Hkristu hta tsaw ra ai nu wa hpu nau ni e, ndai laban gaw Lu Sha Gam Ladaw hta (3) ngu na laban rai nga ai.

 

Nawku Hpung gaw n dai laban na chyum daw ni hku nna, Paska shana hta kashin kamun chyeju kumla hkam la na ni hte hkam la ngut sai anhte ni a matu ahkyak ai lam ni hpe garan gachyan ya nga ai.

 

Kashin Kamun chyeju kumla hkam la ai hta Karai Kasang a Wenyi gaw anhte hpe Karai Kasang a htingnu shatai ya ai.

 

Karai Kasang a hkang da ai lam hpe hkan shatup ai a marang e, prat tup hta Karai Kasang hpe teng man ai hku nawku daw jau ga ai.

 

Yesu Madu gaw Karai Kasang a hkang da ai lam hpe hkan shatup ai hta anhte a kasi kamang tai ya nga ai. Wenyi gaw shi hpe wudang ntsa si hkam ai du hkra lam woi ya ai.

 

Yesusalem mare na htingnu hta nawku daw jau ai lam

Anhte shinggyim masha ni shanu nga na dum nta ra ai. Karai Kasang chyawm gaw dai hpe n ra nga ai. Karai Kasang gaw shara shagu hta aten shagu nga nga ai re. Sumsing mungdan hte ginding aga gaw shi a marang e nga nga ai.

Shinggyim masha gaw malu masha mung ra ai. Karai Kasang chyawm gaw dai hpe mung n ra ai. Shi gaw mungkan masha yawng a malu masha hpe lajang ya ai.

Ps 50: 12-13 hta, “Ngai kaw si ai hkrum wa yang lusha a matu ngai nang kaw hpyi na n rai; hpa majaw nga yang, mungkan ting hte dai hta nga nga ai arai yawng mayawng hte gaw nye a rai nga li ai. Ngai gaw dumsu shan sha nga a ni? Shing nrai, bainam ni a asai hpe lu nga a ni?, ngu Karai Kasang Israel myusha ni hpe tsun da ai.

Raitim, Israel myusha ni hpe Moses hku hkang da ai gaw dusat hkungga ni hte yi sun hkauna na nsi nai si ni hte Karai kasang hpe hkungga nawng ra ai lam hpe tsun da ai.

 

Lani mi hta lahkawng lang, jahpawt hkying 9 aten hte shana hkying 3 aten hta sagu kasha langai sat nna Yerusalem nawku htingnu hta nai mam, tsabyi ntsing ni hpe hkungga nawng jaw na matu tsun da ai.

Poi nhtoi ni hta hkrudu, sagu kasha, dumsu ni hte kaga dusat ni hpe hkung ga nawng jau ma ai. Kaga hkungga nawng jau ai lam ni hpe mung Moses tara hta lam matsun da ai hpe mu lu ga ai.

Karai Kasang Israel myusha ni hpe hpa rai dai hkungga ni hpe nawng jau na matu hkang da ai rai?

 

Kaja wa nga yang, Karai Kasang gaw Wenyi re ai majaw ra kadawn ai lam hpa n nga ai rai nga ai. Raitim, Kaja ai Madu Karai Kasang gaw shinggyim masha ni hpe shi hte jahuk la nu ai.

Chye na hkra tsun dan mayu ai lam langai gaw, moi Israel myusha ni a grupyin masha ni gaw hpara sumla hpe hkungga nawng jau ma ai.

Teng man Karai Kasang hpe nawku ai lam hta Karai Kasang Israel myusha ni hpe dai masa hku ahkaw ahkang n jaw ai rai yang, shut shai ai makau grupyin ni a htung lailen de shalen la hkrum na rai ma ai.

 

Dai re majaw, Karai Kasang gaw shi a myusha ni hpe gara hpe gaw gara hku hkungga nawng jau ra ai lam ni hpe kata lam lam matsun da ya ai. Dai hkungga a jaw e, Israel myusha ni Karai Kasang hta kam sham kam hpa wa let hkye la Madu Messiah sa du gaw de ya na hkrum tsup dik htum nawku daw jau lam hpe shajing shachyip da na matu rai nga ai.

