Hkawhkam Masum Poi, the Epaphany of the Lord

Hkawhkam masum poi, the Epaphany of the Lord

          Hkristu hta tsaw ra ai nu wa hpu nau ni e, ndai laban gaw hkristmas ladaw hta (2) ngu na laban rai nna, Hkaw Hkam masum Poi nhtoi mung rai nga ai.

Ndai laban galaw ai “Epahpany” “Hkaw Hkam masum Poi” gaw Paska poi hte Pentecost poi ni hta grau jau nna galaw ai poi rai nga ai.

Moi shawng na Hkristan masha ni gaw kaga myit dum mai ai poi ni hte rau Hkristmas poi a malai galaw lai wa ai poi rai nga ai.

Yesu Madu gaw Messaiah “Hkyela Madu” re ai lam shadan shalen ai poi rai nga ai. Karai Kasang shi hkum shi madun dan ai atai masum Karai langai Karai Kasang hpe shadan shalen ai poi rai nga ai.

Ndai poi gaw Yesu Madu shinggyim masha ni hpe hkye hkrang la ai lam shadan shadawng ai majaw Karai Kasang hpe shakawn kungdawn ai lachyum hpe madun dan ai.

Sagu rem ni gaw Bethelehem mare hta shangai wa ai Yesu Madu hpe Hkyela Madu hku masat dingsat ai lam shinggyim masha yawng hpe shadan shadawng ai rai nga ai.

Dumsu wa kang hta galen taw ai ma Yesu hpe mu ai hpaji rawng hkaw hkam masum gaw dai ma Yesu gaw yu maya masha n re ai; mungkan ga hpe hkye hkrang la na wa teng sha re ai lam ngang grin ai hku kam sham ma ai.

Asak 30 ning hpring ai jang Yawdan hka hta Yawhan Baptista a lata hta kashin kamun hkam la ai shaloi Madu Yesu shi hkum hpe masha wuhpawng lapran shadan shalen ai rai nga ai.

Cannon mare na hkungran poi hta Yesu Madu a mau hpa lamik kumla hku nna, hka hpe tsabyi ntsing gale dat ya ai hpe shi a sape ni hte dai kaw nga ai ni kam sham wa ma ai.

Hkristmas poi hpe December 25 ya shani laksan galaw ai rai nna, ahkyak dik ai lam langai rai nga ai hpaji rawng hkaw hkam ni hpe Yesu Madu shadan shalen ai “epahpany” hpe myit shadum ya ai.

Moi shawng na Hkristan ni gaw shawng de tsun hkai dan sai myit dum shangun ai lam ni hpe sumru let ndai poi hpe hkik hkam ai hku poi galaw ma ai.

Hpaji rawng hkawhkam masum gaw Hkristu hpe hkap la ai Yuda myusha ni n rai ma ai. Moi shawng na Hkristan law malawng gaw Yuda myusha ni n rai ma ai. Hpaji rawng hkawm hkam masum hpe hkap la shagrau ma ai. Yuda myusha ni n rai ma ai raitim, kam sham ai masha ni tai wa ma ai hte kam sham ai masha law jat wa na matu shakut ma ai rai nna, Karai Kasang hpe chyeju shakawn ma ai.

Anhte hte prat ban shagu hta masha law law Hkristu hpe hkap la kam sham ma ai.

Myihtoi Isaiah hkaw da ai tara maigan myusha ni Hkristu hta kam sham wa na lam

Labau hpe sagawn yu yang Karai Kasang lata san da ai Israel myusha ni hpe laklai ai hku tsaw ra ai lam amyu myu hte madun dan lai wa ai.

Karai Kasang madun dan ai mau hpa lamyik kumla ni hpe mu lu ai majaw Isreael myusha ni sha hkye hkrang la hkrum nna ngam ai masha ni gaw jahten kau hkrum na re ngu hkam lam kam shut nga ma ai.

Dai shanhte a myit sumru shut ai lam ni hpe Karai Kasang gaw myihtoi ni hku nna, myit galu kaba ai hte aten la nna nan shading sharai ya ai. Dai zawn myit sumru shut yin la shut ai lam gaw Karai Kasng a tsawra myit hte mungkan ga hpe hkye hkrang la ai amu hpe roi shagoi di ai lam tai nga ai.

