Chyoi Pra Ai Wenyi Yu Hkrat Wa Ai Poi, A, 2023

Chyoi Pra ai Wenyi yu hkrat wa ai poi, A, 2023

 Hkristu hta tsawra ai, Nu Wa Hpu Nau ni e, ndai laban gaw (Pentecost) “Chyoi Pra ai Wenyi yu hkrat wa ai poi” rai nga ai.

Nawku hpung labau hta Paska poi hte Chyoi Pra ai Wenyi yu hkrat wa ai poi hpe jau dik, aten kaw na nan galaw hpang wa ai poi lahkawng rai nga ai. Ndai poi lahkawng hpe ni htep ai hku galaw ai rai nna, ndai laban na Chyoi Pra ai Wenyi yu hkrat wa ai poi gaw nawku dau jau shaning na paska ladaw jahtum ai laban mung rai nga ai. Ndai poi galaw ai a marang e hkam la lu ai akyu chyeju kaba ni hpe chye da ra ga ai. “Pentecost” ngu ai gaw Greek ga rai nna, (50) lang na ngu ai lachyum pru ai lam chye lu ai. Yuda masha ni a matu Paska poi ngut ai hpang nhtoi (50) ya ngu lachym nga ai re. Anhte Hkristan ni a matu bai hkrungrawt ai hpang nhtoi (50) ya ngu lachyum pru nga ai.

Yuda masha ni Karai Kasang a hkang da tara hte maren ahkyak dik ai poi kaba (3) hpe shaning shagu galaw ma ai. (1) March shata kaw na April shata lapran hta Shalai wa ai poi (2) May shata kaw na June shata lapran hta (Pentecost) Chyoi Pra ai Wenyi yu hkrat wa ai poi (3) September shata kaw na October shata lapran hta N-si naisi chyeju dum poi ni rai nga ai. Pru Mat ai Laika 23:14-17 kaw hti yu yang mu lu ai. Ndai poi kaba (3) hpe hkrun lam hkawm poi ngu na mung shamying ma ai. Hpa majaw nga yang, asak ram ai la sha ni gaw Yerusalem hte n’tsan ai nawku htingnu ni kaw nawku daw jau ai lamang ni hta sa lawm ra ma ai majaw re da. Akyu rawng dik ai poi gaw Paska poi raitim, (Pentecost) Chyoi Pra ai Wenyi yu hkrat wa ai poi shani gaw daini na la ai chyum mungga hta na zawn nawku daw jau poi sa lawm ai masha grai law ma ai.

Yuda masha gaw Hparaw hkawhkam a mayam prat kaw na, Karai Kasng a hpung dagu hte, shanglawt lu ai hpe myit dum ai poi, Shalai wa ai poi hpe Ga Shaka dingsa prat kaw na nan galaw hpang wa ma ai. Karai Kasang gaw Paska aten hta Kasha Yesu asak apnawng nna, bai hkrungrawt na hpe mung Ga Shaka dingsa prat kaw na nan tau nau hkyen da sai rai nga ai.

Shalai wa ai poi galaw ai lam gaw Yesu Madu, Shi a nni nkri yubak hkam la nna si hkam ai a marang e, shinggyim masha ni hpe nat sadan a mayam prat kaw na shalawt dat ai kumla masat dingsat hku Karai Kasang lajang da ya ai rai nga ai.

Karai Kasang gaw Chyoi Pra ai Wenyi hpe kasa ni a matu shangun dat nna, nawku hpung hpe asak jahkrung ya sai. Dai majaw Pentecost poi hpe “nawku hpung shangai nhtoi” ngu mung shamying ma ai. Karai Kasang Shi a Wenyi hpe Kasa ni kaw shangun dat ya na matu kaja dik htuk ai nhtoi kaga nnga sai. Pentecost poi shani Karai kasang hte Israela masha ni zaibru jang kaw ga shaka tawn ta masat htu da ma ai. Karai Kasang gaw Hkristu e shi a asai hte shagring da sai ga shaka ningnan hpe bai gaw de da ai. Dai ga shaka hpe nan, Wenyi gaw kashing kamun chyeju kumla hku Hkristan masha shagu a masin salum hta shagring da ya nga ai. Pentecost poi gaw Karai Kasang Sinal bum ntsa hta tara kanu lam (10) hpe jaw da ai hpe Yuda masha ni myit dum galaw ai poi mung rai nga ai. Dai hpe “Karai Kasang a Tara Kanu lam shi” ngu hkungga lara di shamying ai re. Karai Kasang gaw Pentecost poi nhtoi hpe lata sha-ang nna, Yesu Madu gaw-de ai “Tsawra myit tara nnan” hpe ndau da nga ai. Dai tara gaw “Shada da tsaw ra nga mu. ngu nna Tara ningnan ngai nanhte hpe jaw made ai. Ngai nanhte hpe tsaw ra made ai zawn, nanhte mung shada da tsaw ra nga lu na rai myit dai.,” ngu ai rai nga ai.(Yawhan 13:34)

