Karai Kasang A Mungga - Du Sa Ladaw Laban 1, 2021

Du Sa Ladaw Laban 1, 2021

Du Sa Ladu (1), C, 2021
(Hkristu a hkye hkrang la magam gaw mungkan htum ten du hkra anga nga na)
Hkristu hta tsaw ra ai nu wa hpu nau ni e, ndai laban gaw (C) shaning na du sa ladaw (1) ngu na laban rai nga ai.
Kahtawlik Nawku Hpung a shaning shagu na nawku daw jau shaning hpe ladaw hte ladaw garan masat da ai hpe nu wa ni dum shai na re ngu kam ai. Nawku daw jau ladaw ni hpe Du sa ladaw, Hkristmas Ladaw, Lusha gam ladaw, Paska ladaw, Chyoi Pra ai Wenyi yu hkrat wa ai poi hte kaga poi ni, bai, shaning tup a pranwan ladaw ngu masat da ga ai.
Ndai laban kaw nna gaw shawng de tsun dan sai ladaw ni hpe ningnan kaw nna bai hpang saga ai. Raitim, shawng shaning na zawn sha hkrak tup n bung ai lam ni nga ai hpe mung hkrum wa na ga ai. Dai gaw Nawku Hpung a nawku daw jau shaning ni a nhtoi ni hta hkan nna ladaw ang ai nhtoi ni shai mat wa ai hpe tsun mayu ai.
Du sa ladaw hta anhte ni hpe shajing shachyip da shangun mayu ai lam gaw (1) Hkristmas Ladaw hta Hkristu Madu du sa na hpe myit hprang let ala nga na matu hte (2) Hkristu Madu mungkan htum ai hpang jahtum nhtoi hta bai du sa na aten hpe ala nga na matu rai nga ai.
Yesu Madu gaw shinggyim masha ni hpe hkye la na matu, shing n rai, Karai kasang a kun dinghku masha ni hpang de bai shaga la matu mungkan ga de du sa wa ai rai nga ai.
Mara hta lai nna anhte shinggyim amsha ni zawn sha shinggyim hkum sa la nna mungkan ga de du sa wa ai. Hkawnset Nu Maria kaw na shangai wa nna Nazareth mare hta nga kaba wa ai. Asak sumshi (30) ning hpring ai shaloi Palenstine mungdan hta Karai mungga hpe hkaw tsun hkawm ai. Yuda Hpung woi ni hte Mungdan Asuya daru magam ahkang aya lu ai ni e zingri zingrat ai hpe hkrum, wudang ntsa si hkam, si ai kaw nna bai hkrungrawt, Karai Kasang a hkra maga e hkaw dung, Kawa Karai Kasang ga sadi tawn da ai hte maren Wenyi Karai Kasang hpe anhte hpang de shangun dat, Shi hkum nan mung anhte hte rau nga, Mungkan ting hpe hkye hkrang la ai.
Mungkan shinggyim masha ni a hkye hkrang la hkrum ai lam gaw mungkan htum ten du hkra agring nga na ra ai.
Hkristu a hkye hkrang la magam gaw shinggyim masha langai sha ngam taw ai raitim matut manoi anga nga na ra ai. Hkye hkrang la magam gaw htum ngu nga na n rai.
Shi a hkye hkrang la magam hpe gun hpai na matu kasa ni hpe dan dawng ai hku ap jaw da ai lam Yh 20:21 hta mu lu ga ai, “Wa gaw ngai hpe shangun dat ai hte maren, ngai mung nanhte hpe shangun dat made ai.”
Yesu Madu Kawa Karai Kasang hpang de bai htang wa ai a marang e, Shi ap jaw da ai lit magam hpe ngam kau da ai hku n re ai sha, matut manoi rai, asharawng ashara rai nna galaw nga ai rai nga ai. Dai lit magam hta Shi a kasa ni hte rau kam sham ai masha ni yawng shang lawm lit la gun hpai lawm nga na hpe Yesu Madu ra sharawng nga ai.
Yesu Madu gaw Shi gaw de da ai Nawku Hpung a marang e, Mungkan ting hpe hkye hkrang la hkrum shangun ai hta sha n-ga, dai Nawku Hpung a marang e, Shi a hkye hkrang la magam ni hpe shinggyim masha ni a matu kahtap kahtap nna galaw shangun nga ai.
Jau, shing n rai, masha langai ngai gaw masha langai hpe Kashin Kamun hkam ya ai shaloi, Yesu Hkristu hkum nan Kashin Kamun hkam ya ai rai nga ai.