Chyum mungga daw langai hta tsun ai Myihtoi Isaiah a kabu gara shiga gaw Karai kasang a hkye hkrang la lam masin gaw Yuda myusha ni a matu sha nre ai; shinggyim myusha yawng a matu re ai lam tsun shadum da ai.

Yerusalem mare gaw ninghtoi shingkang htoi tu nga ai rai nna, mungkan jut shara shagu hta gaw nsin chyip rai nga ai hpe Myihtoi Isaiah mu lu ai lam tsun da ai. Messiah hkye la madu du sa na aten hta htoi tu nga na nhtoi hpe tsun ai lam rai nga ai. Yawhan hkye hkrang la lam hpe tsun dan ai gaw “Dai nhtoi gaw nsin hta e htoi nga ai rai nna, nsin mahtang gaw nhtoi hpe galoi mung ka-up kau lu ai n rai” Yh 1: 4-9.

Dai nhtoi shingkang hpe mu lu ai ni yawng gaw Yerusalem de sa du hpawng de na ra ai. Yerusalem gaw nawku hpung hpe hkrang shapraw ai rai nga ai. Hkristu hta kam sham ai nhtoi shingkang gaw Yerusalem hta shawng htoi tu ai rai nna, dai hta na mungkan shara shagu de chyam bra wa ai. Yuda masha ni Hkristu hpe shawng hkap la ma ai rai nna, de a hpang e kaga myusha ni hkap la wa ma ai majaw rai nga ai.

Shinggyim masha amyu myu gaw manu dan sutgan ni hte rau Hkristu Madu hpang de du sa na ma ai.

Sanhte a matu manu dan dik ai sutgan gaw Hkye la Madu hpe hkap la kam sham ai lam hte hkye hkrang la hkrum lu na matu tsawra myit kaba hte madat mara ai lam nan rai nga ai. Messiah du sa ai hte nan Mungkan ga kaw na nsin gaw hkoi hpang mat na ra ai. Nsin gaw sadan galaw shangun ai mara hpe kumla madun hkrang shapraw ai rai nga ai.

Mungkan ga hta nhtoi hte nsin, kaja ai hte n kaja ai, Hkristu hte Sadan lapran majan byin nga ai. Hpang jahtum hta gaw nhtoi sha awng dan lu ai.

Myihtoi Isaiah a myihtoi ga gaw hpaji rawng ai hkawhkam masum hpe Ma Yesu hpang de lam madun sa ai aten kaw na hpang nna jaw teng wa sai.

Kabu Gara Shiga hta hpaji chye ai hkaw hkam masum hpe gara mungdan na sa ai, gara hku lam madun sa ai lam hte kade rai ma ai lam n tsun dan ai. shanhte hpe marai masum ngu tsun da ai raitim hkrang hku nna hkrak n chye lu ga ai.

Moi shawng de sumsing lamu ntsa laklai shagan langai dan dawng wa jang gaw shangai wa na ma gaw laklai na re ngu hkam la ma ai. Dai hkam la ai lam n jaw ai rai tim Karai Kasang gaw mai kaja ai wa rai nna, shagan langai hpe lamu ntsa shadan dan lai wa ai. Dai rai nna, hpaji chye ai hkaw hkam masum gaw lamik kumla hpe hti nna mungkan a a hkyela madu shangai wa na re lam shanhte hpe dum chye shangun ai.

Shagan gaw shanhte hpe lam madun ya ai. Yuda hkaw hkam shangai wa na shara gaw Yerusalem rai na re ngu dum chye da ma ai raitim, dai shara hta du ai shaloi shagan mat mat ai. Hpa majaw nga yang, shahte ni hkye la madu Messiah hpe shut ai shara hta tam ma ai majaw rai nga ai.