Karai Kasang a Tara Kanu lam (10) gaw Karai Kasang shi hkum nan, lungpa ntsa ka da ai re. Ya Tara ningnan hpe marai hkum shagu a masin salum hta Wenyi e ka bang da ai re ngu Myithtoi Ezakiel laika 36:27 hta myithtoi da nga ai. Hpang jahtum hta Yuda myusha ni gaw n-si naisi shu la dan la nna chyeju dum poi hpe Pentecost poi nhtoi hta galaw ma ai. Dai shani San Petru hkaw tsun da ai ga hte maren Karai Kasang gaw nawku hpung hta wenyi n-si naisi law law hpe dan la shu la ai. Dai zawn sha nawku hpung hta htum ngu nnga ai prat shagu hta dan la shu la nga na re. Masha hpe hkye la na Karai Kasang a ningmu hpe anhte gaw mau kabu let shakawn shagrau nga ga ai re. Dai hpe grau chye na lu matu mung anhte ni hpe garum shingtau ya u ga shakawn kungdawn nga ra ga ai.

Yesu Madu gaw si ai kaw na bai hkrung rawt ai hpang, shawng ningnan kasa ni hte hkrum ai shaloi, Wenyi hpe kasa ni kaw ga-wut bang ya ai. Lusu wa shawang myit hte jaw ya mayu nna, tinang a sutgan hpe garan kachyan ya mayu ai zawn, Yesu  Shi a Wenyi kasa ni hpe jaw ya ai hta minute  mi second mi pyi n’hpang hkrat ai. Bai kasa ni hte masha yawng a matu shi a asai hte nawng jau ya ai gaw shi jaw ya ai chyeju sutgan rai nga ai. Kasa ni dai chyeju yawng hpe hkap la lu ma ai. Dai Kumhpa ni gaw (1) Mara dat hkyam sa ai lam. (2) Mara dat hkyam sa ai hte rau simsa lam (3) simsa lam kaw na ngwi pyaw ai lam ni rai nga ai.

San Luka a kabu gara shiga laika hpe hti yu yang Pentecost shani Karai Kasang a ga nseng hpe wan shinglet hte shadan dan ai rai nga ai. Kasa ni mung wenyi a akyu jaw ai lam hpe hkam sha lu ma ai. Hpaji n chye ai San Petru a hkaw tsun mungga gaw, Karai hpaji ninghkring kaba zawn, tengman dinghpring ai rai nga ai. Kasa ni gaw Hkristu a bai hkrungrawt ai lam hpe makoi magap da ai lam nnga ai sha, bau dum shana shabra na myit sharawng nga ma ai. Shanhte a, tsun shapraw dan gwi ai, myit marai hpe mau hpa mu lu nga ai. Shanhte, Wenyi hpe n’hkam la shi ai aten ni hta gaw, hkrit tsang nga ma ai.

Yesu Madu bai hkrungrawt ai nhtoi hta kasa ni hpe Wenyi jaw bang ya ai lam gaw kashing kamun hkam ai lam nan rai nga ai. Pentecost poi hta jaw ya ai ngu ai hte shagring da nga ai.

Hkristan masha ni a matu galoi mung Pentecost poi rai ra nga ai.

