Hkristmas Ladaw (2), the Epaphany of the Lord, C, 2021

2 January 2021

          Hkristu hta tsaw ra ai nu wa hpu nau ni e, ndai laban gaw hkristmas ladaw hta (2) ngu na laban rai nna, Hkaw Hkam masum Poi nhtoi mung rai nga ai.

Ndai laban galaw ai “Epahpany” “Hkaw Hkam masum Poi” gaw Paska poi hte Pentecost poi ni hta grau jau nna galaw ai poi rai nga ai.

Moi shawng na Hkristan masha ni gaw kaga myit dum mai ai poi ni hte rau Hkristmas poi a malai galaw lai wa ai poi rai nga ai.

Yesu Madu gaw Messaiah “Hkyela Madu” re ai lam shadan shalen ai poi rai nga ai. Karai Kasang shi hkum shi madun dan ai atai masum Karai langai Karai Kasang hpe shadan shalen ai poi rai nga ai.

Ndai poi gaw Yesu Madu shinggyim masha ni hpe hkye hkrang la ai lam shadan shadawng ai majaw Karai Kasang hpe shakawn kungdawn ai lachyum hpe madun dan ai.

Hkawhkam masum poi hpe english ga hte “Ephapany” ngu shamying shaga ma ai. Grerek ga kaw na yu hkrat wa ai. Lachyum gaw “shadan dan ai” “dan ai” ngu ai rai nga ai. Shawng de n mu n hkrum yu shi ai lama ma, shing n rai, masha langai ngai dan pru wa ai hpe tsun ai rai nga ai.

Anhte Hkristan ni a matu ndai poi gaw Shinggyim masha labau hta, shawng de n chye n mu yu shi ai hkye la Madu Yesu Hkristu a shadan dan ai hpe tsun ai rai nga ai.

Poi a yaw shada lam gaw Yesu Madu shinggyim masha ni hpe hkye hkrang la na wa hku “dan ai majaw, Karai Kasang hpe chyeju shakawn ai lam rai nga ai. (1) Sagu rem ni gaw, Bethelehem mare hta shangai chying hkai wa ai Sagu rem wa Yesu Madu hpe hkye la Madu hku masat masa galaw hkap la ai gaw shinggyim masha ni hpe shawng nnan shadan dan ai rai nga ai.

(2) Shi hkum hpe hpaji rawng ai ni kaw shadan dan ai majaw shanhte ni nta de bai htang wa ai shaloi ushat wa kang hta kaleng taw ai ma chyangai gaw yu maya ma n re ai sha, mungkan ga hpe hkye la ai Madu rai nga ai hpe teng man ngang grin ai hte kam sham ma ai. (3) Asak 30 ning aten, Yawdan hka hta Yawhan Baptista a lata kaw kashin kamun hkam la ai shaloi shawa masha ni hpe shadan dan ai. (4) Canon mare na hkungran poi hta shi a shawng lang na lamik kumla hte myithtoi htoi ai lam rai nga ai hka hpe tsabyi ntsin de gale shatai ai hpe sape ni hte mu ai ni yawng kam sham ma ai.Aten ni na she na, galai she galai wa ai raitim, laklai poi ni hpe galaw lai wa ma ai.

Yesu Madu a shangai poi hpe December 25 ya shani galaw lai wa ma ai.Ya mung matut manoi galaw nga ai. Yesu Kashin kamun hkam ai poi hpe gaw “Ephapany” Hkawhkam masum poi a hpang laban hta galaw ai. Du na laban hta galaw na rai nga ai. Cnnon maren hta, hka hpe tsabyi shatai ai laksan poi hpe gaw shawng de Yesu Madu Yawdan hka hta kashin kamun hkam ai hte rau galaw lai wa ai raitim, ya dai ni na aten ni hta gaw n galaw sai rai nga ai. Ndai chyum daw hpe chyawm gaw Nawku daw jau shaning a “C” shaning na Yesu Kashin Kamun hkam ai Poi a hpang laban hta hti ga ai rai nga ai.

