Karai Kasang A Mungga - Du Sa Ladaw Laban 2, 2020

Ja Chyum Mungga ni gaw

Chyum Mungga Daw (1) Isaia 40: 1-5, 9-11

Chyum Mungga Daw (2) 2Petru 3: 8-14

Kabu Gara Shiga Marku 1: 1-8

SHAGRIT SHANEM AI MYIT HTE MYIT MADA NGA AI LAM

Hkristu hta tsaw ra ai nu wa hpu nau ni e, ndai laban gaw (B) shaning na du sa ladaw (2) ngu na laban rai nga ai.

Anhte jinphpaw mungdan gaw ya she shawa lam ni loili kaja wa ai rai nga ai. Ya mung lam grai naw shatsawm jat ra ai. Galu kaba ai mungdan ni hpe yu yang bum tsaw ni kade law law, hka panglai kade mi ding ding lam hpe lamu ntsa lam, ga lam, ga npu lam, hka lam, hka kata lam, hka kata na ga lam zawn re ai lam ni grai law ma ai hte aten kadun laman hkawm lu hkra galaw da ma ai.

Anhte buga ni hta gaw dini du hkra ga lam pyi n lu shatsawm shi ga ai. Mare langai hte langai lapran hkawm sa na rai yang lagaw lam hkawm lu sa lu na madang sha galaw da lu ai. Dai pyi grai naw yak ai majaw hkrun lam hkawm yang grai pu ba ga ai re.

Yinam ta rai jang bum lam ntsa ni hta ga gyi nna lam shara law law hta pat kau ya ai lam ni, hkawm sa ai masha n nga wa jang nam ni tu, hpun ru ni hte hpring rai taw nga ai majaw hkawm sa ai ni a matu grai nan yak ai hte pu ba hkam nna hkawm sa ra ga ai.

Dai majaw mare kaba kaw na mungdan up salang ni du wa na rai jang mare bum ntsa de lung nna mare masha yawng na lu hkra lam shatsawm na matu marawn jahtau ndau saw shaga ga di ma ai. Saw saga ai shaloi nta langai kaw na nta masha langai sa na matu saw shaga ma ai.

Mare langai hte langai matut ai lam ni hta tinang a mare maga lam daw mi hpe shatsawm da da di ma ai. Ngam ai daw mi hpe gaw dai matut ai mare masha ni galaw na matu ngam da ya ya di ma ai.

Shanhte gaw lam ntsa kaw na nam ni hpe hkyen ai, ga gyi nna kaput taw ai ga ni hpe htu dagawt kau, hkumpup hka ni ing ai shara hpe ga gaput di ma ai.

Du gyi salang ni hte mare salang ni hkawm sa hkawm wa ai hta masan sa ai hkra hkawm sa lu na matu mare shawa masha ni jawm galaw ya ai rai nga ai.

Ndai laban na chyum daw ni hta shiga gun sa ya na kasa marai masum gaw, kade nna yang du sa na Madu Karai a matu lam ni hpe shatsawm da na matu wuhpung masum hpe ndau shana da ai lam tsun da ai hpe anhte ni na lu saga ai. (1) Shawng na langai gaw Myihtoi Isaiah, shing n rai, shawng na laban hta tsun da sai hte maren tinang a shangun ma langai kaw nna mungdan kaga de gawt shapraw kau hkrum ai Israel myusha ni hpe tsun shadum ai lam, (2) lahkawng ngu hta gaw kashin kamun jaw ai Yawhan Baptista Palestine mung masha ni ni hpe tsun shadum ai lam, (3) masum gaw kasa Petru gaw Yesu Madu a si hkam ai hte bai hkrung rawt ai hpang shaning mali shi nga lai wa sai Hkristan masha ni hpe tsan shadum ai lam ni rai nga ai.

MYIHTOI ISAIAH GUN SA YA AI SHIGA KAJA

Ndai laban na chyum ga daw langai gaw tinang mungdan rai nga ai Palestine kaw nna den hkying hku tsan ai Babylon de gawt shapraw kau hkrum ai ari hpe Yuda myusha ni hkam sha ra ai ten ka da ai rai nga ai. Babyon kaw nna Palestine de hkawm sa ai lam gaw yak hkak jam jau dik htum ai lam rai nna, malu masha grai taw ai zaibru jang pa lam rai nga ai. Dai zaibru pa lam mung den hkying hku galu ai rai nga ai.

Yaweh Karai Kasang gaw myihtoi ni hku tsun ai hta “Nsen langai gaw ‘dai Madu a matu nam mali e lam lajang mu! Anhte a Karai Kasang a matu zaibru jang e lam jasan jaseng mu! Kaduk shagu hpe jahpring mu; bum shagu hpe shara mu. Kawng ni gaw pa layang tai mat nna rawt marak re ai mungdan gaw pri tsawm mat na ra ai”, ngu ai rai nga ai (Is 40: 3-4).

Dai zawn tsan dik ai hte yak dik ai lam hpe hpaw la na matu gaw grai nan kaba ai masin project re ai majaw Babylon de gawt shapraw kau hkrum ai Yuda myusha ni a matu maibyin na masa nan n nga ai.