Herod hkaw hkam gaw shanhte hpe Bethelehem sa lam matsun dat ai shaloi she dai shagan bai dan pru wa ai.   “Shing rai shanhte pru mat wa ma ai rai nna, lam e Sinpraw mung kaw nna shanhte mu ai shagan hpe nan bai mu lu ma ai shaloi, shanhte nachying kabu gara nga ma ai. Dai shagan mung ma kaji nga ai shara a ntsa e ang ang di rai sa hkring mat ai ten du hkra shanhte a shawng e sa wa ai. Shanhte dai nta hta e shang bang wa ma yang, dai ma kaji hte kanu Maria hpe shanhte mu mu ai rai nna, lahput hput di let shi hpe nawku mu ai. Tinang a sut sumpu hpaw nna, shi hpe aja, lawban, mura ngu ai kumhpa ni sak jaw mu ai,” (Mt 2: 9-11).

Ndai ram madang galaw ai gaw shanhte myit mada da ai wa nan rai nga ai majaw rai nga ai.

Shawng na Hkristan ni gaw shanhte hkum shanhte hpaji chye ai hkaw hkam ni a hkrun lam hta tawn da ma ai hte dai lam hta hkawm sa ma ai.

Kasa laika hta hti yu yang Wenyi yu hkrat wa ai shaloi Hkristan tai ai ni yawng gaw Yuda myusha ni rai ma ai. Raitim, San Pawlu hkaw tsun ai a majaw kaga myusha ni nawku hpung de yet hte yet jat shang wa ma ai rai nna, hpang jahtum hta shanhte ni law malawng rai mat ai.

Shawng na Hkristan ni gaw hpaji rawng hkaw hkam masum hpe shanhte a manang ni ngu hkap la ma ai. Hpa majaw nga yang, shanhte gaw Yuda myusha n rai ma tim Hkristu hpe kam sham ai Hkristan masha tai wa ma ai majaw rai nga ai. Hpaji chye hkaw hkam masum a mabyin hta shanhte ni lawm ai ngu hkam la ma ai.

Shanhte ni hta na marai hkum shagu gaw masha kaga marai langai ngai a marang e, mabyin langai ngai a marang e, laklai ai nhtoi hpe mu nna, Yesu Madu hpe hkap la kam sham wa ma ai.

Grau nna laklai ai lam gaw, Hkristu hpang de du wa ai lam bung ai ngu nnga ma ai. Karai kasang gaw shanhte marai hkrum shagu a masa hta hkan nna jahkrum jahtuk la nna, tsaw ra myit hte myit lawm myit tau ya ai lam hpe madun dan ai rai nga ai. San Pawlu gaw, dai zawn re ai Hkristan ni hpe “Israel myusha ningnan” ngu shamying nna, “Moses ningnan” Yesu Madu woi awn ai zaibru pa, nam maling kata lai di nna ga sadi tawn da ai sumsing mungdan de hkawm sa nga ai hpe shadum ya ai.

Dai majaw shawng na Hkristan ni gaw Hkaw Hkam masum poi nhtoi hpe hkik hkam ai hku galaw nna kabu gara shang lawm ma ai.  Shanhte hpe Karai Kasang myi man jaw tsaw ra ai hte Yesu Madu hpe dan len ai hku mu lu ai majaw Karai Kasang hpe shakawn ma ai.

Hkristu Madu hta kam sham na matu anhte hpe shaga ai hta Karai Kasang a laklai tsawra myit hpe hpring tup chye na n lu ga ai.

Chyum mungga daw lahkawng hta San Pawlu Ehpesu hpung masha ni hpang de shagun dat ai laika hta tsun ai hte maren nga yang tara maigan myusha ni hpe Hkristu hta kam sham wa na matu ta ladawn saw shaga ai gaw mau hpa kaba rai nna, grai nan dam lada ai magam rai nga ai.

Karai Kasang shi a kasha shingtai Yesu Hkristu hpe mungkan ga de shangun dat ai hte, shinggyim masha ni Shi a Kasha Yesu Hkristu hpe kam sham ai a marang e, Shi a kashu kasha majing shatai la ai lam hpe kadai mung hkrak tup chye na lu na n re ai. Hpa majaw nga yang Karai Kasang anhte hpe shadawn ndang ai, masat shadang n tawn da ai sha tsaw ra la ai majaw rai nga ai.

Madu Yesu hpe kam sham na matu saw shaga la hkrum ai nan mau hpa hte dam lada dik ai mungsung rai nga ai. Karai Kasang ngai hpe hpa majaw Yesu hta kam sham shangun ai kun? Tinang hkum tinang bai san la ga.

