Karai Kasang A Mungga - Du Sa Ladaw Laban 2, 2021

Du Sa Ladaw Laban 2, 2021

Du Sa Ladaw (2), C, 2020
(sumsing mungdan du lu na re majaw kabu sharawng awng nga na matu saw shaga ai lam)
Hkristu hta tsaw ra ai nu wa hpu nau ni e, ndai laban gaw (C) shaning na du sa ladaw (2) ngu na laban rai nga ai.
Karai Kasang galaw ai magam shagu gaw anhte hpe Shi Madu hpang de woi la na matu chyu sha rai nga ai. Kasha shingtai Yesu Hkristu mungkan ga kaw sak hkrung nga ten galaw awng dang lai wa ai lam yawng gaw anhte hta mung matut manoi naw galaw awng dang nga ai. Dai lam ni hpe shaning shagu a nawku daw jau lamang ni hta anhte ni alak mi bai sum ru nga ga ai. Anhte marai langai hpra hpe mung Shi a hkye hkrang la magam hta shang lawm gun hpai shangun mayu nga ai. Dai zawn shang lawm galaw gun hpai nga ai rai yang, Hkristu a hpang jahtum bai du sa na aten gaw hpring tsup wa na rai nga ai.
Hkye hkrang la lam gaw manu jahpu n jaw ra ai Karai Kasang a chyeju kum hpa rai nga ai. Kadai mung lak san ahkaw ahkang jaw na matu hpyi la n mai ai, hpyi la n lu ai. Karai Kasang anhte hpe tsaw ra ai majaw anhte hpe hkye hkrang la ai she rai nga ai. Karai Kasang hkum nan anhte hpe hkye hkrang la na sharawng awng nga ai.
Chyum daw langai hta Myihtoi Baruch gaw laklai ai myihtoi ga ni hpe htawn tsun da ai hpe mu lu ga ai.
Laban shani hti ang ai chyum daw hta Myihtoi Baruch laika gaw nau n lawm ai hpe dum shai na ma ai.
Baruch gaw Hkristu n paw pru shi ai shaning kru tsa (600) daram aten hta nga lai wa ai Myihtoi Yeremiah a Amu madu tai yu ai wa rai nga ai. Myihtoi Yeremiah hte Baruch shan lahkawng yan gaw masha ni e zingri zingrat ai hpe law law lang hkrum lai wa ma ai. Shan a myihtoi ga ni hpe n hkap la ma ai, ninghkap lai wa ma ai majaw Yerusalem hpe hpyen ni a lata de jaw kau ra ma ai. Lahkawng yan gaw Egyip mungdan de gawt shapraw kau hkrum ma ai hte sat kau mung hkrum lai wa ma ai ngu labau sagawn ai ni htang da ma ai.
Myihtoi ni gaw Yeresalem hpe “kanu” shing n rai, myu shayi ngu shamying shaga chye ma ai. Israel Myusha ni gaw dai shanhte shaga shamying ai wa a kashu kasha ni re ngu hkam la ma ai. Ndai laban na Baruch chyum laika hta Yerusalem kaw na Babylon de mayam shatai na woi wa hkrum ai ni matu hkrap ngu hkrap ngoi ai wa gaw gaida num (Yeresalem) rai nga ai ngu tsun da ai. Yuda myusha ni a matu gaw tinang a mungdan de bai du lu na myit mada shara kachyi mi pyi n nga mat sai, sak hkrung let si ai hte bung nga ai.
Anhte a buga htung lailen hta kun dinghku masha langai ngai si yang si ai hkumtsawp moi mang hpe shatsam dat ai htung lai nga ai raitim, yawn hkyen ai masat kumla ni bu hpun mawn sumli ai htung lai n nga ai. Myusha nkau ni, mungdan nkau ni hta gaw masat kumla bu hpun mawn sumli ai lam nga ai hpe mu lu ga ai.