Dai zawn sha, kaga Sakramentu ni hpe jaw ya ai shaloi mung, Yesu Hkristu hkum nan dai chyeju hpe galaw ya ai rai nga ai.
Jau, shing n rai, tara hkaw sara gaw Kabu Gara Shiga hpe htawn tsun ai shaloi, Yesu Hkristu hkum nan Palenstine kaw hkaw tsun ai hte maren, dai wa a marang e hkaw tsun ai rai nga ai.
Misa Hkungga hta Jau gaw, Muk hte Sabyi hpe shaman akyu hpyi ai shaloi, Madu Yesu hkum nan Shi a hkum hte sai hpe shabyin ai rai nga ai. Chyoi pra hkum garan ai shaloi, Yesu Hkristu hkum nan Shi a hkum hte sai hpe daw jau ya ai rai nga ai.
Jau gaw Mara raw sakramentu jaw ai shaloi, machyi ai ni hpe namman chya sakramentu jaw ai shaloi, Yesu Madu hkum nan mara lu ai ni hpe mara dat ya ai, machyi ai wa hpe shamai ya ai rai nga ai.
Ndai Sakramentu chyeju kumla ni hpe hkam la ai gaw chyoi pra sumla ni a man hta baw gum hkung ga jaw ai, akyu hpyi ga tsun ai, mahkawn shakawn ai lam ni hta grau nna manu dan ai, grau nna lachyum rawng ai rai nga ai.
Nawku daw jau ai lam hpe galaw ai shaloi, grau nna laban nhtoi hta gaw kun dinghku nta masha ni zawn rai nna Hkristan masha ni hpawng de akyu hpyi ai gaw Hkristu a hkye hkrang la magam hpe dan dawng ai hku galaw lu ai, hkye hkrang la magam hta shang lawm ai lachyum kaba ai rai nga ai.
“Shada da hkrum zup hpawng de ai htung lai hpe nkau mi kau tawn da ai lam galaw nga ma ai; anhte gaw dai zawn n galaw ai sha, dai Madu bai du sa na shani ninghtoi ni wa magang ra ai hpe nanhte chye nga myit dai majaw, shada da grau nna n-gun jaw hkat nga ga,” ngu Hebrew hpung masha ni hpe laika sara wa n-gun jaw da nga ai (Heb 10:25).
Laban nhtoi nawku daw jau ai lam gaw Hkristan ni a poi hpe lachyum shalen ya ai, lachyum hpe jahkum shatsup ya ai.
Du sa ladaw hta lachyum nga akyu rawng ai hku nawku daw jau chyeju hkam la ra ga ai. Ndai du sa ladaw hta Karai Kasang gaw anhte Hkristu hpe hkap tau hkap hkalum la na jing jing rai nga shangun mayu ai.
Nawku Hpung gaw anhte a hkye hkrang la lam hpe gara hku hpang wa nna, gara hku hpring tsup wa ai hpe sumru shangun mayu ai. Ndai laban na chyum daw ni gaw Hkristu a sak prat gaw galoi mung du sa ladaw, shing n rai, Hkristu du sa na hpe myit mada ala nga na lam sumru na matu madi shadaw ya ai.
Anhte a matu hkye hkrang la lam hpe gara hku hpang wa ai rai, kadai hpang wa ai rai? Nang ngai, kadai mung n re ai ai gaw teng ai. Karai Kasang a yaw sin ai lam, daw dan ai lam gaw n myit mada da ai shingran yupmang kaw na byin wa ai n re ai; shawng npawt kaw nna nan anhte hpe hkye hkrang la na matu npawt kaw na ndung hkren, kata lam ni yawng hpe masin jahkrat da sai rai nga ai.
Anhte langai hpra hta kaga masha ni hte n bung ai, shai ai shingdu labau ni nga na ga ai. Nkau ni gaw shangai wa ai hpang gade nna yang kashin kamun chyeju hpe hkam la lu ai, nkau ni gaw asak kaba ai hpang kashin kamun hpe hkam la lu ai. Dai shaloi Karai kasang a laklai ai chyeju hpe hkam sha lu ga ai.
Du sa ladaw gaw anhte a hkye hkrang la magam hpe awng dawng lu ai hpe sumru na aten ladaw rai nga ai.
“Dai lam ni byin hpang wa jang, rawt tsap nna baw ni hpe sharawt mada yu mu; hpa majaw nga yang, nanhte hpe hkye hkrang la na aten ni wa ra ai,” (Lk 21:28) ngu Yesu Madu sadi jaw da ai.
