Mungkan Hpe Jahkrit Shama Taw Ai Omicron

Ya aten kalang bai numdaw nna mungkan mungdan law law hte Myanmar mungdan hta mung lani hte lani grau grau chyambra sawng wa nga ai Omicron ana hpe masha shagu tau nau sadi maja let ninghkap kau lu na hpe tsun shadum ya mayu ai.

Covid ginsai hpan galai nna kalang bai numdaw sawng taw nga ai Omicron ana hte seng nna masha shagu tinang hkum nan hte tinang a dum nta masha ni hta n kap hkrum hkra gara hku makawp maga la na ngu ai hpe myit nga na ga ai ngu kam ai. Tau hkrau makawp maga nna sadi sahka nga sa chye ai gaw yawng a matu kaja dik ai lam mung rai nga ai.

Omicron gaw shawng de na covid ana zawn grai machyi sawng ai lam n nga ai nga nna tsun taw ai raitim ya aten lani hte lani Omicron kap hkrum ai masha mungkan mungdan law law hta grau grau sawng jat ding yang rai taw ai lam shiga ni hta mu lu, na lu ai hte maren chye lu nga ga ai.

Dai re majaw tinang hkum nan hte tinang a dum nta masha ni hta Omicron ana n kap hkrum hkra masha shagu mai byin ai made sadi maja let tinang kaw na shawng makawp maga nga sa chye ai gaw omicron ana hpe mungkan ga kaw na lawan ai hku ninghkap shamyik kau ai hta shang lawm ai lam rai nga ai.

Covid ana e jahkrit shama sha hkrum ai aten lahkawng ning jan wa sai re majaw masha law law wa sadi maja makawp maga la lam hta mung grai yawm wa ai hpe mu mada lu ai. Dai hta anhte shiga madat ni n lawm ga, yawng a matu myit shalawm nna sadi maja nga sa let ninghkap shamyik ai hta shang lawm ga ngu nna mung n gun jaw tsun mayu ai.

By - Julia Ja Ing