Shi a myit masin salum hta Yesu Madu gaw Karai Kasang hpe teng man grin dan ai nawku daw jau lam hpe jaw ya lai wa ai.

Chyum laika hku anhte chye lu ai gaw Yesu Madu shi a sak prat hta makam masham rawng ai Yuda masha langai zawn sha, Yerusalem nawku htingnu de sa du akyu hpyi let hkungga nawng jau ai lam rai nga ai.

 

Ndai laban na Kabu Gara Shiga chyum laika hta nawku htingnu kata n htap n htuk ai masa a majaw Yesu Madu daru kau ai hpe mu lu ga ai. Moses tara upadi hte maren Kawa Karai Kasang hpe nawku daw jau ai hta dingman dinghpring ai lam hte makam hpe jahprak ai gaw n rai nga ai. Rai tim, makam masham hpe amyat htuk nna, Karai Kasang hpe hkungga shagrau ai zawn galaw masu ai shanhte a nangmak law hpa ai myit masa hpe jahkrak ai she rai nga ai.

 

Ndai bat na chyum laika ting hta, shi a Kawa nta hpe sut hpaga ginra shatai jai lang ai sut hpaga ga ai ni hte gumhpraw galai ai ni hpe Yesu Madu n-yun bu, masin pawt nna gawk shapraw kau ai lam hpe ka da ai (Mt 21:12; Mk 11:11; Lk 19:45; Yh 2:14).

 

Yawhan gaw Yesu Madu mungga hkaw hpang ai aten hta byin ai ngu ka da ai. San Mahte, San Marku hte San Luka ni gaw Yesu madu a sak prat htum ai aten hta byin ai ngu ka da ma ai.

 

Kaja wa byin ai aten gaw Yesu Madu Yerusalem mare kaba de shang ai nhtoi, kungla shaman poi nhtoi hta byin ai rai nga ai.

Ndai mabyin gaw ahkak ai majaw Kabu Gara Shiga chyum laika buk mali hte kaw tsun da ai hpe mu lu ga ai.

Yh 2:19-21 hta, “Ndai Nawku Htingnu hpe hpya kau u, masum ya laman e, ngai dai hpe bai sharawt na we ai......Yesu tsun nga ai htingnu gaw, shi a hkum hkrang ngu ai htingnu hpe sha-ang nna tsun ai rai nga ai.”

 

Ndai gaw shi a si hkam ai hte bai hkrung rawt na lam hpe tau nau myit htoi da ai rai nga ai. Yerusalem mare nawku htingnu kaw sha nawku daw jau ai hpe nawku htung ningnan ni hte kaga nawku htingnu ni hta mung nawku lu na lam tsun ai rai nga ai.

Nawku tawn gaw nawku daw jau shara rai nna, Yesu Madu gaw shi hkum hpe nawku tawn ngu shamying ai a marang e, shi a masin salum hta manu daw dan n lu ai nawku daw jau lam nga na hpe tsun ai rai nga ai.

Manu dan ai gaw teng nga ai. Wenyi a marang e Yesu Madu gaw Kawa Karai Kasang hpe aten shagu shakawn shagrau na matu mungkan ga hpe hkye la ai hta hkang da ai lit magam hpe kang ka gun hpai lai wa ai rai nga ai.

 

Shinggyim masha langai mi hku Kawa Karai Kasang a ra sharawng ai lam hpe hkrak hkan shatup let nawku daw jau ai. Madu Yuda ni hpe tsun ai gaw “Shi sharawng awng ai amu hpe, ngai tut nawng agalaw nga nngai,” ngu ai rai nga ai (Yh 8:29).

Yesu Madu shi hkum nan daw jau ai Kawa Karai Kasang hpe nawku daw jau ai ni hpe dai Kawa Karai Kasang kaw woi sa ya ai. Mungkan ntsa hta Kawa Karai Kasang hpe grindan ai hte nawku daw jau na kadai mung n mai byin ai.