Moi shawng de gaw ndai mabyin hte seng ai poi nhtoi hpe lak san galaw lai wa yu ai rai nga ai. Raitim, Ephapany hkawhkam masum poi hpe madung galaw yu hkrat wa ai re lam chye lu ai.

Shawng na Hkristan ni gaw tara maigan myu sha ni Hkristan masha tai wa ai ni rai ma ai majaw Yesu Madu hpe hkap la kam sham ai, Yuda myu sha n re ai ni ngu, Yesu hpe sa nawku ai hpaji chye ai hkawhkam masum hte shing daw hkap la hkam la ma ai. Shanhte hpe matsan dum lama myit kaba hte Yesu Madu lam woi la ai n rai yang gaw shanhte ni Hkristan makam hpe lu la na n re ai hpe atsawm sha chye na hkap la da ma ai.

Dai majaw gaw shawng na Hkristan ni “ephapany” hkawhkam masum poi hpe manu shadan hkap la galaw lai wa ma ai rai nga ai.

Prat shagu na masha law law wa Hkristu Madu hpe hkap yin la ma ai hta anhte ni mung lawm nga ga ai. Dai majaw daini na anhte Hkristan ni mung Yesu Madu hpe shakawn kungdawn shagrau sha-a ra ga ai.

Karai Kasang gaw Shi hpe kam sham ai myusha ni hpe lam amyu myu, ladat amyu myu hte shadan dan nga ai.

Karai Kasang gaw kadai kaw nna mung makoi magap da ai lam n nga ai. Mara a majaw anhte shinggyim masha ni mahtang shi hpe n mu lu ai rai ga ai. Karai Kasang gaw shinggyim masha shagu shi hpe mu lu na sharawng awng nga ai. Dai majaw mung prat shagu hta Shi hkum hpe shinggyim masha ni kaw shadan dan ai. Shinggyim masha ni shi hpe chye na, tsaw ra na hte shi hte rau sumsing mungdan de du lu na hpe chye da na ma ai hpe sharawng awng ai.

Hpan da hkrum yawng gaw Karai Kasang a hpaji byen-ya hte matsan dum la ma ai hpe dum chye na matu shinggyim masha ni hpe saw shaga nga ai. Yawng gaw shinggyim masha ni a akyu ara matu rai nga ai.

Anhte shinggyim masha ni hkum nan mung Karai Kasang hpe chye lu hkra shakut ra ga ai. Shinggyim masha shagu gaw tinang a masin salum kata sung sung myit sumru let Karai Kasang hpe tam sagawn ga ai rai yang, teng man kabu pyaw lam hpe lu la na, Karai Kasang a saw shaga nsen hpe mung na lu na rai ga ai.

Kaga hpu nau ni hku hta Karai Kasang Shi hkum hpe shadan dan nga ai. (1) Anhte hpe shangai shaprat ya ai kanu kawa ni hku, (2) anhte tsaw ra ai kahpu kanau ni hku, (3) anhte a tsaw ra hku hkau magam rum manau manang ni hku shadan dan nga ai. (4) anhte a matu n hkru ai masha ni hte jam jau jaw ai ni hku nna mung Karai Kasang shi hkum hpe shadan dan nga ai.

Anhte a myit ru myit tsang lam hte kabu pyaw lam ni hku nna mung Shi hkum hpe shadan dan ya nga ai.

Chyum Laika ni hku nna, Nawku Hpung a sharin shaga ai hku nna, Nawku hpung kanu kawa ni kaw na yu hkrat wa ai sharin shaga ga ni hku nna mung Karai kasang anhte kaw shadan dan nga ai.

Karai Kasang gaw Madu Yesu Hkristu hta anhte hpe shadan dan nga ai. “Karai Kasang shi nan a gawng shingyan hkrang sumla hpe dagraw ai hte mungkan jan shata shagan nga yawng dinghta hpe shi a hpung shingkang rawng ai mungga atsam hte bau sin da nga ai,” (Heb 1:3). Mara hpe dat ya ai shaloi, Wenyi anhte hpe jaw bang ya ai hku Karai Kasang a kun dinghku masha ni shatai ya ai gaw grau nna dan dawng nga ai.

