Du Sa Ladaw Laban Mali Year B. 2023

Du Sa Ladaw Laban Mali Year B

Hkristu hta tsawra hkungga ai nu wa hpu nau nawku hpung masha ni ndai laban gaw Du Sa ladaw hta mali ngu na laban rai nga ai.
Kawa Karai Kasang gaw shi a Kasha shing tai Yesu Hkristu hpe anhte a matu Jau Myi Htoi Hkawhkam hku nna mung ap jaw ya ai..Dai madu yesu gaw chyoi pra ai shaman sau chya hkrum sai masha ni rai nga jau myi htoi hkawhkam ni a shawng na du sa wa ai mung rai nga ai..shi langai hta ndai magam lam ni yawng gaw langai hku nna hte kahkyin gumdin nga taw ai lam re ai hpe mu lu ai..

Hkye la Madu hkristu du sa wa na aten ahkying du wa ai hte maren num sha ni hta na dai Hkristu a Kanu tai na matu lata la hkrum sai Maria hpang de Karai Kasang gaw Lamu Kasa Gabriela hpe shangut dat ai rai nga ai..
Lamu kasa Gabriela mung Lamu kasa kaba marai masum nga ai hta na lamu kasa kaba langai rai nga ai..Gabriel ngu ai a lachyum gaw kabu hpa shiga gun sa ai wa ngu ai lachyum rai nga ai..dai majaw ga shaka dingsa hta e mung ..bai ga shaka ningnan hta e mung Karai Kasang a myu sha ni a matu shiga jaw shalai ya nga ai wa rai nga ai..

Ya na zawn Lamu Kasa Gabriela hku nna Ga sa shana shiga jaw ai hpe Lam masum hku nna anhte rau jawm myit sumru yu nga ga..
shawng nnan hku nna Chyoi Pra ai Maria hpe ga sa shana ai lam rai nga ai..
Maria a myit masin hpe myit shang sha hkra Lamu Kasa Gabreela gaw ndai zawn ga si ni hte tsun shana hpang ai..Chyeju hte hpring nga ndai Nang hte Karai wa nga ai..Num mahkra hta nang A Lu ndai nga nna e shawng nnan tsun shahkram ai rai nga ai..dai zawn sharam dat ai ga hpe Maria Na ai shaloi myit salum hta htuk htak myit kahpra ai lam byin hkrum ai..Maria mung ndai lamu kasa gaw nat tsa dan n rai nga ai..karai kasang a shangun dat ai wa lamu kasa mahtang she rai nga ai nga nna myit hta dum chye la lu ai hte maria mung shi hkum nan shagrit shanem chye ai num rai ai a majaw dai mau hpa amu rai nga ai chyoi pra laklai na lam hte shakawn shagrau dat ai lam hpe na dat ai shaloi mau kajawng myit kahpra ai lam byin hkrum ai mung rai nga ai..Ya na zawn Chyoi pra Maria a shagrit shanem ai lam nga ai gaw maga mi hku nna shi hkum nan mahkawn hkawn jet rai nga ai hte dat kasa wa lamu kasa a ga hpe na ai shaloi shi a myit hta kahpra htuk htak ai lam byin hkrum mat ai mung rai nga ai..kaja wa nga yang lamu kasa kawn Maria hpe Num sha ni hta nang A lu ndai ngu ai ndai ga a majaw mung Maria gaw lak lai ai Kanu ngu na prat de du na ra ai hpe chye na hkawn hkrang la lai wa sai rai nga ai..
Dat kasa wa rai nga ai Lamu Kasa Gabreela gaw Karai Kasang a matsun ai hte maren Maria hpe grai hkungga lara ai hte sa du shakram ai hte shiga jaw lai wa ai zawn anhte ni mung Chyoi pra ai Maria hpe hkungga lara ai hte kam hpa garum hpyi ai lam nga ra ai..

