Karai Kasang A Mungga - Lu Sha Gam Ladaw 2, 2021

Abraham gaw shi kasha shingtai hpe Karai Kasang a matu shagu hkungga nawng

 Hkristu hta tsaw ra ai nu wa hpu nau ni e, ndai laban gaw Lu Sha Gam Ladaw hta (2) ngu na laban rai nga ai.

 

Madu Yesu sharin shaga ai lam nkau ni hpe shi a kasa ni chye na hkawn hkrang na yak ai lam ni nga nga ai. Ga shadawn, “hpyen hpe mara dat ya na lam”, “tinang hkum hpe nyet kau na lam”, “Yerusalem Nawku Htingnu lani mi na nhtoi hta hten run mat na lam” ni hpe atsawm n chye na ma ai.

 

Grau nna chye na yak dik ai lam gaw Yesu Madu nni nkri hkrum na lam hte asak ap nawng kau nna sumsing mungdan du shang wa na lam rai nga ai.

 

Ndai lam gaw kasa ni a matu chye na yak dik ai lam re ai majaw, Yesu Madu hkaw tsun ai lam ni ngut ai hpang nni nkri hkam la na matu Yerusalem mare kaba de rawt sa wa ai shaloi aten hta she sanglang tsun dan lai wa ai.

 

Yesu nni nkri hkam si hkam na lam shawng na lang tsun dan wa ai. Kasa ni kajawng ai hte mau ai hte ma-a mat ma ai. San Petru gaw Messiah Madu hta ndai lam ni byin wa na gaw lachyum nan n nga ai ngu ninghkap ga tsun wa ai.

 

Yesu Madu mung Petru hpe “Satan e, ngai kaw na pru mat wa u. Na a myit ai lam ni gaw Karai Kasang kaw na n rai, masha kaw na she rai nga lit dai,” ngu nna daru kau wu ai (Mk 8: 33).

 

Nni nkri hkam ra ai lam hpe anhte ni chye na yak ga ai rai tim, Nawku Hpung gaw dai chye na yak ai lam nga nga ai hpe atsawm sha chye da ai.

Sumsing mungdan shang mayu ai wa gaw Yesu a nni nkri hkam jam jau hkam ai hta jawm pawng ra ai hpe dum shai ra ai. Hkye hkrang la hkrum na matu kaga lam n nga sai hpe mung dum ra ga ai.

 

Abraham a madat mara ai lam

Chyum mungga daw langai hta Karai Kasang gaw Abraham hpe chyam dinglik yu ai lam galaw ai. Shi a kasha Isac hpe hkungga nawng jau na matu hpyi shawn ai. Abraham a prat hta myit kahpra dik htum ai aten rai nga ai. Shi a mungdan kaw na grai tsan ai shara de sa na matu mung hkang dat ai. Abraham gaw sut su ai wa rai nna, sagu hte rau dusat yam nga law law su ai wa mung rai nga ai. Karai Kasang hkawm sa shangun ai shara hkrak n chye ai rai tim, shi hpe kam sham ai myit hte dai shara de rawt sa wa ai (Ningpawt Ninghpang 12: 4).

 

Yaweh Karai Kasang Abraham hpe ga sadi lahkawng jaw da ai. (1) Hpang daw de Palestine mungdan ngu shamying wa ai Hkanan mungdan hte, (2) Shi hte Sara yan kasha langai shangai shaprat shangun nna dai kasha a marang e masha law law shaprat wa na lam rai nga ai.

 

Abraham si ai hpang shaning 600 ning lai jang Palestine mungdan hpe Israel myu sha ni madu lu ma ai. Asak kung dinggai dingla masai rai tim, kasha Isac hpe shangai la lu ma ai.

 

“Nang grai tsawra ai na a shadang sha shingtai Isac hpe woi nna Moria ga de sa wa su. Ngai nang hpe madun na de ai bum ntsa e,shi hpe sagu hkungga shatai nna ngai hpe nawng jau e,”

ngu nna tsun wu ai,” (Ningpawt Ninghpang 22: 2).

 

Kasha langai sha shaprat shangun nna hpa rai bai hpyi ai kun? shinggyim myu sha ni a kawa shatai na ngu tsun da ai ga sadi gaw hpa wa rai na ta? Karai Kasang Abraham hpe tsawra ai gaw rai kun? Ga san san na lam Abraham hta law law pru wa na re.

Raitim, chyum laika hta Abraham Karai Kasang hpe ga san san ai lam n galaw ai. Karai Kasang a myit ra ai hpe hkan shatup na jin jin rai nga ai. Isac hpe mung bai lu la ai. Isac gaw Esau hte Yaku hpe shaprat ai. Yaku gaw kasha 12 hpe shaprat ai. Dai kasha 12 gaw Israel myu sha lakung 12 a kawa hte ningbaw ni tai wa ma ai.

