Shingra Tsi Hpun, Tsi Lap ( Tsamaw Hpun )

Ndai tsamaw hpun gaw n gup kata byin chye ai ana ahkya ni hpe madung tsi shamai lu ai shingra tsi mawan kaja tsi hpun re ai lam chye lu ai. Shinglet cancer ana,du hte yu hkraw cancer ana, n gup kata kahtet dat a majaw byin ai shinglet hte n gup,n ten hpye kahpraw machyi ai, wa latung sha ai, wa machyi ai, n gup hpye machyi ai hte manden ana zawn re ai n gup hte seng ai ana ahkya ni hpe tsi shamai hkyamsa shangun lu nga ai.

Tsamaw hpun a lap, ru hte hpyi, pu ni yawng tsi byin ai hkrai rai nga ai. Hpyi hte ru gaw yu hkraw machyi ana hte n gup kata byin ai ana ni a matu jai lang mai ai.Pu hpe gaw kan mase, kan hten machyi ana hte ningma hpye ai shara hta shan lawan bai rawt na matu tsi mawan hku jai lang mai ai.Ru hpe mung  wa machyi ai, lasaw lasa machyi ai, maju lasa n gun yawm ai hte wa htu tsi galaw ai shaloi hpaw gayau lang ai. Bai nna jit dwi ana, jit sa lam hte seng ai ana, salum ana, ma mu ana, lagaw lata katsing si, hpawm kahpram ai ana ni tsi shamai ai shaloi jai lang mai ai.

Jahkru ai, sinda chyat ai,sahti ana, sinwawp ana hte shat kan ana, yu hkraw cancer ana ni byin ai shaloi tsamaw lap hpe hka gawm masum hta na gawm mi sha ngam hkra rai shata lahkawng daram shadu lu yang mai tsai lu ai. Tsamaw lap gaw shadu lu yang hkup hkup nga ai nam chyim rawng ai.

Wa machyi, n gup machyi ana byin ai rai yang tsamaw  lap ta lahkyup mi daram hpe hka hte asan sha kashin nna maya ma um ya ya di u, lani mi masum lang daram galaw ya u mai tsai mat na ra ai. Katsing n kam maya maum ai rai yang gaw hka gawm masum bang nna gawm mi sha ngam hkra shadu lu ya mai ai zawn,tsi shadu n tsin hpe ma um nna n gup garu kashin ya mai ai.

Ningma hpye machyi ai rai yang mung lap shing nrai, hpyi hpe shadu nna kashin ya jang ningma lawan mai ai hte shan n nan lawan rawt mai tsai lu ai.

Yu hkraw machyi ai, ladi pat ai, lasa ahkye gying machyi ai rai yang tsamaw ru a hpyi hpe shadu nna ma-um ya jang mai tsai ai lam chye lu ai.

Tsawra ai shiga madat nu wa hpu nau ni tsamaw hpun gaw anhte a buga ginra shara shagu hkan grai law tu ai shingra tsi hpun rai nga tim hpa a matu gara hku akyu jashawn jai lang na hpe n chye ga ai majaw tsing hpun langai hku sha yu shalai kau nga ga ai. Ma kaji n kau mitsama w si myin ai ten shinglet maw si, n gup maw si nga nna di sha ma ai re. Kaja wa nga yang ndai tsamaw hpun gaw hkamja lam a matu grai nan akyu rawng ai shingra tsi hpun rai nga ai hpe daini anhte madat hka ja la lu saga ai .

 

Lamang tang madun ai - Julia Ja Ing

Add new comment

3 + 7 =