nan rai nga hpe hpe atsawm sha chye na sai rai nga ai.

 

“Sharawt da hkrum na ra ai” ngu ai lachyum gaw wudang ntsa si hkam ai ngu ai lachyum rai nga ai. Nicordimu hte prat langai kaw sha ngai pra lai wa ai Yuda masha ni Messaiah Hkyela Madu si hkam ra na, wudang ntsa dip shakap nna si hkam ra na ngu ai hpe hkrak n chye na lai wa ma ai. Shanhte myit mada da ai Messaiah gaw asak hkrung nga na, yawng hpe awng dang lu ai wa ngu sha hkam la ma ai.

 

Nicordimus gaw Yesu Madu hpe n gun grai lu ai rai tim, dai aten hta shinggyim masha hpe tsaw ra nna asak sum si hkam ya na ngu ai hpe gaw n chye na lu shi ai rai nga ai. Raitim, gawng ngwi ngwi chye na wa ai rai nna, mawng la hkrum ai zawn Madu Yesu hpe hkap la wa ai rai nga ai.

 

Nicordimus a lam San Yawhan a Kabu Gara Shiga chyum laika hta shara lahkawng kaw mu lu ai. Shawng na lang gaw Yawhan 8:50-52 hta Nicordimus gaw Yuda tara rung hta Yesu hpe n teng n man ai lam hku mara hta, mara shagun ai lam rai nga ai. Lahkawng ngu na lang gaw Yawhan 19:39 hta, Yesu Madu si ai aten rai nga ai. Yesu Madu a hkum tsawp moi mang hpe lu makoi na shawng kaw mura hte achyaw kayau ai manam pyaw ai baw sau joi sumshi mari nna Yawhan hte rau hkan nang ai lam rai nga ai.

 

Dai aten hta Yesu shawng de tsun lai wa sai lam hpe bai myit dum nna Yesu tsun ai kata lam yawng, langai pyi n ngam hkra hkrum tsup ai lam hpe chye na wa ai rai nga ai.

 

Chyoi Pra ai wenyi gaw Yesu Madu hte Karai Kasang e shangun nna Moses galaw ai magyi lapu hte matut manoi nga ai lam Nicordimus hpe asan sha chye na shangun ai. Grai nan matut mahkai nna hkrup re ai shing daw ai lam rai nga ai.

 

Mungkan shinggyim masha shagu gaw wenyi lam hta si taw ai rai yang zaibru jang nam maling kata hta kawa hkrum ai lapu hta grau sawng ai nat sadan a kawa ai hpe hkam ra na teng sha rai nga ai.

 

Yesu Madu gaw wudang ntsa si hkam ai a marang e shinggyim masha ni a mara ni hpe shalawt dat ya ai wa rai nga ai. Shinggyim masha ni a matu dai shalawt dat ai hpe hkam la lu na matu gaw teng man ai myit malai lu na lam hte Madu Karai a matsan dum ai hpe kam hpa na ra ga nga ai.

Yesu Madu gaw Moses galaw ai magyi lapu hta tsi shamai ya ai atsam hta kaba grau ai wa rai nga ai. Shi a si hkam ai lam hte bai hkrung rawt ai lam a marang e myit malai lu ai ni a matu wenyi asak hte mara dat hkyamsa lam hpe jaw ya ai.

 

Hpang jahtum daw sha poi hta Yesu Madu tsun ai “Htingbu ni a matu tinang a asak nawng kau hkra tsaw ra ai myit hta grau kaba ai tsaw ra myit ngu ai gaw n nga sai,” (Yh 15:13). Htingbu ni hpe sha nre ai, hpyan hpe mung tsaw ra na matu mung tsun da ai. Shi hkum nan hpyan ni a matu mung si hkam ai rai nga ai (Rom 5:8).

 

Madu Yesu hpe San Pawlu a Sakse hkam ai lam

Chyoi Pra ai Wenyi gaw San Pawlu hpe Karai Kasang a tsaw ra myit hpe laklai ai hku chye na hkam la shangun ai. San Pawlu gaw Kabu Gara Shiga a matu kaja wa sha nan prat tup ap nawng ai wa rai nga ai.

 

Chyum Mungga daw lahkawng hta San Pawlu Ephesu hpung masha ni hpe shangun dat ai laika gaw anhte marai hkum shagu a matu mung rai nga ai. Anhte marai hkum shagu gaw Karai Kasang a tsaw ra matsan dum ai hta lawm ai ni rai ga ai (Ephe 2:10).

 

Anhte ning dang n lu ai shi tsun ai lam langai mi nga ai. “Karai Kasang gaw matsan dum ai myit grai law htam nna shi anhte hpe tsaw ra ai myit kaba la nga ai rai nna, anhte a n madat mara nna tawt lai ai lam a majaw wenyi hta chyasi naw rai nga ai ni hpe Hktistu hta asak bai jahkrung dat mi ai. Dai gaw Karai Kasang a chyeju hte sha nanhte hkye hkrang la hkrum manit dai rai nga ai,” (Ephe 2:4-5).

 

Karai Kasang gaw tsaw ra ai lam hta htum ngu n nga ai, masat shadang mung n tawn da ai wa rai nga ai ngu San Pawlu sakse hkam da ai.

 

Akyu hpyi saga

Wa Karai Kasang e, shut hpyit mara galaw ai anhte hpe teng man ai myit malai lu nna nang hpang de kayin wa let kamhpa kamsham myit kaba hte na a tsaw ra matsan dum lama ai hpe shagrit shanem ai hte hkam la lu na chyeju jaw ya rit. Anhte a Madu Hkristu a marang e hpyi nem nga ga ai.  Amen.

 

Hkristu hta tsaw ra ai hkung ga ai Tara hkaw sara/num ni hte nu wa hpu nau ni e, ndai laban gaw Lu Sha Gam Ladaw hta (4) ngu na laban rai nga ai.

 

Hti ang ai Ja Chyum Mungga ni gaw

Chyum Mungga Daw (1) 6 Hkawhkam 36:14-16, 19-23

Chyum Mungga Daw (2) Ehpesu 2:4-10

Kabu Gara Shiga Yh 3:14-21

 

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.