Sinna mungdan na masha ni gaw si mat ai wa a amyu ni hta na la ni gaw n law htum lata lahpum kaw sumpan ahpraw mawn sumli da chye ma ai. Num ni gaw achyang nsam bu hpawn hte mawn sumli bu hpun ma ai.
Myihtoi Baruch a chyum laika hta mung Yerusalem masha ni maigan mungdan de mayam tai na matu woi mat hkrum ma ai shaloi amyu shayi langai achyang nsam bu hpun nna yawn lahpu hkrap ngu hkrap ngwi ai hte shingdaw da ai.
Dai zawn shingdaw tsun nga ai kaw nna kalang lata shi a ga si galai mat nna, Yeresalem mare hpe kabu pyaw nga na matu shalan shabran shadum ga tsun lai wa ai hpe bai mu lu ga ai.
Yerusalem gaw yawn madai hkrap ngu hkrap ngwi ai kaw nna kabu pyaw ai kumla bu hpun mawn sumli lu wa na lam, dai gaw shayi sha langai zawn rai na re lam tsun da ai rai nga ai. Shi a baw ntsa hkawhkam shayi jan mau hkam la na ra ai ngu n gun jaw da ai.
Myihtoi Baruch a ga gaw hpa rai kalang lata galai shai mat ai rai? Yawn hkyen hkrap ngu hkrap ngwi ai kaw nna kalang lata hpa rai kabu pyaw na matu saw shaga ai rai kun?
Mayam prat kaw na lawan dik ai hku bai lawt wa nna Yerusalem de bai du wa na re majaw rai nga ai.
Myihtoi Baruch a tau nau myihtoi ga galoi ten hta dik wa ai rai?
Persia hkawhkam Zairus gaw Yuda myusha ni hpe, n myit mada, tinang mungdan dum nta de shang lawt ai hte bai wa lu ai na lam ahkaw ahkang jaw ai shaloi, lawt lu ai lam kau chyan hpe gaw lu la masai rai nga ai. Shanhte ni gaw matsan ai ni re majaw tinang buga de bai du wa ai shaloi rai tim, jam jau jam hkau yak yak hkrak hkak prat hpe ningnan kaw nna bai gaw sharawt la ra ma ai.
Nawku Htingnu hpe shawng gaw gap la ngut ai hpang, Yeresalem mare jarit nhpan ni hpe ngang kang ai hku gaw gap da la ma ai. Ngut jang she tinang kun dinghku nta masha ni hte seng ai dum nta ni hpe gaw gap la ma ai. Raitim, shanhte a lapran hta lu su ai ni hte matsan ai ni a lapran garan ginhka ai lam nga wa ma ai majaw, grau nna lu su nga mai ai ni hte hpung woi ningbaw ningla ni gaw, Baruch a myihtoi ga hpe n hkap la ma ai majaw hpring tsup ai prat de n du lu shi ma ai.
Myihtoi Baruch tau nau myihtoi da ai ga gaw Israel myusha ni mayam prat kaw na bai nhtang wa lu ai ai hta lachyum grau sung ai, akyu ara grau kaba lam re ai gaw teng sha rai nga ai.
Karai Kasang gaw Baruch a marang e mungdan (Yerusalem) langai de bai htang wa na matu sha n rai, shinggyim masha yawng (Yeresalem mare masha ni chyu sha n re ai) Karai Kasang hta bai kahkying gumding wa nna Shi a tsaw ra ai hta jawm pawng wa lu na matu rai nga ai.
Prat n bung ai ten hta ka tawn da ai Yesu Madu hta dik wa ai myihtoi ga hpe ndai hku mu lu ga ai.
“Dai Madu a matu nam mali e lam lajang mu! Anhte a Karai Kasang a matu zaibru jang e lam jasan jaseng mu! Kadit shagu hpe jahpring mu; bum shagu hpe shara mu. Kawng ni gaw pa layang tai mat nna rawk marak re ai mungdan gaw pri tsawm mat na ra ai,” (Is 40:3-4, Baruch 5:7, Lk 3:5).
