Karai Kasang A Mungga - Hkristu Hkaw Hkam Poi

Hkristu Hkawhkam Poi, Pranwan Ladaw (34), B, 2021
Hkristu hta tsaw ra ai nu wa hpu nau ni e, ndai laban gaw Hkristu Hkawhkam Poi rai nna Pranwan Ladaw hta (34) ngu na laban rai nga ai.
Kahtawlik Nawku Hpung a nawku daw jau shaning hpe ndai Hkristu Hkawhkam poi laban hte shaning shagu jahtum ai. Du na laban kaw nna gaw Du Sa Ladaw de shang wa sana rai nna Nawku daw jau shaning a shaning nnan hpang ai rai nga ai.
Tsun ga nga yang laban shani shagu gaw Hkristu Hkawhkam poi nhtoi mung rai nga ai. Yesu Hkristu hpe “Madu Karai” ngu anhte shaga ai gaw Shi a mungdan htum ngu n nga ai hpe hkap la ai rai nga ai.
Madu langai chyu sha Karai Kasang rai nga ai. Tsaw dik htum hpung shingkang anga nga ai. Htum mat ai ngu n nga ai mungdan madu ai wa rai nga ai. Ndai hkap yin la ai lam hpe anhte ni “Kasa Ni A Kamsham Ai Akyu Hpyi Ga” tsun shagu galaw ga ai.
Ndai laban na chyum daw langai, lahkawng hte Kabu Gara Shiga gaw ndai laban na poi hte htuk dik hpe lata da ai. Chyum daw langai hpe Myihtoi kaba ni (Major Prophets) hta na langai rai nga ai Myihtoi Daniel chyum laika kaw na rai nga ai. Messiah Karai a hpang jahtum nhtoi hta du sa na lam myihtoi htoi da ai wa rai nga ai. Chyum daw lahkawng hpe “Apoclypse” ngu tsun ai Yawhan a Shingran Laika hta na rai nga ai. Latin ga “Apoclypse” a lachyum gaw, shawng de makoi taw ai hpe shadan shadawn ai, ngu ai rai nga ai.
Ndai chyum laika hpe Yesu Madu si hkam ai hpang, shaning (60) daram aten, Yawhan shi si wa na ni ai aten hta, Yesu hte Shi a hpang hkan ai ni a hpang jahtum awng dang ai lam hpe shiga jaw na matu yaw shada nna ka da ai rai nga ai.
Kabu Gara Shiga gaw San Yawhan a laika kaw na rai nga ai. Dai chyum daw gaw Yesu Madu Hkawhkam re ai lam, nni nkri hkam nga ai shaloi tsun shapraw dan ai lam rai nga ai. Pilattu hte ga san ga htai tsun ai shaloi, Yesu Madu gaw Pilatu jaw ai si ari dan hpe hkam la ai raitim masa lam hpe gaw hting hkang lai wa ai.
Chyum daw masum hte gaw bung ai shiga hpe jaw ya nga ai. (1) Yesu Madu anhte hte nihtep ai hku nga ai zawn, kadai gara hkawhkam mung n nga lai yu ai, (2) Yesu Madu a daru magam hpung dagu gaw mungkan hta nga ai hkawhkam ni yawng hta grau kaba ai rai nna, htani htana gring nga ai.
Anhte a Hkristu Hkawhkam, anhte a kun dinghku masha
“Shana e ndai shingran mu nga ai laman, shinggyim masha hte bung ai langai mi ngai mu nngai. Shi gaw ngai kaw shani sa wa nna, sumwi ni hte gawan da let htani htana ahkrung nga sai wa hpang de sa nhtawm shi a man e nga nga ai,” ngu Daniel shingran mu ai lam tsun da ai (Daniel 7:13).
Kabu Gara Shiga hta Yesu Madu, Daniel a shingran hte Shi hkum hpe shi tsun ai gaw, “Dai shaloi e, Masha Kasha gaw daru magam hpung shingkang kaba hte sumwi ni hta e du sa ai hpe mu lu na mara ai, ngu ai rai nga ai (Mk 13:26).
San Mahte a laika hpe bai hti yu yang, Yesu Madu, “Masha Kasha chyawm gaw baw tawn na shara pyi n lu nga ai”, ngu tsun da ai (Mt 8:20).
