Karai Kasang a Mungga ( Lu Sha Gam Ladaw Laban (3)

Chyum Laika Ni

Pru Mat Wa Ai Laika 3:1-8, 13- 15;     

1 Corinhtu 10: 1- 6, 10- 12;

 Luka 13:1- 9

Lusha Gam Ladaw Laban (3)

Lent 3, 2019 (C)  / 2019 March 24

Tsawra ai nu wa hpu nau ni, hpawt ni na laban gaw Lu Sha Gam ladaw hta masum ng una laban rai nga ai. Myit lamai nna tinang a prat hpe gram lai la na ahkyak ai lam ndai bat na ja chyum mungga ni hku nna anhte hpe shadum nga ai.

Anhte na la sai kabu gara ai shiga hta, byin lai wa sai hkrit hpa labau mabyin lahkawng hpe madu Yesu tsun hti dan ai, dai gaw, Pilatu mung gyi htau sat kau ai Galile masha nkau mi a sai hpe nawku htingnu hta shanhte nawng ya ai hkungga the gayau kau ai mabyin, bai kaga langai mi gaw, Siloam ngu ai kahtawng na lang ji daw hkrat nna masha marai 18 kamyet sat hkrum ai hkrit hpa mabyin rai nga ai. Ndai zawn hkrit hpa mabyin the sat hkrum, si hkrum ai htaw lawm lai wa ai ni gaw, Yerusalem mare hta mara kaba dik ai ni rai na rai ma ai, ngu nna sape ni myit nga ma ai rai nga ai. Dai shaloi Madu Yesu shanhte hpe tsun sadi jaw ai lam gaw, “ngai nanhte hpe tsun ma de ga; nanhte mung myit malai n lu myit yang gaw, nanhte nlang dai lam hte hten bya mat na ma rin dai” ngu ai lam rai nga ai. Lachyum gaw anhte yawng mung myit malai nlu ai rai yang hkrit hpa hten bya mat ai hpe hkrum na re, myit malai ra na lam ahkyak ai, ngu ai lam rai nga ai.

Madu Yesu garai ndu pru shi yang, Yawhan Baptista hkawn tsun shadum ai lam hpe myit dum mai nga ga ai. Yawhan a hkaw tsun shadum ai lam yawng a ahkyak gin chyum hpe Mark 1: 15 hta mu lu nga ai dai gaw, “myit malai lu nna, dai kabu gara shi ga hpe kam sham nga mu” ngu ai lam rai nga ai.

Nam bat langai ngu na ahkyak ai lam gaw, mai kaja ai prat the nga sa shakut na myit da ting da ai Hkristian myit masa anhte hta rawng ra ai, lahkawng ngu na gaw myit malai lu ra ai, ngu ai lam rai nga ai. Myit malai lu ai lam nnga ai rai yang si ai hpe anhte hkrum lu na re, si ai ngu ai hta, ndai dinghta prat na si ai lam sha nrai, htani htana asak si sum mat lu mai ai lam rai nga ai. Dai re majaw kabu gara ai shiga hta mu lu nga ai hkrit hpa si hkrum lam mabyin hpan lahakwng hta grau tsang ra ai dik ai hkrit hpa lam gaw htani htana asak si hkrum mat na tsang shara nga ai lam rai nga ai.

Mai kaja ai prat the nga sa shakut na myit da ting da ai Hkristian myit masa rawng nga ai, myit malai nna tinang a prat hpe gram lai la lam galaw na matu sharawng awng nga ai rai yang, anhte na la lai wai sai ndai bat na kabu gara a lahkawng ngu na daw gaw anhte a matu n gun lu hpa, shalan shabran ya ai mungga tai nga na rai nga ai. Madu Yesu tsun ai Kabu gara ai shiga hta na gashadawn mabyin hta, “Masha langai mi shi a tsabyi sun hta hkai da ai maihpang hpun langai mi tu lu ai rai nna, dai hta na asi sa tam yang, n mu wu ai. Dai rai nna shi gaw, Yu u, ngai masum ning tup dai maihpang hpun hta na asi sa tam ti mung n mu we ai; dai hpe kran kau u: hpa rai ga lahpawt tu nga na a ta? ngu nna tsabyi sun lajang ai wa hpe tsun wu ai. Dai wa gaw, Madu e, dai ning sha gaw naw tu nga yu u ga, de a nhpang grup e ngai htu kapun nna hpun apawm na we ai: dai hpang asi si yang gaw, tu nga u ga: asi n si yang gaw nang kran kau na rai nga ai, ngu nan madu hpe htan wu ai” nga ai lam rai nga ai. Tsun lajang ai wa rai nga ai Madu Yesu kaw nna sum madu rai nga ai Kawa hpang de anhte a matu tsun lajin lam galaw ya ai. Laning mi naw la yu ya na matu madu yesu anhte a matu kawa hpang de lajin lam galaw ai. Dai zawn la ya na matu Kawa hpe tsun lajin lam galaw da ai laman e, anhte asi si ai mash ani tai waa u ga matu shi Madu galaw ya ai mai ai lam ni yawng hpe galaw lajang ya na shi tsun nga ai. Anhte a prat hta gram lai ai lam nib yin pru wan a matu rai nga ai, ndai gaw Lu Sha gam ladaw a mungga rai nga ai. Dai re ai majaw ndai Lu sha gam ladaw laman hta anhte a matu madu Yesu si hkam ai lam ni hpe myit dum nga nna tinang a prat hpe mai kaja ai maga de yawng wa lu hkra gram lai ai lam ni galaw nga na ahkyak nga ai.