Myit masin shagrit shanem ai ni chyu sha Karai Kasang lata ladawn da ya ai hkye hkrang la lam hpe hkam la lu ai. Dai masha ni a marang e sha kaga masha ni hpe hkye hkrang la lam hta garum shingtau ya na ra ai.
Ndai laban na Kabu Gara Shiga gaw, Yawhan Baptista Yawdan hka hta Mungga hkaw hpang ai lam rai nga ai. Du sa na hkye la madu Messiah hpe hkap la na matu Yuda masha ni hpe Karai Kasang lata da ai lam hkaw tsun ai rai nga ai.
San Luka a prat hta mung shawa masha ni hpe up hkang ai ni a mying jahpan hpe mung shi a laika hta ka matsin da ai hpe mu lu ai. Dai ten na up hkang masa hta mungdan yawng a daju rai nga ai Roma hkawhkam Tiberius, Palestine mungdan na up hkang du gyi salang ni, Roma up hkang du salang Pilatu, Galile mungdaw hte up hkang salang Herod, bai Roma hkawhkam wa dang tawn da ai hkingjawng kaba Kaihpa, hte arawng power kaba ai Arna ni hpe shalawm da ai.
Karai Kasang gaw hkye hkrang la magam hta mungkan arawng power kaba ai ni hte hkingjawng ni hpe hpa rai n jai lang ai rai?
Mungdan gumsan daru magam arawng aya hku yu yang, Roma hkawhkam a tara shang mungga ga hkaw mi hte sha mung shawa masha ni Messiah hpe hkap la na ma ai. Hkawhkam a ga hpe kadai mung ninghkap lu na n rai ma ai.
Dai hte maren sha makam masham hku yu yang, Yerusalem na hkingjawng kaba kawn Yesu Madu gaw shaning law law Yuda masha ni ala dingda nga ai Messiah re ai ngu ndau ya yang Yuda myu sha ni dai hpe ninghkap na n rai ma ai.
Karai Kasang gaw shinggyim masha ni sumru ai hku n sumru ai. Shinggyim masha ni gaw gawng ba, rai dum ai hte ra marin ai myit hte sak hkrung nga ai ni re majaw kadai ningbaw raitim mung Karai Kasang jaw da ai hkye hkrang la ai lam hpe hkap la na n rai ma ai. Yuda myusha ni hta na makam woi ningbaw ningla ni hpe myit malai lu na matu Yawhan shadum sadi jaw ai hpe n hkap la ma ai. Yawhan hpe mung Herod hkawhkam du htau sat ai hpe mu lu ai.
Karai Kasang gaw shinggyim masha ni hta na myit masin sanseng sanpra ai ni hpe hkye hkrang la magam hta sang lawm gun hpai lawm na matu saw shaga jai lang ai hpe mu lu ai. Hkye hkrang la ai wa gaw Karai Kasang hkum nan rai nga ai. Shinggyim masha ni gaw kadai raitim, tinang hkum a asak hpe mung, kaga masha ni a asak hpe mung hkye hkrang la n lu ai.
Yawhan Baptista gaw shagrit shanem ai wa, lusha gam akyu hpyi ai wa, ding hpring dingman ai wa, masha ni hpe garum shingtau ai wa rai nga ai.
San Pawlu hte San Hpilipi yan gaw anhte Karai Kasang a hkye hkrang la lam hpe gara hku hkap la ra ai, kaga masha ni kaw hkye hkrang la lam hpe gara hku gun sa ra ai lam ni Hkristan hpung masha ni hpe sharin ya ma ai.