Yesu Madu, shi hkum hpe shi, “Masha Kasha” ngu ai ga si hpe lata lang ai lachyum gaw, matsan ai raitim, hpung shingkang nga ai raitim, anhte hte rau galoi mung nihtep ai hku nga nga ai hpe madun dan na matu tsun ai rai nga ai. Mara hta na lai nna anhte zawn shinggyim masha hkum hpe hkam la ai rai nga ai. Yesu Madu gaw kaw si hpang gara ai ni hpe chye na ya ai (Mk 10:12; Yh 4:7).
Yesu Madu gaw anhte a matu kabu lawm ai, myit tsang lawm ai. Yesu Madu gaw anhte zawn lam shagu hta gunglau hkrum yu ti mung yubak mara n galaw ai hkingjawng agyi kaba rai nga ai lam Hebrew 4:15 hta mu lu ga ai.
Yesu Madu gaw anhte a kun dinghku masha rai nna nihtep ai hku hku hkau ai wa rai nga ai ngu ai hpe hkam la ai gaw anhte a matu n-gun kaba rai nga ai.
Hkristu Madu, hpung dagu rawng ai Hkawhkam hta htum ngu n nga ai ahkang aya nga ai
Ndai laban hti ang ai chyum daw lahkawng rai nga ai, Yawhan a shingran laika hta Yesu Madu hpe amying shingten jan mau jaw da ai hpe mu lu ai. “Dinghta ga na hkawhkam ni hpe up ai Hkawhkam, hkawhkam ni a Hkawhkam”, “madu ni a Madu” ngu amying shingten jaw da nga ai (Shingran 1:5; 19:16).
Shawng na Jat ai Hkristan ni gaw zingrit zingrat hkrum ai shaloi raitim, Hkristu a mying ningsang hta asak hpe jaw kau ai du hkra shanhte a makam masham hpe madun lai wa ma ai. Dinghta mungkan hkawhkam hta arawng aya nga ai raitim, Hkristu Madu hta gaw htum ngu n nga ai hpung dagu hte hpung shingkang nga ai. Sumsing lamu de woi shalun la ai shaloi, Kawa Karai Kasang gaw Hkristu Madu hpe lamu kasa ni hte san pra ai ni a Hkawhkam, shinggyim masha hte hpan da hkrum nga yawng nga pra a Hkawhkam hkinghtawng hpe ap jaw da ai, dang da ai. Yesu Madu gaw Kawa Karai Kasang a myit ra ai hte maren, Karai atai, Masha atai hku nna sadi dung let shinggyim masha ni hpe hkye la ai majaw dai hkinghtawng hte grin dan nga ai.
“Sumsing lamu hta e mung, ginding aga hta e mung, up hkang na ahkang nlang hte ngai hpe ap ya ni ai,” ngu Yesu Madu, Shi a sape ni hpe tsun ai (Mt 28:18). Shi a hpung dagu atsam gaw dinghta mungkan hta ya du hkra n mu lu shi ai, hpang de mung mu lu na n rai.
“Shi a mungdan mung htum ngu n nga ai htani htana agrin nga na ra ai,” (Lk 1:13). Lamu Kasa Gabriel Maria hpe ga sa shana ai shaloi tsun ai ga rai nga ai.
“Shi gaw ahkang aya, shagrau sha-a ai hte hkawhkam a daru magam jaw shagrau hkrum ai wa rai nna, amyu baw ni yawng a masha ni yawng mung, amyu bawsang ni hte ga amyu myu shaga ai ni yawng mung shi hpe daw jau na mara ai. Shi a ahkang aya gaw htani htana agrin nga nna, shi a mungdan htum mat na ra ai n rai,” (Daniel 7:14).
“Ngai gaw ningshawng wa (Alpha) mung, jahtum wa (Omega) mung rai nga nngai, nga nna moi prat e mung, ndai prat e mung, du na ra ai htawm hpang prat e mung anga nga ai Chyahtum Chyalai n-gun atsamrawng ai Madu Karai Kasang tsun nga ai” (Shingran 1:8).
“Alpha” ngu ai ga si gaw Greek ga si rai nna laika ga si a shawng na ga si rai nga ai. “Omega” ngu ai ga si mung greek ga si rai nna, laika ga si a jahtum na ga si rai nga ai.
