Kabu Gara Let Myit Mada Ai Lam

Hkristu hta tsaw ra ai nu wa hpu nau ni e, ndai laban gaw (B) shaning na du sa ladaw (4) ngu na laban rai nga ai.

Du Sa Ladaw kade nna yang htum sana rai nna, Hkristmas Ladaw bai du wa sana na re. Anhte ni ala nga ai Hkyela Madu gaw chyinghka shawng kaw du taw sai. Nawku Hpung gaw “du sa na Yesu Madu hpe hkap tau hkalum nawku na matu sa marit” ngu kahtap kahtap nna saw saga nga ai.

Shinggyim masha gaw mara a majaw shi hte hka mat ai rai nna, Karai Kasang bai shaga la na hkye hkrang la na masin hpe ndau da ai. Adam hte Eve yan gaw Madu Karai hpe n madat mara ai shaloi nat sadan hpe ma dam jaw lai wa ai. Ningpawt Ninghpang 3: 14-15 hta, “Nang hte shinggyim numsha a lapran hta mung, na a amyu matu hte shi a amyu matu hpe mung nju n dawng shangun nna galoi mung gumlau hpyen atai shangun nga na nngai.  Shi a amyu matu gaw na a baw hpe abrep nna nang mung shanhte a lahtin hpe achye na ra ai,” ngu nna tsun wu ai.

Karai Kasang tsun ai hta “Hkye La Madu” langai lani myi na aten hta mara a majaw hten run mat sai lam hpe bai gram shatsawm ya na ra ai. Dai ga sadi hpe jahpring shatsup na matu shaning hkying kaba hpe lai di ra na rai tim, Karai Kasang gaw dai lam byin tai wa na hpe ra sharawng nga ai. Shinggyim masha ni gaw Hkye La Madu hpe hkap la lu hkra shawng shajing shachyip da ra ai.

San Mahte hte San Luka yan a kabu gara shiga hta Yesu Madu a ahtik labau hpe galu ai hku mying hte hkrak sawk sagawn da ma ai (Mt 1: 1-17; Lk 3: 23-28). Raitim, shan lahkawng hta mung n shai hkak ai lam ni nga nga ai.

San Mahte gaw Abraham kaw na David, dai hpang Joseph du hkra sawk sagawn da ai. “Yaku gaw Mesiah ngu ai Yesu a kanu hpe hkungran la ai Joseph hpe shaprat wu ai,” (Mt 1: 16).

San Luka gaw Yesu kaw na hpang nna David, dai hpang Abraham, ngut jang Adam kaw du hkra sawk sagawn da ai.

San Mahte gaw Yesu hpe Israel myusha ni hte matut manoi nga ai hpe shadan shadawng mayu ai rai nna, San Luka gaw Yesu Madu hpe anhte shinggyim masha ni zawn sha Adam kaw nna yu hkrat wa ai lam hpe madun dan mayu ai rai nga ai.

Karai Kasang gaw David hpe Yesu Madu a myusha ni hta ahkyak ai wa hku lata san da ai wa rai nga ai.

David gaw Yesu Madu ndu sa shi yang shaning hkying mi daram jau nna nga lai wa ai. Sawlu si ai hpang David gaw shawng daw hta Israel myu hpan lahkawng a hkawhkam sha tai wa ai raitim, hpang daw de ngam nga ai Israel myu hpang 10 a hkawhkam mung tai wa ai. Jerusalem hpe awng dang la ai rai nna, shi hkum nan nga na hkawseng shara hku lata la ai (2Hkawhkam 2:1-4; 5: 5-10).

Israel myusha ni Karai Kasang kaw na manu dan dik ai ga shaka sumpu hpe madu da lu ma ai. Dai ga shaka sumpu gaw hpai hkawm loi ai rai nna, Yaweh Karai Kasang nga nga ai hte shanhte ni ga sadi hkam ai a kumla masat rai nga ai.

David hkawhkam gaw makam masham ngang, tara shadik ai wa rai nna, ga shaka sumpu hpe Jerusalem de lawan dik ai hku htawt tawn da nna nawku daw jau lu na matu laklai ai nawku htingnu kaba langai hpe gaw gap na yaw sin wa ai.

Ndai laban na chyum daw langai gaw David a yaw sin ai lam anhte hpe hkrak sha tsun dan nga ai. Shi hta Yaweh a malai hpaji jaw ai Myihtoi Nathan nga ai. Shawng daw hta Nathan gaw David hpe nawku htingnu gaw gap na matu n gun jaw ai. Raitim, Karai Kasang a shadum ga hte maren David a kasha Solomon gaw gap na re ai lam tsun dan ai.

