Karai Kasang A Mungga - Lu Sha Gam Ladaw 1, 2021

 Hkristu hta tsaw ra ai nu wa hpu nau ni e, ndai laban gaw Lu Sha Gam Ladaw hta (1) ngu na laban rai nga ai.

 

Lai wa sai bat 3 ya shani, Wanwu chya ai nhtoi hta Lu Sha Gam Ladaw hpang wa saga ai. Ndai Lu Sha Gam Ladaw gaw anhte ni hta na kashin kamun garai nhkam la shi ai ni hkyen lajang da ai aten rai nga ai. Kashin kamun hkam la sai ni mung dai hpe hkam la ai shaloi, Karai Kasang hte ga shaka tawn da ai Ga Shaka hpe bai myit dum ai aten rai nga ai.

 

Karai Kasang hte Noah lapran tawn da ai Ga Shaka

Chyum mungga daw langai gaw hka rawt kaba ngut ai hpang Karai Kasang hte Noah lapran tawn da ai Ga Shaka a lam rai nga ai. Anhte a jiwoi jiwa ni mare langai hte langai, myusha langai hte langai lapran, buga ginra langai hte langai lapran myit n pyaw ai lam ni nga ai rai yang simsa tsawm htap ai hku jahtuk hatsawm la ai myit hkrum lam ni galaw chye ma ai. Dai myit hkrum lam hta langai hte langai lapran ga sadi jaw ga sadi hkam ai lam amyu myu galaw chye ma ai.

 

Dai ni na aten hta nga yang mungdan langai hte langai, hpyen hpung langai hte langai, company langai hte langai, sut masa, bawngring hpung langai hte langai lapran myit hkrum sen htu ai lam ni galaw ma ai.

 

Ndai Laban hta anhte na lu ai Karai Kasang hte Noah lapran na Ga Shaka gaw galaw ging ai kun? Galaw lu ai kun? Shan lahkawng lapran hta madang n bung ma ai.Karai Kasang gaw Hpung dagu hte hpring ai wa, Noah gaw hpung dagu n rawng ai wa rai nga ai.Karai Kasang gaw hpaji byen-ya hte hpring ai wa, Noah gaw machye machyang n hkum ai wa rai nga ai.

 

 

Karai Kasang gaw htani htana nga ai wa, Noah gaw shaning kadun sha sak hkrung nga lu ai wa rai nga ai.Shan lahkawng a lapran tawn da ai Ga Shaka gaw kadai a matu rai nna, kade a akyu matu mara rai ta?

 

Karai Kasang gaw anhte shinggyim masha ni hpe shi hpang de bai shaga la na myit sharawng dik nga ai hpe madun dan ai mabyin rai nga ai. Karai Kasang a shawang tsawra myit nan rai nga ai.

 

Karai Kasang hte Abraham lapran na Ga Shaka

 

Noah hte ngut jang Karai Kasang shinggyim masha ni hpe hkye la na matu Abraham hte Ga Shaka bai tawn ai. Mungkan ga hpe hkye la na mungdan a kawa hte ningbaw shatai ya ai.

 

Abraham hpe ga sadi lahkawng jaw da ai. (1) Asak kung dinggai dingla yan Abraham hte Sarah yan kaw nna kasha langai shangai na rai nna, shi a marang e mungdan kaba tai wa na re lam hte (2) Palestine mungdan ting hpe Abraham a kashu kasha ni a matu ap jaw na lam ga shadi jaw da ai. Dai ga sadi a marang e, Palestine mungdan hpe “Ga Sadi tawn buga ginra” ngu shamying ma ai. Karai Kasang Abraham hpe langai sha re ai ga sadi hpyi ai gaw “shi hta kam hpa na” matu rai nga ai.

 

Karai kasang hte Isreal myusha ni lapran tawn ai Ga Shaka

 

Abraham Isac hpe shaprat ai. Isac gaw Esau hte Yaku hpe shaprat ai. Yaku hta Kasha 12 shaprat ai. Dai kasha 12 gaw Isreal myu lakung 12 a kawa hte ningbaw ni rai ma ai.

 

Egutu (Egyip) mungdan hta mayam prat hku nga ra mat ai Israel myusha ni hpe Karai Kasang shalawt dat ya nna ga sadi tawn da ai Palestine mungdan de woi wa na matu Moses hpe shangun dat ai.

 

Israel myusha ni hpe hkye la ai Karai Kasang Sinai Bum ntsa hta Moses rau Isreal myusha ni hte ga shaka tawn da ai. Lahkawng maga yan ga sadi jaw ga sadi hkam da ma ai. Karai Kasang gaw Israel myusha ni hpe lam woi makawp maga ya na rai nna, Israel myusha ni maga hku nna gaw shanhte ni Karai Kasang a myusha ni hku hkam la let Moses hku jaw da ai tara kanu lam 10 hpe hkan shatup sa wa na ga sadi rai nga ai.

