Du Sa Ladaw Laban 2, Year B, 2023

Adventu lahkawng year B

Hkristu hta tsawra hkungga ai nu wa hpu nau nawku hpung masha ni ndai laban gaw Du Sa ladaw hta 2 ngu na laban rai nga ai.

Ngai hta n-gun grau rawng ai wa gaw nye a hpang du na ra ai..shi a hkyep din sumri hpe ngai gum raw na pyi ging nga nngai nrai...ngai gaw nanhte hpe hka hte baptisma jaw masade ai raitim dai wa gaw chyoi pra ai wenyi hta baptisma jaw na marin dai...Mk 1:7-8

mungga hpe lakap nna garai n karan gachyan shi yang hpung sara langai mi a mabyin lam hpe shawng tsun dan mayu ai.lani mi na aten hta shi gaw grai hkrit tsang ra ai nam hkrun lam galu hpe hkawm sa lai wa ai .. dai nam lam hpe shi lai di hkawm sa wa yang myit mada shara n nga na zawn re masha langai mi lam makau e machyi kaba hkrum nna galeng taw nga ai hpe shi mu hkrup ai.shaloi shi hpe yu matsan dum lama wa ai a majaw dai machyi kaba hkrum taw nga ai wa hpe shi hkum nan gawn lajang ya lai wa ai.dai sha n ga ai.shi a malu masha hpe mung garan jaw let tsi ni jaw sha ai hte dai machyi ai hpe atsawm sha gawn nna dai lam makau hta e lana mi shi hte rau nga ya lai wa ai..hpang jahpawt dai machyi ai masha wa gaw tsa mai wa shaloi sara wa hpe tsun ai..gaw nang ngai kadai re ai hte mying kaning ngu ai gara kaw na re ai hpa baw amyu masha re ai nang langai mung nchye tim ngai hpe tsi tsi gawn lajang rai nna na a lu sha ni hpe garan jaw ai tsi tsi ya ai bai ngai hte arau nga ya ai..ya na zawn nang nye a matu galaw ya lu ai gaw kaning re ai lam ni a majaw rai kun? ngai hpe tsun dan rit..ngu nna san dat ai.. shaloi dai hpung sara wa bai htan tsun ai gaw ngai hpe hpan ai madu ngai hpe galoi mung tsun shadum ya nga ai..gaw kaji htum ai na a htingbu wa hpe gawn lajang ai gaw shi hpe gawn lajang ai re..nga nna ngai hpe galoi mung shadum nga ai.. daini nang mung hkristu hta nye a kahpu kanau wa rai nga ndai..nang hpe ngai gawn lajang lam mahkra gaw nye madu a ra sharawng ai lam hpe galaw nga ai rai nga ai..machyi ai masha wa mung rai taw sara e na a Karai Kasang gaw kadai ta? na a karai kasang gaw jasam masha a matu dai daram garum shingtau ai lam hpe galaw shangun ai nga yang ngai mung dai zawn Karai Kasang hpe ra kadawn nga nngai..na Karai Kasang ngai hpe mung jaw rit...ngu tsun nna lai wa ai...sara wa mung dai masha wa a prat hpe Karai Kasang hta mu mada wa hkra madun hting let ya lai wa ai..

ndai bat na jachyum.mungga hta yawhan baptister gaw tau hkrau hkaw tsun shana ai wa rai nga ai lam hpe myi htoi Esaia 40: 3 hta marai langai mi a jahtau ai nsen gaw nam mali e Karai Kasang a lam lajang da mu ..nanhte a karai kasang a matu nmaw lam shading mu ngu nna tsun da ai hpe mu lu nga ai..kaja wa yawhan baptister gaw du sa wa na hkye la madu a matu lam hpe hkyen lajang ai wa rai nga ai..dai zawn hkyen lajang galaw ai hta shi a prat hpe tara shadik ai hte nga sa ai lam hku na mung madun dan lai..wa ai. bai Karai Kasang a lam hpe hkaw tsun sakse hkam ai...hte tengman man ai lam a matu asak mung si hkam lai wa sai...rai nga ai..

yawhan baptister gaw yawdan hkan makau hta sumsing mungdan lam hte hkye la madu du sa wa na lam hpe tara hkaw nna kashin kamun ni hpe jaw ya let nga taw ai ten masha wunawng gaw shi hpang de sa nna shi a lak lai ai hku nga sa taw nga ai hpe mu nna grai nan mau nga ma ai re..hpa majaw nga yang yawhan gaw sumsing kasa ni zawn sari shadang ni hte atsawm sha sak hkrung nga sa taw ai majaw rai nga ai.

ndai laban hta anhte hku nna yawhan baptister a dingman nga ai lam hpe rau sha jawm myit sumru yu nga ga..
langai hta yawha baptister gaw shi a magam bungli hpe atsawm sha hkyen lajang nna gun hpai ai lam rai nga ai.
dai ma mung kaba wa nna wenyi atsam hta ja wa let Israela amyu masha ni kaw dan pru ai nhtoi du hkra nam mali hkan nga nga ai...lk1:80 hta yawhan baptister a kaji ten lam hpe mu lu nga ai..shi dai nam mali shara hta tara shadik ai hte akyu hpyi ai..lu sha gam ai ndai amu magam lam ni hte tinang gun hpai ra ai shawng lam hkaw tsun magam bungli hpe kang ka ai hte galaw gun hpai na matu shi hkum shi hkyen lajang lai wa ai mung rai nga ai..