Karai Kasang gaw Shi hpe teng man ding hpring ai hte shagrit shanem let myit san seng ai hku tam ai ni hta Shi hkum hpe shadan dan nga ai.

Hpaji Chye ai Hkawhkam masum gaw shangai wa ai hkye la Madu hpe hkan tam ai shaloi, shagan hpe yu nna hkan tam ma ai. Shanhte gaw lamu shagan ni hpe masam maram chye ai ni rai na masa hta nga ai. Shagan hpe yu nna tam ai gaw shanhte a matu shawng na lahkam rai nga ai. Karai Kasang lam woi ya ai hte shagan a hpang hkan ma ai majaw Bethelehem na dumsu wakang hta hkye la Madu hpe mu lu, nawku lu, kumhpa sak jaw lu ma ai hte, kabu gara let tinang a buga nta de bai htang wa lu ma ai.

Dai ma hpe kumhpa sak jaw nawku nga ten, shanhte a masin salum hta htoi tu wa ai nhtoi gaw shagan hta grau ai ngu hkam sha ma ai majaw dai ma gaw hkye la Madu rai na hpe shanhte ni chye na let hkap la kam sham wa ma ai.

Yuda salang ni hte Herod hkawhkam a myit masin ni gaw dai hkawhkam masum a myit masin hte grai nan shai ma ai. Messiah Madu shangai wa ai lam Herod hkawhkam chye ai shaloi, dai ma hpe hkan shamyit kau na masing jahkrat wu ai.

Hpaji rawng ai hkawhkam masum gaw shingran jaw hkrum ai hte maren dai hkawhkam hpe n jahkrum ai sha lam kaga hku tinang a mungdan de bai nhtang wa ma ai. Karai Kasang hte ma Yesu a ntsa sadi dung ai hpe madun ai rai nga ai.

Hkristan pra gaw Hkristu hpe aten shagu tam nga na matu rai nga ai.

Kashin Kamun hkam la da sai ni yawng gaw Hkristu hpe tam ai lam n mai jahkring da ai. Hkristu hpe anhte hkrum saga ai raitim, Shi a lam grau sung ai hku chye na hkawn hkrang hkap la kam sham lu hkra matut manoi shakut nga ra ga ai. Hkristu a lam tam sawk sagawn na gaw anhte shinggyim masha ni a matu htum ngu n nga ai.

Langai hpra, shing n rai wuhpung wuhpawng hte akyu hpyi ai shaloi, sak hkrung mungga hpe hti, madat, sumru la ai shaloi, grau nna gaw, Missa Hkungga nawng jau ai shaloi ni hta Karai Kasang anhte kaw shadan dan nga ai.

Hkristan ni gaw marai langai sha rai tim, wuhpung wuhpawng hte rai tim, masha ni a lapran, Karai Kasang hpe shadan dan ra ai.

Anhte Hkristan masha langai hpra gaw kaga masha ni hpe Hkristu Madu hpang woi wa ai ni tai nga ra ai (Mk 1:45; Mt 9:31).

Anhte Hkristan ni gaw Nawku hpung mying hte Hkristu madu hpe mungkan masha ni kaw shadan dan ya ra ai.

Akyu hpyi saga

Wa Karai Kasang e, shangai wa sai Messiah Hkyela Madu hpe kabu gara hkap tau la let hpu nau ni kaw mung shachyan ya lu na chyeju atsam Hkristan masha shagu hpe jaw ya rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra hkung ga ai kanu kawa Tara hkaw sara/num ni hte nu wa hpu nau ni e, ndai laban gaw hkristmas ladaw hta (2) ngu na laban rai nna, Hkaw Hkam masum Poi nhtoi mung rai nga ai.

Hti ang ai Ja Chyum Mungga ni gaw

Chyum Mungga Daw (1) Is 60: 1 - 6

Chyum Mungga Daw (2) Ehpe 3: 2-3, 5-6

Kabu Gara Shiga Mt 2: 1- 12

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.