 

Messaiah Hkyela Madu gaw dai Israel myu lakung hta na shangai wa ai. “Nanhte a kawa Abraham gaw, ngai du sa wa na nhtoi hpe mu lu na rai nna sharawng awng nga ai, dai n’htoi hpe mu lu ai shaloi mung kabu gara nga ai, ngu Yesu Madu tsun da ai (Yh 8: 56).Yesu Madu hte Kawa Karai Kasang gaw Abraham hpe shinggyim masha ni a kawa hkinghtawng aya ap jaw da ai. Ireal myu sha ni gaw hkum shan sai hku Abraham a aru arat ni rai nga ai. Yesu Madu hpe hkap la kam sham ai ni yawng gaw makam masham lam hku Abraham a aru arat ni rai nga ai. Dai majaw Abraham gaw kam sham ai ni yawng a kawa ngu ai hkinghtawng hpe hkam la ai wa rai nga ai.

 

Bum ntsa hta Yesu Madu ahpraw nsam galai ai lam gaw shi a matu nni nkri hkam si hkam ai lam hpe hkap la na matu n gun tai shangun ai. Ahpraw nsam galai ai shaloi Kawa Karai Kasang a tsawra myit hpe atsawm sha chye la lu ai ngu tsun mai nga ai. Moses hte Elijah shi hte rau ga sa shaga ma ai (Mk 9: 4). Madu Yesu Yerusalem hta nni nkri hkam si hkam na lam hte seng nna tsun jahta na ma ai (Lk 9: 31). Dai aten Kawa Karai Kasang a nsen hpe kasa ni na ma ai. “Ndai wa gaw ngai tsawra ai ngai sha rai nga ai, shi ga hpe madat mara mu,” ngu summwi ntsa kaw na nsen hte shaga wa ai, (Mk 9: 7).

 

Kawa Karai Kasang a tsawra myit hpe chye na ai Yesu Madu nni nkri hkam si hkam let mungkan ting hpe hkye la na Kawa Karai Kasang a masin hpe madi shadaw hkap la na myit daw dan da ai rai nga ai.

 

Kawa Karai Kasang hpe hpring tup kam ai lam Gestmany sun hta akyu hpyi ten hte nni nkri hkam nna wudang ntsa si hkam ai aten hta mu lu nga ai.

 

“Wa e, Nang gaw yawng mayawng hpe dang di lu nga ndai; ndai nni nkri ngu ai gawm hpe ngai kaw na shalai kau ya rit. Rai ti mung, Ngai ra ai hku n rai, na a myit ra ai hku she rai u ga, ngu nna akyu hpyi ai, (Mk 14: 36).

 

“Wa e, Na a lata de nye a wenyi ap ya de ai, nga nna nsen kaba hte jahtau wu ai. Shing nga tsun ngut jang, nsa hti mat ai,” (Lk 23:46).

 

Shi a nni nkri hte si hkam ai a marang e sha, shinggyim masha ni hkye hkrang la hkrum na re ai majaw Yesu Madu gaw dai nni nkri hte si hkam ai lam hpe sharawng awng ai hte hkam la ai.

 

Nni nkri hkam ai a marang e hpring tup ai akyu chyeju hkam la lu ai hpe Wenyi a marang e chye lu ai.

 

Yesu Madu gaw shinggyim masha yawng hpe mara hta na shalawt dat ya let Kawa Karai Kasang hte prinem lam hpe bai gaw gap ya ai.

 

Shinggyim masha ni gaw Wenyi a marang e, Karai Kasang a jinhku hte kashu kasha ni tai wa ai.

 

Yesu Madu gaw nni nkri hte si hkam ai a marang e, hpung shingkang rawng nga na ra ai. Dai gaw, shi langai sha a matu n re ai sha, sumsing mungdan shang mayu ai ni yawng a matu sumsing chyinghka hpaw da na matu rai nga ai.

 

Yesu Madu gaw shinggyim masha ni a n gun kya ai lam hpe hkam la nna anhte ni hpe n gun ban ya ai majaw shi hpe shakawn ra ga ai.

 

Yesu Madu nni nkri hkam ai shaloi lu la ai n gun atsam hte anhte ni agung alau hkrum ai shaloi hkam la lu ai n gun atsam gaw maren sha rai nga ai.

“Kadai rai ti mung, ngai hpang de hkan sa mayu ai wa gaw, tinang hkum hpe ndang kau nna, shi a wudang hpai let, ngai kaw hkan nang ru ga,” (Mk 8: 34). Yesu a hpang hkan nang ai ni gaw nni nkri hkam ra na hpe Yesu Madu asan sha tsun da ai.

 

Kanu a hkritung kaw nna shangai wa ai hte rau dai ma gaw hkrap let shangai wa ai. Si ai n’htoi du hkra machyi makaw ru yak jam jau lam a myu myu hkam sharang lai ra ai.

 

Raitim, nni nkri hte si hkrung si htan lam gaw Karai Kasang a majaw n rai nga ai. Karai Kasang a masing gaw shinggyim masha ni sak hkrung lu na hte ngwi pyaw simsa ai hku nga pra lu na matu hpan da ai lam rai nga ai. Nni nkri hte si hkrung si htan lam gaw Karai Kasang a masing n rai nga ai. Mara mahtang she dai hpe mungkan ga de gun sa ya ai yubak rai nga ai.