Yawng mayawng gaw Yesu Madu hta hpang ai rai nna, yawng mayawng gaw Shi hta jahtum ai rai yang Shi galoi mung anga nga na ngu tsun ai mung rai nga ai. Yesu Madu hta lai nna ndai ga hpe kadai mung tsun lu ai n rai.
Hkristu Hkawhkam, anhte hpe tsaw ra ai, anhte a matu si hkam nna Shi Madu ai yawng anhte hpe garan ya ai
“Jinghku ni a matu tinang a asak nawng kau hkra tsaw ra ai myit hta grau kaba ai tsaw ra myit ngu ai gaw n nga sai,” (Yh 15:13). Ndai ga hpe Yesu Madu wudang ntsa si hkam na shawng shana hta shi a tsaw ra myit hpe sakse madun ya ai. Dinghta hkawhkam ni gaw hpyen majan gasat na matu hpyen ma ni hpe dat dat ma ai. Hpyen ma ni gaw ra yang ra ai hku si hkam ra ai. Hpyen ma ni si htum ma jang she hpyen du ni majan gasat ai hta lawm wa chye ai.
Yesu Madu gaw shi hpang hkan ai ni a matu shi a asak hpe jaw kau ai. Dai majaw Hkristan ni gaw Hkristu a htum ngu n nga ai tsaw ra myit a majaw sak hkrung nga lu ai zawn hpu nau wa a matu mung sak jaw ap nawng lu ma ai.
Yesu Madu gaw Shi a prat anhte hpe garan jaw ya ai. Anhte ni Kashin Kamun hkam la ai shaloi Yesu Madu gaw shi a asak rai nga ai Wenyi asak hta anhte hpe shalawm la nna, Karai Kasang a kun dinghku masha hta mung shalawm la ai majaw shi a kahpu kanau ni tai wa saga ai.
Chyoi pra hkum Sakramentu Chyeju kumla hku nna Shi a hkum hte sai anhte hpe jaw ya ai.
Yesu Madu gaw Shi a Hkingjawng aya hta anhte hpe shang lawm shangun ai. Ndai laban na chyum daw lahkawng hta, Yesu Madu gaw shi a Kawa Karai Kasang hpe daw jau na matu anhte hpe hkingjawng ni shatai ya ai ngu tsun da ai (Shingran 1:6). Kashin Kamun hkam la sai ni yawng gaw hkingjawng amyu ni tai wa sai rai nga ai. Hkingjawng amyu ni rai ga ai hte maren, Hkristu hte rau Wa Jau ni Kawa Karai Kasang kaw nawng jau ai Misa Hkungga hte anhte hpyi ai akyu hpyi ga ni gaw langai hta sha jawm pawng nga ai. Anhte gaw Hkingjawng amyu ni rai ga ai majaw anhte a asak gaw Karai Kasang sharawng awng ai teng man hkungga nan rai nga ai.
Yesu Madu gaw Shi a kabu pyaw ai lam anhte hpe garan jaw ya ai. “Ngwi pyaw simsa ai gaw ngai nanhte hpe tawn da ya ma sade ai,” (Yh 14:27).
“Wa e, Ginding aga garai n lat kaw nna nang ngai hpe tsaw ra nga ndai majaw, ngai e jaw ai nye a hpung shingkang hpe ngai e ap ya da ai masha ni mu lu mu ga, ngai nga ai shara hta shanhte hpe mung nga shangun mayu nngai,” (Yh 17:24).

Akyu hpyi saga
Wa Karai Kasang e, Hkristu Hkawhkam hpe hkungga lara nawku daw jau lu na chyeju jaw ya rit. Shi a hpung shingkan npu e sak hkrung nga let hpu nau ni a matu tinang asak hpe n lahpawt ai sha ap nawng daw jau lu na atsam mung jaw ya rit. Anhte a Madu Hkristu a marang e hpyi nem nga ga ai. Amen.
Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, ndai laban gaw Hkristu Hkawhkam Poi rai nna Pranwan Ladaw hta (34) ngu na laban rai nga ai.

Hti ang ai Ja Chyum Mungga ni gaw
Chyum Mungga Daw (1) – Daniel 7:13-14
Chyum Mungga Daw (2) – Shingran 1:5-8
Kabu Gara Shiga – Yh 18:33-37
Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.