lahkawng ngu na hta Lamu kasa hku nna ga shana ai a mungsung lam rai nga ai..
Lamu Kasa kawn Maria hpe Nang gaw Mara kap ai shinggyim masha ni hpe hkye mawai la na rai nga ai Madu Yesu a Kanu tai na re ai lam hpe asan sha tsun dan lai wa ai..dai zawn Maria gaw Karai a Kanu tai hkrum na lam hpe shi chye ai shaloi ..ndai lam gaw gara hku na byin wa lu na rai ta? hpa majaw nga yang ngai la n chye nngai..nga nna e lamu kasa hpe bai htan tsun lai wa ai..ya na zawn dai hku htan tsun ai lam mung Maria gaw shi a mahkawn hkawn jet prat ngu ai hpe kade daram manu shadan nga ai lam hpe asan sha mu shangun nga ai..Kaja wa shi hkum nan mung prat tup a matu mahkawn hkawn jet prat hte nga sana nga nna e ga shaka tawn da ai a majaw ya na zawn Kanu ngu na prat de du na ra ai hpe chye ai shaloi myit masin hta nsim n sa byin hkrum ai hte myit tsang nga ai rai nga ai..dai majaw Lamu Kasa kawn Maria a myit hta dai zawn n sim nsa byin nga ai hpe shazim ya na matu ndai lam mahkra gaw Chyoi Pra ai Wenyi a hpung dagu hte Karai a Kanu ngu ai prat de du wa na mungsung lam hpe maria hpe atsawm sha tsun sanglang dan lai wa ai.rai nga ai.dai majaw Chyoi Pra ai Maria mung Yesu a Kanu ngu na prat de du wa ai raitim shi a mahkawn hkawn jet prat ngu na gaw hten za mat ai lam gaw n nga ai sha mi na hte maren sha rai nga ai lam gaw kaja wa teng nga ai lam hpe kam shut shara n nga ai..zawn anhte a matu kam sham ra ai lam mung rai nga ai..

Kasha Karai Kasang gaw shagrit shanem ai..san seng chyoi pra ai ndai lam ni mahkra hte hpring zup nga ai Maria hpe grai sharawng awng ai hte shi a Karai kanu hku nna lata la ai lam mung rai nga ai..tinang hkum tinang shagrit shanem ai wa gaw shakawn shagrau hkrum na ra ai lam hte myit masin san seng ai ni mung A lu nga ai nga nna e..sak hkrung chyum mungga hta tsun da ai lam nga ai hte maren Maria gaw shagrit shanem nna san seng ai myit salum hte Karai Kasang a shawng hta e myi man pa nna num sha ni hta Alu ai Num shi rai nga lu ai..
Masum ngu na hta Kasha Karai Kasang gaw Maria a hkri tung hta na um na sin hkam la ai lam rai nga ai..
Lamu Kasa Gabriela gaw Maria hpe ga shana ngut ai hpang garai n wa mat shi yang Maria kaw na myit hkrum hkap la sai ga sadi hpe lu la na matu mabyin lam langai hpe tsun dan ai ..dai gaw shi a kana E

.dai gaw shi a kana Elizabeth mung kashu kasha lu na matu asak kaba na nmai sai raitim ya e Karai Kasang a hpung dagu hte kanu ngu na prat hpe shi hkam la lu nga sai lam Maria hpe tsun dan ai...shaloi Maria kawn Karai Kasang a myit sharawng awng ai lam rai nga ai hpe shi hkawn chye la lu ai a majaw..Maria gaw ..yu u Madu a mayam jan nga rai nga nngai..Na a ga hte maren nga hta byin wa u ga..ngu nna bai htan tsun let myit masin mahkra hte myit hkrum hkap la lai wa ai rai nga ai..

ya na zawn ga sadi jaw hkap la ngut ai hpang Kasha Karai Kasang gaw Maria kaw masha hkum hkrang hpe sa dagraw hkam la ai..dai majaw jachyum mungga hta mu lu ai hte maren Mungga gaw masha tai wa sai hte anhte rau nga nga ai..lam mi hku nna kasha karai kasang gaw maria kaw masha hkum sai shan hpe sa dagraw hkam la nna Karai Kasang gaw masha hkum hkrang hte pawm hpawm na matu wenyi hpe hpan da nu ai..masha hkum hkrang hpe dagraw hkam la ai Madu yesu mung shi hkum nan masha ajet rai nga ai hte shinggyim masha ni hte hpa shai ai lam n nga ai raitim shi anhte hte shai lam gaw na mak law hpa ai lam ni pawt sing dawng ai bai n kaja ai hkum sai shan myit masin lam ni ma hkra hpe koi gam tawt lai lu ai.