 

Karai Kasang hpe grindan ai hku nawku dau jau lu na matu Yesu Madu anhte hpe Karai Kasang a htingnu shatai ya ai. Mai byin ai masa lam hku gaw shachyaw da ya ai. Shi a Wenyi anhte hpe garan gachyan ya ai. Petecost poi hta kasa ni hpe garan jaw ya ai. Kam sham nna kashin kamun hkam la ai shaloi, anhte hpe matut garan gachyan ya nna Wenyi a htingnu shatai ya ai.

Karai Kasang a Wenyi gaw anhte hpe Karai Kasang hkang da ai lam de woi bang la ai. Chyum mungga daw langai hta Karai Kasang gaw Israel myusha ni hpe “Tara Kanu Lam (10) jaw da ai lam na lu ga ai (Pru Mat Wa ai Laika 20:1-17).

 

Myit n pyaw lam gaw Tara kanu lam 10 gaw Karai Kasang anhte hpe gyit hkang shayak ai re ngu anhte ni hkam la shut ai lam rai nga ai. Anhte ni Karai Kasang a tara kanu lam 10 hpe hkan ai mi rai rai, n hkan ai mi rai rai, shi hpe hpa akyu mung n jaw ai hpe dum ra ga ai.

Karai Kasang shi a akyu ara matu anhte hpe tara kanu jaw da ai n rai nga ai. Anhte ni hkan shatup jang akyu ara hkam la lu na gaw anhte sha rai nga ai. Tara tawk jang akyu ara hkrat sum na mung anhte ni sha rai nga ai.

Tsun ga nga yang, Karai Kasang anhte hpe tsaw ra ai majaw anhte a akyu ara matu teng man ai kabu pyaw lam tara hpe jaw ya ai rai nga ai. Karai Kasang a tara kanu lam 10 gaw ngwi pyaw lam matsun ya ai tara ngu hkak tsun lu nga ai.

 

Yesu Madu gaw dai hpe ga hkaw lahkawng hte ginchyum dat da ai.

 

“Dai madu na a Karai Kasang hpe na a myit kraw lawang mahkra hte, na a myit masin mahkra hte, na a myit mang mahkra hte nang tsaw ra lu na rai ndai,” (Mt 22: 37).

“Na a htingbu wa hpe, na a hkum hte maren nang tsaw ra lu na rai ndai,” (Mt 22:39).

Sak jaw ap nawng nna nsa htum mahka e Yesu Madu shaga ai hta “kaga masha ni yawng mung lawm ai tara ningnan rai nga ai.

“Ngai nanhte hpe tsaw ra made ai zawn, nanhte shada da tsaw ra nga mu,” (Yh 15:12).

Shi a tsawra myit gaw Kawa Karai Kasang a tsawra myit ram kaba ai ngu Yesu Madu shia kasa ni hpe tsun da ai rai nga ai (Yh 15:9). “Kawa Karai Kasang hpe tsaw ra ai zawn nanhte hpe tsaw ra ai ngu Madu Yesu tsun ai rai nga ai.

Yesu Madu zawn anhte ni kaga masha ni hpe n tsaw ra lu ai hpe dum ga ai. Madu Jaw ya ai Wenyi gaw anhte hpe tsaw ra chye na matu sharin ya ai hpe gawng ngwi ngwi chye na hkam sha wa ga ai.

Tinang hte ni htep ai ni hpe tsaw ra ai gaw Karai Kasang hpe kaja dik htum ai kumhpa shagrau ai rai nga ai. Htingbu wa hpe tsaw ra ai lam n lawm ai magam gaw Karai Kasang a man hta akyu n nga ai (Mt 5:23).

 

Dai majaw tsaw ra ai gaw anhte a prat ting n htum n woi nawku daw jau ai lam byin shangun nna, dai hpe Kawa Karai Kasang gaw Yesu Madu hte rau kabu gara let hkap la ya ai. Dai nawku daw jau lam hte seng nna San Petru Hkristan Hpung masha ni hpang de shagun laika ka da ai.

“Nanhte gaw asak hkrung nga ai nlung ni zawn Karai Kasang kaw sa nna dai wenyi hte seng ai htingnu gaw gap ai hta nanhte ni nan shang lawm jai lang hkam nga mu,” (1Petru 2:5).