San Pawlu hte Sila yan akyu hpyi ai shara de sa ai lam hta nat shung ai num langai mi hte hkrum hkrum rai ma ai. Dai nat shung ai num sha hpe bau da ai madu ni gaw shi a marang e gumhpraw law law lu la ma ai. San Pawlu hte Sila yan akyu hpyi sa shagu dai num gaw shan hpe, “ndai ni gaw law, tsaw htum ai Wa a shangun ma ni rai nna nanhte kaning rai hkye hkrang la hkrum na lam tsun shana dan ai ni rai nga ma ai law,” ngu jahtau marawng rawng di ai hpe dum ai Pawlu gaw, Yesu a mying ningsang hte ngai nang hpe hkang da de ga, shi kaw na pru mat u, ngu jang numsha kaw na nat pru mat wa ai.
Nat shung ai num hpe bau da ai madu ni gumhpraw lu lam mat mat ai majaw San Pawlu hte Sila hpe n jaw n ang ai hku tara shawk tara jeyang ma ai. Shan hpe zingri ma ai hte hkyuk htawng hta mung sharawng da ma ai lam Kasa Laika 16:16-24 hta mu lu ga ai.
Hpilipi kaw na Hkristan hpung masha ni gaw San Pawlu hpe tsaw ra hkung ga ai ni rai ma ai hte maren San Pawlu hte Sila hkyuk htawng hta rawng nga ai ten alu arung arai ni hte sa garum ya ma ai.
San Pawlu mung shanhte hpe chyeju dum ai lam Hpilipi hpung masha ni hpang de shagun dat ai laika 1:7-8 hta mu lu ga ai. “Nanhte yawng gaw, ngai bawng dung nga ai aten hta mung (hkyuk htawng sharawng hkrum ai aten hta mung) Kabu Gara Shiga hpe ndut ndang makawp maga hkaw tsun sharin shaga nna shangang shagrin da na ahkang lu nga ai ten hta mung, nanhte nlang hte gaw Karai Kasang jaw ai chyeju hpe ngai hte rau jawm hkam la manit dai.”
“Madu a magam bungli hpe gun hpai hpang ai shani kaw nna dai ni du hkra nanhte gaw dai Kabu Gara Shiga hkaw tsun ai lam hta ngai hpe garum shingtau galaw gun hpai lai wa manit dai,” (Hpil 1:5).
“Nanhte hta ndai mai kaja ai magam bungli hpang da ya ai wa gaw Hkristu Yesu bai yu wa ai nhtoi garai n du yang dai amu hpe ngut hkra shatsup shatup na ra ai, ngu nna ngai myit kam nga nngai,” (Hpil 1:6).
San Pawlu gaw Hkristu a lam grau sung ai hku chye na let anhte a matu lajang da ai masin masa ni hpe chye da na matu, shinggyim masha shada tsaw ra hkung ga, manu shadan, garum shingtau lam hpe lani hte lani grau grau law jat wa na matu, mara shangun hpa n tai hkra sadi maja nga nna Hkristu bai du wa ai shaloi, Shi a hkye hkrang la lam hpe hpring tup hkam la lu na matu shadum sharin shaga da ai rai nga ai.

Akyu hpyi saga
Wa Karai Kasang e, San Pawlu sharin shaga shadum jahprang da ai hte maren Hkristu hpe grau chye chyang let shada tsaw ra daw jau nna Hkristu a hkye hkrang lam ai hpe hkam la lu na chyeju anhte hpe jaw ya rit. Anhte a Madu Hkristu a marang e, hpyi nem nga ga ai. Amen.
Hkristu hta tsaw ra ai hkung ga ai Tara hkaw sara/num ni hte nu wa hpu nau ni e, ndai laban gaw du sa ladaw hta (2) ngu na laban rai nga ai.
Hti ang ai Ja Chyum Mungga ni gaw
Chyum Mungga Daw (1) Bar 5:1-9
Chyum Mungga Daw (2) Hpil 1:3-6, 8-11
Kabu Gara Shiga Lk 3:1-6
Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.

Add new comment

10 + 0 =