David hta Karai Kasang jaw da ai laklai ga sadi

David gaw Karai Kasang a matu htingnu langai gaw gap ya mayu ai. De a malai Karai Kasang gaw David hpe nta langai gaw gap ya ai. Dai gaw galoi mung grin nga ai kun dinghku langai rai nga ai.

David a kasha Solomon gaw David yaw sin da ai Nawku Htingnu hpe gaw gap na ra ai. David a kun dinghku kaw na Kasha langai mung shaprat wa na ra ai. Shi a mungdan gaw galoi mung hkrat sum ngu nnga na ra ai.

David hpe bau kaba makawp maga ai gaw Karai Kasang rai nga ai. David hpe sagu rem prat kaw nna hkawhkam shatai ya ai mung Karai Kasang rai nga ai. Bying wa ai lam yawng gaw ga sadi tawn da ai Messaiah Madu hta hkum tsup wa na ra ai.

Solomon gaw kawa David kaw nna hkawhkam aya hpe hkam la lu ai hpang laklai mau hpa htingnu hpe gaw gap ai rai nga ai. Shaning 40 ning jan up hkang lai wa ai rai nna, Israel myusha ni a labau hta laklai dik htum aten rai nga ai.

Raitim, Solomon hkawhkam si mat ai hpang shi a aru arat myu hpan lahkawng sha ga sadi dung ma ai rai nna, kaga aru arat myu hpan ni gaw hkawhkam kaga ni kaw shingbyi mat ma ai hte laksan mungdan ningnan gawde ma ai.

Sawng dik ai gaw, David si ai hpang shaning 400 lapran dai mungdan lahkawng yan hten run mat ai. Shawng nnan hte run mat ai gaw Israel myu lakung 10 ni a mungdan, dingdung Israel mungdan rai nga ai. Yuda masha ni gaw mayan tai ra mat ma ai. Hpang daw de mayam prat kaw na tinang mungdan de bai nhtang wa lu ma ai raitim, shanhte a mungdan hta shang lawt lu ai ahkaw ahkang n lu ma ai. Maigan mungdan kaw na up hkang ai hpe matut matut hkam sha ra ma ai. Dai zawn re ai yawn hkyen lam ni hpe Yuda myusha ni hkrum sha nga ra ma ai.

Karai Kasang David hpe jaw da ai ga sadi hpe Yuda myusha ni nhtang da ai masa lam hku jahkum shatsup ya lai wa ai.

Shawng ningnan Adam yan Eve hpe ndai lam tsun da sai rai nga ai. Hpang daw hta Abraham, Moses hte Myihtoi ni hku Israel myusha ni hpe sadi jaw shadum lai wa ai.

Karai Kasang gaw ga sadi dung ai rai nna, Nazereth na Maria hpe lata la ai hte shi hta na-um na-sin nna Messiah hpe shaprat ya ai. Maria gaw shagrit shanem ai wa rai nna, makam masham ngang ai wa rai nga ai.

Lk 1: 28 hta, “Lamu kasa gaw maria kaw du jang, chyeju hte hpring nga ndai; nang hte karai wa nga ai; shaman chyeju kaba nang hpe jaw nit dai,” ngu wu ai.

Maria gaw mare masha langai mi; yu maya masha langai mi sha re ai majaw dai ga na jang mau mat ai. Madu Lamu kasa gaw Maria hpe n mau na matu; n hkrit na matu n gun jaw ai. David hpe Karai Kasang jaw da ai ga sadi a lam hpe Madu lamu kasa madi nna tsun ai rai nga ai.

Lk 1:31-33 hta, “Yu u, nang na-um nasin rai wa nna shadang sha shangai na rin dai; shi a mying hpe Yesu ngu nna shamying ya na ru ai. Dai wa gaw galu kaba wa na ra ai rai nna, Tsaw Htum ai wa a kasha ngu, shi hkam la na ru ai; Madu Karai Kasang mung, shi kawa David a tingnyang shi hpe jaw na wu ai. Shi gaw Yaku a aru arat ni a ntsa e htani htana a up nga na ra ai; shi a mungdan mung htum ngu ai nga na n rai,” ngu nna shi hpe tsun wu ai.

Maria gaw Karai Kasang a myit ra ai lam hpe chye mayu ai myit grai kaba ai.