daini na ten hta anhte mung Lamu Kasa Grabriela hpe kasi yu la let kabu hpa shiga hpe shana ya lu ai hting let ya chye ai..kashu kasha ni tai lu hkra shaut ga..Shiga shana ai lam ngu ai hta anhte chye ra ai gaw kabu hpa shiga.n pyaw hpa yawng hpa shiga nga nna e naw nga ai ngu ai lam rai nga ai..dai shiga kaja hpe jaw ya ai ni mahtang tai nga ga...Karai Kasang a myu sha ni a matu tara lam hpe hkrak rai hkan nang hkan sa nga ai nga yang hpa yawn hpa shiga ni na chye lu na lam n nga ai..yawn npyaw hpa tsang hpa shiga jaw hkrum wa ai ngu ai lam gaw karai kasang shi a myu sha ni rai nga ai anhte hpe galai shai wa na matu yaw shada ai a majaw rai nga ai..anhte marai hkum ngau shagu mung tinang hte ni htep nga ai masha ni a matu lamu kasa ni zawn rai nga let masha ni a prat hkrun lam hpe yu nna.kaja yang mung shakawn shagrau ya shut yang sharai ya... shadum jahprang ya ai hte kaja ai lam hta bai hkawm sa wa lu na matu shakut shaja ya ra nga ai..n ju mat na tsang nna n tsun ai n sharai ya ai nga yang karai kasang a lamu kasa ni a lailen hte nhtan shai ai hku nga ai hte shi a masha ni tai nga ai lam mung mying hkam nna nga ai lam sha rai nga ai.hpe myit dum la nga ai..

Mabyin lam langai mi hpe tsun dan mayu ai..Htawng kata hta masha sat ai wa gaw shi hpe asawng ja hpyak ai hyen du langai hpe shi sat kau ai re hpe arawng mi ala rai nna e tsun taw nga ai raitim..rip kawp tara hte maren shi gaw si dam ja hkrat dat hkrum ai wa rai nga ai..tara.jeyang na lamang hpe garai n galaw shi yang bat lahkawng ram naw ra shi ai shaloi Jau langai mi gaw shi hpang de sa du nna shi hpe galaw shut hpyit kau sai mara ni mahkra a matu myit yawn myit malai lu na hpe tsun shadum ai..dai zawn tsun shadum ai raitim n hkap la hte mara hta naw len noi nga ai..
tara jeng yang na nhtoi a shawng shani e Jau gaw shi hpang de kalang bai sa du nna manang wa e yawng htum nye a myit hpe nang hkan shadik ya rit dai gaw ngai hte rau rai nna Ave Maria akyu ga hpe hpe masum lang sha hkan tsun ya rit ngu nna hpyi shawn la ai..

dai masha sat ai wa mung shi a myit loi mi nyem wa ai rai tim naw shalu nna nga ai..raitim Jau a myit n daw ai hte jahkring hkring hpyi nem ai lam a majaw hpang jahtum e akyu hpyi ga hpe Jau hte rau masum lang shi hkan tsun lai wa ai..dai zawn Ave Maria akyu hpyi ga hpe masum lang ngu na tsun na shaloi shi hta grai myit yawn wa ai hte myit yawn myit malai nna e myi prwi si pru wa ai hte shi gaw kalang lata Wa Jau e ngai mara raw la mayu ai nga nna hpyi shawn ai..mara ni hpe atsawm sha raw la ngut hpang si dam hpe hkam la lai wa ai..
ndai mabyin lam gaw Jau a ngang kang ai kam sham lam hte mara lu ai wa a hpang jahtum na ten hta myi yawn myit malai ai lam lu ai a majaw mara raw dat ya ai hpe hkam la lu dat ai gaw Chyoi pra ai ni Maria a garum hpyi htinglu ya ai lam a marang e mung rai nga ai..

Akyu hpyi saga oh hpan madu karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.
Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw du sa ladaw ladaw hta. ....laban 4 ngu na lanban rai nga ai hti ang ai ja chyum mungga ni gaw chyum mungga daw langai ..Lahkawng ngu..Samuela a laika 7 :1 - 5.8 - 11, 16.chyum mungga daw lahkawng Roma hpung masha ni hpang de san paulu shagun dat ai laika 16:25-27 kabu gara shiga Luka 1:26- 38
Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law