 

Atsawm sumru yu ga nga yang, Ndai myit hkrum ga shaka hpe mung Karai Kasang sha jaw da ai rai nga ai. Noah, Abraham hte Moses ni hte ga shaka tawn da ai hta kumla langai hpra rawng nga ai. “Noah hte n gwe la tum,” “Abraham hte matu kadoi ai lam” hte Moses hte dusat sai wan nat hkungga tawn hkungri hta gat ai lam ni rai nga ai. Ga shaka shagu mung tara shang ai rai nga ai.

 

Lahkawng maga yan gaw myit hkrum ga sadi hpe hkan shatup ma ai.

 

Karai Kasang gaw galoi mung sadi dung ai wa rai nga ai. Hka hte jeyang ai lam hpang de galoi mung n galaw ai. Ga sadi hte maren Abraham hpe kasha shaprat shangun ai hte aten du jang kashu kasha ni a matu Palestine mungdan hpe jaw ai. Zai bru jang hte nam maling hkrun lam hta Israel myusha ni hpe makawp maga ya ai. Shanhte hpe Mana muk jaw sha nna mau hpa lamik kumla amyu myu madun lai wa ai.

 

Noah, Abraham hte Moses ni langai hpra gaw shanhte a sak prat hta Karai Kasang a ntsa sadi dung lai wa ma ai. Raitim, Israel myusha ni gaw lang hte lang Karai Kasang hte tawn ai Ga Shaka hpe hprai lai wa ma ai rai nna nat naw ai lam ni mung galaw lai wa ma ai.

 

Karai Kasang hta Ga Shaka ningnan hpe tawn na matu ga sadi da lai wa ai.

Lai wa sai aten tawn da ai ga shaka ni hta grau hkum tsup ai ga shaka rai nga ai. Dai ga shaka gaw mungdan langai hte myusha langai a matu sha n rai nga ai. Yawng hte seng ai ga shaka rai nga ai. Aten ladaw langai na matu sha n rai nga ai. Htani htana a matu rai nga ai. Dai Ga Shaka tawn ai lam galaw ngut ai hpang kaga ga shaka n nga sana rai nga ai. Dai Ga shaka gaw shinggyim masha shagu a masin salum hta Wenyi a marang e tawn da ai Ga Shaka rai nga ai (Ezehkela 36: 27).

 

Shawng de ga shaka tawn da ai hte maren sha, masha langai hku tawn na rai tim, Shi gaw yu maya masha n re ai; Karai kasang hkum nan rai nga ai; Shi a Kasha shingtai Yesu Madu hkum nan rai nga ai.

 

Dai Ga Shaka hpe galoi aten tawn da nna shagrin da ai rai?

 

Myihtoi ni hku tsun da ai dai ga shaka ningnan hpe Yesu Madu nsa htum na shawng shana na daw sha poi hta masat ai ga shaka rai nna, hpang shani wudang ntsa si hkam ai shaloi shi a sai hte ka tawn da nna shagrin da ai rai nga ai.

 

Shi a sape ni hte rau Paska daw sha poi hpe galaw lai wa ai. Mungkan ntsa hta shi a hpang jahtum daw sha poi ngu anhte ni tsun ga ai. “Nanhte yawng ndai hpe la nna sha mu; ndai gaw, nanhte a matu ap kau na, nye a hkum rai nga li ai,” (Mt 26: 26; Mk 14: 22; Lk 22; 20). “Nanhte yawng ndai hta na lu mu; ndai gaw nye a sai rawng ai gawm rai nga ai; shut hpyit mara raw mat lu mu ga, nanhte hte masha nlang hte a matu ru kau na, htani htana ga shaka ningnan a sai rai nga ai; ngai hpe adum nga na matu ndai galaw mu,” (Mt 26: 28; Mk 14: 24; Lk 22: 20).

 

Yesu madu hkum nan anhte a matu Chyoi Pra Hkum Sakramentu hpe gaw de da ya ai. Anhte a matu Ga Shaka ningnan masat dingsat hpe tawn da ya ai. Myit hkrum ga sadi tawn na matu myit sharawng awng la ai majaw lani mi jau nna anhte matu Ga Shaka tawn da ai. Yesu a hpang jahtum daw sha poi hta hkrak tup nan hpring tup wa ai rai nga ai.

Dai Ga shaka gaw anhte hpe mara dat hkyamsa ya ai; Wenyi sak ningnan hpe jaw ya ai; Ga sadi tawn buga rai nga ai Sumsing mungdan hta ning ngai lu ai chyeju ni hpe jaw ya ai.

 

Anhte Karai Kasang hte myit hkrum ga shaka tawn ai lam gaw wenyi hta kashin kamun hkam la ai aten hta shagrin ai rai nga ai.