Kasa laika hta Yesu Madu Shi a Wenyi Kasa ni hpe Pentecost poi shani hte Paska poi shani hta sha jaw ya ai ngu tsun mayu ai n’re. Nawku hpung gaw Pentecost poi hta shangai wa ai ngu hkam la mai ai. Yawhan 15:1-8 hta Hpun Madung rai nga ai Yesu gaw lakung laking ni rai nga ai kasa ni hpe shi a asak hka, lwi shang ya taw nga ai. Dai zawn Wenyi jaw ya ai lam gaw, Kashing Kamun hte N-gun shaja chyeju kumla hkam la ai shaloi sha n ga, Yesu Madu kaw na anhte ni kaw lwi shang ai asak gaw masha a baw kaw na hkum hkrang de asai lwi hkrat wa ai zawn rai nga ai nga nna, San Pawlu tsun da nga ai. Hkristu hte Wenyi gaw Hkristan Nawku Hpung a matu rai nga ai. Wenyi gaw Nawku Hpung hpe asak jaw ai masin salum rai nga ai ngu shingdaw mai nga ai. Anhte ni wenyi a magam hpe shingdaw shadan shalen dan na matu yak ai raitim, (1) Wenyi gaw anhte a mara kashing kau ya ai. (2) Wenyi gaw galoi mung hkrit tsang chye ai anhte ni a masin salum hta simsa lam bai jaw ya ai. (3) Wenyi gaw anhte ni a myit masin salum hta tengman ai ngwi pyaw lam jaw bang ya ai. Mara a jaw e lachyum nnga ai pyaw daw gadaw ai lam hpe jahten sharun kau ya nna, myit yawn myit kaji lam hpe galai bang ya ai. (4) Wenyi gaw Karai Kasang a Mungga, tengman ai nyan hpaji hte, Karai Karang a ra sharawng ai hpe chye na lu hkra nhtoi jaw ya ai. (5)Wenyi gaw tengman ai Hkristan sak hkrung lam hpe sakse hkam lu na n-gun atsam marai jaw bang ya ai. Anhte ni shani shagu hkrum sha nga ai dam ana hkang ni hpe tsi tsi lajang lu hkra Wenyi sha garum ya lu ai.

Wenyi gaw anhte langai hpra a ra gadawn ai hpe masa lam hta hkan nna, galoi mung htap htuk hkra galaw jaw ya ai. Yesu Madu, Shi a Wenyi kasa ni hpe jaw da ai daram anhte hpe mung jaw ya ai ngu tsun mayu ai n rai tim, dai chyeju hpe matut manoi jaw ya nga ai re. Yesu Madu sharawng awng ai hte jaw ya ai Wenyi hpe ning hkap ai, shing nrai, n hkap la ai gaw, Wenyi a chyeju hpe pat shingdang ai tai nna, myit yawn hpa rai nga ai.

Anhte langai hpra hta Wenyi hpe jaw bang ya ai gaw hkum hkrang ting matu rai nga ai. Tsun mayu ai gaw, Hkristan Nawku Hpung ting a matu rai nga ai. Wenyi gaw manu daw dan nlu ai kumhpa rai nga ai. Raitim, hkap la ai wa hta lit kaba nga nga ai. (a) Wenyi gaw Hkristan Nawku Hpung masha ni hpe galoi mung hkam ja kung hpan shangun ai. Hkraw hkun mat sai hpun lakun lakin, hpun lap ni gaw wan nat kau na matu sha rai nga ai, (Yawhan 15:6). Dai zawn sha, hkum hkrang hkam ja sak galu na matu asak nrawng ai hkum adaw achyan ni hpe la kau ra nga ai. Wenyi hte n htan shai ai mara shagu kade mi makoi magap da ai rai tim, Nawku Hpung a matu dingbai dingna nga nga ai. Anhte a Hkristan sak prat hpe manu shadan ai lam n nga jang Wenyi hte Nawku Hpung hpe hkra machyi shangun wa ai re. (b) Anhte ni hkap la lu ai kumhpa ni, kaga masha ni hpe, gam garan kachyan na matu Wenyi ra  sharawng nga ai.

Dai ni na prat hta hkan nna, anhte ni matsan masha ni hpe garum ya na Wenyi ra sharawng nga ai rai tim, anhte ni a matu aten shagu n mai bing taw nga ai. Anhte a makau grup yin hta matsan mayan ni garum ningtum galoi mung ra kadawn nga ma ai hpe mu chye lu ai lam gaw Wenyi shanu nga ai kumla rai nga ai. Wenyi chyeju garan kachyan ai hta jarit masat n mai nga ai. Anhte Hkristan Nawku Hpung gaw makam masham lam, nawku daw jau akyu hpyi lam, dum hprang ai lam, hpaji jaw lam, n-gun jaw madi shadaw lam, simsa lam, ngwi pyaw lam ni hpe garan kachyan ra ga ai. Gara tingkyen myit jasat hte rai tim, hpu nau ni hpe pat shing dang ai lam n mai galaw ai. Tengman ai Hkristan masha gaw Nawku Hpung matu aten shagu tinang hkum hpe shangun ma zawn daw jau ai wa ngu mu la hkam la chye ra ai. N’kam n’sham ai ni hte Kahtawlik Hpung masha nre ai ni hpe mung garan kachyan daw jau ai lam nga ra ai.