Ga sadi gaw laklai mau hpa nan rai nga ai. Yuda myusha langai a matu dai hta grau ai kabu pyaw ai shiga kaga nnga sai. Maria mung kabu pyaw na re. Raitim, dai shiga ndau ai hta Karai kasang kaw na teng man ai lam hpe hkrak chye la na matu Maria shakut lai wa ai. Lk 1: 34 hta, “Shaloi Maria gaw, Dai gaw kaning rai byin na rai ta? Ngai hkawn jet sha naw rai nngai,” ngu nna lamu kasa hpe tsun wu ai.

Maria a shagrit shanem ai, madat mara ai, sum nung shingdi ai, zen ja ai a marang e Karai Kasang gaw shi a yaw sin ai lam shi hpe kum hpa hku asan brang tsun dan ai.

Maria a myit um ang ai lam ni hpe Madu lamu kasa tsawm htap ai ga si ga ngau ni hte sanglang chye na shangun ai.

Lk 1: 35 hta, “Dai lamu kasa gaw, Chyoi Pra ai Wenyi na a ntsa e du nna, Karai Kasang a atsam nang hpe shingnip ka-up na ra ai; dai re ai majaw, shangai wa na ra ai wa hpe Karai Kasang a Kasha ngu nna shamying ai hkam la na ra ai,” ngu shanglang da ai.

Madu lamu kasa tsun ai ga hta Karai Kasang gaw Maria hpe madu da ai lachyum rawng nga ai. Messiah gaw Maria a hkritung hta masha hkum shan sai hpe la na matu shata 9 rawng nga ai. Maria mung Karai Kasang a ga shaka sumpu ningnan tai wa ai rai nna, shinggyim masha ni hta rawng nga na shara ningnan rai nga ai.

Maria gaw Karai Kasang a myit ra ai lam hpe myit masin hkum hkrang yawng hte hkap la ai wa re. Karai Kasang a yaw sin ai lam hpe chye ai hpang Maria gaw Madu lamu kasa a ga hpe myit dik myit pyaw ai hte hkap la ai. Lk 1: 38 hta, “shaloi Maria gaw, Yu u, Madu a mayam jang ngai rai nga nngai; Na a ga hte maren ngai hta byin wa u ga,” ngu wu ai.

San Luka “shangun ma” ngu ai ga si a malai “mayam ngu jai lang da ai. Dai aten hta mayam ni hta ahkaw ahkang hpa nan nnga ma ai rai nna, madu ra sharawng ai hte maren, aten shagu, shara n lata, galaw daw ra ma ai. Maria mung Karai kasang a myit ra ai lam hpe aten hte shara n lata ai sha jing jing rai nga ai lam hpe shadan shadawng ai rai nga ai.

Karai a Kasha shingtai shinggyim hkum shan sa la ai gaw mungsung lam rai nna, kadai mung hkum tsup hkra chye na na n re ai.

Kawa Karai Kasang gaw anhte hpe hkye hkrang la na matu shi a Kasha shingtai hpe mungkan ga de shangun dat ai.

Yesu Madu gaw shinggyim hkum shan sai sa la nna anhte a shinggyim kun dinghku masha sa tai ai. Adam a kasha alat mung rai nga ai. Karai Kasang a Kasha majing mung rai nga ai.

Maria gaw Karai Kasang a masin hpe sharawng awng ai hte hkap la hkan shatup ai majaw Hkyela Madu a Kanu tai wa ai.

Chyum mungga daw lahkawng hta San Pawlu anhte hpe tsun ai gaw, ndai mabyin yawng gaw kam yak na zawn rai nna ndum shami Karai Kasang anhte hpe tsun dan ai lam rai nga ai. Dai gaw anhte ni hkum tsup hkra chye na n lu ai  Karai Kasang a dam lada dik ai tsaw ra myit a mau hpa nan rai nga ai.

AKYU HPYI SAGA

Wa Karai Kasang e, shangai wa na hkye la madu Messaiah hpe Kanu Nu Maria zawn makam masham hta ngang kang nna, shagrit shanem, madat mara myit kaba hte hkap tau hkap hkalum nawku daw jau chyeju hkam la lu na matu garum ya rit. Anhte a Madu Hkristu a marang e hpyi nem nga ga ai. Amen.

Hkristu hta tsaw ra ai hkung ga ai Tara hkaw sara/num ni hte nu wa hpu nau ni e, ndai laban gaw (B) shaning na du sa ladaw(4) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) 2 Samuela 7: 1-5, 8-12, 14, 16

Chyum Mungga Daw (2) Roma 16: 25 -27

Kabu Gara Shiga Luka 1: 26 -38

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.