 

 Chyum mungga daw lahkawng hta San Petru kashin kamun lam hte seng nna tsun da ai. “Karai Kasang a man e ga shaka tawn da ai lam rai nga ai,” (1Pet 3: 21). Yesu Madu wudang ntsa si hkam ai a marang e, shinggyim masha ni yawng a matu, mara dat hkyamsa lam hpe jaw da ai. Bai hkrung rawt ai a marang e, yawng a matu htani htana asak hpe jaw da ya ai.

 

Raitim, anhte dum ra ai gaw, Yesu Madu anhte langai hpra hte ga shaka tawn da ai re. Tsun mayu ai gaw, anhte a myit hkrum ga sadi hpe marai hkum shagu Karai Kasang hte sen htu ra ai.

 

Kashin kamun chyeju kumla a marang e, anhte a mara ni hpe kashin shatsai kau ya ai. San Petru tsun ai hte maren nga yang anhte a hkum hkrang hta na maza ni hpe kashin kau ya ai hku n re ai sha, anhte a wenyi hta kap nga ai mara hpe kashin shatsai kau ya ai. Kashin kamun chyeju kumla hta anhte a sak prat ningnan rai nga ai Wenyi asak nga nga ai, (Kasa 2: 38). Kashin kamun chyeju kumla a marang e Wenyi Karai Kasang gaw anhte hpe Israel myusha ningnan, nawku hpung masha ningnan shatai ya ai. Yesu Madu a hkum adaw achyen ni tai wa ga ai, (1Kor 12: 12-13).

 

Lu Sha Gam Ladaw gaw Karai Kasang hte anhte lapran tawn da ai Ga Shaka hpe bai shatsawm na aten rai nga ai.

 

Kashin kamun hkam la ai aten hta anhte marai hkum shagu hte tawn da ai ga shaka hpe Karai Kasang jahpring shatsup ya ai. Karai Kasang anhte hpe hkye hkrang la ai hta masat shadang n nga ai myit galu kaba hkam sharang ai tsawra myit kaba hte woi ningshawng ya ai. Karai Kasang anhte hpe hkye hkrang la ai hta masha langai ngai hpe jasum kau ai, hprai ai lam nga ai ngu kadai mung tara hta ai lam n lu galaw ai.

 

Anhte ni mung kadai n lu tsun ga ai. Mt 1: 15 hta, “Dai a ten ladaw dik wa ai hte, Karai Kasang mungdan gaw ni wa magang ra ai! Nanhte a shut hpyit mara ni kaw na kayin wa nna Karai Kasang a Kabu Gara Shiga hpe kam sham nga mu,” ngu Madu Yesu hkaw tsun hpang ai.

 

Aten ni wa sai ngu Madu tsun ai gaw anhte ni Karai Kasang hte tsan gang ai kaw du nga ai na sai rai nna, shi hpang de bai kayin wa na matu aten du sai ngu tsun ai rai nga ai.

 

“Karai kasang a mungdan gaw ni wa magang ra ai” ngu ai gaw nat sadan woi maw ai hpe hkam la na malai Karai Kasang a matsan dum lama ai hpe hkam la nna shi a hkang da ai hta hkawm sa na matu rai nga ai.

 

“Myit malai lu mu” ngu ai gaw anhte a sak prat hta Israel myusha ni zawn sha Karai kasang a matsan dum lama ai ga sadi hpe hprai nga ga ai majaw myit malai na lam law law nga ga ai hpe shadum ai rai nga ai.

 

“Kabu Gara Shiga hpe kam sham nga mu” ngu ai gaw Yesu Madu hkang da ai lam ni gaw teng man ai rai nna, dai hta kam sham ai hte sha n hkum tsup shi ai; Kabu Gara Shiga hte maren sak hkrung nga pra ra ga ai hpe shadum ya ai.

 

Ndai Lu Sha Gam Ladaw gaw anhte a matu htuk manu dik ai ladaw rai nga ai. Karai Kasang gaw shi tawn da ai Ga Shaka hta sadi dung ai wa rai nga ai. Anhte ni mung shi zawn ga sadi dung ai rai yang galoi rai tim, myit malai hpang hkrat ai ngu nga na n rai ga ai.

 

Akyu hpyi saga

Wa Karai Kasang e, ndai Lu Sha Gam Ladaw hta Nang Madu hkang da ai hte maren myit malai ai lam hta hkawm sa let sumsing mungdan hpe hkam la lu na lam woi ya rit. Anhte a Madu Hkristu a marang e hpyi nem nga ga ai.  Amen.

 

Hkristu hta tsaw ra ai hkungga ai Tara hkaw sara/num ni hte nu wa hpu nau ni e, ndai laban gaw Lu Sha Gam Ladaw hta (1) ngu na laban rai nga ai.

 

Hti ang ai Ja Chyum Mungga ni gaw

Chyum Mungga Daw (1) Ningpawt Ninghpang 9: 8-15

Chyum Mungga Daw (2) 1Peter 3: 18-22

Kabu Gara Shiga Mk 1: 12-15

 

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.