 

Karai Kasang gaw yak hkak jam jau lam hpe byin shangun ai n re ai. Raitim, dai lam hpe hkam sha na matu gaw ahkang jaw da ai. Dai zawn ahkang jaw da ai lam gaw Karai Kasang a hpung dagu hte matsan dum lama ai a marang e, dai n kaja ai lam kaw nna kaja ai lam de galai shai ya na matu rai nga ai. Anhte ni matsan dum lama ai lam nga ai rai yang agung alau mahkra hpe akyu ara maga de gale la lu na rai ga ai. Hkristan ni gaw matsan jam jau hkrum nni nkri hkam ra ai aten shagu hta n gun atsam hkam la shara nga nga ai.

 

Anhte ni gaw Yesu Madu zawn sha Kawa Karai Kasang a matsan dum lama ai hpe kam hpa ra ga ai. “Shi a kasha hpe pyi n lahpawt dum ai sha anhte mahkra a matu mara sagu hkungga di nna nawng kau ai Karai Kasang gaw nga manga hpe mung shi anhte hpe n jaw ai nga na a ni?” (Rom 8: 32)

 

Anhte a matsan jam jau, nni nkri lam ni hpe myit galu kaba hkam sharang ai hte hkap la gun hpai ai rai yang akyu chyeju kaba tai wa na ra ai.

 

Matsan jam jau ai lam gaw anhte hpe Karai Kasang hte ni grau shangun ai. Shinggyim masha law malawng gaw sut su nga pyaw wa nna hkam ja ai aten ni hta Karai Kasang hpe kau da ma ai. Shi hte tsan gang mat ma ai. Matsan jam jau hkrum jang gaw shi hpang de bai gayin wa ma ai.

 

Yesu Madu a matsan jam jau, nni nkri hkam ai gaw shinggyim masha ni hpe hkye la hkrang la lu ai zawn, anhte a matsan jam jau hkam nni nkri hkam ai mung anhte hkum nan hte kaga hpu nau ni hpe hkye hkrang lam de woi sa lu ai.

 

“Nanhte hpe ngai kaja wa teng teng tsun made ai gaw, mam nhkyep gaw ga hta hkrat nna, n hten mat yang gaw langai sha arai nga ai; hten mat yang she asi law law si wa lu ai,” (Yh 12: 24).

 

Bum ntsa kaw Yesu Madu a hpraw nsam galai ai lam gaw shi nni nkri hkam si hkam ai lam n byin shi ai aten rai nga ai. Yesu Madu a ahpraw nsam hkrak galai mat ai aten gaw shi bai hkrung rawt ai shani rai nga ai. Dai shani gaw jan a n’htoi shingkang gaw masin salum hta htum ngu nnga ai kabu pyaw ai lam hte hpring tup nga ai. Anhte ni si mat ai shaloi dai hte maren byin wa na rai ga ai.

 

Anhte a prat hta matsan jam jau ai lam gaw prat hpe galai shai na matu gau ngwi ngwi rai garum ya nga ai. Anhte hta rawng nga ai Wenyi gaw anhte hpe Yesu Madu hte grau bung wa hkra shatsawm ya nga ai. Dai galai shatsawm ya ai lam gaw Yesu Madu a nni nkri hpe hkam la ga ai rai yang grau lawan ai hku byin wa na ga ai.

 

Anhte ni matsan jam jau hkrum ai aten shagu Hkristu Madu anhte a makau hta nga nga ai. Matsan jam jau ai ni hpe anhte byin mai ai made atsam dat shalan shabran ya ra ga ai. Hkristu Madu chyu sha atsam kaba hte shalan shabran ya lu ai.  

 

 

Akyu hpyi saga

Wa Karai Kasang e, myit hkri ba lit li nna myit kaji nga ai ni hpe shalan shabran ya na matu anhte ni hta hpring tup atsam n nga ga ai. Shanhte hte rau hkam sha lawm ai hta lai nna anhte ni hpa n lu galaw ga ai. Rai tim, Yesu Madu hpe Simun Kalawari kawng hta wudang hpai garum ya ai zawn matsan jam jau myit ru myit kaji nga ai ni hte rau hkam sha lawm let teng man ai shalan shabran lam hpe garan gachyan lu na atsam jaw ya rit. Anhte a Madu Hkristu a marang e hpyi nem nga ga ai.  Amen.

Hkristu hta tsawra  hkungga ai Tara hkaw sara/num ni hte nu wa hpu nau ni e, ndai laban gaw Lu Sha Gam Ladaw hta (2) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) Ningpawt Ninghpang 22: 1-2; 9-15; 18

Chyum Mungga Daw (2) Rom 8: 31-34

Kabu Gara Shiga Mk 9: 2-10

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.

Add new comment

7 + 2 =