Shing gyim masha ni galaw ai shut hpyit mara a majaw, ndai ding hta ga ntsa hta nan karai kasang gaw shing gyim masha ni hpe ari jaw ai lam galaw ai rai kun, ngu ai ga san hpe anhte a myit hta san nga chye ga ai. Hpa majaw nga yang nshawp nkap ai masha ni hta lama ma yak hkak jam jau du pru wa yang shanhte galaw ai nhkru nkaja ai lam ni a majaw karai kasang a sharin shaga ai hpe hkrum ai rai nga ai, nga nna tsun mara shagun hkat ai lam ni hpe mung anhte na yu nga ga ai rai nga ai.

Dai rai yang tsawra ai nu wa hpu nau ni, ndai ding hta ga hta karai kasang ari dan jaw ai lam galaw ai, n galaw ai ngu ai lam the seng nna hpan mali daram garan ging hka mu mada mai nga ga ai. Nam bat langai ngu na mu mada chye na mai ai lam gaw, anhte shing gyim masha ni the du pru wa ai machyi makaw the gam maka ntsawm ai yak hkak jam jau lam ni gaw anhte galaw shut sai mara ni a majaw karai kasang ari dan jaw ai lam nrai nga ai, hpa majaw nga yang, anhte yawng gaw shing gyim masha ni rai ga ai majaw shut hpyit mara lu ai wa mi rai rai, san pra ai masha wa mi rai rai, anhte yawng hta kaw si hpang gara ai ngu ai nga pru ai, machyi makaw ai hkrum ai, jam jau jam hkau yak hkak lam ni hkrum ai, si ai ngu ai lam hpe hkrum ra ga ai rai nga ai.

Lahkawng ngu na anhte myit dum mai ai lam gaw, anhte a shut hpyit ai lam ni a majaw ari dan hku nna hkam la ra ai tsin yam lam ni mung hkrak sha nga nga ai. Ga shadawn Sodom the Gomorrah mare masha ni hkrum sha lai wa ai zawn re ai masa rai nga ai.

Masum ngu na hpan gaw, karai kasang jaw ai ari dan nrai, anhte galaw ai shut hpyit mara ni e shabyin shapraw dat ai tsin yam lam ni hpe anhte hkrum ra ai ngu ai lam rai nga ai. Ga shadawn, malut hka yawm the tsa chyaru ladu shalai lu lang ai lam a majaw cancer ana byin nna si hkrum ra ai,  num shalaw num machyu ai ding hku la hku nna nga pra ai a majaw ding hku n ngwi npyaw byin ai, ding hku hta ja gum hpraw mang hkang ai, myit masa the seng nna n ngwi npyaw ai lam ni byin hkrum ra ai, hpaga dingga galaw ai lam hta ga sadi ndung ai majaw ting nang the hpaga rau galaw ai masha nnga mat wa ai, jahtum e hpaga hten bra hkrat sum mat wa ai the jahtum ra ai, ngu ai masa ni rai nga ai.

Mali ngu na mu mada lu mai ai lam gaw, ndai ding hta ga ntsa anhte hkrum kadup nga ra ai tsin yam lam nkau mi gaw karai kasang e shabyin dat ya ai lam ni rai nga ai rai tim, mara a majaw ari jaw na matu ngu ai masa nre ai sha, grau nna mai kaja ai lam ni shabyin ya na matu, grau chyoi pra san seng ai masa de woi la lu na matu karai kasang shabyin dat ya ai lam ni mung nga mai nga ai.

Ja htum anhte tsun lu ai lam gaw, kaja ai masha ni hpe karai kasang shagrau ya nga ai zawn nhkru nkaja ai masha ni hpe ndai dinghta hta mung htawm hpang prat hta mung sharin shaga ai lam karai kasang galaw nga ai, ngu ai lam rai nga ai.

Dai re ai majaw tsawra ai nu wa hpu nau ni, ndai lu sha gam ladaw hta masum ngu na laban na kabu gara ai shiga anhte hpe shadum n gun jaw nga ai lam gaw, hpa shut hpyit mara raitim galaw shut ai mara a matu ari dan ngu ai galoi mung nga nga ai, dai ari dan gaw ndai ding hta e hkam la ra ai baw rai yang rai na, shing nrai yang  htawm hpang prat hta dai anhte galaw sai shut hpyit amra a ari dan hpe teng sha hkam la shajang ra na rai ga ai, dai re ai majaw dai ari dan nhkrum u ga, myit malai nna tinang a prat hpe gram lai la ai lam ni galaw na matu ndai Lu sha gam ladaw gaw kaja dik ai aten nan rai nga ai ngu ai lam hpe myit dum nga let ndai lu sha gam ladaw hpe matut nna shachyoi shapra nga ga law.

Akyu hpyi sagha: Wa kari kasang e, shut hpyit mara hpe shamyit dang kau lu na matu, lu sha gam ai, akyu hpyi ai the alu jaw ai lam ni hpe hkan galaw ra ai nga nna nang sharin achyin ya ndai, anhte shut hpyit ai ni gaw, ndai mai kaja ai amu magam ni hpe galaw shakut lu na matu, matsan dum ai the garum ya mi, anhte a madu hkrstu a marang e hpyi nem nga ga ai. AMEN.

Fr.Bernard Dashi Tang Ji