Pentecost shani San Petru Hkristu a lam tsun shapraw ai shaloi jang Wenyi hpe hkam la lu ai. Hkristu hta kam sham ai makam gaw manu dan dik ai sut gan kaba langai rai nga ai. Raitim, mungkan ga na sut gan hte n bung ai. Mungkan ga na sut gan gaw gam garan magan yawm htum wa magang; Makam masham sut gan gaw gam garan kachyan magam law jat wa magang rai nga ai.

Hkristan masha shagu gaw Nawku Hpung masha law htam wa na matu hte Nawku Hpung galu kaba wa na matu sasana magam hta shang lawm garum na lit nga ai.

Tsi Du ni machyi masha nkau ni a hkum hkrang adaw achyan ni a akyu pyu akyu rawng ai lachyum hpe hkrak tup n chye na shi ma ai da. Hkum hta na adaw achyan langai ngai gaw ntsa lam hta ahkyak ai lam n’nga ai ngu tim, akyu n’rawng ai ngu nmai tsun nga ai. Anhte lawm taw ai Hkristu a Hkum gaw dai zawn sha rai nga ai. Kadai raitim, tinang hkum hpe akyu n rawng ai, shing nrai, sari manu n nga ai ngu n mai myit la ai. Nawku hpung gaw mara lu ai ni hpawng de ai Chyoi Pra ai Nawku Hpung rai nga ai hpe dum hprang ra ga ai. Mara lu ai wa mara hta manoi nga yang ngarai mung hkrat na sha rai nga ai. Raitim, Hkristu a sak jaw ap nawng ai a marang e, Karai Kasang a ting yang shawng hta hkye la lam hkam la lu nna, sari sadang nga na rai nga ai. 1Petru 1:18 hta San Petru gaw hpaga yun ga ni manu n nga ai arai hpe manu law law jaw nna n mari ma ai. Anhte ni gaw asai hte mari ra ai majaw Hkristu hta sari manu nga nga ai ngu tsun da nga ai.

Anhte gaw Wenyi hpe hkap la saga ai majaw Hkristan Nawku hpung hpe madi shadaw garum na lit nga ga ai. Karai Kasang gaw anhte ni a akyu rawng ai n rawng ai hpe shinggyim masha ni masat ai kasi madang (joi shadang) hte n yu ai sha, anhte ni a wenyi sak prat kung hpan lam hta hkan nna she hkap la na rai nga ai. Hkristan sak prat hta lata la na lam kaga n nga ai. Ahkyak ai sumru lam gaw anhte ni shani shagu Wenyi a chyeju kumhpa matu Hkristu hpe shakawn ra ga ai. Bai anhte ni hta Wenyi sak hkrung nga lu u ga anhte hkum hpe hting hkang la ra nga ga ai.

Akyu hpyi saga:

Wa Karai Kasang e, Kasa ni a ntsa yu hkrat wa ai Wenyi anhte ni hta mung up hkang lam woi ningshawng nga u ga. Anhte ni Wenyi chyeju hkam la sak hkrung nga lu let makau grup ying hte mungkan masha ni hpe dai Wenyi chyeju gam garan kachyan ya ai a majaw Hkristu a Hkum hta jawm pawng nga lu na matu shaman ya rit. Anhte a Madu Hkristu a marang e hpyi nem nga ga ai. Amen.

Hkristu hta tsawra ai kanu kawa Tarahkaw Sara/num ni hte nu wa hpu nau ni e,

Ndai laban gaw Chyoi Pra ai Wenyi Kasa ni a ntsa yu hkrat wa ai poi laban rai nga ai.

Hti ang ai Ja Chyum Mungga ni gaw

Chyum Mungga Daw (1)  Kasa 2:1-11

Chyum Mungga Daw (2) 1Kor 12:3-7,12-13

Kabu Gara Shiga      Yawhan 20:19-23

Ndai Ja Chyum Mungga ni hpe hti nna hpawtni na nawku daw jau lamang ni hpe woi awn nga ga.