Dan len ai gaw, Myihtoi tsun ai lam gaw masha hkawm lam n rai nga ai. Dai aten hta shabung mai ai zaibru jang pa gaw Yaweh a hkang da ai lam ni hpe kau da ai Yuda myusha ni a masin salum ni hpe wenyi lam hpaw na matu, gaw de na matu rai nga ai. Myihtoi Isaiah shadum ai gaw (1) Bum hte bung ai nanhte a arawng mala rai dum ai  myit hpe htu gyi shara kau mu (2) Hkaraw zawn tai mat ai nanhte kabai kau ai Karai Kasang a hkang da tara ni hpe nnan kaw nna bai madat hkam la hkan sa mu ngu ai rai nga ai.

Yaweh Karai Kasang gaw Yuda myusha ni a masin salum ni hpe galai shai ya na matu, shanhte a shut hpyi mara kaw na mayit malai gayin wa na matu du sa wa na rai nna, shi a myusha ni jing jing rai nga na matu rai nga ai.

Dai gaw shanhte a dum nta de bai shaga la na matu sa du ai rai nga ai. Yaweh Karai Kasang gaw shanhte hta ra kadawn nga ai lam ni hpe galang bai yu lajang ya na hte shanhte hte htani htana rau nga na matu du sa na rai nga ai. Is 40: 11 hta, “Shi gaw sagu rem ai wa zawn shi a sagu hpung hpe lanu lahku na ra ai; shi gaw sagu kasha ni hpe shinggyin la nna dai ni hpe shi a lata lahpum hta pawn da na ra ai; shi gaw dai ni a kanu ni hpe angwi sha woi sa na ra ai,” ngu tsun da ai.

Bai, Is 40: 9 hta mung, “..hkum hkrit nga et. Shanhte a Karai Kasang du sa wa nga ai ngu, Yuda mare ni hpe tsun mu!,” ngu Karai Kasang Myihtoi Isaiah hpe matsun da ai.

Yuda myusha ni Yerusalem de bai n htang wa lu ma ai hte Yerusalem Nawku Htingnu hpe mung bai gaw gap da ma ai rai nna, Palestine mung masha ni hku nga lu ma ai gaw Myihtoi Isaiah a myihtoi ga kau chyan mi hpring tup wa ai rai nga ai. Raitim, hpang de shaning (500) ning daram na jang she dai myihtoi ga hpring tup hpe hkam la lu ma ai lam Kabu Gara Shiga hta sang lang da ai hpe mu lu ga ai.

YAWHAN BAPTISTA GUN SA YA AI KABU GARA SHIGA

Ndai laban na Kabu Gara Shiga hta Myihtoi Isaiah a myihtoi ga hpring tsup wa ai lam Marku sang lang da ai hpe chye lu nna mau nga ga ai. Mau ra ai lam gaw (1) Myihtoi Isaiah gaw nam maling kata kaw nna pru let “Madu Karai a matu lam lajang da mu” ngu jahtau shadum da ai. Dai gaw Yaweh Karai Kasang shangun dat ai kasa hku nna tinang hkum hpe madi ai rai kun, shing n rai, kashin kamun jaw ai Yawhan Baptista hpe madi ai rai kun? (2) Shi gaw Yaweh Karai Kasang Israel myusha ni gawk shapraw kau hkrum ai kaw nna hkye la na matu du sa na lam hpe ndau ai kun, shing n rai, shinggyim masha yawng hpe hkye la na matu Yesu Madu du sa na lam hpe ndau ai rai kun? Ndau zawn sumru yak ai lam gaw anhte hpe mau hpa byin shangun nga ai.

Chyum laika ka sara gaw myihtoi Isaiah hte Yawhan lahkawng yan hpe tsun ai rai nga ai. Chyum laika sara dai hta lai jan nna naw ndau shangun mayu ai lam langai gaw mungdan kaga de gawt shapraw kau hkrum ai Yuda myusha ni hpe shalawt dat ya mayu ai hte shinggyim masha yawng hpe Yesu a marang e, hkye hkrang la na matu rai nga ai. Myihtoi ga gaw mungdan kaga de gawt shapraw kau hkrum ai Yuda masha ni hpe tinang buga de bai wa nga shangun na lam hte, shut hpyi mara kaw nna shalawt ya ai kumla rai nga ai.