 

Teng man ai Hkristan prat hpe shadan shalen ya ai Yesu madu hpe chyeju dum ra ga ai. Tsawra myit kaba hte Kawa Karai Kasang sharawng awng ai lam hpe hkan ai gaw Madu Yesu a dau jau ai lam hta shang lawm ga ai rai nga ai.

Anhte marai hkum shagu htingnu ni rai ga yang hpawng de na matu gaw gap da ai nawku htingnu ni naw ra ai kun? Shing n rai, Karai Kasang sharawng awng ai hpe hkan shatup na rai yang, ga shadawn- yi sun hkauna galaw ai gaw lachyum nga na kun? Anhte marai hkum shagu Karai kasang hpe myit masin hta nawku daw jau ga ai majaw laban nawku daw jau ai lam hpe hpa rai naw galaw ra ga ai kun?

 

Yesu a hpang hkan Hkristan ni shaning 300 ning daram nawku htingnu gaw gap na ahkaw ahkang hpe pat da hkrum ai majaw Nawku Hpung gaw nawku dau jau na matu htingnu n nga ai sha nawku daw jau lai wa ma ai. Dai ni na aten du hkra mungdan nkau ni hta dai zawn pat shingdang ai lam ni naw nga nga ai.

Raitim, Hkristan wuhpung wuhpawng matu gaw gap da ai nawku htingnu law jat kaba jat wa na gaw ahkyak nga ai. Hkristan ni gaw kun dinghku masha zawn zup hpawng nna Karai Kasang hpe nawku daw jau ai.

 

Akyu hpyi na matu hpawng de ai shara hta Hkristu Madu nga nga ai lam ga sadi jaw da ai (Mt 18:20). Nawku Hpung masha law htam ai hte maren byin mai ai made shakut nna nawku htingnu gaw gap na hpe ra sharawng ai.

Dai hte maren sha, Karai Kasang gaw anhte a sak jaw kumhpa ni hpe kabu gara let hkap la ai gaw shi hta ra kadawn ai majaw n rai nga ai. Anhte a kamhpa kamsham ai lam hpe hpaw madun shangun ai she rai nga ai. Shawng de tsun da sai hte maren, htingbu wa hpe tsaw ra ai gaw hkungga nawng jau ai lam rai nga ai.

 

Anhte dum ra ai ahkyak dik langai gaw, Laban nawku daw jau ai lam hpe Karai Kasang teng sha ra sharawng ai ngu ai rai nga ai. Anhte a nawku daw jau ai lam gaw manu kachyi sha nga ai. Laban nawku daw jau lam gaw Hkristan Hpung masha shada da hta tsawra myit garan gachyan ai hte law htam wa shangun ai rai nga ai.

Tsawra myit hte laban nawku daw jau ai lam gaw Nawku Htingnu ni hte alu hkungga ni hpe lachyum pru shangun ai. Tsawra myit n nga ai rai yang gaw lachyum n nga, manu n dan nawku htingnu ni hte lachyum n pru ai nawku daw jau lam ni sha tai nga ai.

 

Akyu hpyi saga

Wa Karai Kasang e, nang Madu hpe anhte hkum hkrang myit masin wenyi mahkra hte tsaw ra let nawku daw jau nna htingbu wa hpe mung tinang hkum hte maren tsaw ra lu na chyeju jaw ya rit. Wuhpung wuhpang hte rai tim, tinang myit masin hte sha rai tim, lachyum nga, lachyum pru, akyu pru ai hku nang Madu hkang da ai hte maren hkan shatup lu na chyeju jaw ya rit. Anhte a Madu Hkristu a marang e hpyi nem nga ga ai.  Amen.

 

Hkristu hta tsaw ra ai hkung ga ai Tara hkaw sara/num ni hte nu wa hpu nau ni e, ndai laban gaw Lu Sha Gam Ladaw hta (3) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) Pru Mat Wa Ai 20: 1-17

Chyum Mungga Daw (2) 1Kor 1: 22-25

Kabu Gara Shiga Yawhan 2: 13-25

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.