Wenyi a shadut ya ai chyeju hte San Luka gaw Yesu Madu tsun sadi jaw da ai ga hpe hkrak ka da lu ai rai nga ai. Ndai Yesu Madu a sadi jaw ga hpe Yesu Madu nni nkri hkam si hkam ai hpang shaning sumshi (30) lapran zingri zingrat hkrum jam jau nga ma ai Hkristan ni a matu mung, ya, anhte ni hkum nan a matu mung ka da ai rai nga ai.
Labau hpe yu dat yang, Yesu Madu a mying ningsang hta zingri zingrat hkrum ai nkau ni gaw hprawng makoi mat ma ai, nkau ni gaw sumsing lamu de myit mada lam kaba tawn da let mada yu nga ma ai. Yawng gaw lama ma hpe, shing n rai, langai ngai hpe myit mada lai wa ma ai.
Anhte Hkristan ni gaw si hkrung si htan lam ni hte hkrum ai shaloi raitim, hkrung nga ai shaloi raitim, ngwi pyaw ruyak ai shaloi raitim, teng man ai hkristan sak prat hte n hkrit n tsang ai sha, jing jing rai nga na gaw ahkyak la nga ai.
Yesu Madu hte San Pawlu gaw hpang jahtum nhtoi hta Yesu Madu du sa na lam hpe gara hku myit mada ala nga ra ai lam anhte hpe jaw da sai rai nga ai.
Anhte gaw galoi, gara kaw rai tim, jing jing rai nga ra ai. Satan gaw anhte a hkye hkrang la hkrum na lam hten run na masin jahkrat nna sumprat bang garan ginhka ya nga ai. Shaning htum ai shaloi nsi nai mam hpe zing la na aten hten run lam n nga hkra grau grau sadi maja nga ra ga ai.
Anhte ni galoi mung, gara kaw mung akyu hpyi nga ra ga ai. Anhte hkye hkrang la hkrum na matu Yesu Madu aten shagu bungli galaw nga ai. Anhte mahtang kachyi mi n-gun dat na n kam byin chye nga ga ai, ra kadawn lam law law nga nga ga ai. Dai majaw Karai kasang hkum nan anhte hpe garum ya na, lam woi ya ni, n-gun atsam jaw bang ya na matu Shi kaw shagrit shanem ai myit hte tang shawn hpyi nem nga ra ga ai.
Anhte a sak prat, aten ladaw kaba wa ai hte maren, anhte a tsaw ra myit mung kung kaba jat wa na ra ga ai.
Hkristan prat hta tinang hte nihtep ai htingbu ni hpe tsaw ra ai a marang e Karai Kasang a teng man tsaw ra myit hpe sakse hkam lu na ga ai. Tinang a prat hta Yesu Madu du sa ai shaloi, tinang hte ni htep ai masha ni hpe tsaw ra sakse n madun lu ai wa kadai raitim hkye hkrang la hkrum na n re (Mt 21:31-46).
San Pawlu Htesaloni hpung masha ni hpe shagun dat ai laika hta mung Yesu a sharin shaga shadum sadi jaw da ai ga hpe mahta nna sha sharin shaga shadum sadi jaw da ai. Anhte a prat hta tsaw ra myit gaw lani hte lani kaba jat wa ra ai.
Anhte gaw prat hta Karai Kasang ap jaw da ai lit magam ni hpe sadi dung let myit dik myit pyaw ai hte gun hpai sa wa ra ai. Anhte ni hkye hkrang la lam hpe hkrak hkam la lu na matu gaw Karai Kasang myit ra ai, Shi hkang da ai hpe hkan shatup ra ga ai.

Akyu hpyi saga
Wa Karai Kasang e, ndai du sa ladaw hta Hkristu Madu hpe jing jing rai ala nga lu na matu nang madu jaw ya ai hkye hkrang la magam hta shang lawm gun hpai sa lu na chyeju shinggyim masha shagu hpe jaw bang ya rit. Anhte a Madu Hkristu a marang e, hpyi nem nga ga ai. Amen.
Hkristu hta tsaw ra ai hkung ga ai Tara hkaw sara/num ni hte nu wa hpu nau ni e, ndai laban gaw du sa ladaw hta (1) ngu na laban rai nga ai.
Hti ang ai Ja Chyum Mungga ni gaw
Chyum Mungga Daw (1) Yere 33:14-16
Chyum Mungga Daw (2) Htes 3:12, 4:2
Kabu Gara Shiga Lk 21: 25-28, 34-36
Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.

Add new comment

12 + 2 =