Yawhan Baptista mung Myihtoi Isaiah a shiga hpe grau chye na hkra bai sang lang da ya ai. (1) Shi ndau ai lam gaw Yesu Madu du sa na lam rai nna, shi a aten na masha ni hpe hkye la na matu Yaweh du sa ai hpe Isaiah hkaw tsun ai zawn hkaw tsun ai rai nga ai. (2) Raitim, Yesu Madu du sa ai gaw, mungdan langai hpe sha, shing n rai, mungdan n kau ni hpe sha hkye la na matu n rai nga ai. Shinggyim masha yawng hpe hkye la na matu du sa ai rai nga ai hpe hkaw tsun ai. (3) Mungkan ntsa nga ai ni yawng gaw sumsing mungdan kaw nna gawt shapraw kau hkrum ai ni rai nga ai majaw, Karai Kasang jaw da ai anhte a nta majing sumsing mungdan de bai woi la na matu hkaw tsun ai. (4) Shinggyim masha yawng hpe sagu rem wa zawn tsaw ra myit kaba hte du sa nna, Myihtoi Isaiah a ndau shana ai kabu gara shiga hpe jahpring shatsup ya na ai rai nga ai. Yawhan 10:1-6 hta, “kaja ai sagu rem wa” Lk 15: 4-7 hta, “Mat mat ai sagu anhte yawng hpe tsawra myit kaba hte tawn da na ru ai,” ngu rawng nga ai.

Yesu madu gaw anhte hpe hkye hkrang la lam ap jaw ya na rai nna, shagrit shanem ai myit masin rawng ai wa gaw hkye hkrang la hkrum na rai nga ai.

Hkye hkrang la na matu du sa ai Karai Kasang hpe shinggyim masha yawng kabu gara ai hte n hkap tau la ai gaw mau hpa nan rai nga ai. Israel mung masha ni maigan mungdan de gawt shapraw kau hkrum ai kaw nna buga de bai n htang wa na matu Karai Kasang lam hpaw ya ai mabyin hta mu lu nga ai. Karai Kasang gaw Yuda myu sha ni hpe shalawt ya nna buga de bai wa lu na matu Persian (ya- Iran) hkawhkam Zairus hpe jahkrat kau ai. Raitim, ndai lam hpe yawng n hkam la ma ai. Law malawng gaw maigan hkawhkam a n pu kaw nga mayu ma ai. Hpa majaw nga yang, shanhte a sut masa lam hta hkrat sum wa nna Yaweh Karai a makawp maga ai npu kaw nga na hta, karai kata myit jasat hte nga na ra sharawng ma ai.

Kashin kamun jaw ai Yawhan Baptista gaw Yuda masha ni myit malai lu nna hkye la Madu Yesu Hkrsitu hpe hkap la na matu tsun ai shaloi mung bai mu lu ga ai. Yuda ningbaw ningla ni n hkap la ma ai. Raitim, yu maya masha ni gaw hkap la ma ai.

Mk 1:7 hta, Yawhan gaw “Nye a hpang e du sa na ra ai wa gaw, ngai hta grau kaba ai wa rai nga ai. Shi a kyepdin sumri ni hpe gum raw ya na pyi ngai n ging n dan nngai,” ngu shagrit shanem let tsun da ai.

San Petru a kabu gara shiga gaw anhte Hkristan ni hte anhte yawng a matu rai nga ai. Madu Yesu si hkam nna bai hkrung rawt ai hpang shaning mali shi na ai shaloi, San Petru a sape langai gaw buga shara shagu chyambra nga ai Hkristan masha ni a matu shadum jahprang laika langai ka dat ai. Shi ka ai aten hta San Petru gaw si mat sai raitim, San Petru ka da ai zawn, Nawku Hpung gaw “San Petru laika lahkawng ngu shamying da ai. Anhte a matu mung shi dai hpe ka da ai rai nga ai.

San Petru gaw Hkristan ni hpe Madu Karai du sa na lam tsun dan ai. Dai hpe chye na hkap la ma ai rai tim, aten na na la ra ai majaw myit htum wa ma ai rai nna, du sa na kun, n du sa na kun, ngu ai hpe myit um ang hpang wa ma ai.

San Petru gaw Madu Karai du sa na na matu, na taw ai lam shanhte hpe shang lang dan ai. Karai Kasang gaw shinggyim masha yawng hpe hkye la matu, shanhte ni myit malai na matu aten law law jaw da ai majaw na ai rai nga ai. Karai Kasang gaw galoi mung chyahkyi sau sau, ya ju ya hkyen n ga law ai. Karai Kasang a matu shaning hkying mi gaw lani mi daram sha nga ai rai nna, shinggyim masha ni a shaning hkying mi galaw ra ai lam ni hpe Karai Kasang gaw lani mi lapran shangut la lu ai.  Karai Kasang gaw hpung dagu hte hpring ai rai nna, tsaw ra matsan dum lama myit hte hpring tup ai wa rai nga ai.

“Dai re majaw nye a manang ni e, nanhte dai nhtoi hpe la nga ai ten hta Karai Kasang a man e nanhte a myit masin san seng nna mara n kap u ga hte si hta ngwi pyaw sim sa nga lu na matu atsam htum hkra shakut shaja nga mu,” 2Petru 3: 14.

Akyu hpyi saga

Wa Karai Kasang e, Ndai du sa ladaw hta nang Madu hpe hkap la lu na matu anhte hta nga ai atsam mahkra hte shakut shaja lu na chyeju jaw ya rit. Anhte a Madu Hkristu a marang e, hpyi nem nga ga ai. Amen.

Karai Kasang a Mungga   Mungga : Wa Jau Patrick Gawmaw Hkawng Yae