Anhte a kun dinghku masha ni hta Hkristan n re ai ni lawm nga ai gaw mai byin nga ai. Anhte ni gaw kaga masha ni hta kaja ai majaw kun, shing n rai, anhte ni kaga ni hta jau nna Hkristan tai wa ai gaw Karai Kasang lama ma yaw sin ai rai kun?

Hkristu hta kam sham ai gaw kadai mung n ging dan ai Karai Kasang a laksan ahkaw ahkang jaw ai lam rai nga ai. Daini anhte ni Hkristan masha tai nga ai gaw Karai Kasang anhte hpe laksan tsaw ra ai majaw rai na re. Kaga lam gaw nnga na sai.

Dai zawn re ai laklai kumhpa hpe shalai shachyam shabra na matu anhte hpe saw shaga lit shatsam hkrum ga ai. De a matu mung Karai Kasang hpe chyeju dum na matu galoi n mai malap ga ai.

Anhte a prat tup hta matut matut nna “Epahpany” “hpaji rawng ai Hkaw Hkam masum” tai nga ra ga ai. Yesu Madu gaw shi hkum hpe anhte hta galoi mung shadan dan nga ai.

Hkristan mying hkam la ai masha nkau ni gaw Karai Kasang jaw da ai chyeju sutgan hpe sim ai hku kyem da chye ma ai. Dai hku di ai gaw n jaw n ang ai. Makam masham gaw kashin kamun hkam la ngut ai hpang, sak prat hta nli kapran ga nna tu kaba wa ai zawn rai ra ai. Anhte a makam masham gaw ngang kang nna law htam wa na matu hte madi shadaw garum ya na matu Yesu Madu anhte hpe lam amyu myu hku jaw ya nga ai makam rai ra ai. Dai makam hte anhte ni shani shagu hkrum ga ai ni, anhte hkrum katut ai mabyin ni, hkam sham ai myit yawn myit kaji ai lam ni hte kabu pyaw ai nna myit dik ai lam ni hta shadan shadawn na matu rai nga ai.

Yesu Madu shadan shadawn ai lam ni hpe anhte ni gara hku bai htang ra na ta?

Yerusalem mare kaw na hkingjawng agyi ni Messiah shangai wa na shara hte aten hpe maram chye da ma ai. Raitim, makam masham machye machang hta kungkyang ma ai ngu htang da ai ni Yerusalem kaw nna n shamu ma ai, n hkawm sa ma ai, n hkan tam ma ai majaw Madu hte nhkrum lu ma ai.

Hpaji rawng ai hkaw hkam masum gaw Messiah du sa na hpe na lu nna Bethelehem de lawan rawt sa ma ai. Shanhte tam ma ai majaw akyu ara hpe hkam la lu ma ai.

Tsun mayu ai gaw Yesu Madu gaw shi hkum shi anhte hpe shadan shadawn nga ai. Shani shagu shagrit shanem ai myit hte shi hpe tam ra ga ai. Tam mu jang, kabu gara let hkan nang ra ga ai. Dai zawn galaw ai a marang e, anhte a makam masham gaw anhte a sak prat hta kunghpan galu kaba wa nna, Yesu Madu hpang de lam woi shadu ya ai htani htana nhtoi shingkan tai nga na ga ai.

Akyu hpyi saga

Wa Karai Kasang e, Hpaji Rawng Hkaw Hkam masum zawn anhte ni mung Yesu Madau jaw ya ai nhtoi hta hkawm sha let Messiah Hkyela Madu hpe tam mu lu u ga. Mu lu ai hte kam sham lu u ga. Makam ngang gring ai hte hpunau ni hpe nhtoi jahtoi lu u ga garum ya rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra hkung ga ai Tara hkaw sara/num ni hte nu wa hpu nau ni e, ndai laban gaw hkristmas ladaw hta (2) ngu na laban rai nna, Hkaw Hkam masum Poi nhtoi mung rai nga ai.

Hti ang ai Ja Chyum Mungga ni gaw

Chyum Mungga Daw (1) Is 60: 1 -  6

Chyum Mungga Daw (2) Ehpe 3: 2-3, 5-6

Kabu Gara Shiga Mt 2: 1- 12

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.