yawhan zawn anhte mung Karai Kasang a myit sharawng awng ai lam hpe hkan nang nna tinang masat da hkrum sai shara hta gun hpai ra ai lit magam ni hpe kang ka ai hte gun hpai lu na matu akyu hpyi ra ai ..sadi maja let hkawm sa ra ai..mai kaja ai kyang lailen ni hte tinang hkum hpe tinang hkyen lajang ra ai..grau nna gaw kaba ai shara hta lit la woi awn nga sai ni hte karai magam hpe gun hpai nga sai ni gaw hkungga lara ai lam myit galu hkam sharang ai ..sharin achyin ya ai...ndai zawn myit masa ni hte myit lawm hkum lawm rai tinang hkum tinang hkyen lajang ra ai..

lahkawng hta gaw yawhan gaw myit marai hte hpying nga ai lam rai nga ai..yawhan gaw atsam marai hte hpying ai hku na sim sa ai shara de sa nna Karai Kasang a sharawng awng ai hte maren bungli ni hpe galaw hpai lai wa ai. dai ten kaw na yawdan ma yang na buga gaw yawhan a hkaw tsun ai lam ni hpe shanhte a na hta pra pra naw na nga ma ai...
yawhan gaw hkye la madu a matu shawng dat dat hkrum ai myi htoi kaba mung rai nga ai..bai nna madu du sa wa na lam hpe hkaw tsun na matu dat dat hkrum ai kasa kaba mung rai nga ai..hparashe ni hpe lagawn ai hte yup pyaw nga ai kaw na sharawt nna myit malai ai hte tinang hte seng ai magam lit ni hpe atsawm gun hpai na matu shadut shadum ya ai nsen mung rai nga ai..

yawhan gaw myi htoi Elia zawn matsan mayan rai nga nna tengman ai tara lam hpe hkan namg na matu myit da ting ai masha langai mung rai nga ai..mara shut nna nga taw ai du gyi salang ni mi rai rai hkrit tsang ai lam n nga ai hte sha gwi gwi tsun shadum sharin ya ai wa mung rai nga ai..hpareshe ni kang hta ai ni hte hpyen la ni hpe mung madu a kabu gara shiga hpe gwi gwi nhkrit ai hte sha hkaw tsun lai wa ai wa mung rai nga ai..

masum ngu na hta gaw yawhan a shagrit shanem ai lam rai nga ai..
yawhan gaw shi hkum nan shawa a man e yin la ai lam gaw..ngai gaw nanhte ala dingda nga ai hkristu ngu ai wa n rai nngai..shi gaw nye a hpang e du sa wa na ra ai..shi a hkyep din sumri hpe gum dagup nna raw ya na pi ngai hta n ging nngai..ngai gaw nanhte hpe hka hte kashin kamun sha jaw nngai ..shi gaw nanhte hpe chyoi pra ai wenyi hte kashin kamun jaw na ra ai..ngai myi htoi Ezekela hkaw da ai hte maren Karai Kasang a lam hpe shading na nga mu ngu nna nam mali e marawn jahtau ai nsen sha rai nga nngai...nga nna tsun ai hpe mu lu ai..

ndai mungga hku nna yawhan shagrit shanem ai hpe mu lu nga ai..gara hku na ta nga yang shi a bungli manu dan mai kaja ai lam hpe myit tsaw shakawng ai lam n galaw ai..shi hkum nan mying kaba dan hkung na lam hpe makoi magap let tinang hkum tinang hpa n re ai ai madu a dat dat shangun ma re lam hpe sha tsun lai wa ai..
yawhan shi tsun ai hta ngai gaw ndai mungkan ga hta du sa wa na rai nga ai Hkye La Madu Yesu htan shawng shangai nna shi hta ngai asak kaba ai..shi gaw Karai Kasang rai nga ai hte maren masha hkum hkrang hpe dagraw la ai rai tim hpung shing kang arawng sadang nga ai lam ni hpe mahta nna ngai hta shingdaw n lu hkra tsaw dik nga ai wa rai nga ai. ngai hpe shi hte shing daw tsun yang ngai kade daram grit nem ai madang rai nga ai hte kade daram jahpoi hpa rai nga na..kaja wa dai du sa wa na wa a hkyep din sumri pi ngai gum raw ya na n ging nngai.hpe nanhte nchye nga myit dai..nga nna tsun lai wa ai..yawhan baptister ya na zawn shagrit shanem ai.. tsawra hkungga ai..hkye la MadunYesu hpe masha ni law law chye wa hkra sharawng awng ai myit hte shakut lai ai wa rai nga ai...ndai mungkan ga de yawhan a shiga ngu na grai kaba myit mada na lam hpe jaw ai..dai gaw shagrit shanem lam hpe gaw gap let Madu Yesu hpe hkap pang hkalum la lu na matu anhte a hkum hpe hkyen lajang ai lam rai nga ai..anhte mung yawhan a kasi hpe la let shakut hkawm sa nga ga...
Akyu hpyi saga oh hpan madu karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.

Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw du sa ladaw hta. ....lahkawng....... ngu na lanban rai nga ai hti ang ai ja chyum mungga ni gaw chyum mungga daw langai ....Esaia laika 40 : 1-5, 9 - 11 chyum mungga daw lahkawng lahkawng ngu na petru a laika 3 : 8 - 14 kabu gara shiga Maku 1 : 1 - 8
Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law